Webstee-archief


In dit webstee-archief vien ie ooldere tiedings en aander ni'js. Et is goed om in de gaten te holen dat et de hieltied om oold ni'js gaot. Vaeke bin gegevens nog wel zo, mar alderhaande dingen bin ok veroolderd!! Inderdaod, zoks heurt bi'j de aord van een archief.


Eerste exemplaor van 'Warkieslappe' veur wethoolder Sierd de Boer: ni'j boek van Sjoukje Oosterloo

Op vri'jdagmiddag 3 september zal bi'j boekhaandel Bruna in Oosterwoolde et ni'je boek van Sjoukje Oosterloo prissenteerd wodden. Et eerste exemplaor wodt deur de schriefster anbeuden an wethoolder Sierd de Boer van Stellingwarf-Oostaende. De leiding van de feestelike bi'jienkomst, die om twie ure begint, is in hanen van veurzitter Ype Dijkstra van de Stichting Stellingwarver Schrieversronte, de uutgever van et ni'je boek. Et boek kan nao de prissentaosie mitien anschaft wodden, uteraord veurzien van een haandtekening van de schriefster.
In 'Warkieslappe', heur twiede boek, vertelt Sjoukje Oosterloo op humoristische wieze over daegelikse dingen die aenlik iederiene wel overkommen kunnen. Et gaot, krek as in heur eerste boek 'Malle meraokels', vaeks om slim herkenbere gebeurtenissen, die alliend daoromme al veur een protte meensken zo plezierig binnen om te lezen. Now en dan bin d'r liekewel in et boek ok sfeervolle verhaelen mit een serieuzere ondertoon te vienen.

Vertaelen
Sjoukje Oosterloo-Tiesinga woont vandaege-de-dag in Drachten, mar gruuide op bi'j de Drie Tolhekken in Oosterwoolde. Heur baand mit disse regio en et Stellingwarfs is nog altied biezunder hecht. Behalven mit et schrieven van heur eigen verhaelen is Sjoukje Oosterloo ok hiel aktief mit et vertaelen van verhaelen van eren. Veurbeelden daorvan bin o.e. et vertaelen van et jaorlikse Tomke-boekien veur ukken, mar ok et vertaelen van tenielstokken veur verschillende tenielverienings. Ok van ere schrievers die et Stellingwarfs niet machtig binnen, mar die wel graeg in die tael publiceren willen, vertaelt Sjoukje Oosterloo wark. Butendat is zi'j ok op ere fronten iene van die zo belangrieke vri'jwilligers van de Schrieversronte.



Soe sullen die Stellinge...! Oftewel: et symposiumboek 'Stellingwarf' 700 komt d'r an

Daor komt dan et symposiumboek Soe sullen die Stellinge... an, mit de drie prachtige lezings van et Historisch Symposium in Noordwoolde, 18 september veurig jaor. Waor as et ok al weer omme gong? De eerste keer dat Stellingwarf mit die eigen mooie naeme nuumd is, is in een oorkonde van 1309. De Stellingwarvers en Schoterwarvers hadden et bisschoppelike slot in Vollenhove belegerd en ze hadden doe, neffens die oorkonde en volgens de vertaeling uut et Latien, 'buitensporige gruwelijkheden' begaon. De bisschop veroordielde de Stellingwarvers en Schoterwarvers tot de 'karkeban'. Daor zollen ze nog an ontkommen kunnen as ze vot-op-slag voldeden an een tal zwaore veurweerden. Nao 1309 vien ie in de bronnen een beeld van een lang en de hieltied weer de kop opstikkende ruzie. De Stellingwarver en Schoterwarver 'rebellen' voldeden riegelmaotig niet an bisschoppelike eisen en eerder maekde ofspraoken. Waor gong et omme bi'j dit chronische konflikt? Wat weren de bestuurlike verholings tussen 'Stellingwarf', de ere Friese lanen, et Laand van Vollenhove en Drenthe? Wat was de poletieke richting van de Stellingwarvers en waoromme? Wat zegt et in et veurjaor van 2009 ontdekte 'Laandrecht van Stellingwarf'over de pesisie van de Stellingwarvers? Drie deskundigen gongen op dit soorte van vraogen in op et Historisch Symposium 'Stellingwarf'700 van 18 september 2009. De naeme van et ni'je boek, 'Soe sullen die Stellinge...', is neffens een riegel uut et 14e ieuwse laandrecht. De bundel brengt dus de teksten van de lezings, en die bin hier en daor nog licht anpast. De titels en auteurs van de lezings bin: 1) 'Stellingwerf en Schoterland als vrije Friese landsgemeenten en hun strijd met de bisschop van Utrecht', deur perf. dr. J.A. (Hans) Mol, 2) 'Het landrecht van Stellingwerf: een eerste verkenning', deur dr. Oebele Vries, en 'De locale verhoudingen tussen Stellingwerf, het Land van Vollenhove en Steenwijk aan het begin van de veertiende eeuw', door mr. Caspar van Heel.
In et boek is ok de oorspronkelike tekst van et Laandrecht van Stellingwarf opneumen, dus in et oostelik kleurde Middelnederlaans van de in et veurjaor van 2009 ontdekte versie. En ok een uutvoerige liest van interessaante oorkonden die op Stellingwarf betrekking hebben, een foto van de oorkondetekst van 1309 en een vertaeling in et Nederlaans van die tekst. Et boek begint mit een kotte inleiding deur drs. Carel Zuil (symposiumveurzitter) en dr. Henk Bloemhoff (veurbereider van et symposium).
'Soe sullen die Stellinge...' is een uutgifte van de Stichting Stellingwarver Schrieversronte, telt 72 bladzieden en kost 17,50 euro. Ie kun et bestellen op info@stellingwarfs.nl.


Ni'jste Ovend: slim de muuite weerd

De vaaste lezers hebben him al weer even in de huus, mar oonze gaasten op disse webstee nugen we graeg om him te bestellen as ze him nog niet lazzen: et ni'jste nommer van oons tiedschrift De Ovend. Et is weer een pracht om te zien en te lezen. Harmen Houtman dicht over De laeste stuver, Weerzien hiet et verhael van oold-Appelschester W. de Jong in disse Ovend en Jannes Westerhof het een aorig vraoggesprek mit Arend ten Oever, veurzitter van SONT, de Nedersaksische koepelorgenisaosie. Fettje Alten en Johan Veenstra lopen veuruut op de kommende sutelaktie, Jelleke Bouma schrift over wat zi'j now een mooi boek vint, Frank Scheenstra publiceert een fietsverhael, Rob Zethoven vertelt biezundere dingen uut zien herinnerings van him as dokter, Aizo Betten was even weeromme in Ni'jberkoop en miemert over et oolde dörp in een biezunder gedicht. In de rebriek Dit plak dot me wat vertelt Jannes Westerhof over de Stellingwarver Hendrik Betten. Die is slim bekend uut de sportwereld en van de lekaole omroep Odrie. En al zo wat henne in disse Ovend! Et dadde nommer al weer van dit jaor. Losse ofleverings kosten drie euro et stok, et jaorabonnement gelt 16.00 euro.


RUG-onderzuker hoolt lezing over et Stellingwarver laandrecht: bi'j et verschienen van et symposiumboek 'Soe sullen die Stellinge...' op 24 augustus

Op deensdagaovend 24 augustus wodt et boek prissenteerd mit de lezings van et Historisch Symposium 'Stellingwarf' 700 in Noordwoolde, van 18 september veurig jaor. Disse lezings weren van perf. dr. Hans Mol van de Fryske Akademy, dr. Oebele Vries van et Fries Instituut Rieksuniversiteit Grunningen en van mr. Caspar van Heel uut Hattem, eerder perveensiaol archiefinspekteur van Overiessel. De drie lezings weren van hoog nivo en bin veur disse uutgifte nog es bewarkt en verni'jd. Et ni'je boek is weer een hoogweerdig perdukt van de Stichting Stellingwarver Schrieversronte in Berkoop, die veul liefhebbers van geschiedenis en identiteit van Stellingwarf hier een plezier mit dot.
Anslutend op de prissentaosie zal iene van de specialisten, dr. Oebele Vries, opni'j ingaon op et Stellingwarver laandrecht van begin 14e ieuw. Veur een uutvoerige 'verkenning' was op et symposium van veurig jaor aenlik wat te min tied. Hiel wat bezukers van doe wollen et verhael nog wel es wat uutgebreider heuren. Dat de Stellingwarver Schrieversronte het dr. Vries vraogd om opni'j naor oonze regio te kommen en om dan nog es uutgebreider te vertellen over zien speurtocht naor inhoold en aachtergronden van het Stellingwarver laandrecht. De heer Vries bleek gelokkig bereid, en iederiene is d'r wisse van dat et veur de liefhebbers van de Stellingwarver geschiedenis een prachtige lezing wodden zal.
Disse aovend is dus kultuur dubbelop: et ni'je geschiedenisboek wodt prissenteerd, en d'r is een meraokels interessaante lezing. Iederiene mit belangstelling veur geschiedenis en identiteit is welkom en d'r wodt gien intree vraogd. Plak: gebouw van de Stellingwarver Schrieversronte, Willinge Prinsstraote 10, Berkoop; tied: 20.00 ure. Pries van et ni'je boek: 17,50 euro. Bestellings of meer info: info@stellingwarfs.nl,


Fouten in boek Appelsche Bijdrage tot de Geschiedenis van een oude Stellingwerfse Boerengemeenschap van Gerke P. Mulder

Spietig genoeg bin d'r bi'j et korrigeren van et boek Appelsche Bijdrage tot de Geschiedenis van een oude Stellingwarfse Boerengemeenschap van Gerke P. Mulder fouten in de tekst zitten bleven. Veur de boeken die al verkocht binnen ligt d'r bi'j de boekwinkels, de H.V. Appelsche en et kantoor van de Schrieversronte een lieste klaor mit errata, in de nog niet verkochte boeken wodt die lieste toevoegd. Daornaost zal et boek zo gauw meugelik foutloos anbeuden wodden via de webstee www.stellingwarfs.nl. De uutgeveri'je van de Stellingwarver Schrieversronte bödt zien exkuses an veur dit ongemak.


Goeie jaorvergeerdering Stellingwarver Schrieversronte, en...
Eerste Stellingwarf-trofee veur Johan Veenstra!

Op woensdagaovend 19 meie hul de Stichting Stellingwarver Schrieversronte zien jaorlikse ledevergeerdering in et eigen paand in Berkoop. In zien eupeningswoord kon veurzitter Ype Dijkstra goed veertig leden welkom hieten. De veurzitter vertelde vervolgens bliede te wezen dat et gebruuk van de Nedersaksische streektaelen, waoronder et Stellingwarfs vaalt, zo staorigiesan niet meer op formele weerstanen stuit. In datzelde kader vertelde hi'j ok dat de erkenning van oonze tael weer een stappien dichterbi'j kommen is. Ok goed nuumde de veurzitter de goeie kontakten van oonze stichting mit de gemientelike en perveensiaole overheden in et oflopen jaor. Al kan d'r vandaege-de-dag wat de subsidie angaot niet alles daon wodden, d'r is een positieve holing te zien om een oplossing veur dat perbleem te vienen. In datzelde verbaand nuumde Dijkstra ok de goeie kontakten mit de verschillende raodsfrakties.
Omreden de financiële pesisie van de Schrieversronte zorgelik blift, wodde et oflopen jaor perbeerd om ni'je geldstromen tot staand te brengen. Iene daorvan is et instellen van een ni'je stichting Vrunden van de Schrieversronte. In de veurbereidende kemmissie zit o.e. oold-bestuurslid Jelke Nijboer en die zol nao de bestuursverkiezing laeter op de aovend over dat ni'je initiatief vertellen. Veurzitter Ype Dijkstra nuumde ok nog even de meerst opvalende biezunderheden van et jaor 2009. Vanzels weren dat al die prachtige en verschillende aktiviteiten in et kader van Stellingwarf 700 en et winnen van de H.J. Bergveld-pries. Mar ok opvalend nuumde Dijkstra de zo goed verlopen sutelaktie, meugelik maekt deur de grote inzet van een hiele grote groep vri'jwilligers. Dat de Schrieversronte veural ok hiel aktief is op et gebied van et uutgeven bleek wel uut de lieste mit boeken die d'r de kommende tied an staon te kommen. Daornaost wodt d'r hadde warkt an twie ni'je websteden, iene veur tael en kursuswark die richt is op mit naeme de jeugd en iene veur kultuur, historie, keunst en laandschop. De kommende tied wil et bestuur ok een kemmissie instellen om et 40-jaorig bestaon van de Stellingwarver Schrieversronte (in 2012) te vieren, zo vertelde de veurzitter.

Twie ni'je bestuursleden
Nao et eupeningswoord wodde et jaorverslag van de stichting deur de leden van de Algemiene Raod goedkeurd en vaastesteld.
In et bestuur weren twie vakketures, waorveur Henk Koelma van Hooltpae en Geke Zanen-Dokter kandidaot steld wodden. Geke Zanen is woonachtig in et Grunningse Zuudwoolde, mar komt van oorsprong van Makkinge. Beiden wodden mit algemiene stemmen benuumd.
Oftredend en herkiesber weren de heer Fokke Bron en veurzitter Ype Dijkstra. Ok de heren Bron en Dijkstra wodden mit algemiene stemmen herbenuumd.
Et veurstel van et bestuur om et lidmaotschop te verhogen van 15 naor 16 euro wodde deur de leden goedkeurd.

Stellingwarf-trofee en bofferd
Een biezunder gebeuren tiedens de oflopen jaorvergeerdering was et overhaandigen van de Stellingwarf-trofee, een ni'j initiatief van de Stellingwarver Schrieversronte. Die ni'je trofee, waorveur keunstener Peter Hiemstra vraogd is om een speciaol beeltien te ontwarpen, is bedoeld veur personen die heur ommeraek inzetten of inzet hebben veur et Stellingwarfs en de Schrieversronte. Et ni'je initiatief is ontstaon omreden et Schrieversronte-bestuur et meer as tied vun om schriever Johan Veenstra es extra in et zunnegien te zetten vanwegens zien meer as grote inzet veur et Stellingwarfs. De laeste tied vul dat nog es weer op deurdat de schriever van Ni'jhooltpae de Streektaelpries van et Dagblad van het Noorden wun, mar ok omreden mit de herdrok van zien boek 'Et geheim van de wiend' zien tetaole tal boeken boven de 50.000 kommen is. Veur zoe'n klein taelgebied as dat van et Stellingwarfs is dat butengewoon hoge.
Behalven de trofee hadde veurzitter Dijkstra nog een verrassing veur Johan Veenstra. Dijkstra wus dat de zo suksesvolle schriever ommeraek vule van bofferd hoolt, mar ok daj' daor vandaege-de-dag niet meer zo makkelik an kommen kunnen. Van schriefster Sjoukje Oosterloo wus hi'j dat zi'j heerlike bofferd maeken kan, en die zorgde d'r dan ok graeg veur dat d'r op 19 meie een vassen iene overhaandigd wodden kon.

Stellingwarver laandverhuzers
Nao et schoft vertelde de heer Otto de Vent van De Fochtel over zien onderzuuk naor Stellingwarver laandverhuzers in de 19e ieuw. De Vent is daor al hiel wat jaoren drok mit in de weer en bliekt tot hiele interessaante risseltaoten te kommen. Indertied is Otto de Vent ok in de voetsporen van laandverhuzer Kuipers van De Hoeve naor Dakota west, om daor mit naozaoten van laandverhuzers te praoten. Deur toedoen van mit naeme Kuipers bin in de twiede helte van de 19e ieuw veul meensken uut oonze regio daor naor toe verhuusd.
De Vent bliekt ondertussen een schat an gegevens te hebben en kan uterst boeiend en vol enthousiasme over dit onderwarp vertellen. Et doel is dat hi'j dit naojaor daor nog uutgebreider, mit o.e. een powerpoint-prissentaosie, opni'j over vertellen zal. Die aovend is ok weer in et gebouw van de Schrieversronte, iederiene die interesse het kan die aovend dan bi'jwonen.


Tentoonstelling Sierd Geertsma en Appelsche

Van 26 juni t/m 22 augustus is in De Hoolten Klinte in Appelsche een biezundere tentoonstelling van schilderi'jen en tekenings van Siert Geertsma te zien. De tentoonstelling is orgeniseerd deur de Historische Verieninge Appelsche e.o. Veur de keuze van et wark dat tentoonsteld wodt het de verieninge de hulpe had van Museum Smallingerland/Drachten en de Stichting Sierd Geertsma.
Veul wark van Sierd Geertsma (1896 - 1985) het een biezunder historisch kerakter. Om die reden bin d'r bi'j dat wark ok interessaante beschrievings maekt, die bi'j et wark prissenteerd wodden. Die beschrievings bin in et Stellingwarfs en in et Fries te lezen. Veur et Stellingwarfs zorgde Schrieversronte-vri'jwilligster Sjoukje Oosterloo.
De tentoonstelling lat een mooi overzicht zien van et wark dat Geertsma in en om Appelsche henne maekt het. Een anraoder om es even henne te gaon!
De eupeningstieden bin: op woensdag, zaoterdag en zundag van 14.00 tot 17.00 ure. Adres: De Hoolten Klinte, Bosberg 1, Appelsche


De ni'je Stellingwarver Spreukekelinder komt d'r an! Mit mitwarking van o.e. museum Oold Ark

Twiede helte juni komt weer de ni'je Stellingwarver Spreukekelinder uut. Veur et jaor 2011 warkte opni'j een grote groep meensken mit an disse biezundere uutgifte. De kelinder, die uutgeven wodt deur Uutgeveri'je Van de Berg in Almere, is daoromme slim ofwisselend wodden. In de kelinder bin tal van ni'je verhaelen, gedichten, spreukies en gezegden, mar ok hiel vule infermetieve stokkies opneumen. Veul ommedaenken is d'r ok now weer veur de netuur. Zo beschrift Gerrit Hof van Berkoop alderhaande waornemings uut de netuur en vaaste kelindermitwarker Henk Jager (Berkoop) vertelt o.e. over insekten en Stellingwarver netuurgebieden. Ok de geschiedenis van de streek komt weer an bod. Zo schrift Sjoerd Hoogenkamp (Wolvege) over zien biezundere bojemvoonsten in oonze kontreinen. Ni'j veur 2011 is de mitwarking van histotolk Frank Spijkers van Buil. Hi'j benaodert een tal historische onderwarpen op zien eigen aorige wieze.
Ni'j veur 2011 is ok de mitwarking van een groepien vri'jwilligers van museum Oold Ark in Makkinge. Zi'j beschrieven allemaole een biezunder veurwarp uut heur museum, waorvan ok een foto in de kelinder opneumen is.
Veur ni'je gedichten en verhaelen in de kelinder zorgden o.e. Jan Bakker, Roely Bakker, Klaas Boersma, Koosje Hornstra, Harmen Houtman, Kees Koopstra, Sjoukje Oosterloo, Marijke Ponne en Freddie de Vries. In de kelinder bin ok gedichten opneumen uut et boekien 'Gewoon Stellingwarfs De tael van mien moeke van Jan Veldhuizen' (1941 - 2005) en 'Pake (Een schets uut et Berkoper volksleven)' van Klaas Bergsma (1899 - 1974). Beide boeken wodden indertied uutgeven deur de Stellingwarver Schrieversronte, mar ondertussen bin ze al weer even uutverkocht.
De redaktie van de kelinder was weer in hanen van Annie Dedden en Sietske Bloemhoff.
De verkooppries van de kelinder is etzelde bleven, die is 11,95 euro.


Eerste streekmark in Berkoop leup goed en was gezellig

Zaoterdag 5 juni was de eerste streekmark in Berkoop. Die wodde orgeniseerd deur de stichting Buorkerij. Roem twintig bedrieven en instellings in Zuudoost-Frieslaand bin bi'j die stichting ansleuten. Ze hullen now veur et eerst een gezaemelike streekmark.
Al van et begin of an, morgens om tien ure, leup et gezellig an en van op et gezellige pleintien in et centrum van Berkoop. Even daorveur was de streekmark eupend mit een mooie toespraoke van Johan Veenstra. Dudelik was al mitien dat de meerste bezukers mit zin kwammen om bi'j de verschillende kraompies wat an te schaffen. Veerweg de meersten gongen vot mit een vol speciaol Buorkerij-tassien, en d'r weren ok genoeg die mit twie tot drie volle tassen weer op huus an gongen. Niet verwonderlik, want d'r was een mooi anbod an streekperdukten. Van heerlike keze tot lekker brood, hunning, ies, alderhaande soorten sappen, eerpels en gao mar deur. Ok de Schrieversronte hadde een kraom, uteraord ok mit streekperdukten, alliend gong et bi'j heur vanzels om 'leesvoer'... De drie Schrieversronte-markluden (Koosje Hornstra, Johan Veenstra en Sietske Bloemhoff) weren an et aende van de mark dikke tevreden mit de omzet. De streekmark in Berkoop is dit jaor nog tot en mit oktober, op elke eerste zaoterdag van de maond, van 10.00 tot 16.00 ure.



Ni'je streekmark in Berkoop

Tot en mit oktober wodt in Berkoop op de eerste zaoterdag van elke maond een streekmark orgeniseerd. Op die mark kommen allemaole bedrieven uut hiel Zuudoost-Frieslaand heur eigen streekperdukten verkopen of over heur bedrief of instelling infermeren. Ie moe'n daenken an kraomen mit biologisch fruit, gruunten, keze, vis en gao mar deur, perdukten die allemaole op bedrieven in de beide Stellingwarver gemienten en de gemienten 't Vene, Opsterlaand en Smallingerlaand kweekt of maekt wodden. De mark is in elk geval de eerste keer op et plein midden in et dörp, et kan wezen dat de keren daornao de mark in de Willinge Prinsstraote holen wodt.
Netuurlik staot ok de Stellingwarver Schrieversronte mit een boeke- en infokraom op disse biezundere mark, die orgeniseerd wodt deur Stichting De Buorkerij. Grote initiatiefnemer van die stichting en de streekmark is Dory van der Gun van kezeboeri'je 'De Stelp' in Berkoop. De eupening van de eerste mark is op 5 juni.


Staotssiktaoris Bijleveld kreeg verzuuk tot veerdere erkenning van et Nedersaksisch

Staotssiktaoris Ank Bijleveld het op 25 meert et verzuuk anlangd kregen tot erkenning van et Nedersaksisch onder diel III van et Europees Haandvest veur regionaole taelen of taelen van minderheden. Et verzuuk wodde heur anbeuden deur een dillegaosie van bestuurders van de perveensies Grunningen, Drenthe, Overiessel en Gelderland en van oonze gemienten Oost- en West-Stellingwarf. Et verzuuk is onderbouwd mit een studie van de Rechtenfakulteit van de Rieksuniversiteit Grunningen. Die studie het as titel 'Nedersaksisch waar het kan' en wodde schreven deur dr. M. Herweijer en perf. mr. W.H. Jans. De staotssiktaoris is positief over de anvraoge en zal die veur toetsing deurgeven an de betrokken aandere ministeries.


