De Ovend: al 40 jaor et ienige echte Stellingwarver tiedschrift!

Niet alliend de Stichting Stellingwarver Schrieversronte bestaot onderhaand veertig jaor, datzelde gelt ok veur et Stellingwarfs tiedschrift De Ovend. Et twiede nommer van dit jaor zal daoromme verschienen as jubileumnommer en wodt saemensteld deur een speciaole redaktie. Die redaktie bestaot uut Antje van Dijk (raodslid veur de VVD in West-Stellingwarf), Jesper Christensen (raodslid veur de PvdA in Oost-Stellingwarf) en neerlandikus en Schrieversronte-bestuurslid Peter Riksma uut Zandpol (Drenthe). Veur et jubileumnommer is deur veul schrievers kopie anleverd zodat de gaastredaktie een hiele klus het om daor een keuze uut te maeken. Vaaste staot liekewel dat in disse biezundere Ovend foto’s plaetst wodden zullen van twie jonge Stellingwarver fotografen, dat bin Marije Kuiper (van vroeger uut Vinkege) en Ruurd Jelle van der Leij (van vroeger van Hooltpae).
Een abonnement op De Ovend kost mar € 18,00 in et jaor, et blad verschient zes keer. Losse nommers bin te koop bi’j boekhaandel Bruna in Oosterwoolde en boekhaandel Zwikstra in Wolvege.