Groot ni'js: Johan Veenstra wint de streektaelpries van et Dagblad van het Noorden

Zopas kwam et ni'js binnen dat de Stellingwarver schriever Johan Veenstra de Dagblad van het Noorden-streektaelpries wunnen het, mit zien beststeller "Et geheim van de wiend". Dan gaot et om de kattegorie Poëzie & Proza. Behalven Veenstra zien boek stonnen veerder op nommenaosie in die kattegorie: "Minnezinne. Drentse erotische gedichten" deur Delia Bremer & Ria Westerhuis, "Op e tast" van Tonko Ufkes, "Zo is t nait goan/Zo is het niet gegaan" van Jan Glas, en "Bliedschop veur t bezeren" deur Henk Puister. Mooi ni'js dus veur Johan Veenstra, veur al zien fans en veur de Stellingwarver schrieveri'je in et algemien! De jury zee o.e. 'Veenstra het een status aparte binnen de Nedersaksische streektaelen. En dat komt niet allienig deurdat hi'j in et Stellingwerfs schrift, et het ok te maeken mit zien veulziedighied. Veenstra is van alle marken thuus: gedichten, verhaelen, kollums en romans. Et geheim van de wiend is al weer zien vuufde roman. Aj' d'r dan an daenken dat streektaelromans d'r dunne binnen, dan is dat een indrokwekkende prestaosie.' In de kategorie CD& DVD wun Daniël Lohues mit de cd Allienig III(6 meert 2010)


Prissentaosie ni'j boek van Jan Schonewille: 'Alderhaande'

Vri'jdagmiddag 5 meert verscheen in een biezundere bi'jienkomst et ni'jste boek 'Alderhaande' van ds. Schonewille van Noordwoolde. Et gaot om 40 verhaelties mit 40 foto's veur 40 inspirerende mementen. In zien eupeningswoord leut veurzitter Ype Dijkstra van de Stellingwarver Schrieversronte, uutgever van et boek, weten dat hi'j slim wies is mit disse ni'jste uutgifte van zien stichting. Dijkstra vun de teksten in de ni'je bulden slim de muuite van et lezen weerd, ze zetten je dudelik even tot naodaenken an. Daornaost prees Dijkstra ok even de inzet van de schriever veur et Stellingwarfs. Zo is Jan Schonewille o.e. vaaste vri'jwilliger van de jaorlikse sutelaktie.
De anwezigen gongen nao zien positieve woorden mit mekeer naor de karke van Berkoop. Daor wodde, naodat Schonewelle een tal verhaelen uut zien ni'je boek veurlezen hadde, et eerste exemplaor overhaandigd an ds. Grietje Martens. Zi'j is as domenee verbunnen an de karkgemienschop van Oolde- en Ni'jberkoop, mar ze is ok oold-studiegenoot van de schriever. Ds. Martens stelde et arg op pries dat zi'j et eerste exemplaor in ontvangst nemen moch en vertelde vervolgens nog een peer aorige anekdotes uut de gezaemelike studietied in Kaampen. Mar ze leut ok weten hoe belangriek ze et vint dat et Stellingwarfs ok op disse meniere bruukt wodt.
Nao de prissentaosie gongen de geneudigden weeromme naor et gebouw van de Schrieversronte, waor onder et genot van een glassien drinken nog een hiel posien naopraot wodde, én waor gelegenhied was om et ni'je boek an te schaffen en et signeren te laoten.


Kleine mar biezundere Johannes Mulders-tentoonstelling

Tot 26 meert is d r in et gebouw van de Stichting Stellingwarver Schrieversronte een tentoonstelling mit wark van Johannes Mulders (1899-1989), die as keunstschilder, grafikus en illestraoter in Stellingwarf aktief was. Op de tentoonstelling hangen 21 warken, waoronder een drietal biezundere zelspetretten mar ok petretten van femilieleden van Mulders. D'r hangen hoolt- en linosneden, tekenings, waetervarveschilderi'jen en et topstok is de gouache 'Zundagmorgen'. Veerder is d'r een mooie dwasdeursnee te zien van zien ontwarpen van boekomslaegen, van zien boekillestraosies en zien illestraosies veur o.e. kelinders.
De tentoonstelling is te bekieken op maendag tot en mit donderdag, van 8.30 tot 16.30 ure, an de Willinge Prinsstraote 10. Daor is ok een overdrok te koop van et uutgebreide Ovend-artikel, augustus 2000, van de haand van Pieter Jonker, over leven en wark van Johannes Mulders. Die overdrok kost 2,75 euro.


Kleine mar biezundere Johannes Mulders-tentoonstelling

Tot 26 meert is d'r in et gebouw van de Stichting Stellingwarver Schrieversronte een tentoonstelling mit wark van Johannes Mulders (1899-1989), die as keunstschilder, grafikus en illestraoter in Stellingwarf aktief was. Op de tentoonstelling hangen 21 warken, waoronder een drietal biezundere zelspetretten mar ok petretten van femilieleden van Mulders. D'r hangen hoolt- en linosneden, tekenings, waetervarveschilderi'jen en et topstok is de gouache 'Zundagmorgen'. Veerder is d'r een mooie dwasdeursnee te zien van zien ontwarpen van boekomslaegen, van zien boekillestraosies en zien illestraosies veur o.e. kelinders.
De tentoonstelling is te bekieken op maendag tot en mit donderdag, van 8.30 tot 16.30 ure, an de Willinge Prinsstraote 10. Daor is ok een overdrok te koop van et uutgebreide Ovend-artikel, augustus 2000, van de haand van Pieter Jonker, over leven en wark van Johannes Mulders. Die overdrok kost 2,75 euro.


Schrieversronte-bestuurslid Hans van den Berg haostig wegraekt

Op 9 meert kregen bestuur en passeniel van de Schrieversronte tiedinge dat nao een jaor van hoop en spanning heur bestuurslid Hans van den Berg op de leeftied van 64 jaor uut de tied raekt was. Sund 1974 woonde Van den Berg, van komof Noordwooldiger, in Hooltwoolde. Daor was hi'j 23 jaor heufdonderwiezer van de Drie Dörpenschoele. Hi'j zette him van 1986 of in veur et hiemkunde-onderwies op 'e Stellingwarver schoelen. Van den Berg was echt een verieningsman, mit naeme veur de dörpen Hooltwoolde, Der Izzerd en Ni'jhooltwoolde. Daornaost hadde hi'j mit naeme ok in de körfbalwereld hi'j een grote inbreng. Vier daegen veur zien wegraeken wodde hi'j benuumd tot Lid in de Odder van Oranje-Nassau, veur zien bestuurlike aktiviteiten op et gebied van sport, buurtwelwezen en kultuur. Burgemeester Gerard van Klaveren rikte die onderscheiding uut en roem 150 dörpsgenoten maekten et feestelike gebeuren mit. Van meie 2007 of was Hans van den Berg siktaoris van de Stellingwarver Schrieversronte. Zien grote inzet, zien enthousiasme en zeker ok zien gevuul veur humor zal bestuur, staf en leden van de stichting mit grote wardering bi'jblieven.


Ni'j boek van Gerke P. Mulder verschient gauwachtig; eerste exemplaor veur borgemeister Oosterman

Op et heden wodt bi'j de drokkeri'je de laeste haand legd an et boek "Appelsche. Bijdrage tot de Geschiedenis van een oude Stellingwerfse Boerengemeenschap". Et is een herdrok van een dubbelnommer van et tiedschrift "It Beaken" van de Fryske Akademy uut et jaor 1977. Mar et is niet alliend een herdrok. Et boek is ok veurzien van een uutgebreide inleiding van Pieter Jonker over et wark van Gerke P. Mulder. Alderdeegst is een liest mit publikaosies van Gerke P. Mulder opneumen. Mulder publiceerde riegelmaotig in "Driemaandelijkse Bladen", "De Ovend" en de "Nieuwe Ooststellingwerver". In et boek zels is ommedaenken veur de geschiedenis van de naeme Appelsche. Netuurlik komt et zonuumde klooster Lux Mundi ok op de bodden. Etzelde gelt ok veur de burcht van Terwische. D'r wo'n heufdstokken spendeerd an Appelsche in de 17de en 18de eeuw. Belangrieke femilies uut de begintied van de schriftelike bronnen wo'n uutgebreid behaandeld. Ok gegevens uut de administraosie van de diaekeni'je kriegen ok heur gerak van Mulder. Ok Appelsche in de 19de ieuw komt an bod. Mulder onderbouwt op alle fronten et feit dat veurdat Appelsche bekend wodde deur zien verveningsgeschiedenis dat Appelsche echt een boeredörp was.
Et boek telt 92 pagina's, verschient in een oplaoge van 500 stoks - mit toestemming van de Fryske Akademy uteraord - en gaot Euro 12,50 kosten. Et kan now al besteld wodden bi'j de Stellingwarver Schrieversronte, de Historische Verieninge Appelsche en de boekwinkels. Et boek verschient o.e. mit steun van de perveensie Frieslaand.
De prissentaosie is op donderdagmiddag 11 meert, in "De Hoolten Klinte", et gebouw van de historische verieninge van Appelsche. Et eerste exemplaor is veur borgemeister drs. H. Oosterman, hi'j krigt et uut hanen van Schrieversronte-veurzitter Ype Dijkstra. Et boek is een uutgifte van de Stichting Stellingwarver Schrieversronte Berkoop. De prissentaosie van et boek is in hanen van de Appelschester historische verieninge.
In et kenniscentrum van de Stichting is de uutgebreide Mulder-kollektie onderbrocht. Een beschrieving daorvan vienen jim veerderop op disse webstee.


Stellingwarver sni'j smultte vot... komt et veurjaor d'r an?

Now, et veurjaor is d'r. Daoromme de volgende winterindrokken mar gauw in et webstee-archief dus... Veur meensken die veerder vot wonen en wat bi'jholen willen hoe et nog was in oonze streek! Et begon al veur de Kastdaegen te sni'jen, en sund hewwe de hieltied winterweer had. Et dujt now en dan vot, mar dat vröst et ok weer een poze. Hier en daor weren tot et laeste van feberwaori nog plakken of bulten sni'j. Zol de winter nog weerommekommen? De iene vun de winter prachtig, van de ere had et al vule eerder opholen mocht. Wat aj' d'r ok van vienen, we weten now weer wat winter is, dat is een veurdiel.
Mit de dikke laogen van lessend bin netuurlik de verhaelen ok loskommen... Mar zo slim as de Stellingwarver schriever H.J. Bergveld (1902-1966) et indertied 'naovertelde', now nee, zo slim hewwe et toch nog niet had, ok disse winter niet:

Dan hebben wi'j nog niks te klaegen...

Jan Saanders Klaos zat lessendaegs
Bi'j Ties van Geert wat op te snieden.
"Ie hebben now", zo zwetste Jan,
"Gien winters meer as vroeger tieden!
Wat is mi'j now zoe'n druppien sni'j?
Dan mag 't mi'j nog wel aanders heugen!
Et was van ien- op twienentachtig,
Doe lag die sni'j, da's ongeleugen,
Bi'j Pake an de daoke toe!
Et kachellit was vaastevreuren!
En nargens kon ie onder 't ies
Een spraankien waeter meer bespeuren!
Doe laggen in de Weme-bos
De haezen in de eksternusten!
En op een keer zat dokter Sluus
Op 't klokkehuus wat uut te rusten!"

(H.J. Bergveld, De Oolde Pook, Wolvege, 1970: 51)

Veur nog een dichterlike beleving van de sni'jwereld: zie onderan op disse bladziede.


Keuning Roegbaord

Keuning Roegbaord het zien haand
Daelelegd op stad en laand.
En hi'j blaost zien koolde aosem
Over 't waeter, voorn en braosem
Vlochten in de diepte vot.
En hi'j schuddet naor zien aord
Grote vlokken uut zien baord,
Tot de wereld wietwaor wit wodt
En de wegen spiegelglad.
Keuning Roegbaord grinnikt wat.

Mar de kiender, mit heur sleden,
Draeven ov'ral of en an,
Glieden waor 't mar even kan.
Keuning Roegbaord lacht tevreden,
Het d'r zien pleziertien van!
En hi'j blaost nóg even hadder,
En hi'j schuddet nóg wat barder,
En de oold're generaosie
Klaegt netuurlik stien en bien,
Want ze meugen him niet zien!
- Roegbaord wat bin ie gemien!
- Wat bedoej' en wat beblaos ie!

Roegbaord grinnikt om heur zorgen:
Oolde zoere proemers bin 't!
Roegbaord is de Kiendervrind!
Wie de Jeugd het, die het Morgen!

(Jouk, ps. van M. Bakker (1926-1996), Een haandvol speulgoed. Wolvege, 1972: 63)



Prissentaosie ni'j boek ds. Jan Schonewille

Op vri'jdagmiddag 5 meert wodt in een biezundere bi'jienkomst et ni'jste boek van domenee Jan Schonewille van Noordwoolde prissenteerd. Et boek, daor 40 verhaelties mit 40 foto's veur 40 inspirerende mementen in opneumen binnen, het as titel Alderhaande. Veur de 40 foto's zorgde Marjan van den Berg, dat is Jan Schonewille zien vrouw. Et omslagontwarp is van Bauke Visser Koenders van Haulerwiek.
De auteur het jaorenlaank redaktielid west van et blad 'Netwerk', hi'j verzorgde o.e. de rebriek 'Alderhaande'. Et gong daorbi'j om alderhaande prikkelende, uutdaegende, tot naodaenken zettende stokkies op et gebied van geleuf en saemenleving. Die stokkies weren bedoeld veur persoonlik meditatief gebruuk, of as een eupeningsmement bi'j vergeerderings en ere bi'jienkomsten.
Een diel van die stokkies het Jan Schonewille ommezet in et Stellingwarfs, mar hi'j het veur disse ni'je bundel ok een tal ni'je verhaelen schreven. Mit mekere ontstonnen zo de 40 stokkies veur 40 inspirerende mementen. Marjan van den Berg maekte bi'j elk verhaeltien een toepasselike foto, in de Stellingwarven, mar ok op ere plakken in de wereld. Verhaelen en foto's zorgen zo veur een biezunder gehiel, dat slim de muuite van et lezen en bekieken weerd is. Et boek wodt uutgeven deur de Stichting Stellingwarver Schrieversronte.
Et eerste exemplaor van Alderhaande zal in de karke van Berkoop uutrikt wodden an domenee Grietje Martens, zi'j is o.e. predikante in Berkoop, mar ok oold-studiegenoot van Schonewille. De bi'jienkomst, die diels in de Berkoper karke en diels in et gebouw van de Stellingwarver Schrieversronte is, zal leided wodden deur de veurzitter van de Schrieversronte, de heer Y. Dijkstra.
Van dezelfde schriever verscheen eerder et boek Maaike. In die roman wodt de geheime liefde verteld van een Stellingwarfs maegien mit een joodse bewoner van et kaamp Ybenheer op 'e Fochtel.


Negen kursisten haelden diploma Stellingwarfs: toegelieke negen ambassadeurs veur et Stellingwarfs!

"Jim bin now oonze ambassadeurs veur et Stellingwarfs!" Dit bin de woorden van Schrieversronte-veurzitter Ype Dijkstra, die oflopen zaoterdag an negen van de elf kursisten et diploma Stellingwarfs I uutrieken kon. Elke kursist(e) wodde op persoonlike wieze deur him toespreuken en dat wodde mar wat op pries steld. Dat was middags nao ofloop van de examendag, die om tien ure uut aende gaon was mit een pittig diktee. Daornao was et vaaste onderdiel mit schriftelike vraogen over de tael. As laeste onderdiel morgens was d'r een opdracht op et terrein van et kreatief schrieven. Middags was et mondeling examen. Dat wodde ofneumen deur de kursusleiders Roely Bakker, Grietje Bosma, Geert Lantinga, Henk Bloemhoff en Pieter Jonker. In et mondeling examen gaot et om et goed lezen kunnen van een tekst, om vraogen over de schrievers en de schrieveri'je en over vier boeken die lezen wodden moeten. Daornaost bin d'r vraogen over de geschiedenis.
Om drie ure wodde dudelik dat de negen kursisten die an et examen mitdaon hadden mit mooie ciefers slaegd weren. In tetaol deden d'r disse keer elf kursisten mit. Twieje van die elven hadden besleuten niet mit te doen an et examen, mar ankem jaor doen ze dat lichtkaans wel. Pieter Jonker zee uut naeme van de kursusleiding: 'Jim weren slim leergierig en belangstellend. Dat is veur de lesgevers geweldig. Ik hope dat jim nao disse kursus betrokken blieven bi'j aander kursuswark van oonze stichting en bi'j aandere aktiviteiten.' Henk Bloemhoff gaf op verzuuk nog even een toelochting op de muuilikste punten uut et diktee en de schriftelike vraogen. Veurzitter Ype Dijkstra bedaankte de vri'jwillige kursusleiding. De kursus wodt ofsleuten op 29 april mit een exkursie op 'e Delleboersterheide onder leiding van kursusleider Geert Lantinga.
De slaegden veur de kursus Stellingwarfs I van dit kursusjaor numen we mit ere. Et weren de vrouwluden Ineke Oudshoorn (Else), Catharina Hommes (Noordwoolde), Hielkje Nieuwenhuis (Noordwoolde), Joke Broekman-Coenrades (De Oosterstreek), Joke Brouwer (Oosterwoolde) en Anja Binnema (Wolvege), en de manluden Jaap Koen Bijma (Wolvege), Jacob Woudstra (Berkoop) en Mark van Veen (Wolvege).


Zwitserlaand-lezing op 9 feberwaori: slim interessaant

Op et historisch kongres in Noordwoolde van 28 september kowwe gien lezing meer anbieden over de overienkomsten tussen de Stellingwarver en Friese vri'jhied en die van Zwitserlaand. Dat daoromme hewwe die orgeniseerd in et ni'je jaor, in et kader van, zeg mar, "Stellingwarf"700+. De lezing is geven deur de geschiedenisliefhebber en zaekeman Oliver F. von Borstel. De heer Von Borstel is ofkomstig uut et kanton Luzern en woont now al weer een jaormennig in Schiedam. In et daegeliks leven is hi'j Salesman & Managing Director bi'j Managers of Sales Europe b.v., Rotterdam. Von Borstel bleek een groot kenner van de geschiedenis, et laand en de meensken te wezen. Et ontbrak him niet an de neudige humor en ok niet an een kritische instelling bi'j de bespreking van de verschillende soorten demekraosie. Zwitserlaand is van dat wat biezunders: de demekraosie, veural de gemientelike van onderop, staot daor hoge anschreven. Wel betekent dat dat de meensken hiel vaeke te stemmen moeten over alderhaande soorten onderwarpen, en daor bin ze dan niet al te goed op veurbereid. Mar disse aovend gong bepaold niet allienig over demekraosie van vandaege-de-dag en over et poletieke plan van Zwitserlaand in verbaand mit de EU, hoewel daor, zo bleek bi'j de vraogestelderi'je, best flink wat belangstelling veur was.
Et was veural een soort Zwitserlaand-aovend, veur geschiedenisliefhebbers liekegoed as veur liefhebbers van dit mooie vekaansielaand in de Alpen.
Onderwarpen die veerder op 'e bodden kwammen, weren: de tied van veur 1291: mit vechteri'jen tegen de "voogd" en veur de vri'jhied (dat hoolt in: tegen de Habsburgers); de gebeurtenissen op 1 augustus 1291: Uri, Schwyz en Unterwalden zweren de ied veur et Iedgenootschop op de Ruetliwiese; 1332: Luzern slöt him an en kanton nao kanton komt d'r vervolgens bi'j; de komst van Napoleon; 1848: van Staotebond naor Bondsstaot; Zwitserlaand vandaege-de-dag: laand, meensken, poletiek en neutraliteit. D'r weren wat te min meensken die de lezing bi'jwoonden: tegen de dattig, mar die weren dan ok opgetogen over inhoold, nivo en levendighied van de prissentaosie. Veurzitter Ype Dijkstra kon de meensken dan ok rond half elven mit een voldaon gevuul naor huus toe gaon laoten, naodat hi'j zien grote daank wardering veur de heer Von Borstel uutspreuken hadde.


Stellingwarver Schrieversronte zette et jaor in de vroege ni'jjaorsmorgen goed in: mit daank an de Berkoper Geitefok!

In de vroege morgen van 1 jannewaori 2010 wodde de Stellingwarver Schrieversronte bliede maekt mit een kedo van de ooldejaorsverieninge van Berkoop, beter bekend as 'De Geitefok'.
In een fleurige bi'jienkomst op de driehoeke bi'j de karke kregen verscheiden Berkoper verienings een aorig kedo. En zo ok de Schrieversronte. Direkteur Sietske Bloemhoff kreeg veur et kantoor uut hanen van de 'gulle gevers' een ni'j koffiezetapperaot en een mooi ni'j tillefoontoestel. Daor is de Schrieversronte ommeraek bliede mit. De aandere orgenisaosies weren netuurlik al lieke bliede. Een orgenisaosie die ok 'bovenplaetselik' warkt en wat kreeg is... de braandweer. Braandweer, aandere hulptroepen en de pelisiehelikopter hoefden d'r veur een goeie gang van zaeken op disse happening niet an te passe te kommen. Alles gong fleurig en mit verdrag. In disse prachtige winternaacht was d'r een macht volk op de lappen in Berkoop, en dat hadden de orgeniserende Geitefokkers ok wel verdiend!


Ok Drentse staoten aachter weens tot veerdere erkenning Nedersaksisch

Op 16 december hebben ok de Perveensiaole Staoten van Drenthe besleuten tot mitdoen in de anvraoge om et Nedersaksisch onder diel lll van et Europese Haandvest veur regionaole taelen of taelen van minderheden te brengen. Veur de zommer kwammen de perveensies Gelderlaand, Overiessel en Grunningen en de beide Stellingwarver gemienten al tot die besluutvorming. De perveensie Frieslaand volgt hier disse beleidsweens van de Stellingwarver gemienten. De bestuurlike ofstemming is beriekt veural op basis van et rappot 'Nedersaksisch waar het kan', schreven deur de rechtsgeleerden perf. dr. J.J. Jans en dr. M. Herweijer, verbunnen an de Rechtenfakulteit van de Rieksuniversiteit Grunningen.


Stripboek 'Weeromme naor Stellingwarf' op 11 december verschenen

In de loop van de feestelike ofsluting van et biezundere jaor 2009 verscheen op 11 december et stripboek Terug naar Stellingwerf/Weeromme naor Stellingwarf van Frank Spijkers uut Buil. De strips verschenen et oflopen jaor wekeliks in de regionaole kraanten 'Stellingwerf' en 'Nieuwe Ooststellingwerver'. In dat verhael vertelt auteur en tekener Frank Spijkers de historie van Stellingwarf om 1309 henne en hi'j dot dat op een hiele eigen en ansprekende wieze vanuut et jaor 2009.
Dit stripverhael is biezunder geschikt veur kiender van zoe'n jaor of twaelf, dattien, mar ok ooldere lezers zullen et mit plezier bekieken en lezen. Omreden striptekenenings die in kraanten verschienen vaeke niet beweerd blieven, het de warkgroep Stellingwarf 1309-2009 een posien leden besleuten om et verhael in boekvorm uut te geven. In de kraanten wodde Weeromme naor Stellingwarf in et Nederlaans verteld, mar op verzuuk van mit naeme de schriever/tekener zels verschient de bundel now in een twietaelige vorm. Dat op 'e linkerbladzieden is et verhael in et Nederlaans te lezen, op 'e rechterbladzieden in et Stellingwarfs. Veur de Stellingwarver vertaeling zorgde Sjoukje Oosterloo uut Drachten. Et boek wodt begin 2010 uutdield an alle Stellingwarver basisschoelen, veur alle leerlingen van groep achte.
Frank Spijkers is al een hiele poze gien onbekende meer in de Stellingwarver regio. Mit naeme in et basisonderwies is hi'j bekend as Histotolk. Dit jaor gong Frank naor meer as 40 schoelen toe om daor as Otto van Buil te vertellen over die remoerige Stellingwarver periode om 1309 henne. Een peer jaor leden vertelde Frank ok al over de geschiedenis van de Bekhofschaans an vri'j wat kiender op de schoelen in de buurt. Et doel van de kreatieve Builiger is om in 2010 een eer stok van de Stellingwarver geschiedenis as Histotolk an de kiender van et basisonderwies te vertellen. Dat verhael zal dan opneumen wodden in et lesanbod veur et vak Hiemkunde in et basisonderwies.


Winterse verhaelen in Stellingwarver verpleeghuzen en zorginstellings: Veurleesaktie Schrieversronte veur et dadde jaor

Op deensdag 29 en woensdag 30 december gongen een kleine twintig vri'jwilligers van de Stellingwarver Schrieversronte veur de dadde keer op pad mit winterse verhaelen. Ze gongen naor zowat alle Stellingwarver verpleeghuzen en zorginstellings om daor veur te lezen. De aktie was bedoeld veur de ooldere inwoners van Stellingwarf die in verpleeghuzen of zorginstellings wonen, omdat juust in disse tied van et jaor wat extra ommedaenken veur ooldere en/of zieke meensken hiel belangriek wezen kan. Daornaost vint de Schrieversronte et belangriek om op disse meniere et wark in de zorg in elk geval ien keer in et jaor te ondersteunen. Een schoffien leden wodden daoromme ok now weer alle instellings anschreven mit de vraoge as ze opni'j gebruuk maeken wollen van et veurleesanbod. Dat et de beide eerste keren ommeraek goed voldaon het bleek wel uut de reakties die bi'j Immy Sloot - mitwarkster bi'j de Schrieversronte die dit keer de hiele orgenisaosie veur heur rekening nam - binnenkwammen.
Alle veurleesvri'jwilligers kregen een speciaole mappe mit daor alderhaande verschillende verhaelen en gedichten in te vienen weren. Dat weren o.m. verhaelen van de bekende schrievers uut et verleden Jouk en H.J. Bergveld, mar ok van Stellingwarver schrievers van vandaege-de-dag, zoas bi'jglieks Sjoukje Oosterloo.


Desiré and the Bastards winner Stellingwarfpop 2009

Et dadde Stellingwarver popfestival Stellingwarfpop 2009 is een groot sukses wodden. Veur de eerste keer was et festival, dat orgeniseerd wodde deur de Stellingwarver Schrieversronte, binnen in et jeugd- en meziekcentrum M!X in Wolvege. Van begin tot aende was d'r een geweldige sfeer in en bi'j de meer as geschikte zael van dit centrum.
Winner wodde de groep 'Desiré and the Bastards', twiede de band 'Marius' en dadde 'Sound of Parka'. 'Sound of Parka' zorgde as laeste dielnemer veur een optreden dat ston as een huus, dat de band mos meerdere toegiften geven. De band 'Marius' kwam mit een iezerstark lied, waor de muzikaliteit op alle menieren van ofstraolt, mar ok de perfekte zang van disse groep uut Wolvege vaalt op. 'Desiré and the Bastards' wunnen de eerste pries mit een geweldig optreden, waor niet alliend zangeres Desiré Dooper veur zorgde mar ok de bassist, gitarist en drummer. Opmarkelik is de leeftied van de leden: de zangeres - zi'j gaot bi'jkotten een opleiding volgen an de rockakedemie in Tilburg - is 17 jaor, en dat gelt ok veur de bassist. De gitarist is nog mar 14 en de drummer alderdeegst 12 jaor oold. De jury was daor ok van onder de indrok, mar dit gegeven gaf niet de deurslag: mit naeme de prima eigen Stellingwarver tekst, de muzikaole kaante, de strakke uutvoering en de goeie prissentaosie deden dat wel.
De jury hadde liekewel veur alle ere bands ok goeie woorden. Mit naeme et optreden van Carolien Hunneman, diels bi'jstaon deur een violist, vul arg op.

De prissentaosie van Stellingwarfpop was in goeie hanen van Coen Speelman uut Grunningen, hi'j is o.e. drummer bi'j de band 'A Liquid Landscape'. De jury beston uut Jan Oosterhof van Steggerde, Robert van Dam uut Grunningen en Boelie Winter van Wolvege. As vierde stemme in de jury was et pebliek vraogd om stemformelieren in te vullen. Dat was veur et eerst bi'j Stellingwarfpop en dat het iederiene ommeraek goed voldaon. Opvalend was dat et pebliek tot dezelde konklusie kwam as de drie juryleden.
Veur et locht en geluud zorgden as altied Harry Hof en Cees Pols van Thij-studio's uut Tuk.
Laestnuumde zorgde eerder ok veur de opnaemen van alle Stellingwarver nommers, die zaoterdag in een kleine oplaoge op een cd verschenen binnen. Stellingwarfpop 2009 wodde ofsleuten mit een prachtig optreden van de winner van veurig jaor, 'Ex-Aequo'.

Bi'jkotten zit de warkgroep Stellingwarfpop al weer om de taofel om mit de eerste veurbereidings van Stellingwarfpop 2010 an de slag te gaon. Weerommekiekende op oflopen 21 november het de warkgroep, die dit keer beston uut Bernard Damhuis, Léon van Lier, Piet Tjassing en Sietske Bloemhoff, is daor alle reden toe. Stellingwarfpop 2009 wodde financieel meugelik maekt deur Rabobaank de Stellingwerven, Woonboulevard Home Center, de gemienten Oost- en West-Stellingwarf, et Nederlands Fonds voor Podiumkunsten, Popnet, Friesland Pop, Grand-Café De Burgemeester, Jeugd- en muziekcentrum M!X en de Stellingwarver Schrieversronte.


Van Borselen-lezing kreeg levendige diskussie nao

Onder de titel 'Nieuwe stellingen betrekken' hul de bekende publicist Hans van Borselen van De Fochtel donderdagaovend 19 november een boeiende lezing over de Stellingwarver maotschoppi'je, et plak van de tael en kultuur daor in, de ekenomische kaansen, de pesisie van et gebied in de meer algemiene ontwikkelings van et plattelaand, de saemenwarking tussen beide gemienten en de hobbels die daor dislange bi'j ondervunnen binnen. Een flink tal meensken mit interesse veur visies op de gebiedsontwikkeling was d'r op ofkommen. De aovend wodde holen in de zael van et Schrieversronte-gebouw in Berkoop.
Van Borselen kan levendig vertellen en stapt zonder muuite van de grote Europese verbanen over naor de kleinere schaol van de regio Stellingwarf. Deur zien eerdere wark as sektordirekteur bi'j de gemiente Oost-Stellingwarf is hi'j ommeraek op 'e hoogte mit de perblematiek van beleidsontwikkeling, gemientepoletiek en ambtelik daenken.
Disse aovend was in et kader van 'Stellingwarf' 700 jaor, en et bin now krek al de aktiviteiten en levendighied in dat kader die him et bewies leveren dat d'r hiel wat kan en dat de regionaole identiteit van Stellingwarf inderdaod hiel bried beleefd wodt, ok bi'j meensken die hier van buten kommen binnen te wonen, al zullen die heur naor zien oordiel in eerste instaansie wat minder betrokken vulen bi'j de Stellingwarver tael.
Naotied kon et volk vraogen stellen en mit de inleider in gesprek gaon. Van die meugelikhied wodde een protte gebruuk maekt. Sommigen wezen d'r op dat ze zels eerder in heur gezin te makkelik et Stellingwarfs niet meer bruukt hadden naor de kiender toe, wiels ze daor now aanders over daenken. Die 'anpassing' ok an butermeensken was meerstal niet neudig; et Stellingwarfs hadde ok naor de kiender toe bruukt wodden kund, want daornaost was toch ok wel genoeg ommedaenken veur et Nederlaans, mit naeme op 'e schoelen.
Wat et staorigan niet meer praot wodden van de tael angaot het Van Borselen een wat optimistischer visie as sommigen. Zoks kuj' netuurlik niet hielemaole sturen as overhied, al moet d'r wel geriedschop wezen, zoas de boekeschrieveri'je, taelhulpmiddels enz. In ieder geval gaot et weerommelopen traoger as dat wel es docht wodt, konstateerde hi'j. Uutspraoken van et soorte 'over twintig jaor is et vot' kommen niet uut. Van de zael uut wodde d'r ok op wezen dat d'r misschien wel niet zovule verschillen binnen tussen 'Oost' en 'West' as Van Borselen in 't eerst angaf. Interessaant was dat zien veurbeelden van dat veural sleugen op de ontwikkeling van beleid in de gemiente en et tempo van anpakken van bepaolde verni'jings in et verbaand van de gemienten. Al mit al kan de Schrieversronte weerommekieken op een aktiviteit die deur onderwarp, levendige inzet van de spreker en betrokkenhied van et pebliek bi'j dit onderwarp as slim suksesvol beschouwd wodden kan.


Unieke anweenst veur Stellingwarver archeologie: kollektie Anton van der Lee uut Den Bosch naor Berkoop

Veurige weke was in Braobaant de overdracht van een belangrieke archeologiekollektie van Anton van der Lee an de Stichting Stellingwarver Schrieversronte in Berkoop. Van der Lee is een bekende hiemkundige in Den Bosch, die ok veurzitter was van de laandelike orgenisaosie veur ammeteur-archeologen APAN. Van der Lee is ok een begrip in de wereld van de Friese archeologie. In 1965 kreeg hi'j van dochter Bertha van de bekende ammeteur-archeoloog, kraante-uutgever en boekhaandeler Hendrik Jan Popping alle boeken over die zi'j nog van heur heit in eigendom hadde. Die was in augustus 1950 wegraekt. Bertha Popping was mit heur mem verhuusd naor Drunen, waor ze as 'juffer Popping' sikteresse was bi'j de febriek van Lips. In 1979 kwam Schrieversronte-mitwarker Pieter Jonker naor Drunen om et archief van H.J. Popping, mar ok van die zien heit Jan Hendriks Popping weeromme te kriegen naor de streek daor et archief opbouwd was. Juffer Popping vun dat et de hoogste tied was dat de kollektie weerommegong naor Oosterwoolde.

Drs. Evert van Ginkel en drs. Sake Jager schreven in 2005 et boek 'Archeologie van de Stellingwerven'. Ien heufdstok wodde hielendal spendeerd an leven en wark van H.J. Popping. Ofpraot was mit de auteurs dat de hiele kollektie bronnemateriaol van dat boek overbrocht wodden zol naor et kenniscentrum van de Stichting Stellingwarver Schrieversronte. Trouwens, de kollektie Popping was ok an de auteurs uutliend as bronnemateriaol. Bi'j de beschrieving veurig jaor van de kollektie bronnemateriaol vun Pieter Jonker een antekening van Sake Jager dat Van der Lee in Den Bosch lichtkaans dat wat over was van de boekeri'je van Popping in eigendom hadde. D'r kwam een briefwisseling en die het now een schinking van disse biezundere biebeltheek as gevolg, die now dus in Berkoop op de plaanken in de kluis staot en die now ok veur elkeniene te bestuderen is. De kollektie wodt niet uutliend en zal bi'jkotten op 'e webstee van de Schrieversronte beschreven wodden. Dat elk kan dan op veurhaand zien welke publikaosies d'r in Berkoop binnen. Pieter Jonker: 'Naost de kollektie Popping en et bronnemateriaol van 'Archeologie van de Stellingwerven' hadden we in oons kenniscentrum ok wel wat algemiene literetuur op et terrein van de archeologie, mar mit de kollektie Anton van der Lee d'r bi'j begint et echt interessaant te wodden. Alle boeken en publikaosies hebben et exlibris van H.J. Popping, daoromme is et ok 100% zeker dat et uut de Popping-biebeltheek komt. De kollektie is hiel goed beheerd en beweerd en is in een uutzunderlik goeie staot.' Nao een tillefonische ofspraoke is de kollektie Anton van der Lee in Berkoop bi'j de Stichting Stellingwarver Schrieversronte te bekieken


Al weer een maond of wat: Hiemkunde op Internet

D'r is een begin maekt mit et plaetsen van digitale lessen Hiemkunde in et basisonderwies op Internet. De eerste zonuumde 'digiles' behaandelt et thema 'Stellingwarf in de Middelieuwen' en is een saemenwarkingsprojekt van de Stichting Comperio en de Stellingwarver Schrieversronte. Disse eerste les is ontwikkeld deur onderwiezer Klaas Dijkstra van Langedieke i.s.m. mitwarkers van de Schrieversronte. D'r wodt intied ok warkt an een digiles over de Friese Waeterlinie. D'r staon ok nog een tal plannen op staepel. Ok de toekomstige lessen bin douk te vienen op
www.stellingwerf-heemkunde.nl.


Stellingwarver Spreukekelinder 2010 is d'r al!

Mar liefst 17 Stellingwarver schrievers, dichters, tekeners en fotografen zorgden de oflopen tied veur een prachtige ni'je Stellingwarver Spreukekelinder veur et jaor 2010. De kelinder, die uutgeven wodt deur Uutgeveri'je Van de Berg in Almere, is daoromme slim ofwisselend wodden. In de kelinder bin een protte ni'je verhaelen, gedichten, spreukies en gezegden, striptekenings en puzelties opneumen, mar d'r bin ok veul infermetieve blatties in te vienen. Zo kuj' lezen over bojemvoonsten in oonze kontreinen, over voegels om huus henne, over wat d'r allegere veur biezunders te vienen is in et kenniscentrum van de Schrieversronte, over vissen en insekten in Stellingwarf en gao zo mar deur. Op de veurkaante van alle blatties bin, krek as altied, weer alderaorigste spreuken en gezegden te lezen.
Ieder jaor wodt disse biezundere kelinder mit 'van alles' uut en over de eigen regio ommeraek goed verkocht. De spreukekelinder is daoromme ok alle jaoren iene van de toppers in de jaorlikse sutelaktie van de Stichting Stellingwarver Schrieversronte. Ok et enthousiasme om an dit prachtige streekperdukt mit te warken is groot. Zó groot, dat intied de eerste (ni'je) mitwarkers al weer begonnen binnen mit heur stokkies veur de kelinder van 2011. De 17 mitwarkers weren: Roely Bakker, Klaas Boersma, Sjoerd Hoogenkamp, Koosje Hornstra, Harmen Houtman, Henk Jager, Pieter Jonker, Ruurd-Jelle van der Leij, Christine Magour, Attie Nijboer, Jan Oosterhof, Sjoukje Oosterloo, Martin Oostra, Johan Veenstra en Freddie de Vries. De redaktie beston ok dit jaor weer uut Annie Dedden en Sietske Bloemhoff. De Stellingwarver Spreukekelinder is krek anleverd (half juli) en zal bi'jkotten rondomtoe te koop wezen bi'j de Stellingwarver boekwinkels. En netuurlik kuj' him kopen bi'j de Stellingwarver Schrieversronte in Berkoop. (20-07-09)


Stellingwarf 700-jaor, laeste aktiviteit: tentoonstelling bi'j Peter Hiemstra, tot en mit 27 december

Iene aktiviteit van et jubileumjaor 2009 ('Stellingwarf 700') lopt nog, en dat is een tentoonstelling van verschillende keunsteners die heur inspireren laoten hebben deur et Stellingwarver laandschop. Die tentoonstelling is in galerie Peter Hiemstra, Berkoop. Eupeningstieden: vri'jdag-, zaoterdag- en zundagmiddag, van 13.00 tot 17.00 ure (tot en mit 27 december). De Stichting Prop het veur de gelegenhied een hiel mooi boekwark uutgeven, mit ofdrokken van et wark van de keunsteners, en mit hiel biezundere gedichten van de Stellingwarver schriever en dichter Johan Veenstra. Disse uutgifte gelt 10 euro en is op de tentoonstelling te bezetten. Et kan dus nog even: d'r op uut naor Berkoop, dat deur et winterweer extra sfeerfol is. En de tentoonstelling is slim de muuite weerd, dat heur ie her en der.


'Stellingwarf' 1309 - 2009: viering in 2009

Oons gebied Stellingwarf het zolange as de meensken heugt een biezunder, eigen plak inneumen in de poletieke en bestuurlike ontwikkelings in Noord- en Oost-Nederlaand. In de tiedrekte van ongeveer 1300 tot september 1500 hadde oons gebied een zelsstaandige poletieke en bestuurlike pesisie. Stellingwarf wodde in die tied bestuurd deur 'Stellingen', die uut en deur de bevolking keuzen wodden. Meerstentieds gong et om drieje. Et gebied beschouwde himzels een hiele tied als 'vri'j', wat ok wel 'rieksonmiddellik' hiet, krek as in et geval van onder aanderen de Friezen van Oostergo, Westergo en Zeuvenwoolden.
Et hul in daj' rechtstreeks onder et bestuur van de Duutse keuning of keizer vullen. Dat kwam in de praktiek daele op onofhaankelikhied. In ooldere publikaosies op et terrein van de geschiedenis hebben ze et zodoende ok wel over 'de vri'je naosie van de Stellingwarven'.

In de tied tot 1500 hadde oons gebied veural de naeme Stellingwarf, mar et wodde ok wel vaeke 'Stellingwerf' nuumd. Stellingwarf is de naeme in de uutspraoke van de Stellingwarver streektael, et Stellingwarfs, en dat is onderdiel van et Nedersaksisch. Et Nedersaksisch is, naost et Fries en et Limburgs, een erkende regionaole tael in oons laand.
De gemientenaemen Oost-Stellingwarf en West-Stellingwarf van vandaege-de-dag kommen deur de splitsing in 1517/1524, niet lange naodat et gebied bi'j de bestuurlike ienhied Frieslaand daon was, die in1498 ontstaon was.

De eerste keer dat de laansnaeme Stellingwarf him veurdot in schriftelike bronnen, is in een bekende bisschoppelike oorkonde van 25 augustus 1309. Die wodt wel anduded as de Excommunicatiebulle van Guido van Avesnes, bisschop van Utrecht (1301 - 1317). Die oorkonde is nogal belangriek, niet allienig omdat d'r veur et eerst de naeme Stellingwarf in nuumd wodt, mar nog meer om de inhoold. Daor dot uut blieken waoromme as et neudig was dat de oorkonde schreven wodde. Et was zo dat d'r him in die tied een groot poletiek konflikt veurdee tussen de bestuurders en inwoners van et Middelieuwse laand Stellingwarf an de iene kaante en Guido van Avesnes, bisschop van Utrecht an de aandere kaante. Et gong om kwessies as et bezit en de pacht van laanderi'jen en boerderi'jen deur Stellingwarvers in et gebied dat now Stienwiekerlaand is, een gebied daor de bisschop laansheer van was, om de weigering deur de Stellingwarvers om de bisschop as heur heer te erkennen en him belasting te betaelen, en zo meer. De Stellingwarvers beschouwden heur as vri'j, krek as de aandere 'vri'je Friezen' in die tied, en ze wollen dus niet onder et gezag van de bisschop van Utrecht as laansheer valen.

Et konflikt was op een gegeven ogenblik uutlopen op een indrokwekkende belegering en et omtrent innemen van et grote kesteel van de bisschop in Vollenhove. Dat gebeurde deur de Stellingwarvers en heur kammeraoden uut et buurgebied Schoterwarf. Et kesteel wodde liekewel op et laeste mement nog redded deur troepen van de bisschop, die militaire steun kregen hadde van de graaf van Hollaand. In de oorkonde van 24 augustus 1309 wodde de bisschoppelike straf bekendmaekt. Die beston uut exkommunikaosie. Dat hul de uutsluting van de karkelike gemienschop in, tot et mement dat de Stellingwarvers en heur bondgenoten heur ofgrieselike daoden op een passende meniere goedmaekt hebben zollen en et verdiend hadden om weer van heur straffen of te kommen.

De naeme Stellingwarf wodt in de oorkonde van 1309 veur de eerste keer nuumd. De naeme van oons gebied is zodoende onderdehaand op zien minst zeuvenhonderd jaor oold. Daor hebben de Stichting Stellingwarver Schrieversronte en een tal historische verienings, zoas de Vereniging Historie Weststellingwerf en de Historische Vereniging Appelscha en Omstreken in 2009 nogal wat ommedaenken an geven. D'r bin veur de viering verschillende manifestaosies en biezundere aktiviteiten opzet. Inkelden lopen of kommen nog in december. Ok is d'r een biezundere webstee over 700 jaor Stellingwarf: www.stellingwarf700.nl. Ien en aander wodt koördineerd van een kleine veurbereidingsgroep uut.


Huders van mien kienderdromen

Ik bin naor mien jonkhied
Op 'e struun,
naor sporen van vroeger

'k Stop bi'j een laene mit kestanjebomen
Heur gruui en bluui
bin roem en wied

Ik volg ze mit mien ogen
van stamme tot kruun
en alsmar, alsmar

Bin 'k onder de indrok
van heur kracht om te kiemen
uut niks meer as zaand

In een veer verleden
pootte ik ze stok veur stok
en leut ze betiemen…

Altied nog bekommer ik mi'j
om disse huders
van mien kienderdromen
Ontstaon uut mien haand…

Attie Nijboer, juni 2009


Besluutvorming over erkenning onder diel III bi'j Nedersaksische overheden staorigan ofrond

Hoe staot et d'r veur mit de besluutvorming in de Nedersaksische perveensies en oonze beide gemienten? Et kollege en de raod van de gemiente Oost-Stellingwarf bleken mit flink wat enthousiasme veur. Dat was aenlik ok wel wat te verwaachten, want van 1995 of hebben Oost- liekewel as West-Stellingwarf heur de hieltied volop aachter et streven naor erkenning onder diel III steld. De volgenden weren kollege en staoten van de perveensie Gelderlaand, en doe kwammen kollege en staoten van Overiessel. Beide staoten weren positief. Et gaot om grote en belangrieke perveensies uteraord. De Grunninger staotekemmissie bliekt intied ok glad veur. Veur de zommer hebben de Grunninger staoten ok mit fleur instemd. Op 8 juni praotte de raod van West-Stellingwarf over et veurstel, een veurstel dat uteraord ok et veurstel was van et eigen kollege. Et risseltaot was krek as in Oost slim positief, wat alle meensken die et Stellingwarfs en aander Nedersaksisch een waarm hatte toedregen, een goed gevuul geft.
D'r is nog een klein hikkertien: de grote perti'jen in de Drentse staoten hebben meer tied neudig. De Drentse staoten zullen besluten in december.


Ni'je Stellingwarver 'hangers' in kader Stellingwarf 700

Willem Higgins uut Oosterwoolde het twie mooie tinnen hangers bedocht en maekt, feguren die aj' an een riempien of zo om de hals hangen kunnen. Hi'j dot zoks in et kader van Stellingwarf 700. Mar netuurlik kuj' zien hangers ok op een aandere meniere bruken: ze argens zichtber henne leggen of zetten. Et bin feguren in et kader van de Stellingwarf-symboliek. De iene feguur is een griffioen zoas hi'j ok te zien is as teken van Stellingwarf 700, de aandere is een uutvoering van de griffioen zoas hi'j bi'j iene van de ooldste oorkondes heurt. Higgins kan ze appat maeken, ok veur jow. Per stok gellen ze 11,50 euro. Hi'j maekte zien aktiviteit wereldkundig op de aovend van de boekuutrikkinge van et ni'je boek van Martin Oostra. Zie veerder op DAUWVOETER.BLOGSPOT.COM. (31 aug. 09)


Historische kuiertocht in en om Wolvege henne: kommende zundag 22 november

Kommende zundag 22 november wodt d'r in en om Wolvege henne een historische kuier holen in et kader van Stellingwarf 700 jaor. Bi'j disse biezundere kuier zal de leiding in hanen wezen van Geert Lantinga, kenner van de historie en de omgeving bi'j uutstek. De tocht begint morgens om tien ure bi'j de Brasserie van Hotel Resteraant Holland Inn an de Stienwiekerweg 52 in Wolvege. Veur et middagschoft gaot de kuier deur et dörp zels. Nao een goed verzorgde koffietaofel in Holland Inn wodt de tocht vervolgd deur de Ni'je Anleg en et angreenzende Driessenpooldergebied mit een bezuuk an de meule van Gooijer.
Zo rond de klokke van drie ure zal d'r dan een aende kommen an disse biezundere kennismaeking mit Wolvege en zien omgeving. Op dit mement kun d'r nog wel een peer meensken mit de groep mit. Ie moe'n je dan wel even opgeven bi'j de Stellingwarver Schrieversronte in Berkoop: till. 0516-451108. Mailen kan vanzels ok naor info@stellingwarfs.nl. De kosten an de historische kuier bedregen € 19,50 per persoon (de koffietaofel is bi'j de pries inbegrepen).


Ni'jste oflevering van 'De Ovend' mit de tekst van et Stellingwarver Laandrecht

Veur de liefhebbers van geschiedenis is d'r now een pracht van een kaans om an de uutschreven tekst van et dit veurjaor weerommevunnen Stellingwarver Laandrecht te kommen! Ontdekker dr. Oebele Vries het in et ni'jste nommer van et Stellingwarver tiedschrift 'De Ovend' (oktober 2009) de volledige tekst uutgeven. Dat is gebeurd neffens de principes van een kritische edisie, wat inhoolt dat et bruken van heufdletters, punten en komma's en zo anpast is an de gewoonten van vandaege-de-dag. En zo is d'r meer: ofkottings bi'jglieks bin hielemaole uutschreven. Op 18 september, op et Historisch symposium Stellingwarf 700 in Noordwoolde, het de heer Vries de tekst al zien laoten an et pebliek, en hi'j hoopt d'r laeter dieper op in te gaon in ien of meer wetenschoppelike publikaosies. Mar dat duurt nog wel even, en ok de symposiumbundel is niet vot-op-slag klaor. Daoromme is et mooi dat deur Vries zien publikaosie in 'De Ovend' elke belangstellende now alvast van disse tekst uut de Middelieuwen kennis nemen kan.
Netuurlik het 'De Ovend' ok now weer veul aandere aorige artikels en zo wat henne, o.e. over de interessaante Stellingwarvers Jebbie van der Wal en Jaap Wemer. D'r bin verhaelen te lezen van Henk Koelma en van Kees Stuurman, wiels Lily Köhler een 'ienakter' publiceert 'veur alle warkende memmen'… Losse nommers van 'De Ovend' gellen 3 euro. Vule mooier nog is et om je te abonneren: 15,00 euro in et jaor, veur 6 ofleverings. (24-10-09)


Zaoterdag 21 november: Stellingwarfpop 2009! Mit: Carolien Hunneman, Desire and the Bastards, Hekze, Infinite, Marius, Sound of Parka, Target Remains en Viscious Circle

Op zaoterdag 21 november wodt veur de dadde keer et popfestival Stellingwarfpop holen. Et festival, dat orgeniseerd wodt deur de Stellingwarver Schrieversronte, is dit keer niet buten, mar binnen in et jeugd- en meziekcentrum M!X in Wolvege. Et doel van et festival is in 't eerste plak om mit naeme jonge bands en muzikaanten an te vieteren om in heur meziek meer gebruuk te maeken van de eigen streektael et Stellingwarfs. D'r is daoromme een pries beschikber steld veur de drie beste Stellingwarfstaelige nommers: de eerste pries bestaot uut een geldbedrag van € 300,00, de twiede pries levert € 200,00 op en de dadde € 100,00. Daornaost wodt d'r van alle dielnemers an et festival (achte mit mekere) ien Stellingwarfstaelig nommer op een CD zet. Et doel is dat die CD binnen niet al te lange tied uutkommen zal. Veur de opnaemen daorveur zorgde Cees Pols van studio Case I/O in Tuk.

Grote ofwisseling in optredens
Hiel mooi is dat et de veurbereidende warkgroep dit keer lokt is om veur een grotere verscheidenhied an mezieksoorten te zorgen. Zo is d'r veur et eerst op dit unieke festival o.e. een singer/songwriter (Carolien Hunneman) te heuren, zorgt de band Hekze veur een Stellingwarver rap, wiels Sound of Parka mit modpunk en hippierock op et podium staot. Twie bands deden eerder an Stellingwarfpop mit, dat bin Infinite en Sound of Parka. Laestnuumde vul bi'j de veurige festivals in de priezen. Veerder doen mit: Desire and the Bastards, Marius, Target Remains en Viscious Circle. De winner van Stellingwarfpop 2008, Ex-Aequo, slöt et festival of. Tussen de verschillende optredens deur zal d'r een daansdemonstraosie geven wodden deur Racket en healt dancers.
Veur de formule van Stellingwarfpop is onderhaand arg veul wardering, et festival krigt de hieltied briedere bekendhied. Dat gelt niet alliend veur bi'jglieks ere Nedersaksische regio's, mar ok in de wereld van de popmeziek.

Pebliek stemt mit!
Et festival begint middags om vuuf ure, veur de prissentaosie zorgt dit keer Coen Speelman uut Grunningen. Coen Speelman, die van oorsprong van Nijeveen komt, is o.e. drummer bi'j de band A Liquid Landscape uut Grunningen.
De jury die uuteindelik de priezen toekennen zal, bestaot dit keer uut vier personen en et pebliek. Iederiene die dit gratis festival bezuken gaot, krigt bi'j binnenkomst een formelier, daor hi'j op angeven kan wie neffens him de winner van et festival is. De uutslag van et pebliek telt mit as vuufde stemme binnen de jury. In de jury zitten: Neerlandikus en meziekliefhebber Peter Riksma (van vroeger van Wolvege), de Stellingwarver dichter/muzikaant Jan Oosterhof (Steggerde), Robert van Dam (bassist A Liquid Landscape, Grunningen) en Boelie Winter (drummer Ex-Aequo). Laestnuumde is ok veurzitter van de jury.
Stellingwarfpop wodt financieel meugelik maekt deur Rabobaank de Stellingwerven, Woonboulevard Home Center, de gemienten Oost- en West-Stellingwarf, Friesland Pop, jeugd- en meziekcentrum M!X en de Stellingwarver Schrieversronte.


Rondrit Stellingwarver Smulbus in de kienderboekeweke

In et kader van de kienderboekeweke en Stellingwarf 700 jaor ridt in oktober de Smulbus mit leerlingen van et basisonderwies naor verschillende lekaosies in de gemiente Oost-Stellingwarf. De Smulbus is een initiatief van de warkgroep 'Alles rondom taal' van de stichting Kunstwerf. Die warkgroep bestaot uut vertegenwoordigers van de Eupenbaore Biebeltheek, boekhaandel Bruna en de Stellingwarver Schrieversronte.
In kombinaosie mit 'Stellingwarf 700 jaor' en et thema van de kienderboekeweke 'Eten en snoepen in kinderboeken' is disse keer keuzen veur 'de Smulbus'. Die ridt op vier verschillende morgens in de kienderboekeweke een 'culinaire en historische route' deur de regio. De dielnemers van disse biezundere tocht bin leerlingen van groep 8 van 13 verschillende basisschoelen in Oost-Stellingwarf.
De tocht gaot aldereerst naor Berkoop. Bi'j de Stellingwarver Schrieversronte wodt verteld over 'Stellingwarf in de Middelieuwen', mit anslutend een kwis. Van Berkoop gaon de leerlingen naor kookmuseum 'De Vleer' in Appelsche. Eigeneresse Carolina Verhoeven zal vertellen over eetgewoonten in de Middelieuwen. Van Appelsche of gaot de tocht richting Oosterwoolde, waor in de Bruna-winkel een puzeltocht uutzet is. Van Bruna uut gaot de route lopende veerder richting biebeltheek, mar onderwegens is d'r nog een 'pitt-stop' bi'j supermark C-1000. Eigener Van Zanten bödt daor beneudigdheden an veur et klaormaeken van een lunchpakket. Bi'j de laeste halte, in de biebeltheek, wodt et bereiden van een oold recept uut de regio veurdaon en tot slot zal ok van et risseltaot d'r van pruufd wodden kunnen. Op dit mement wo'n nog de meugelikheden van een ofslutend kienderboekebal bekeken.


Ni'je kursus Stellingwarfs begint in november

Heb ie d'r ok aorighied an om mit te doen an de kommende beginnerskursus Stellingwarfs? De eerste lesaovend is op 9 of 12 november, dat hangt d'r nog even van of. Woj' nog wat weten van de kursus, eerdaj' jow opgeven op info@stellingwarfs.nl? Bel dan even mit de Stellingwarver Schrieversronte (0516-451108) en vraog deur naor Pieter Jonker. Die kan d'r veul over vertellen. Hi'j is op maendag en deensdag anwezig.


Historische kuiertocht in en om Wolvege henne: neteer: 22 november

Naodat de Stellingwarver Schrieversronte veurig jaor in december o.l.v. de heer Jan Slofstra uut Bakkevene een prachtige infermetieve kuier hul in de wereld van Waskemeer wodt die suksesvolle formule herhaeld. Op zundag 22 november wodt d'r in en om Wolvege henne een historische kuier holen in et kader van 'Stellingwarf' 700 jaor. Bi'j die biezundere kuier zal de leiding in hanen wezen van Geert Lantinga, kenner van de historie en de omgeving bi'j uutstek.
De dielnemers an de tocht verzaemelen heur morgens om tien ure in de Brasserie van Hotel Resteraant Holland Inn an de Stienwiekerweg 52 in Wolvege, waor de koffie en thee mit wat d'r bi'j klaorstaon. Veur et middagschoft gaot de kuier deur et dörp zels. Nao een goed verzorgde koffietaofel in Holland Inn wodt de tocht vervolgd deur de Ni'je Anleg en et angreenzende Driessenpooldergebied mit een bezuuk an de meule van Gooijer.
Zo rond de klokke van drie ure zal d'r dan een aende kommen an disse biezundere kennismaeking mit Wolvege en zien omgeving. De heer Lantinga radt iederiene an om veur goeie schoenen of leerzens te zorgen.
De kosten an de historische kuier bedregen € 19,50 per persoon. D'r is een maximum steld an et tal dielnemers. Opgeven kan bi'j de Stellingwarver Schrieversronte in Berkoop: till. 0516-451108. Mailen kan vanzels ok naor info@stellingwarfs.nl.


Stellingwarfs en Schrieversronte goed vertegenwoordigd op Eupen Taele-dag Liwwadden

Oflopen zaoterdag 26 september hul de gemiente Liwwadden in zien prachtige stadhuus een Eupen Dag. De dag ston dit jaor in et teken van taelen. Dat zodoende weren d'r Friezen, Stellingwarvers, volk uut Et Bildt, mar ok Chinezen, Afghanen en Antillianen.
Et Stellingwarfs was d'r ommeraek vertegenwoordigd. Zo weren d'r optredens van Carolien Hunneman in de prachtige Oranjezael, wiels Johan Veenstra en Attie Nijboer uut eigen wark veurdreugen. Daornaost had de Stellingwarver Schrieversronte veur een mooie info-kraom zorgd daor flink belangstelling veur was. De Eupen Dag wodde deur zoe'n 500 personen bezocht


Sutelaktie Schrieversronte smit krapan € 19.000,- op: op twie nao beste Stellingwarver sutelaktie ooit

De jaorlikse sutelaktie, dat is de verkoopaktie van de Stellingwarver Schrieversronte mit boeken, de spreukekelinder, cd's, kaorten en plakplaeties, is dit jaor wel weer een hiel groot sukses wodden. Disse keer zetten zoe'n 100 Schrieversronte-vri'jwilligers heur in om mar zoveul meugelik uutgiften van de stichting onder de meensken te brengen. En dat is meer as lokt, want de sutelaktie brocht € 18.800,- op en dat is de op twie nao beste sutelaktie ooit. Bi'jkotten staot de Schrieversronte ok nog op de jaorlikse boekemark in Drachten, dat is de ofsluting van de Friese én de Stellingwarver sutelaktie, en daor zal de uuteindelike opbrengst roem over de € 19.000,- kommen.
De verkooptopper in de sutelaktie 2009 was de Stellingwarver Spreukekelinder, daor wodden mar liefst 534 exemplaoren van verkocht. Goeie twiede wodde de ni'je roman van Johan Veenstra 'Et geheim van de wiend', mit 440 verkochte boeken. Van dat boek, dat op 28 augustus verscheen, is trouwens now al zowat de helte van de oplaoge (1500 stoks) verkocht.
In de sutelaktie wodden ok de routegids 'De buurtschoppen van Oosterwolde' (Sietske Bloemhoff en Geert van der Meulen), 'Wille op 'e brille' (Jouk), 'Gien plak dat mi'j zo trekt, de 13 dörpen van Oost-Stellingwarf vroeger' (Henk Bloemhoff) en 'De Friese waterlinie' (Meindert Schroor) ommeraek verkocht.
Op de laeste sutelaktieaovend was de stemming bi'j de sutelders vanzels hielemaole opperbest. Uut naeme van et bestuur bedaankte direkteur Sietske Bloemhoff alle vri'jwilligers van hatte en benaodrokte nog es van hoe'n groot belang de inzet van heur allemaole is. (20 sept. 09)

De Stellingwarver zaeke in 1309 en daornao op Symposium Stellingwarf 700: 120 bezukers geneuten van goeie lezings mit veul inhoold

Multifunktioneel Centrum 't Vlechtwerk in Noordwoolde was op de zunnige vri'jdagmiddag van 18 september 2009 een smoeke omgeving veur een meraokels interessaant symposium in et kader van 'Stellingwarf 700'. Symposiumveurzitter drs. Carel Zuil, eerder lerer geschiedenis en wethoolder van Oost-Stellingwarf kon een 120 geïnteresseerden as dielnemer van et symposium welkom hieten. Hi'j stelde de sprekers veur en vertelde wat heur publikaosies en aktiveiten op historisch terrein binnen.
Perf. dr. Hans Mol, hooglerer geschiedenis van de Friese lanen en warkzem bi'j de Fryske Akademy gong in op Stellingwarf, Schoterwarf en de aachtergronden van et verzet tegen de bisschop van Utrecht in de 14e ieuw. Hi'j leut zien dat de Middelieuwse Stellingwarvers van de Friese gebieden meer steun kregen hebben as dat eerder wel anneumen is in de geschiedschrieveri'je van Stellingwarf. Stellingwarf, en zo ok de stad Grunningen, deden mit an de Friese vri'jhied uut poletieke bedoelings, mar Stellingwarf en ok Schoterwarf, dat laeste gebied misschien veur een pat, weren etnisch Saksisch en niet Fries. Een singeliers gegeven is, dat roegweg beschouwd Stellingwarf en Schoterwarf et langste et poletieke systeem van de Friese vri'jhied beweerd hebben.
Dr. Oebele Vries van de Rieksuniversiteit Grunningen gong in op et Laandrecht van Stellingwarf, dat dit veurjaor deur him ontdekt wodde in et Gelders Archief in Arnhem. Hi'j gaf tekst en uutleg bi'j de verschillende artikels, mar d'r bin veurlopig hier en daor ok wel de neudige raodsels. Et laandrecht zol wel es opsteld wezen kunnen veur 1328, en dat is beheurlik oold. Et gaot veural over et gebied tussen Lende en Kuunder, en zo te zien niet over de 12 dörpen die even veur of in 1328 heur van Drenthe ofscheiden hebben. Et is niet opsteld deur een laansheer; die wollen de Stellingwarvers niet hebben, mar deur de Stellingwarver zels, en dat is oold en biezunder.
Mr. Caspar van Heel hul de dadde lezing. Hi'j was eerder perveensiaol archiefinspekteur van Overiessel. Hi'j wees d'r onder eren op dat d'r in de tied van de slag bi'j Ane ok opstaand was tegen de bisschop in Stienwiek en omgeving, deur opstaandige Drenthen en Friezen, lees Stellingwarvers. Pas in tieden dat de Stellingwarvers wat rustiger wodden weren, gaf een volgende bisschop Stienwiek zien stadsrechten. 't Was ok om strategische redenen tegen de Stellingwarvers. D'r is neffens de heer Van Heel reden om in et nog te ontwarpen waopen van Stienwiek ok een griffioen op te nemen, omdat we et gebied van Stienwiek en wiede omgeving tegere mit Oost- en West-Stellingwarf as et oorspronkelike Groot-Stellingwarf beschouwen kunnen. Stienwiekerlaand van now hadde om him Groot-Stellingwarf hieten mocht.
Nao elke lezing wodde gebruuk maekt van de gelegenhied om vraogen te stellen. Uut naeme van de orgeniserende Stellingwarver Schrieversronte nuumde Henk Bloemhoff dat de lezings over een posien verschienen zullen in een mooie bundel. Dat ok aanderen kun dan in de kunde kommen mit de mooie inhoold van de lezings. Hi'j kon hielemaole an et begin borgemeister Van Klaveren en wethoolder Trompetter van West-Stellingwarf welkom hieten, en zo ok wethoolder Pieter Bouma van Oost-Stellingwarf, en liekegoed ok een tal raodsleden. De gemiente Stienwiekerlaand wodde vertegenwoordigd deur borgemeister Apotheker, en de gemiente Opsterlaand deur wethoolder Kooistra. Ok was d'r een biezunder welkom veur oold-borgemeister Remco Heite West-Stellingwarf, veur oold-borgemeister Arend ten Oever, tegenwoordig veurzitter van de Nedersaksische koepelorgenisaosie SONT, en veur de vertegenwoordigers van de historische verienings van Stienwiek en Iesselham. An et aende wees Bloemhoff d'r op dat dr. Vries de tekst van et Laandrecht van Stellingwarf veur et eerst publiceren zal in et oktobernommer van et Stellingwarver tiedschrift De Ovend. Veur die publikaosie is uteraord al veul belangstelling. Butendat kondigde hi'j een lezing an over de Zwitserse vri'jhied en veerdere geschiedenis van laand en volk van Zwitserlaand, vanwegens overienkomstige kenmarken in de Friese en Stellingwarver vri'jhied. Dat zal wezen op 9 feberwaori 2010, de aovens.
(anpassing 19 sept. 09)


Passekonfereensieni'js: de ontdekking van et Laandrecht van Stellingwarf in et Gelders Archief in Arnhem slim biezunder, in meer as ien opzicht

Vri'jdagmorgen 3 juli was in et gebouw van de Stellingwarver Schrieversronte een biezundere passekonfereensie. Toegelieke weren d'r ok een tal aandere geneudigden as de passe, dit allemaole om te heuren hoe as dr. Oebele Vries van et Fries Instituut van de RUG bi'j wieze van aldereerste verkenning vertelde over et pas deur him ontdekte laandrecht van oons middelieuwse Stellingwarf.
Feitelik was hi'j al in april op et oolde dokement stuit, dee blieken. Et dateert uut ongeveer 1480, en is een vertaeling uut et Latien weg in oostelik kleurd Middelnederlaans. De universiteit hadde deensdag een uutvoerige passetiedinge de wereld instuurd, dat in veul laandelike en regionaole media was et ni'js van de ontdekking bekendmaekt.
In zien uutleg was de heer Vries dudelik waor hi'j dat wezen kon en hul hi'j slaegen om de aarm in aandere gevallen. In elk geval is de tekst hiel uniek, omreden eigen wetsteksten van de Stellingwarvers uut de middelieuwen dislange niet bekend weren. In een inkeld geval zicht de heer Vries een overienkomst mit et Drentse laandrecht (de schreven vorm daorvan is trouwens jonger as de tekst daor et Stellingwarver stok op weerommegaot – die liekt him slim ooldachtig), et is niet zo dat de tekst hiel wat aanders is as aandere laandrechten uut – ongeveer - die tied, mar de artikels bin wel eigen. Ze bin niet as et waore een kopie van soortgeliekense teksten uut et Friese Frieslaand. Dat zol wel kund hebben, omreden de Stellingwarvers heur ansleuten hadden bi'j de vri'je Friese lanen. Slim opmarkelik in dat verbaand is een boete die steld wodde op inbreuk maeken op de Friese vri'jhied. De Saksische Stellingwarvers hadden heur losmaekt van et gebied van de bisschop van Utrecht, en richtten een eigen laand in dat as vri'j beschouwd wodden mos, vri'j van een laansheer, wat dat angaot naor et veurbeeld van aandere Friese laanties zoas Schoterlaand en Opsterlaand, zo daenkt de heer Vries. Biezunder is ok een verwiezing naor de gewoonten angaonde de middelieuwse vete. Singeliers is dat zegd wodt dat de 'laansgemiente' betrekking het op et gebied 'binnen Lende en Kuunder'. Dat zol inholen kunnen dat de tekst nog slat op de tied van veur de ansluting van twaelf oostelike perochies. Henk Bloemhoff, taelkundige van de Schrieversronte, die de passekonfereensie leidede, nuumt et stok iene van de vuuf topstokken uut et middelieuwse Stellingwarf. Mit et uteren van veul daank kon hi'j vertellen dat et Gelders Archief, daor de heer Vries de ontdekking dee, slim mitwarkt het veur et holen van disse passekonfereensie. De Stellingwarver Schrieversronte moch veur een dag en een naacht et dokement, een kopieboek van ongeveer 1480 daor et Stellingwarver laandrecht in te vienen is, in de kluis hebben. Daordeur was et meugelik dat de heer Vries et laandrecht an et aende van de passekonfereense even tonen kon an de passe en de aandere meensken. En zodoende bin d'r ok nogal wat foto's maekt. Iederiene was et d'r over iens: hulde veur de prachtige ontdekking deur de heer Vries. Die hadde oons trouwens an et aende van zien eerste inleiding ok al fielseteerd mit et 'weerommekriegen' van oons eigen oolde laandrecht. Op het Historisch Symposium op 18 september zal de heer Vries in een lezing 'Het Landrecht van Stellingwerf. Een eerste verkenning' veerder ingaon op aord en betekenis van oons laandrecht. Veul wardering was d'r veur de mitwarking van et Gelders Archief en de RUG an disse prissentaosie (4-7-09)


Unieke voonst: et middelieuwse laandrecht van Stellingwarf

In et Gelders Archief in Arnhem is de tekst ontdekt van et middelieuwse laandrecht van Stellingwarf. Et is hiel uutzunderlik dat in oonze tied nog middelieuwse rechtsregels van een gebied weerommevunnen wodden. Ok is et van belang dat uut Stellingwarf, een gebied mit een hiel eigen historische ontwikkeling, dislange gien spoor van een eigen middelieuws recht bekend was. De tekst is ontdekt deur dr. Oebele Vries, universitair docent en onderzuker an de opleiding Friese tael en kultuur van de Rieksuniversiteit van Grunningen. De tekst wodt vri'jdag 3 juli 2009 an de passe en aandere belangstellenden zien laoten op een passekonfereensie van de Stellingwarver Schrieversronte in Berkoop.
Et gaot om een oostelik-Nederlaanse vertaeling uut de laete vieftiende ieuw. De oorspronkelike tekst was in et Latien. Die moet optekend wezen in de veertiende ieuw, mar wanneer percies is niet te zeggen.
De geldighied van et laandrecht van Stellingwarf is een aende an kommen in et jaor 1504, toegelieke mit die van et Ooldfriese recht.

Opstaand

Et oolde gebied Stellingwarf, dat now veural bekend is deur de gemienten Oost- en West-Stellingwarf, is vandaege-de-dag et zuudoostelike pat van de perveensie Frieslaand. Oorspronkelik heurde et bi'j Drenthe/Overiessel, waor doedertieden de bisschop van Utrecht de heerschoppi'je voerde. In de rekte 1309-1328 kwam Stellingwarf in opstaand tegen de bisschop. Daornao was et zoe'n twie ieuwen een vri'je, himzels besturende laansgemiente, neffens et veurbeeld van Frieslaand, waor al langer soortgeliekense rippebliekies bestonnen. In 1498 kwam d'r een aende an de vri'jhied van de Friese laansgemienten, in 1500 ok an die van Stellingwarf. Hertog Albrecht van Saksen wodde doe de ni'je heer. Die brocht et Saksische Stellingwarf bi'j Frieslaand onder. Nog altied is Stellingwarf binnen Frieslaand een gebied mit een hiel eigen kerakter, o.e. deur de eigen, Stellingwarver tael, een variaant van et Nedersaksisch.

Tien rechtsregels

Et now ontdekte laandrecht van Stellingwarf bestaot uut tien rechtsregels. Die bin vaastelegd in opdracht van de 'stellings', de rechters/bestuurders van de laansgemiente Stellingwarf. Die rechtsregels hebben bepaolings op et terrein van strafrecht en arfrecht. Veural sommige strafrechtelike bepaolings kommen nogal ooldachtig over. Dat gelt in et biezunder veur de procedure van et opeisen van een ofkoopsom veur een femilielid dat doodmaekt is. Hiel biezunder is de boete die steld wodt op et maeken van inbreuk op de Friese vri'jhied.


Lezing op 19 november: 'Nieuwe stellingen betrekken door de Stellingwerven'

Onder disse titel orgeniseert de Stellingwarver Schrieversronte op 19 november om 20.00 ure in et gebouw van de Schrieversronte in Berkoop een lezing die verzord wodden zal deur Hans van Borselen van De Fochtel, eerder direkteur Welwezen van de gemiente Oost-Stellingwarf en publicist op verschillende terreinen. Hi'j publiceerde in 1997 et essay 'Van Werven naar Verworven'; daorin is hi'j an et zuken naor et kenmarkende van de Stellingwarven doe en now. Twie jaor laeter hul hi'j een lezing mit as titel 'De politieke en sociaal-economische identiteit der Stellingwerven in historisch perspectief'.
Hi'j gaot disse keer in op de gevolgen van de geschiedenis van beide Stellingwarven tegere in de boererippebliek tussen 1300 en 1500 veur et sociaole en kulturele kerakter van beide gemienten vandaege-de-dag. Op 'e bodden kommen de al of niet kenmarkende verschillen doe en now van de beide Stellingwarven. In dat verbaand zal ok naor veuren brocht wodden de pesisie van de Stellingwarver tael, literetuur en kultuur in de saemenleving in dit gebied. Et gaot hierbi'j mit naeme om de identiteit van de gemienschoppelike kultuur, de antrekkelikhied van de tael, de geveren die de tael bedriegen en de vraoge as de streekkultuur langer bestaon zal as de streektael.
Van Borselen zal ok uutgebreid ommedaenken geven an de ekenomische en sociaole ontwikkelings in beide gemienten, die, zoas bekend, gien ekenomische kernzones in de perveensie Frieslaand binnen. Wat bin de prioriteiten op disse gebieden van beide gemienten veur de kommende tied? Gaot de saemenwarking tussen beiden zo veer dat d'r over een posien een fusie kommen zal van de beide gemienten? En tenslotte: zal de streekkultuur integreerd wodden in et gezaemelike beleid van de beide gemienten, of wodt et een bi'jzaeke?
Om kot te gaon: dit wodt een lezing over verleden, heden en veural de toekomst van de beide Stellingwarven die meensken die ok naodaenken over die toekomst zeker niet missen meugen. 'Nieuwe stellingen betrekken' hiet et in de titel, mar hoe en watte dan? Zet et alvast even in de agenda en geef even deur daj' kommen via de mail: info@stellingwarfs.nl.


Beeld van 14e en 15e ieuwse oorkonden angaonde Stellingwarf

Gao toch veural ok even naor de prachtige fototentoonstelling van oolde oorkonden in Noordwoolde. In et kader van Stellingwarf 700 wodt van 16 meie tot 26 oktober 2009 een biezundere tentoonstelling hullen, onder de titel: "Beeld van 14e-15e ieuwse oorkonden angaonde Stellingwarf". Et gaot om foto's van oorkonden die Stellingwarf anbelangen uut de tied van 1309 tot omdebi'j 1500. De tentoonstelling is in 't Nationaol Vlechtmuseum in Noordwoolde, in etzelde gebouw as Multifunktioneel Centrum 't Vlechtwerk. Zaoterdagmidddag 16 meie wodde de tentoonstelling eupend, mit een toepasselike toespraoke deur de inhooldelike uutvoerder, drs. Anne van der Helm van Donkerbroek, uteraord veur et geheur van een tal geneudigden. Ok wodde et tentoonstellingsgidsien prissenteerd.
Orgenisaosie: 't Vlechtmuseum, Noordwoolde, i.s.m. de Stichting Stellingwarver Schrieversronte, Berkoop en inhooldelik uutvoerder drs. Anne J. van der Helm, Donkerbroek. (10 sept. 09)


Sutelaktie Stellingwarver Schrieversronte begint op 31 augustus, oftewel: mit 77 vri'jwilligers op pad

Op maendagaovend 31 augustus begint de jaorlikse sutelaktie van de Stellingwarver Schrieversronte mit tal van ni'je uutgiften in de krojen. De jaorlikse verkoopaktie van Stellingwarver boeken, de spreukekelinder, cd's, kaorten en plakplaeties begint dit keer veur et eerst in augustus. Op maendag 31 augustus, woensdag 2 september en maendag 7 september wodt d'r suteld in Stellingwarf-Westaende. Dat zal o.m. wezen in Ni'jhooltpae, Hooltpae, Blesdieke, Zaandhuzen en Wolvege. Op woensdag 9 september, maendag 14 september en woensdag 16 september is Oost-Stellingwarf an bod. D'r wodt dan o.e. suteld in Appelsche, Makkinge, Berkoop en Oosterwoolde.
De sutelaktie is de hieltied tussen middags vuuf ure en aovens acht ure. De sutelaktiekemmissie, bestaonde uut de Schrieversronte-vri'jwilligers Hammie en Jitze Hofstra, Joop Oosterhof, Koop Oosterloo en Jan Punter, is van plan om van de aktie weer een flink sukses te maeken. Dit keer wodde de kemmissie veural bi'jstaon deur mit naeme et 'belteam' Fettje Alten en Johan Veenstra. Zi'j zorgden d'r tegere veur dat de groep die dit jaor op pad gaot mit de krojen uut mar liefst 77 enthousiaste Schrieversronte-vri'jwilligers bestaot.!

Vier ni'je uutgiften
In de jaorlikse sutelaktie bin d'r vier spiksplinterni'je uutgiften te vienen. In et eerste plak is dat vanzels de ni'je roman Et geheim van de wiend van Johan Veenstra. Mar ok een prachtige ni'je spreukekelinder, mit wark van 16 schrievers, dichters, tekeners en fotografen, ligt weer in de krojen. Ni'j is ok et kienderboek van Martin Oostra God maekt mooie dingen, dat op 25 augustus uutrikt wodden an ds. Nico ter Linden. Veerder verschient op de eerste suteldag et boek De veldnaemen van Ooldetriene en Sunnege, deur Piet van der Lende. In dit boek bin behalven de veldnaemen van die beide dörpen ok tal van nog niet eerder publiceerde historische gegevens te vienen. Ni'j veur de sutelaktie bin ok et boek De Friese Waterlinie van Meindert Schroor en de routegids De buurtschappen van Oosterwolde, deur Sietske Bloemhoff en Geert van der Meulen.
De uutgeveri'je van de Schrieversronte leunt now liekewel veur de rest van et jaor niet aachterover. An tal van uutgiften wodt op dit mement nog stevig deurwarkt.

Stellingwarfs, as 't even kan!
Sund al weer een hiele poze leden het de Schrieversronte ok zorgd veur een peer ni'je, opvalende plakplaeties, veural omdat daor nog al es vraoge naor is. Op et iene plakplaetien is te lezen 'Stellingwarfs, as 't even kan', op et ere 'Stellingwarfs, please!' Ok disse beide plakplaeties bin in de krojen van de sutelaktie te vienen.

Speciaol september-anbod
In de loop van de hiele septembermaond gelt d'r een biezunder anbod: wie een boek kocht dat uutgeven is deur de Stellingwarver Schrieversronte én daorbi'j de Stellingwarver Spreukekelinder kan de prachtige autobiografie De Stoel van Lily Köhler veur € 5,00 anschaffen; dat boek kost gewoonlik € 12,50. Et anbod gelt in de Stellingwarver boekwinkels krek liekegoed as bi'j de sutelaktie.


Aktiepunt jaorvergeerdering Stellingwarver Schrieversronte: oproep poletieke perti'jen veur ommedaenken Stellingwarfs

Oflopen woensdagaovend 20 meie hul de Stichting Stellingwarver Schrieversronte zien jaorlikse ledevergeerdering in et eigen paand in Berkoop. Een kleine veertig leden maekten die vergeerdering mit.
In zien eupeningswoord ston veurzitter Ype Dijkstra mit naeme stille bi'j de bezunigings deur drie subsidiegevers van de stichting: de beide Stellingwarver gemienten en de perveensie. Die bezunigings raeken mit naeme et wetenschoppelik onderzuuk en taelbegeleiding dat vanof 1991 uutvoerd wodt deur de stichting. Deur de bezunigingsmaotriegels raekten zo mit ingang van 1 feberwaori 28 uren verleuren. Op dit mement bin bestuur en direktie liekewel drok in onderhaandeling mit verschillende instellings om uut te zuken as d'r toch nog meugelikheden binnen om dit wezenlike onderdiel van de Stellingwarver Schrieversronte overaende te holen.
Iene van de akties veur et behoold van de aktiviteiten veur de eigen streektael is et anschrieven van alle poletieke perti'jen in beide gemienten. In die brief wodt o.e. vraogd om ommedaenken te geven an et belang van et behoold van de eigen streektael en streekkultuur in heur verkiezingspergrammes veur de kommende gemienteraodsverkiezings in 2010.
Nao et eupeningswoord deur veurzitter Dijkstra wodde et jaorverslag van de stichting deur de leden goedkeurd en vaastesteld. De betrokkenhied van de leden van de Algemiene Raod daor de stichting in et jaorverslag over schrift, bleek uut verschillende infermetieve vraogen.
Ofscheid wodde neumen van bestuurslid Jelke Nijboer; Nijboer het zien zittingsperiode van twie keer drie jaor d'r op zitten. Veur de stichting blift Nijboer liekewel aktief in o.e. de ni'j op te richten stichting Vrunden van de Stellingwarver Schrieversronte. Oftredend was ok ponghoolder Geert Dekker, mar de heer Dekker kon opni'j benuumd wodden veur drie jaor. Veur de vakketure die veurig jaor ontston deur et vertrekkende bestuurslid Grietje Bosma-Dijkstra stelde et bestuur as kandidaot de heer Fokke Bron van Munnikeburen. De laeste maonden dri'jde Bron al mit in et bestuurswark en dat voldee van weerskaanten ommeraek. Fokke bron wodde dan ok mit instemming van alle leden benuumd. Veur de vakketure van Jelke Nijboer is et bestuur nog op zuke naor een geschikte kandidaot.
Nao et schoft vertelde de heer Henk Ruiter van De Langelille op een slim inspirerende wieze over de wereld van de rietsniederi'je in mit naeme de Westhoeke van West-Stellingwarf en de Weerribben, krek over de greens mit Overiessel. Ruiter was eerder opzichter van Staotsbosbeheer in de Rottige Miente, mar komt uut een femilie van echte turfmaekers en rietsnieders. Binnen niet al te lange tied zal dit verhael nao te lezen wezen in De Ovend, et tiedschrift van de Stichting Stellingwarver Schrieversronte.

18 SEPTEMBER 2009: de middag van et Historisch Symposium Stellingwarf 700, oftewel:'De Stellingwerfse kwestie van 1309: politieke, bestuurlijke en menselijke verhoudingen in een Utrechts-Fries grensgebied aan het begin van de 14e eeuw'

Ien van de hoogtepunten van de viering "Stellingwarf 700 jaor" wodt et Historisch Symposium over de poletieke en militaire gebeurtenissen in oons gebied Stellingwarf en daor ommehenne, in en rond et jaor 1309.
Et wodt hullen op vri'jdagmiddag 18 september 2009. Et begint om 14.00 ure. Et zal et pebliek zicht geven op 'e machtsverholings in et gebied van et oolde 'Laand van Vollenhove' en et laand Stellingwarf van vroeger. Stellingwarf hadde keuzen veur et poletieke stelsel van de zonuumde Friese vri'jhied. De opstaand van de Stellingwarvers in 1309 tegen Guido van Avesnes, bisschop van Utrecht, krigt in dit symposium et neudige ommedaenken.

Eerste lezing: 'Stellingwerf en Schoterwerf: hun status en de achtergronden van hun verzet, mede in het licht van de Friese vrijheid', deur perf. dr. Hans Mol
Twiede lezing: 'Het Landrecht van Stellingwerf. Een eerste verkenning', deur dr. Oebele Vries
Dadde lezing: 'De locale verhoudingen tussen Stellingwerf, het Land van Vollenhove en Steenwijk aan het begin van de veertiende eeuw', deur mr. Caspar van Heel

Aj' kommen willen en ie hebben je nog niet opgeven, zollen we je vraogen willen om dat nog wel even te doen, deur een mailtien te sturen naor info@stellingwarfs.nl. Dit in verbaand mit et forse tal anmeldings dislange.
Et symposium wodt veurzeten deur drs. C.C. Zuil, eerder docent geschiedenis an et Stellingwerfcollege. Nao elke lezing is d'r kot gelegenhied veur vraogen en diskussie. De lezings bin in et Nederlaans. Et symposium wodt holen in Multifunktioneel Centrum 't Vlechtwerk, Noordwoolde. Orgenisaosie: Stichting Stellingwarver Schrieversronte. De toegang is vri'j, dus ommenocht. Vraog eventueel om veerdere inhooldelike info op etzelde mailadres, t.a.v. dr. Henk Bloemhoff, inhooldelik veurbereider van et symposium. [N.B. Deur aandere verplichtings kon de eerder ankondigde lezing van de heer Albert Mensema spietig genoeg niet deurgaon. De lezing van dr. O. Vries is d'r veur in 't plak kommen.] (10-09-09)


Juryrappot H.J. Bergveldpries 2009 vol lof over de Stellingwarver Schrieversronte

Op 17 juni kreeg veurzitter Ype Dijkstra uut hanen van borgemeister Harry Oosterman van Oost-Stellingwarf de H.J. Bergveldpries 2009. Oosterman hadde een mooie toespraoke en leut daor et belangrieke, waarme plak in zien van de Stellingwarver Schrieversronte midden in de Stellingwarver saemenleving. Ok Ype Dijkstra en veurzitter Arend ten Oever van SONT hullen toespraoken. Dijkstra nuumde een tal belangrieke aktiviteiten en risseltaoten uut et verleden, en maekte indrok mit zien schets van et belang van kulturele en wetenschoppelike instellings zoas de Stellingwarver Schrieversronte. Veurzitter Arend ten Oever sleut him daor bi'j an en nuumde o.e. dat de Stellingwarver Schrieversronte altied een stevige inbreng had het m.b.t. de ontwikkelings van et Nedersaksisch as gehiel, in et biezunder om de erkenningskwessie henne. Et juryrappot wodde veurlezen deur jurylid Geke Zanen. We hebben et hiernao opneumen. Et was een prachtige aovend in et gemientehuus van West-Stellingwarf, mit optredens van zangeres Caroline Hunneman, Christine Magour, Johan Veenstra en et Wolvegester Anbo-koor. Meer over de Bergveldpries in de tekst onder et juryrappot.

Juryrappot H.J. Bergveldpries 2009

'De echte taal, de taal in haar allerwezenlijkste functie, de taal die de mens tot mens maakt, is niet het speciale bezit van de dichters en hun aanhang van literair-geïnteresseerden, maar het algemene bezit van iedereen.'
Dat schrift perf. dr. K.H. Heeroma - van 1953 tot 1972 hooglerer Nedersaksische tael- en letterkunde an de universiteit van Grunningen en direkteur van et Nedersaksisch instituut - in zien bundel Nader tot een taaltheologie (1967) en hi'j zegt dan veerder: 'Men kan deze taal in zichzelf tot ontwikkeling brengen tot een vervuld bestaan of laten verschrompelen tot een gebruiksartikel.'
Heeroma was meraokels grepen deur et feit dat de tael et meerst wezenlike is an de meens. Daoromme zee en schreef hi'j ok zo vaeke 'De mens bestaat in taal' en getuugde hi'j van 'de verbinding tussen de mensen door een taalverbond'.

Et is dit 'taelverbond' dat ok de meensken in Stellingwarf al van ooldsher mit mekere verbint en bi'j mekeer brengt en hoolt. Et is et follement van heur gemienschopsgevuul en van de diepgaonde tael- en streekbeleving, daor ze vol van zitten.
Et Stellingwarfs, dat behalven in de gemienten Oost- en West-Stellingwarf ok praot wodt in et noordwesten van Overiessel (Stienwiekerlaand) en in een klein angreenzend gebied van Drenthe, nemt binnen et Nedersaksisch taelgebied een unieke eigen pesisie in die votkomt uut de onofhaankelike en zelsbewuste opstelling van de Stellingwarvers deur de ieuwen henne.

Om et Stellingwarfs ok veur de toekomst as kultureel arfgoed te beweren wodde in 1972, krek doe et gebruuk van de streektael en et ommedaenken d'r veur onder drok kwammen te staon, deur een tal gedreven vri'jwilligers et initiatief neumen tot de oprichting van de Stichting Stellingwarver Schrieversronte. Et is te daanken an die stichting, dat d'r in de veurbi'je jaoren veul tot staand brocht is dat van ommeraek groot belang is veur et instaandholen van de tael en de streekkultuur.
Toegelieke het de stichting een ondersteunende funktie naor de gemientelike overheden toe wat de veurbereiding en de uutvoering van de uutrikkinge van de instelde literaire priezen anbelangt, waoronder de H.J. Bergveldpries. Veur toekenning van disse prestigieuze pries kun individuele personen, orgenisaosies en instellings, die heur veur et Stellingwarfs in de briedste zin op een biezundere wieze verdienstelik maekt hebben, in anmarking brocht wodden.

Binnen et ofwisselende laandschop van de Stellingwarver tael en kultuur het de jury een rondgang maekt in et domein van de schrievers en dichters en him verdiept in heur artistieke specialisaosie, de proza en de poëzie. Daor eupenbaorde him een riek en kleurig spektrum van romans, verhaelebundels, dokementaires, dichtbundels, liedteksten, teniel en gao zo mar deur.
As we de perduktie in de verscheiden literaire genres overzien, vaalt d'r een hoopvolle ontwikkeling te konstateren. Sommige auteurs hebben heur sporen al verdiend, eren bin veulbelovend en zullen ongetwiefeld nog van heur heuren laoten.

In de loop van de veerdere verkenning van de aktiviteiten die in Stellingwarf ten behoeve van de eigen tael en kultuur ontwikkeld en uutvoerd wodden, wodde de hieltied weer dudelik hoe as de Stellingwarver Schrieversronte daor een centraole rolle in speult. De jury raekte niet alliend in toenemende maote onder de indrok van de veulhied en de variaosie van aktiviteiten die de stichting tot zien taekepakket rekent, mar ok van de hoge kwaliteit d'r van.
Een summier overzicht volstaot om de kwaliteiten an te duden die de Schrieversronte niet alliend kenmarken as et belangriekste instituut veur tael, literetuur, geschiedenis, volkskunde en indentiteit van Stellingwarf, mar ok as een utermaote professioneel instituut:
- Aldereerst vaalt et fraai uutvoerde twiemaondelikse tiedschrift De Ovend op, mit mooie bi'jdregen op et gebied van de Stellingwarver tael, literetuur, volkskunde en geschiedenis, die een boel meensken ni'jdoen zullen. De Ovend mag dan ok mit recht een vesitekaortien van de Schrieversronte nuumd wodden.
- Dan is d'r et Kenniscentrum, waorvan de biebeltheek, de biezundere kollektie dokementen en et beeld- en geluudsarchief ok veur et pebliek eupensteld binnen.
- Veur wie et Stellingwarfs niet alliend as tael om in te praoten, mar ok as schrieftael beheersen wil wo'n jaorliks de kursussen Stellingwarfs geven.
- Aorig riegelmaotig orgeniseert de Schrieversronte lezings en kongressen.
- D'r is gericht ommedaenken veur et saemenstellen van hiemkundig lesmateriaol veur et basisonderwies, wiels daor an de leerkrachten veurlochtingspergrammes over anbeuden wodden. Zo wodt ok de jongste generaosie vertrouwd maekt mit de tael, de geschiedenis en de saemenleving van Stellingwarf.
- Binnen et gehiel an aktiviteiten die de Schrieversronte tot zien taekepakket rekent, is de wetenschoppelike specialisaosie een wel hiel belangriek onderdiel. De stichting ontlient in belangrieke maote daor zien professionele staotus an. Wil d'r een volledig beeld ontstaon van et eigen taelsysteem van et Stellingwarfs, dan dient die tael, veur zoveer et meugelik is, ok in al zien facetten onderzocht en beschreven te wodden. Daorbi'j gaot et o.e. om disciplines as semantiek, lexikologie/lexikografie, fonologie, toponymie enz. Op die terreinen is al veul tot staand brocht. Hierveur kan bi'jglieks wezen wodden op et 4-dielige Stellingwarfs Woordeboek, op de paragrafen over et Stellingwarfs in et Handboek Nedersaksische Taal- en Letterkunde en op de onderdehaand slim talrieke wetenschoppelike publikaosies in verschillende bundels en tiedschriften.
- Biezunder is et uutgiftebeleid van de Schrieversronte. Al van de oprichting of geft de stichting mit grote riegelmaot ni'je boeken uut in en over et Stellingwarfs. Veerweg de meerste van de literaire perdukten, romans, verhaele- en gedichtebundels, bin opneumen in et uutgiftebestaand van de Schrieversronte. Daornaost verschenen en verschienen d'r, in een grote verscheidenhied, publikaosies op et terrein van de geschiedenis, de volkskunde, de regionaole identiteit en de belende keunst. Tientallen en tientallen titels bin d'r zo in de loop van de jaoren beschikber kommen veur et briede pebliek.

Zo het de Stichting Stellingwarver Schrieversronte een deurslaggevende funktie, niet alliend om et gevuul van weerde veur de eigen streektael bi'j de inwoners te verstarken, mar veural om de Stellingwarver tael en kultuur in alle facetten zien gerak te geven.

Al meer as 35 jaor voeren de besturen van de Schrieversronte die mekeer opvolgden mit grote inzet en overgaove alle komplekse en arbeidsintensieve taeken uut die ze heurzels oplegden. Et weren ok die besturen die et beleid bepaolden en veur et planmaotige uutvoeren d'r van zorgden. Dat bestuursbeleid, dat deur de jaoren henne kenmarkt wodde deur een hoge maote van duurzemhied, wodde en wodt de hieltied in een meerjaoreplan en ok in een jaorplan omschreven en vaastelegd, wiels deur et Jaor- en Perduktverslag evalueerd en verantwoording oflegd wodt.
Wie et gehiel van die arbeid overzicht en op him inwarken lat en him daor ok bewust bi'j is van et feit dat et stichtingsbestuur zien warkzemheden hielemaole vri'jwillig en belangeloos uutvoert, raekt diepe onder de indrok.

Bi'j zien uuteindelike ofweging is de jury dan ok ienstemmig tot et oordiel kommen dat et wark van de Stichting Stellingwarver Schrieversronte, lettende op de biezundere maotschoppelike betekenis d'r van, de grootst meugelike wardering verdient, niet alliend van de hiele Stellingwarver saemenleving mar ok van de regionaole overheden, een wardering die et beste tot uutdrokking brocht wodden kan in de onderscheiding mit de Bergveldpries 2009, uut te rieken an et now zittende bestuur van de Schrieversronte in de persoon van zien veurzitter.

Mit betrekking tot de toekomstige ontwikkelings veroorlooft de jury him nog et volgende op te marken:
De erkenning van et Nedersaksisch neffens diel III van et Europees Haandvest veur Minderhiedstaelen kan een belangrieke impuls betekenen veur et streektaelebeleid. Et zicht d'r naor uut dat die erkenning, waorveur de overheden van de perveensies Grunningen, Drenthe, Overiessel, Gelderlaand en van de gemienten Oost- en West-Stellingwarf in gezaemelikhied veul wark verzet hebben, now ophanen is. Dat is een biezunder positieve ontwikkeling, die liekewel toegelieke ok konsekweensies hebben zal. Zo kriegen de overheden onder diel III een grotere inspanningsverplichting angaonde et Nedersaksisch. Et ambisienivo veur et gebruuk van de streektael in de verschillende domeinen van de saemenleving ligt beheurlik hoger as dat vandaege-de-dag onder diel II et geval is.
Om dat hogere nivo waor te maeken zullen de regionaole overheden en de professionele streektaelinstituten mekere neudig hebben; d'r zullen gezaemelik ni'je lijnen uutzet wodden moeten.
Veur de streektaelinstituten - dus ok veur de Schrieversronte - zal de erkenning neffens diel III o.e. et veerder verdiepen en uutbreiden van taeken mit him mitbrengen en naost nog meer onderling overleg binnen et Nedersaksisch taelgebied, ok verkenning en saemenwarking over de greenzen henne.
Et wodt spannend. De Schrieversronte kan, mit de deskundighied die de stichting het, die uutdaeging an, as de overheden - want zi'j dregen veur et streektaelbeleid de eerste verantwoordelikhied - daor de meugelikheden mar veur bieden.

Et is zaeke om Heeroma's uutspraoke 'Men kan deze taal in zichzelf tot ontwikkeling brengen tot een vervuld bestaan of laten verschrompelen tot een gebruiksartikel' eernstig te nemen.
Veur wie zien verantwoordelikhied verstaot is de keuze liekewel gien vraoge meer.

Grunningen, meert 2009
De jury H.J. Bergveldpries 2009,
G. Zanen-Dokter, C.C. Zuil, J. Haveman


Friese vertaeling van 'Een brogge van glas' verschenen

In dezelde weke dat de ni'je roman 'Et geheim van de wiend' van Johan Veenstra verscheen, kwam ok de Friese vertaeling van zien veurige roman 'Een brogge van glas' uut. Veur de vertaeling zorgde Folkert de Jong uut Drachten. In et biezunder veur dit boek het Johan Veenstra een naowoord schreven. Hi'j beschrift daorin hoe et veerdergaon is waor et boek ophoolt. Hoe de eerste ontmoeting mit zien breur verlopen is en wat veur reakties hi'j op 'e roman kregen het en nog altied krigt. Van de Stellingwarver versie 'Een brogge van glas' bin een kleine 4500 boeken verkocht. De Friese versie 'In brêge van glês' wodde in een oplaoge van duzend exemplaoren uutgeven deur uutgeveri'je Bornmeer uut De Gediek. Et het een ni'j omslag en gelt veur € 17,50. Et is rondomtoe in de boekwinkels te koop.


'God maekt mooie dingen'. Eerste exemplaor van boek mit Biebelse verhaelen veur kiender wodt anbeuden an ds. Nico ter Linden

Op deensdagaovend 25 augustus verschient et aldereerste boek van Martin Oostra. In et boek vertelt de schriever uut Wolvege Biebelse verhaelen veur kiender, onder de titel God maekt mooie dingen. Disse ni'jste uutgifte van de Stellingwarver Schrieversronte is opfleurd mit tien prachtige, kleurige prenten van Geeske Snetselaar uut Zwolle.
Martin Oostra is een peer jaor leden begonnen mit et schrieven in et Stellingwarfs, naodat hi'j de kursus Stellingwarfs veur beginners volgd hadde. Hi'j schrift sund die tied veur de verhaelerebriek 'Op 'e schostienmaantel' in de regionaole kraanten NOS en Stellingwerf. Verhaelen van him bin ok te lezen in De Grijpvogel en op de ni'je Stellingwarver Spreukekelinder. In zien eerste boek vertelt Martin Oostra verhaelen uut de Biebel. Verhaelen veur kiender, over Adam en Eva, Maria en Jozef, Jezus en zien discipels...

Johan Veenstra
In de flaptekst zegt Johan Veenstra over de verhaelen van Martin Oostra: 'Et bin al hiele oolde verhaelen over meensken die lange leden leefden en hier een hiel aende uut de buurt woonden. Mar et aorige is dat meensken deur de ieuwen henne in wezen niks veraanderd binnen. Waor as ze ok op 'e wereld wonen. As ze now in Israël wonen of in de Stellingwarven, dat maekt aenlik niks uut. Meensken bin in wezen overal liek. D'r bin altied slim aorige meensken west, mar ie hebben ok volk dat niet altied eerlik is. Meensken doen soms hatstikke goeie dingen, mar bi'jtieden bakken ze d'r hielemaole niks van en spoeken ze stiekem de malste dingen uut. Dat het ok altied en overal zo west. In de Biebel is dat percies zo: pattie meensken bin zo goed as koeke, mar ie hebben ok goenend die gremietig en jeloers binnen.
Lees mar es hoe as Martin die mooie, oolde verhaelen uut de Biebel vertelt. Of luuster d'r mar es naor as iene ze je veurlest. Dan is 't krek as ziej' et veur je ogen gebeuren en maek ie et zels allemaole van dichtebi'j mit.

Ds. Nico ter Linden
Et bestuur van de Stellingwarver Schrieversronte is d'r ommeraek mit inneumen dat ds. Nico ter Linden uut Munnikeburen/Amsterdan et eerste exemplaor van dit biezundere boek in ontvangst nemen wil. Op de aovend van de prissentaosie zal ds. Ter Linden ok op de inhoold en et belang van God maekt mooie dingen ingaon. Netuurlik zal d'r aovens ok uut et ni'je boek veurlezen wodden. Dat zal gebeuren deur Femmie van Veen uut Hooltpae. Sund de invoering van et vak Hiemkunde in et basisonderwies in de beide Stellingwarvern is zi'j o.m. as vaaste veurlezer van kienderverhaelen riegelmaotig op pad.

Exemplaor veur alle basisschoelen
De Stellingwarver Schrieversronte dielt op 30 september an alle basisschoelen in Stellingwarf een exemplaor van dit ni'je boek uut. Dat zal gebeuren tiedens de jaorlikse hiemkundemiddag veur onderwiezend passeniel in et gebouw van de Schrieversronte in Berkoop. Mar et ni'je boek is vanzels ok te koop bi'j de boekhaandels en bi'j de Schrieversronte zels. De pries is € 12,50. (12-08-09]


'Et geheim van de wiend': ni'je roman van Johan Veenstra

Op vri'jdagaovend 28 augustus komt Johan Veenstra zien ni'je roman 'Et geheim van de wiend' uut op een peblieksaovend in De Ni'je Stienze in Ni'jhooltpae. Alleman kan naor disse mooie, ofwisselende kulturele aovend, en de toegang is vergees. Zangeresse Carolien Hunneman uut Oosterwoolde zal zingen, de Friese schriever Douwe Kootstra zal Johan Veenstra interviewen, die lest zels veur uut et ni'je boek, en hi'j geft et eerste exemplaor an kesteelheer Gregorius Halman uut Blesdieke. De aovend begint om 8 ure en wodt eupend deur Ype Dijkstra, de veurzitter van de Stellingwarver Schrieversronte.

Et is vandehaast op 'e kop of 35 jaor leden dat Johan Veenstra zien eerste boek uutkwam: Wilde Gaanzen. Zien ni'je roman 'Et geheim van de wiend' is zien 22ste boek en zien 5e roman. Et is een spannend en ontroerend boek wodden. Veenstra vertelt et levensverhael van Anna Mulder, een maegien dat mit heur heit, mem en breur Albert op een boerespul in Ni'jhooltpae woont en in et mooie veurjaor van 1922 tot over heur oren verliefd wodt op Jan Bouw, een stoere jongkerel die mit zien volk van de Veluwe naor de Stellingwarven komt te iekschellen. In die tied kwammen koppels meensken as seizoenarbeiders van de Veluwe naor de bossen van de Stellingwarven en Gaasterlaand te iekschellen. De baste wodde van de iekenboompies klopt en laeter bruukt deur de leerlooieri'jen in Braobaant. Jan en zien volk kommen in 1922 naor de Koebos op et oost van Ni'jhooltpae, tegen Berkoop an. Mar ja, is die Jan wel hielemaole te vertrouwen en zol Anna heur heit wel zitten te waachten op een aarme luusangel van de Veluwe as schoonzeune? Et boek begint trouwens in de hiete zoemer van 2006 as Anna in ien van de tehuzen van Wolvege 100 jaor wodt en op die dag weerommekikt op heur leven. Ze beleeft in heur gedaachten alles opni'j: heur liefde veur Jan en heur leven mit Dieks Hilbrink, een man die van Twente komt en op een boerderi'jgien an de Markeweg in Blesdieke woont. Krek as in Veenstra zien roman 'Toegift' speult een klein pat van et boek him of in Twente. Dieks, de twiede grote liefde van Anna, is de zeune van de mulder van de Noordmeule op et laandgoed Twickel bi'j Delden. De schriever schildert mit liefde et mooie Twentse laand en beschrift op een ontroerende wieze waoromme Dieks deur een noodlottige liefdesrelaosie niet in Twente blieven kan. In de Stellingwarven komt hi'j mit Anna in de kunde. Twie meensken die allebeide et neudige mitmaekt hebben en die ok heur geheimen hebben. Eerst an et aende van et boek wodt de lezer geweer wat et grote geheim is dat Anna heur hiele leven mit heur mitneumen het. Aj' ienkeer begonnen binnen mit lezen, lat et boek je niet meer los.
Et boek wodt uutgeven deur de Stichting Stellingwarver Schrieversronte en is drokt bi'j Van der Meer in Oosterwoolde. Et omslag van 'Et geheim van de wiend' is maekt deur Sijtze Veldema uut Dwingel. Omdat et laeste diel van et boek in Blesdieke speult, is veur et omslag een ofbelinge bruukt van et schilderi'je De Blesdieker Heide van de bekende Stellingwarver schilder Rinny Siemonsma.
De roman verschient in een oplaoge van 1500 exemplaoren en kost 12,50 euro. Een dag nao de feestelike prissentaosie in Ni'jhooltpae signeert Johan Veenstra zien ni'je boek. Dat is dus op zaoterdag 29 augustus, de morgens van 10 tot 12 ure bi'j boekhaandel Bruna in Oosterwoolde en middags van 2 tot 4 ure bi'j Zwikstra in Wolvege. Op vri'jdagaovend 4 september is d'r een aovend in de biebeltheek van Noordwoolde daor Veenstra veurlest uut et boek en d'r over interviewd wodden zal deur Pieter Jonker. (10-08-09)


Veldnaemeboek Sunnege en Ooldetriene op komst

In 't laest van augustus verschient d'r weer een ni'j taelboek over et Stellingwarfs. In dit geval gaot et om een beschrieving van de veldnaemen van twie dörpen van oons gebied, Sunnege en Ooldetriene. Et boek is niet allienig slim de muuite weerd veur veldnaemeliefhebbers, mar ok veur geïnteresseerden in de geschiedenis van westelik Stellingwarf, van et vroegere leven daor bi'j omme en ok van de netuur en et laandschop. Schriever is Piet van der Lende uut Amsterdam, van vroeger uut de Westhoek. Die het niet allienig et Schrieversronte-veldnaememateriaol bruukt, mar hi'j het ok artikels, boeken en archieven naozocht. Hi'j kreeg butendat belangrieke mitwarking van een groep infermaanten uut beide dörpen. De uutgifte wodt 80 bladzieden dikke en gelt 11,50 euro. Et boek kan besteld wodden bi'j de Stellingwarver Schrieversronte of in de boekwinkel.
De riegel Veldnaemen van Stellingwarf is begonnen in 1982, mit een publikaosie over de dörpen Ni'jhooltpae en Ni'jberkoop. Dit boek is et zesde in die riegel, en mit mekeer bin daordeur 15 dörpen veldnaemkundig beschreven. Veur een flinke groep aandere dörpen is et al veer henne mit de veurbereidings tot uutgifte en veur weer een aandere flinke groep gelt dat d'r nog de hieltied verzaemeld wodt. (22-07-09)


Stellingwarver Schrieversronte in de priezen! Feest op woensdag 17 juni

In et gemientehuus van West-Stellingwarf zal op woensdagaovend 17 juni veur de zeuvende keer sund 1982 op feestelike wieze de intergemientelike literaire H.J. Bergveldpries uutriekt wodden. De Kollege's van B. en W. van Oost- en West-Stellingwarf hebben instemd mit de veurdracht van de jury van disse 'P.C. Hooftpries veur de Stellingwarven'. De jury van de pries bestaot uut drs. Geke Zanen-Dokter (letterkundige) uut Zuudwoolde, drs. Carel Zuil (historikus) uut Grunningen en Jan Haveman (letterkundige) uut Emmen, eerder rektor van een schoelegemienschop en van vroeger van Steggerde. De jury was unaniem in de toekenning van de pries an de Stichting Stellingwarver Schrieversronte in Berkoop. De redenen van toekenning liggen vaaste in et juryrappot en dat wodt op 17 juni eupenbaor maekt.
De pries zal anlangd wodden deur burgemeester Harry Oosterman van Oost-Stellingwarf, wiels Schrieversronte-veurzitter Ype Dijkstra de pries naemens bestuur, passeniel en vri'jwilligers ankriegen zal. De feestelike uutrikkinge, waorbi'j op zoe'n 150 geneudigden rekend wodt, wodt veurbereided deur de Warkgroep H.J. Bergveldpries. Behalven dat de neudige sprekers an et woord kommen zullen, is d'r ok spraoke van een kultureel pergramme. De H.J. Bergveldpries is een intergemientelike pries die deur de gemienten zels opzet en orgeniseerd wodt.

Eerder ok al een pries
De verrassing en de bliedschop bi'j bestuur, passeniel en vri'jwilligers van de Stichting Stellingwarver Schrieversronte was groot doe in Berkoop et bericht bekend maekt wodde. Et is de twiede keer in et krapan veertigjaorige bestaon dat de Stellingwarver Schrieversronte een eervolle pries krigt. In 1998 wodde de Friese Anjer toekend van et Prins Bernhard Fonds, die beston uut een bedrag van viefduzend gulden, een prachtige ets van Antonia Talamini en een receptie op et perveensiehuus in Liwwadden. Et bestuur van et Anjerfonds Friesland kende doe de pries toe omreden ze grote wardering hadde veur de energie, de iensgezindhied en de rejaole en toegelieke belangeloze inzet waor bestuursleden en vri'jwiligers tal van reguliere en biezundere aktiviteiten mit tot staand brocht hadden. Et was veural een pries veur et vri'jwilligerswark van de stichting. Disse keer staot de hiele stichting in et zunnegien.

Wiezigd riegelment
In de beginjaoren was de H.J. Bergveldpries een pries veur Stellingwarver schrievers, mar sund 2003 is et riegelment deur de gemienteraoden van Oost- en West-Stellingwarf anpast. Et is now dé taelpries veur et Stellingwarver taelgebied. De pries is bestemd veur wark in et Stellingwarfs in de briedste zin. Et kan daorbi'j gaon om literair of taelkundig wark. Et riegelment zegt veerder dat et wark van belangrieke betekenis wezen moet veur de Stellingwarver tael. De pries bestaot sund die tied uut een penning van de haand van beeldhouwer Guus Hellegers (Steggerde) en een bedrag van duzend euro. In 2003 wodde de verni'jde Bergveldpries toekend an dr. Henk Bloemhoff veur zien taelwetenschoppelik wark angaonde et Stellingwarfs. Hi'j hadde doe al tientallen wetenschoppelike artikels, een proefschrift, de riegel van vier woordeboeken Stellingwarfs-Nederlaans van elk duzend pagina's, een haandwoordeboek, en boeken in et kader van et projekt 'Veldnaemen van Stellingwarf' opleverd. Veerder kreeg hi'j de pries veur zien redakteurschop van et tiedschrift 'De Ovend', zien wark as lietieszanger en zien inspannings veur de erkenning van et Stellingwarfs onder et Europees Haandvest veur regionaole taelen en taelen van minderheden.

Zeuvende keer
De H.J. Bergveldpries is een pries die al een lange geschiedenis kent en die nuumd is naor de Stellingwarver schriever Hendrik Johannes Bergveld (1902—1966). Nao zien dood wodde et wark van die schriever bundeld in twie boeken, 'De oolde pook' (1971) en 'Klaeterjaegers' (1976). Die wodden uutgeven deur de Culturele Raad Ooststellingwerf, die indertied ok et initiatief nam om te kommen tot een pries veur schrieveri'je veur et Stellingwarfs. Sund 1982 wodde de H.J. Bergveldpries vief keer an een schriever toekend. In 1982 kreeg oold-wethoolder Hendrik Vondeling de pries veur et laeste diel in de riegel boeken 'Haarm en Maatien'. Johan Veenstra kreeg de pries twie keer en wel in 1984 veur 'Naachs goelen de honnen' en in 1991 veur 'Een vlinder van zulver'. In 1986 wodde de pries toekend an Pieter Jonker veur zien Stellingwarver vertaeling van kienderverhaelen van Dolf Verroen, die deur Uutgeveri'je Leopold Den Haag uutgeven wodden onder de titel 'Dikke Doezerd'. In 1996 kreeg Fokke Middendorp uut Wolvege de pries veur et boek 'Huus op 'e Miente'. Et was de bewarking van et levensverhael van Batteld Nijhoolt. En de zesde keer was in 2003 doe dr. Henk Bloemhoff de pries kreeg.

Alle oold-bestuursleden
En now, veur de zeuvende keer uutrikkinge Bergveldpries, gaot die naor de Stichting Stellingwarver Schrieversronte, die in april 1972 opricht wodde deur de ploeg meensken die destieds een winterseizoen laank et driewekeliks radiopergramme 'Op 'e schostienmaantel' veur Omroep Frieslaand maekte. Nao een jaor wodden ze d'r daor weer uutwarkt, mar diezelde ploeg zette de schoolders d'r onder om et Stellingwarfs in levendig gebruuk te holen en ze richtten mitmekaander de Schrieversronte op. Eerst as vri'jwilligersorgenisaosie, sund 1975 mit bescheiden kantoorruumte in de Meulehoeve in Oosterwoolde mit tiedelike krachten en sund 1 juni 1978 mit de eerste beroepskracht: heufdmitwarker Pieter Jonker. Staorigan wodde et wark op professionele wieze uutbreided, mit financiële hulpe van de gemienten Oost- en West-Stellingwarf en de perveensie Frieslaand. Ok et vri'jwilligersleger gruuide mit de dag. Van 40 leden gruuide de orgenisaosie deur naor krapan 1300 leden. Mit aktiviteiten in tal van taeldomeinen en sund 1 jannewaori 1997 in een schitterende huusvesting in een veurmaolig baankgebouw in Berkoop. Naost de uutgifte van boeken, een eigen tiedschrift, een huus-an-huus boekekraante, kelinders, cd's en dvd's wo'n d'r onderwiesmateriaolen en -projekten veur et basisonderwies realiseerd. D'r wo'n kursussen, lezings en symposia orgeniseerd naost et kenniscentrum veur tael, literetuur en geschiedenis. Spietig is et dat veurlopig een aende kommen is an et wetenschoppelik wark van de Stichting, mar et bestuur lat weten dat et de moed niet opgeft. Op 17 juni is et feest. Perbeerd wodt om o.e. alle oold-bestuursleden die nog in leven in binnen te nugen veur de feestelike uutrikkinge van de H.J. Bergveldpries.


EUPENLOCHTSTOK 'MOEDER GEERTE': BIESTERBAORLIK OM TE ZIEN EN TE HEUREN!

Zaoterdagaovend 4 juli wodde et Appelschester eupenlochtspul Moeder Geerte veur de twiede keer opvoerd. Een prachtig, kleurriek en ofwisselend spektaokel, mit zoe'n 50 speulers en figuraanten. Et stok is van oorsprong Nederlaans, mar wodde veur de gelegenhied speuld in de Stellingwarver vertaeling van Sjoukje Oosterloo. En et Stellingwarfs gaf dudelik een protte eigen kleur an et gehiel.
Wel 500 man bevolkten zaoterdagaovend et verni'jde, pas eupende eupenlochttheater van Appelsche, en tenielgroep De Vriendenkring en de historische verieninge maekten d'r wat prachtigs van. Et ni'je eupenlochttheater is ommeraek mooi inricht en het hiel vule sfeer. De meensken die d'r bi'j weren hebben meraokels geneuten van alles. De orgenisaosie was hatstikke goed. De wardering van et pebliek was hiel groot, niet in et laeste plak omdat nogal wat niet-Stellingwarvers dudelik flink heur best daon hadden om d'r, krek as degenen die et wel van huus uut praoten kunnen, wat aorigs van te maeken. De kompelmenten en hulde veur et gehiel, heurde ie vri'j wat meensken zeggen. Zundagaovend 5 juli wodde et stok nog een keer opvoerd.


Meraokels Middelieuws spektaokel in Wolvege

De veurbi'je zaoterdag wodde een prachtig Middelieuws Stellingwarf 700-spektaokel hullen in et centrum van Wolvege, mit naeme op et Pasteri'jeplein. Middelieuwse kraompies, ambachts- en koopluden, een eettente mit 'ressiesrollegies', 'sneden eerpels' en wat niet al, een mooie meziekkoepel mit een goeie volksmeziekgroep, en... et naospeulen van de belegering van et slot van Vollenhove in 1309, mit ridders, peerden netuurlik, waachters, en... de grote stormtoren. En... een onverwaachse komst van de oolde bisschop daor we et in 1309 mit an de stok hadden, die mit stelling Geert Jansz de Vrede van Wolvege tekende. D'r was een macht volk op 'e lappen bi'j dit grote spektaokel, en de speulders Johan Veenstra (bisschop Guido) en Geert Lantinga (stelling Geert Jansz van Wolvege) hadden ok aorighied an heur rolle, zo te zien. Toch weren de rebelse geluden onder et bi'j mekeer kommende 'gepeupel' niet hielemaole van de locht: pattie zeden dat ze disse vrede niet zo vertrouwden, aanderen wollen betere veurweerden, hielemaole in de stijl van 1309, 1310 dus.
Et weer was goed, de braderie in de buurt was ok plezierig en de mooie Middelieuwse dag was begonnen mit... een prachtig optreden van Duo Amoroso, mit Middelieuwse en aandere oolde meziek, in et gaastvri'je deupsgezinde karkien. Krek bi'j dit mooie optreden had wel wat meer volk wezen kund. Lao'we hopen dat ze gauw es weer in oonze kontreinen te heuren binnen. Op de webstee van Johan Veenstra bin trouwens een tal mooie foto's van et meraokelse spektaokel te zien, kiek van dat ok mar even op www.johan-veenstra.nl. Meer mooie beelden nog bin te vienen op de webstee van Lenus van der Broek: www.lenusvanderbroek.nl (Klik daor an: Middeleeuwse markt.)


Et jaor 1309 herdocht, en 't jubileumjaor 2009 letterlik inluded

Op zaoterdagmiddag 6 feberwaori was d'r een biezundere gebeurtenis in Berkoop. Eerst wodde daor de ni'je, roodwitte jubileumvlagge mit twie griffioenen hesen. Et is de vlagge die bi'j dit herdaenkingsjaor 2009 heurt, en zeker ok bi'j de festiviteiteriegel angaonde Stellingwarf 700. Die vlagge zal op tal van plakken te koop wezen. Et omhogens trekken van de vlagge gebeurde deur lid van de warkgroep 1309-2009 Sjoerd Hoogenkamp, naodat Ike Naafs, krek as him ok lid van de Vereniging Historie Weststellingwerf, in een aorige herdaenkingstoespraoke verschillende meugelikheden anstipt hadde om weeromme te daenken an en in et verleden. Veurof hadde Jan Berend van Elp de Berkoper klokke even een posien beieren laoten. De mennigte geneudigden van historische verienings, warkgroepleden en aanderen, onder wie ok een koppel gemientebestuurders, geneuten van de gebeurtenissen in et et prachtige zunneschienweer. Niet in et laeste plak ok van de bekende histotolk, die dommiet alderhaande schoelen bi'jdaele gaon zal in de gedaonte van Otto van Buil, indertied bi'j de Stellingwarvers in dienst, as huurling uut Amsterdam…
Nao de tied wodden de plechtigheden vervolgd in et gebouw van de Stellingwarver Schrieversronte, dichte bi'j de Berkoper karke. Veurzitter Ype Dijkstra van de Stellingwarver Schrieversronte prissenteerde in een kotte toespraoke de eerste oflevering van de grote aktiviteitefolder Stellingwarf 700. Hi'j wees ok even op de 'asse' van Stellingwarf die hi'j zicht in et historisch tinte dörp Berkoop en et levendige Noordwoolde mit zien Nationaol Vlechtmuseum en et multifunktioneel centreum Et Vlechtwark. Die asse ligt zo mooi in de midden van twie plezierig saemenwarkende gemienten. Dijkstra beud vervolgens eerste exemplaoren an an de pottefuliehoolders veur kultuur van de beide gemienten, borgemeister Gerard van Klaveren van West-Stellingwarf en wethoolder Gerben But van Oost-Stellingwarf. De heer Van Klaveren sprak o.e. zien wardering uut veur de enthousiaste inzet van meensken in de verschillende verienings die mitdoen.
Op uutneudiging van de warkgroep vertelde taelkundige Henk Bloemhoff vervolgens over et ontstaon van Stellingwarf en de opstaand van de Stellingwarvers tegen de bisschop van Utrecht, in et biezunder in 1309. Uut een oorkonde van 1310 dot blieken dat de Stellingwarvers heur nao 1309 bepaold niet daelegavven onder de bisschop, ok al hadden ze de roemruchte slag bi'j Vollenhove op et alderlaeste mement niet winnen kund. De jaoren daornao zien we et gebied Stellingwarf de hieltied weer as een soort vri'j laand te wark gaon. Vandaege-de-dag kun we nog van alles dat mooi en kenmarkend is an oons gebied beweren, docht Bloemhoff. Mit naeme ok de tael, et prachtige monement van vroeger dat d'r in de middelieuwen ok al was. Midden in de Europese wereld kuwwe die nog altied gewoon praoten en schrieven blieven, en dat moe'n we doen ok. Stellingwarfs, yes we can, was hi'j van oordiel.
Nao een kot daankwoord van Schrieversronteveurzitter Dijkstra wodde disse officiële eupening ofsleuten. Daornao was et toch nog ien en al drokte: d'r was een soortement van receptie, d'r kon een Schrieversrontetentoonstelling van veural historische en volkskundige publikaosies bezien wodden, d'r wodden interviews ofneumen, en al zo meer. Goeie 'veurtiermeri'je' veur een goed vervolg van de aktiviteiten in et kader van Stellingwarf 700.
[De biezundere jubileumvlagge was veur elk te koop veur € 17,50 via de speciaole webstee, bi'j de Stellingwarver boekwinkels en bi'j de Stellingwarver Schrieversronte. Hi'j is now uutverkocht.]


Ni'jste Ovend mit o.e. wark van Anton Voorzanger

Et ni'jste nommer van et Stellingwarver tiedschrift De Ovend is d'r al weer. As eerste vaalt te lezen een mooi artikel van Pieter Jonker over et wark van Anton Voorzanger, de bekende keunstschilder uut Oosterwoolde. Interessaante infermaosie, en mit mekeer 8 prachtige ofbelings van gouaches van Voorzanger. Veerder gaot disse Ovend o.e. over de Bergveldpries - die wunnen wodde deur de Stellingwarver Schrieversronte, dat ok et juryrappot is opneumen -, et mooiste Stellingwarver plak in de beleving van netuurkenner Wiebe Scheenstra komt op de bodden, Henk Bloemhoff schrift over de toepassing van diel III van et Europese haandvest veur regiotaelen op et Nedersaksisch, verschillende berichten bin te lezen over de viering Stellingwarf 700, Attie Nijboer geft een beschouwing angaonde Liet 2009 waor 'oonze' zingende en gitaarspeulende Carolien Hunneman in slim positieve zin opvul mit heur nommer 'Zoemer in Frieslaand', ok lees ie een beschouwing/oproep van Fettje Alten en Johan Veenstra over de sutelaktie, zo ok een verslag van de jaorvergeerdering mit een foto van oftredend bestuurslid Jelke Nijboer van Berkoop, en veerder kuj' genieten van gedichten van Koosje Hornstra en Harmen Houtman. En dan is iens nog niet alles nuumd. Al mit al een prachtig nommer, dat los 3 euro kost. Veur 15 euro woj' abonnee en kriej' jaorliks zes nommers. Ie wo'n dan toegelieke lid van de Schrieversronte. (4-7-09)


700 jaor Stellingwarf en Symposium

De ontdekking die hierboven beschreven wodde is hiel toevallig in etzelde jaor as de viering 'Stellingwarf 700', zie veerder op disse webstee mit alderhaande ni'js angaonde de feestelikheden. Op 18 september 2009 orgeniseert de Stichting Stellingwarver Schrieversronte een historisch symposium over Stellingwarf an et begin van de 14e ieuw. Iene van de onderdielen zal wezen een eerste verkenning van et pas ontdekte laandrecht deur dr. Oebele Vries. Plak: 't Vlechtwerk, Noordwoolde. Et begint om 14.00 ure. Meer over et symposium argens aanders op disse webstee.
Op vri'jdag 3 juli die now ankomt hoolt de Stichting Stellingwarver Schrieversronte een passekonfereensie over de voonst. Dr. Oebele Vries geft dan een aldereerste uutleg. Plak: gebouw Stichting Stellingwarver Schrieversronte, Willinge Prinsstraote 10, 8421 PE Berkoop/ Oldeberkoop. Begin: 11.00 uur. Infermaosie: dr. Henk Bloemhoff, taelkundige van o.e. de Stellingwarver Schrieversronte, till. 0516 - 850197, e-mail drhbloemhoff@yahoo.com.


Groot zangfeest in Appelsche in veurbereiding

Dit is beslist wat veur alle liefhebbers van zingen! Een bericht van www.feestkoor.nl van Bert van der Beek, in verbaand mit et te vormen koor mit iederiene in Stellingwarf die graeg zingen wil. In et biezunder in et kader van Stellingwarf 700.
Bert van der Beek en zien groep willen op zundag 12 juli 2009 in Appelsche, mit 700 (zeuvenhonderd!) meensken een gelegenhiedskoor optreden laoten. Iederiene uut de dörpen die mitdoen wil kan him opgeven op de webstee www.feestkoor.nl. Zoj' d'r dan even bi'j zetten willen: '700 jaor Stellingwarf'? Dan wodt et speciaole tekstboek per e-mail toestuurd. Notelezen is niet neudig, d'r zal zongen wodden mit orkestbanen, krek as artiesten dat doen.
D'r moet wel een peer keer oefend wodden. Et zol toch mooi wezen as uut alle dörpen groepen meensken mitdoen om allegeer mit mekeer te zingen. Dus: geef je op!
Op 14 juli 1859 wodde in Appelsche veur de eerste keer et zonuumde Bargfeest hullen. Daor wodde ok een groot koor bi'j vormd. Doe kwammen meensken uut Grunningen, Frieslaand en Drenthe naor de feesten. Now zal d'r een bargfeest wezen op zaoterdag 11 juli.


Ni'je postzegel mit 'Stellingwarf 700' beschikber

Et is dit jaor 700 jaor leden dat de naeme Stellingwarf veur de eerste keer nuumd is in een belangriek dokement, kiek van dat ok veerder op disse webstee. Behalven an et gewone wark en de gewone aktiviteiten geft de Stellingwarver Schrieversronte, krek as hiel wat aandere instellings op et terrein van de regionaole Stellingwarver kultuur, aorig wat ommedaenken an 'Stellingwarf 700', zowat et hiele jaor deur. Om te beginnen: op verschillende verkooppunten in Oost- en West-Stellingwarf kuj' de biezundere postzegel kopen die maekt wodde in verbaand mit Stellingwarf 700. Hi'j zicht d'r prachtig uut. De verkooppunten bin: Primera in Noordwoolde, Primera in Wolvege, boekwinkel Zwikstra in Wolvege, de Bruna-boekwinkel in Oosterwoolde, de Winkel van Sinkel van Terpstra in Scharpenzeel en netuurlik ok de Stellingwarver Schrieversronte in Berkoop. Et gaot om een saemenwarkingsperdukt van de koördinerende warkgroep Stellingwarf 700. Meer is te vienen op de biezundere webstee die d'r veur et jubileumjaor maekt is. Daor vien ie alderhaande aktiviteiten ankondigd vanuut die warkgroep: www.stellingwarf700.nl (kiek dan, om de zegel te zien, ok even onder 'producten')


Jong en oold kun mitdoen an de Stellingwarver Schrieveri'jepries

Dit jaor wodt veur de dadde keer de Stellingwarver Schrieveri'jepries uutrikt. Bi'j die twiejaorlikse anvieteringspries wodt deur de orgeniserende warkgroep elke keer een aander thema keuzen. Dit keer is de keuze valen op de tegenstelling jong en oold.
Om an de schriefwedstried mit te doen, wodt de saemenwarking van twie generaosies vraogd. De schrieverskoppelties moe'n bestaon uut iene ooldere en iene jongere persoon. Dat kun bi'jglieks een vader en zeune wezen, een pake mit zien kleinkiend, een tante mit heur nefien of nichien, een vrouw mit heur buurmaegien. En zo bin d'r nog wel wat meer meugelikheden te bedaenken om een koppeltien te maeken dat gezaemelik een verhael in et Stellingwarfs schrift over heur erverings doe en now.
D'r bin thema's zat te bedaenken waor as gezaemelik een verhael over schreven wodden kan. Wat dat anbelangt bin de dielnemers vri'j in heur keuze. Zo kan de ooldste van de twie bi'jglieks schrieven over et boereleven van vrogger en de jongste over hoe et now toegaot op een mederne boerkeri'je. Ok et dörpsleven, et onderwies, et eten, vekaansie en et uutgaonsleven doe en now, om mar wat te numen, bin thema's waor as meensken van verschillende generaosies saemen best een aorig verhael over schrieven kunnen.
Et verhael moet bestaon uut minstens 700 woorden en wodt in et Stellingwarfs schreven. Dat is de tael die in et zuudoosten van Frieslaand, Zuudwest-Drenthe en Noordwest-Overiessel van ooldsher leeft. Et verhael dat deur de dielnemers schreven wodt, moet veur 15 juni inzunnen wodden.
De verhaelen die inzunnen wodden veur de Stellingwarver Schrieveri'jepries wo'n deur een deskundige jury beoordield. De pries veur et mooiste verhael bestaot uut een oorkonde en een geldbedrag van 500 euro. Hi'j wodt 23 november uutrikt in et gemientehuus in Oosterwoolde.
Infermaosie over et riegelment is te kriegen bi'j de siktaoris van de orgeniserende warkgroep: Marten Tel, gemientehuus Stellingwarf-Oostaende, ofdieling WelZon, till. 0516-566222.


Vierde jaorlikse streektaelkonfereensie ankondigd

Ok dit jaor is d'r weer een grote konfereensie over et bestaon en veural et bestaon blieven van streektaelen. Veur pattie lezers grootkaans een verrassing, mar disse keer is et... in Brussel.
De laeste jaoren bin daor goenend slim aktief mit et biezundere stadsdialekt. Meensken uut hiele Nederlaand en België weg, veural meensken die mit taelbeleid en zo te maeken hebben, zullen d'r henne, naor an te nemen vaalt. De daotum is 12 juni. Meer infermaosie is te vienen op www.variaties.be (anklikken: 'activiteiten'). Twie jaor leden was de konfereensie in 'oons' Noordwoolde. Daor is doe een hiele riegel lezings hullen, die in boekvorm verschenen binnen en zo nog te koop binnen. Titel: Streektaal en duurzaamheid. Uutgever: de Stellingwarver Schrieversronte.


Et ni'jste Tomke-boekien is d'r! Veurleesweke vot-en-daolik nao Pinkster

Kotleden wodden bi'j de Stellingwarver Schrieversronte in Berkoop de ni'je Tomke-boekies bezorgd. Et ni'jste boekien hiet 'Tomke en Romke: hip, hip… hap'. Tomke is veural bedoeld veur ukken. Et boekien verschient in et Friestaelige pat van Frieslaand al veur de veertiende keer, mar sund vier jaor is d'r now ok een Stellingwarfstaelige edisie. De Stellingwarver versie wodt vertaeld deur Sjoukje Oosterloo uut Gersloot. In et boekien beleven et joongien Tomke en zien hontien Romke altied spannende aeventuren. Dit keer bin ze an et gimmestieken, gaon ze naor de zee, pruven snupies en stoppen ies in een fruitbakkien. Behalven verhaelties bin d'r in et kleurige boekien ok lieties, spullegies, opdrachten en kleurplaten opneumen.
De Stellingwarver Schrieversronte stelt veur alle ukken in beide gemienten een Tomke-boekien beschikber. De stichting zorgt d'r liekewel ok veur dat et boekien gratis uutdield wodden kan in de biebeltheken, in de boekwinkels en in de loop van de jaorlikse sutelaktie in september. Et Friestaelige Tomke-boekien wodt uutgeven deur de Afûk in Liwwadden, mit dit instituut het de Stellingwarver Schrieversronte een plezierig saemenwarkingsverbaand.
Oflopen jaor wodde veur et eerst ok mitdaon an de Tomke-veurleesweke in juni. Op initiatief van de Stellingwarver Schrieversronte gaon vri'jwilligers naor een flink tal ukkespeulplakken, om zo an disse biezundere veurleesaktie mit te doen. De koördinaosie in Oost-Stellingwarf wodt verzorgd deur Akkie Zeilstra van Raevenswoold, wiels de koördinaosie in West-Stellingwarf in hanen is van Annie Dedden uut Blesdieke.


Dörpsarchief Berkoop brengt tentoonstelling: 'Gerrit Prop, de wereld in kaart gebracht'

Gerrit Prop (1880-1980) wodde bekend deur zien eerdriekskundige waandkaorten en atlassen die tot in de jaoren tachting bruukt wodden in et onderwies. Daor was hi'j een begrip, en ok bi'j atlas- en kaortemaekers. Nog mar even leden verscheen de biografie “Gerrit Prop – De wereld in kaart gebracht” over him, deur de sociaol-geograaf Dick Rozing uut Amersfoort. Bi'j die gelegenhied het de schriever ok een expesisie over zien leven en wark maekt, tegere mit et Nederlaand Onderwies Museum in Rotterdam en et Historisch Genootschop Lochem. Et dörpsarchief van Berkoop het ok mithulpen, veural angaonde de jonkhied van Prop in Berkoop. Van 29 meie of is de expesisie twie weken in Berkoop.
Plak: gebouw Stellingwarver Schrieversronte, Willinge Prinsstraot nr. 10. Tied: 30 meie - 13 juni, daegeliks van 13.30 tot 17.00 ure. Zaoterdaegen en Pinkstermaendag van 10.00 tot 12.00 en van 13.30 tot 17.00 ure. Op Pinsterzundag is de tentoonstelling dichte.


Prachtige Overiesselse theaterveurstelling douk nog ien keer te zien

In de veurbi'je winter hadde de Overiesselse streektael-theaterveurstelling 'Uutsprèken' een protte sukses, tot in Deurne (Noord-Braobaant) an toe. Op 6 juni 2009 is de uutvoering nog een keer in et grote eupenlochttheater van Ommen, op de Besthemerbarg. Et begint om 20.00 ure; d'r wodt gien intree heven.


Fleurige examendag in Berkoop mit goeie risseltaoten

Op zaoterdag 14 feberwaori wodde de jaorlikse kursus Stellingwarfs I ofsleuten mit een plezierige examendag in Berkoop. De kursisten legden verschillende proeven of, zoas et diktee. Dat beston uut tien zinnegies. Aenlik bin alle muuilikheden in de schriefwieze van et Stellingwarfs in dat diktee verwarkt. Et diktee wodde hiel goed maekt. Een muuiliker onderdiel was de opdracht mit schriftelike vraogen over et Stellingwarfs. As dadde onderdiel van et schriftelik was d'r een opdracht kreatief schrieven, daor as ok weer goeie risseltaoten boekt wodden. D'r kon keuzen wodden uut vieftien onderwarpen; de meerste kursisten keuzen veur onderwarpen as 'Vekaansie' of 'Et oolde huus'. Middags volgde et mondeling examen, mit een blokkien geschiedenis en mit een blokkien over schrieveri'je en tael, mit ok lezen in et Stellingwarfs.
De kursusleiding kwam in de twiede helte van de middag tot et oordiel dat iederiene slaegd was, en zo kon overgaon wodden tot de diploma-uutrikkinge deur Schrieversronte-veurzitter Ype Dijkstra.
Naodat kursusleider Pieter Jonker iederiene welkom hiette hadde in dit biezundere diel van de middag, ston hi'j even stille bi'j et feit dat de kursusleiders Geert Lantinga en Henk Bloemhoff al langer as dattig jaor betrokken binnen bi'j et geven van disse kursus. Hi'j prees ok Roely Bakker uut Makkinge, die van et jaor veur et eerst in de vri'jwillige kursusleiding mitdri'jde. Daornaost is ok Grietje Bosma-Dijkstra uut Sunnege kursusleidster al een hiele poze kursusleidster. Pieter Jonker wees d'r op dat d'r tal van vervolgmeugelikheden binnen veur de kursisten en dat de kursusgroep van 2008-2009 een enthousiaste groep was. In et verleden is ok al bewezen dat de kursussen kweekviever binnen veur ni'j Schrieversronte-telent. Kommitteerde dr. Henk Bloemhoff ston even stille bi'j de geschiedenis van de kursus, die al sund 1976 geven wodt onder toezicht van et Nedersaksisch Instituut. As kursusleider behaandelde hi'j ok even de goeie antwoorden van de schriftelike opdracht van et examen; et hadde blieken daon dat die veur de meersten nog wel wat muuilik was.
Doe mochten de elf kursisten naor veuren kommen om et diploma in ontvangst te nemen uut hanen van veurzitter Ype Dijkstra. Die gong in zien toespraoke in op et belang van de kursus en hi'j prees ok de inzet van de kursisten. Hi'j reup ze op om mit te doen an de Schrieveri'je-pries en zee te hopen dat ieder op zien eigen meniere ok een vervolg geft an disse kursus.
As teken van daank kregen de kursusleiders nao ofloop nog een mooi boeket bloemen van de kursisten. In meie krigt de kursus nog een mooie ofronding mit een mooie exkursie in et gebied van De Scheene, onder leiding van kursusleider Geert Lantinga. De eerste anmeldings veur de ni'je kursus, die in de haast weer begint, bin al binnen. Inderdaod, ie kun je al weer opgeven bi'j de Stichting Stellingwarver Schrieversronte in Berkoop.


Keuning Winter

Iespegels hangen an de daoke
Ze flonkeren as kristal
De vraoge is, zoas zo vaeke,
Of de koolde anholen zal.

Ja, Keuning Winter lopt mit oons te dwepen
In de sloden ligt een laogien ies
Pattie scheuvels bin al slepen
De barometer maekt oons toch niks wies?

Nog een peer vostige naachten
Weerman hoe staon we d'r veur?
We kun haost niet meer waachten
Gaot de 'tocht der tochten' deur?

Attie Nijboer, jannewaori 2009


Eerste grote aktiviteit over Stellingwarf 700 trok volle zael

De eerste grotere aktiviteit in et locht van et Stellingwarver jubileumjaor was zaoterdagmiddag 31 jannewaori in et gebouw De Hoolten Klinte, niet veer van de Bosbarg in Appelsche. De oe zo aktieve Historische Verieninge van Appelsche en omgeving hadde de primeur in een riegel van zoe'n twintig aktiviteiten en manifestaosies zoas die now uutzet binnen deur et hiele jaor 2009 henne.
Disse middag wodde spendeerd an de biezundere konflikten mit bisschop Gui van Utrecht in, nao, en ongetwiefeld ok veur 1309. Van 1309 dateert een belangrieke oorkondetekst van bisschop Gui. Die zien slot in Vollenhove, dat een soort bestuurlik mar ok een militair machtscentrum was en zodoende een geveer was veur de Stellingwarvers en de meensken uut Schoterwarf, wodde deur heur op een geunstig mement anvalen. Op een haor nao hadden de Stellingwarvers en heur kammeraoden de stried wunnen, mar ze wodden keerd, mit naeme deurdat de verdedigers van et kesteel een vat branende pek op de stormtoren van de Stellingwarvers gooiden.
Et leger van de bisschop zette heur toch mar niet nao. Neffens sommige kroniekschrievers hadden de Stellingwarver op dat mement God an heur kaante, want et was beesteweer en de Hollaanse en Utrechtse ridders mit heur helpers uut Et Sticht (Overiessel) vunnen et toch te bezwaorlik, over die modderige wegen en deur een soort jungle-achtig terrein.
In een belangrieke oorkonde van augustus 1309 drokte de bisschop zien woede en straf uut, en in de tekst d'r van vienen we veur et eerst mit naeme en toenaeme dus et laand Stellingwarf nuumd, en ok Schoterwarf, mit een anduding van de soorten bestuurders en rechters. Lezinghoolder Henk Bloemhoff gong op tal van aspekten van die tied en daornao in, en gong ok even in op de tied van de Romantiek in de Nederlaanse letterkunde. Wi'j daanken an die stroming niet allienig een historische aeventureroman van Anne Diederik van Buren Schele die de belegering van et slot in Vollenhove as stof keus (1836), mar ok... de eerste gedichten in et Stellingwarfs, die publiceerd binnen in de Friese Volksalmenak (o.e. 1837).
Nao de pauze gong et veerder an de haand van dia's. Grootte, aord en kerakter van et oolde laand Stellingwarf liekewel as karkestichtings, et centraole plak van Berkoop en in biezunder de periode van de Stellingwarvers as appat laand mit heur claim dat ze ok 'vri'je Friezen' weren (in de tied tussen 1300 en 1500) kwammen op de bodden. En zo ok de komst van et bezettingsleger van Albrecht van Saksen in september 1500. Doe was d'r gien holen meer an, en van dat mement of kwam Stellingwarf bi'j Frieslaand, eerst as iene grieteni'je (de veurloper van de 'gemiente'), wiels et opsplissen in 1517 begon. En zodoende dus hewwe vandaege-de-dag twie gemienten.
Et pebliek kwam ok veer buten Appelsche weg. Middagveurzitter Johan Oosterloo van de Appelschester Historische Verieninge was dikke tevreden mit de opkomst en reup elk op om ok te kommen naor de verschillende aandere festiviteiten die d'r an kommen in et kader van et 700-jaorig bestaon van Stellingwarf. In Appelsche zels wo'n dommiet de historische Bergfeesten weer uutvoerd en bin d'r drie veurstellings van et eupenlochtspul Moeder Geerte in et Appelschester Eupenlochttheater. Dat zal dan weer hielemaole as ni'j wezen. Henk Bloemhoff attendeerde veerder nog op de oorkondetentoonstelling van de zommer in Noordwoolde, en in et biezunder op et historisch symposium, dat op 18 september ok in Noordwoolde holen wodden zal. Mar d'r bin ok alderhaande kleindere aktiviteiten en grotere peblieksaktiviteiten, zoas in juni. Dan wodt d'r in Wolvege een grote middelieuwse mark holen. En op 1 feberwaori weren een hiele riegel Stellingwarver dichters te heuren in et lekaole radiopergramme Huus en Hiem mit (ok) as thema 'Stellingwarf 700'. Kiek ok op: www.stellingwarf700.nl (en zuuk benaemens onder de aktiviteiten)


Op 3 april opvoering anpaste Stellingwarfcantate

Op vri'jdagaovend 3 april zal in een speciaole opvoering de Stellingwarf Cantate opni'j te zien en te heuren wezen. Et Anbo-koor van Wolvege e.o. is, tegere mit heur dirigent Jan Brens, al mit de veurbereidings an de gang. Datzelde gelt ok veur de schriever van de Cantate, Johan Veenstra, die de tekst hier en daor anpast het an et thema Stellingwarf 700.
De Stellingwarf Cantate zal opvoerd wodden in de prachtige karke van Berkoop. De aovend begint om 20.00 ure en et pergramme duurt omdebi'j aanderhalf ure. De intree is € 6,00. D'r kan al van maendag 5 jannewaori of risserveerd wodden bi'j de Stellingwarver Schrieversronte in Berkoop (till. 0516-451108, e-mail info@stellingwarfs.nl. Vanof 1 feberwaori kun daor dan ok de kaorties ofhaeld wodden. Mar zie oonze eupeningstieden boven disse websteebladziede.


Twiejaorlikse mannefestaosie Stichting Nederlaanse Dialekten disse keer in Hogevene

Kwam de internationaole streektaelkonfereensie een kleine twie jaor leden nog naor et Stellingwarver Noordwoolde, de Stichting Nederlaanse Dialekten trekt disse keer ok naor et noorden. Dat zal wezen op 28 meert. Dan hoolt de SND de tiende oflevering van de twiejaorlikse dialektedag in Theater en Congrescentrum De Tamboer in Hogevene. Elke keer brengt de 'dialektedag' honderden liefhebbers van streektaelen en dialekten uut et zuden en noorden bi'j mekeer, en daor wodt ok weer op rekend now, nao de oflevering van 2007 in Mechelen, een Drents plak an de beurt is. Et thema veur disse jubileumuutvoering is de regionaole verscheidenhied in streektael en dialekt, waorbi'j mit naeme ok keken wodt naor taelverschil in verbaand mit leeftied. D'r is een keuze maekt om te kieken naor woorden veur mekeer dagzeggen, goenend anspreken, et van mekeer ofscheid nemen, et gelokweensken, zeggen dat et je spiet en al zo meer.
Et pergramme het eerst een diel mit lezings, o.e. van de bekende dialektoloog Jan Stroop. Hi'j zal een algemiene lezing verzorgen 'Over hartelijke groeten en beste wensen'. Dan is d'r een lezing van Frank den Hollander over 'Een Zeeuw in Groningen – met een uitstapje naar Schellebelle!' Hi'j en Peter de Haan verzorgen vervolgens een muzikaol tussenstok. Reinhild Vandekerckhove gaot daornao in op “De chattaal van tieners tussen 'lokaal' en 'mondiaal'”. Et morgenpergramme wodt ofsleuten mit de prissentaosie van et ni'je, bi'j de twiejaorlikse dialektedag gebrukelike dialekteboek. Middags is d'r een riegel warkwinkels, o.e. over de 35 jaor durende vertaelaktiviteiten veur de laestdaegs verschenen Biebel in et Grunnings, en over de schrieveri'je in streektael en dialekt. D'r is middags veerder een grote infomark van de streektaelinstituten.

In et Nederlaans bin de menieren om mekeer dag te zeggen nogal slim neffens ien en dezelde vorm wodden. Mar de dialekten en streektaelen kennen wel een geweldigen riekdom an woorden die bi'j et dagzeggen enz. bruukt wodden. Zo kuj' daenken an et Braobaanse houdoe, et Twentse goodgaon, et Grunnings-Drentse moi, et Fries-Stellingwarfs-Drentse goeie en et Stellingwarver ofscheid tot kiek es. Veur elke regio hebben verschillende auteurs uut et Nederlaanse en Vlaamse taelgebied onderzuuk daon en een artikel schreven om de variaosie in beeld te brengen. De bi'jdregen staon et tiende dialekteboek van de Stichting Nederlaanse Dialekten. Dat wodt de morgens van de 28e meert prissenteerd en is daornao te koop. Et kan naoderhaand ok bi'j de SND besteld wodden. An de ni'je bundel hebben ok een riegel bekende noordelike auteurs mitdaon. De Stellingwarver bi'jdrege wodde leverd deur Henk Bloemhoff van et streektaelinstituut Stellingwarver Schrieversronte in Berkoop. Die veur Overiessel deur Philomène Bloemhoff-de Bruijn, projektleider streektael van de Iesselakedemie in Kaampen. De Drentse bi'jdrege schreef Abel Darwinkel, warkzem an et Drentse streektaelinstituut Huus van de Taol in Beilen. De Grunninger bi'jdrege is van de haand van Siemon Reker, heufd van et Buro veur Grunninger tael en kultuur van de RUG. De Friese bi'jdrege komt van Pieter Breuker, verbunnen an et Fries Instituut van de RUG.


RTV Drenthe zal ommedaenken geven an Stellingwarf 700

Bi'j gelegenhied van de feestelike eupening van dit jaor mit biezundere evenementen i.v.m. 700 jaor 'Stellingwarf' het RTV Drenthe nogal wat opnaemen maekt veur een reportage die uutzunnen wodden zal in et pergramme Drents Diep. Et pergramme zal 25 menuten duren en uutzunnen wodden om 18.35, 19.45, 20.45, 21.45 en 22.45 ure. Laeter kuj' et pergramme nog bekieken op de webstee van TV Drenthe. Zie veur et gehiel van aktiviteiten in et kader van Stellingwarf 700 de biezundere webstee www.stellingwarf700.nl



Eupening 'Stellingwarf 700'-jaor, en... speciaole jubileumvlagge!

Op vri'jdagmiddag 6 feberwaori 2009 is bi'j de karke van Berkoop de eupening van een biezunder jaor vol aktiviteiten. Et is dit 700 jaor leden dat de naeme Stellingwarf bruukt wodde in de ooldste oorkonde die we an now toe kennen mit die naeme van oons gebied. Alle reden veur tal van Stellingwarver verienings en instellings om alderhaande aktiviteiten in et kader d'r van te orgeniseren. Om ien en aander goed te koördineren bin al in 2007 verschillende historische verienings en de Stellingwarver Schrieversronte bi'j mekere zitten gaon veur overleg. Uut die bi'jienkomsten is in 2008 een speciaole warkgroep insteld, mit vertegenwoordigers uut die historische verienings en de Stellingwarver Schrieversronte. De warkgroep 1309 het d'r onderdehaand veur zorgd dat d'r bi'jglieks een speciaole webstee is (www.stellingwarf700.nl), mit o.e. een overzicht van alle aktiviteiten in dit jaor. Elkeniene kan zien of heur aktiviteit, mit as thema Stellingwarf 700, deurgeven en wodt dan in dat overzicht opneumen. De warkgroep is et feestelike jaor liekewel begonnen mit de uutgifte van speciaole Stellingwarf 700 jaor-postzegels. Daor bliekt een geweldigen belangstelling veur te wezen.
De officiële eupening van et Stellingwarf 700-jaor, daor de beide gemientebesturen veur nuugd binnen, zal gebeuren deur een speciaole jubileumvlagge uut te stikken. Dat zal allemaole wezen in Berkoop, iene van de ooldste dörpen van de regio. Berkoop wodt butendat vanoolds zien as een soort centrum van et hiele gebied, dat zodoende. De jubileumvlagge zal hesen wodden in de vlaggemast naost de Berkoper karke. Op de vlagge, een ontwarp van warkgroeplid Sjoerd Hoogenkamp, bin o.e. de griffioenen van Oost- en West-Stellingwarf te zien. Veur de vlagge is al een protte belangstelling, bi'j veurintekening bin al meer as honderd exemplaoren ofneumen. De vlagge is veur elk te koop veur € 17,50 via de speciaole webstee, bi'j de Stellingwarver boekwinkels en bi'j de Stellingwarver Schrieversronte.
Nao de plechtighied is d'r een bi'jienkomst in et paand van de Stellingwarver Schrieversronte, waor dr. Henk Bloemhoff, taelkundige van dat instituut, ien en aander om et biezundere jaor 1309 henne uut de doeken doen zal. Daornaost zullen ere aktiviteiten en akties veur dit jaor prissenteerd wodden.


Veul wardering veur Nedersaksisch Vocaal Ensemble op ni'jjaorsbi'jienkomst

Oflopen zaoterdagaovend hul de Stellingwarver Schrieversronte zien ni'jjaorsbi'jienkomst in 't Vlechtwark in Noordwoolde. Daor kwam flink wat volk op of, want de zael van 't Vlechtwark was meer as vol. In zien ni'jjaorstoespraoke vertelde veurzitter Ype Dijkstra mit naeme over alle plannen die de Stellingwarver Schrieversronte veur dit jaor weer uutvoeren gaot, zoas de projekten veur de peuters en kleuters, ni'je kursussen, tal van uutgiften en et dadde Stellingwarver popfestival.
Daornao volgde et eerste optreden van et Nedersaksisch Vocaal Ensemble, dat deur de toeheurders ommeraek wardeerd wodde. Et koor, dat uut zoe'n 25 personen bestaot en waorvan de leden uut et Nedersaksische taelgebied kommen, leut lieties in et Drents, Grunnings en Aachterhoeks heuren en wodde begeleided deur een pianist en een fluitiste. Nao et eerste optreden was et de beurt an de Drentse schriever Jan Germs, in et daegeliks leven direkteur van et Huus van de Taol. Van zien haand verschenen an now toe drie boeken in et Drents. Germs schrift hiele herkenbere, humoristische verhaelen, mar ok serieuze en gevulige. Van beide leut hi'j zaoterdagaovend een veurbeeld heuren.
Nao et schoft dee Henk Bloemhoff, taelkundige bi´j de Schrieversronte, ien en aander uut de doeken over et biezundere jaor 1309. Van dat jaor dateert et ooldste schriftelike gebruuk van de naeme Stellingwarf.
Om die reden zullen d'r dit jaor een tal festiviteiten holen wodden, zoas een tentoonstelling van oolde oorkonden. Op 18 september is d'r een historisch symposium [zie ok veerder op disse webstee].
In et twiede optreden van et Nedersaksisch Vocaal Ensemble wodde deur et koor ok een Stellingwarfs lied naor veuren brocht ('Soezen' van Jan Oosterhof uut Steggerde). Et wodde deur ien van de koorleden ankondigd in et Stellingwarfs, een oold-inwoner van Wolvege. Nao een twiede veurdracht van Jan Germs was d'r nog tied veur een gezellige naozit en daor maekten nog hiel wat bezukers gebruuk van.


Ni'jjaorsbi'jienkomst 2009 van de Stellingwarver Schrieversronte

Op de aovend van 17 jannewaori hoolt de Stichting Stellingwarver Schrieversronte zien ni'jjaorsbi'jienkomst. Et is in 't Vlechtwark in Noordwoolde. Nao de ni'jjaorstoespraoke van veurzitter Ype Dijkstra zal et Nedersaksisch Vocaal Ensemble optreden en brengt de Drentse schriever Jan Germs een tal verhaelen uut eigen wark naor veuren. Ok zal Henk Bloemhoff, taelkundige van de Schrieversronte, ien en aander vertellen over de ooldste vermelding van de naeme Stellingwarf, uut 1309. Dit jaor zullen wegens et minstens 700 jaor oold wezen van die naeme behalven de Schrieversronte bi'jglieks ok tal van Historische Verienings aorige aktiviteiten holen.
Et Nedersaksisch Vocaal Ensemble is een streektaelkoor dat him doende hoolt mit et maeken en uutvoeren van meziek veur koren in de verschillende Nedersaksische streektaelen, zoas et Grunnings en et Drents. In Noordwoolde zal et koor veur et eerst drie lieties in et Stellingwarfs naor veuren brengen. Op dit mement bestaot et koor uut 26 leden.
De Drentse schriever Jan Germs is in zien daegelikse leven direkteur van de Drentse stichting Huus van de Taol. Dat instituut kuj' vergelieken mit dat van de Stellingwarver Schrieversronte. Jan Germs het een humoristische meniere van schrieven en kan zien eigen verhaelen arg mooi vertellen.
Wie zin het om disse biezundere aovend ok mit te maeken is van hatte welkom. Vanwegens et biezundere en feestelike jaor 2009 kan dit keer iederiene de ni'jjaorsbi'jienkomst van de Stellingwarver Schrieversronte ommenocht bi'jwonen. Ie moe'n je dan wel even tillefonisch opgeven (0516-451108) of via de mail: info@stellingwarfs.nl. Et pergramme begint zaoterdagaovend om 20.00 ure.


Veurleesaktie winterverhaelen in et Stellingwarfs op 29 en 30 december 2008

Inititatief van Stellingwarver biebeltheken en Stellingwarver Schrieversronte

Op maendag 29 en deensdag 30 december gaon een kleine dattig vri'jwilligers veur de twiede keer op pad veur een grote Stellingwarver veurleesaktie. De aktie wodt orgeniseerd deur de Stellingwarver Schrieversronte en de Stellingwarver biebeltheken en is veural bedoeld veur de ooldere inwoners van Stellingwarf die in verpleeghuzen of zorginstellings wonen. Daornaost wodt d'r in vier biebeltheken in et Stellingwarfs veurlezen.
Omdat juust in de donkere tied van et jaor wat extra ommedaenken veur ooldere en/of zieke meensken hiel belangriek wezen kan, bin de beide veurleesdaegen orgeniseerd. Daornaost vienen biebeltheken en Schrieversronte et belangriek om op disse meniere et wark in de zorg te ondersteunen. Een schoffien leden wodden daoromme ok dit jaor alle verpleeghuzen en zorginstellings in beide gemienten anschreven mit de vraoge as ze dit jaor opni'j gebruuk maeken wollen van et veurleesanbod. Ok now wodde daor enthousiast op reageerd en de veurbereidings gongen uut aende.
Deur de mitwarkers van de Schrieversronte wodde veurig jaor al een selektie van winterverhaelen maekt en in een appatte map verzaemeld. Dit jaor is d'r opni'j een map saemensteld, daor een tal ni'je verhaelen in opneumen binnen. Net as veurig jaor wo'n ok now die mappen weer in de instellings aachterlaoten, zodat d'r ok nao de aktie gebruuk van maekt wodden kan. Disse weke zullen deur veurzitter Ype Dijkstra van de Stellingwarver Schrieversronte op een speciaole bi'jienkomst de ni'je mappen an de veurlezers uutdield wodden.

In biebeltheken iederiene welkom

Ok in vier Stellingwarver biebeltheken wo'n op maendag 29 december en deensdag 30 december Stellingwarver winterverhaelen veurlezen. In Noordwoolde en Wolvege gebeurt dat op de maendagmiddag vanof half drieje. In Appelsche wodt d'r een dag laeter veurlezen (middags om half drieje) en in Oosterwoolde op de deensdagaovend, om half achte. Et veurlezen is ok in de biebeltheken veural bedoeld veur ooldere meensken, mar vanzels bin ere interesseerden ok van hatte welkom. De toegang is ommenocht.

Kael

De eerde roekt,
De zoemer stoekt,
Trekt an et kotste aend'

De bomen wo'n kael,
De wiend gaot an de hael,
Zien laeste blad verwent
Et oge mit zien kleuren.

Laot et mar gebeuren,
Omreden kael ok went!

Attie Nijboer, 25 oktober 2008.


Schitterend boek over de 13 dörpen van Oost-Stellingwarf verschenen. Eerste exemplaor veur Vrouw G.A.A. Oosterwijk

Oflopen zaoterdagmorgen 30 augustus 2008 was in de Brunaboekwinkel in Oosterwoolde de feestelike prissentaosie van et boek Gien plak dat mi'j zo trekt. De 13 dörpen van Oost-Stellingwarf vroeger. Et is een uutgifte van drokkeri'je Van der Meer en de Stichting Stellingwarver Schrieversronte tegere, en die wodde schreven deur dr. Henk Bloemhoff van Oosterwoolde. Et boek het prachtige foto's van Sietske Bloemhoff (Oosterwoolde) en een riegel ni'je gedichten van Attie Nijboer van De Fochtel.
In et boek bin over alle dörpen slim aorige historische biezunderheden en interessaante feiten te lezen. De 'grepen uut de geschiedenis' bin anvuld mit foto's van vroeger, mar alles is ok opfleurd mit kleurefoto's van vandaege-de-dag. Per dörp wodt de Oost-Stellingwarver sfeer extra verstarkt mit bestaonde gedichten of lietiesteksten of speciaol veur dit boek schreven gedichten van Attie Nijboer.
In et boek is ok, bi'j wieze van eerbetoon, ommedaenken veur dr. T.H. Oosterwijk, oold-borgemeister van Oost-Stellingwarf. Dit vanwegens zien grote kundigheden, zien boeken, lezings en artikels over de geschiedenis van Oost-Stellingwarf en ok om zien inzet om de meensken liefde veur die geschiedenis bi'j te brengen. Oosterwijk was indertied een slim gezien borgemeister mit veul interesse veur de geschiedenis, in et biezunder die van de Stellingwarver regio. In zien tied as student ekenemie in Leiden was hi'j al in de weer mit et schrieven over de historie van Oost-Stellingwarf en laeter zol hi'j daor nog meer mit an de slag wezen, zo vertelde de schriever van et ni'je boek tiedens de bi'jienkomst. Bloemhoff vertelde altied hiel veul respekt en wardering veur dr. Oosterwijk had te hebben. Dat was al begonnen in de tied dat dr. Oosterwijk, nog veur zien borgemeisterschop, les gaf an de R.H.B.S. in Oosterwoolde. De laeste les veur de vekaansie vertelde hi'j dan zien leerlingen over de geschiedenis van Oost-Stellingwarf, i.p.v. dat hi'j zien gewoonlike lessen Staotsinrichting en Staotshuushooldkunde gaf. Deur zien enthousiaste wieze van vertellen bin tal van leerlingen interesseerd raekt in de geschiedenis van de eigen streek. Henk Bloemhoff is een veurbeeld van iene die zeker ok deur de lessen van Oosterwijk inspireerd wodde om daor ok mit an de slag te gaon. Et is ok om die reden dat Bloemhoff et eerste exemplaor van zien ni'je boek overhaandigde an de wedevrouw van dr. Oosterwijk, Vrouw G.A.A. Oosterwijk. Vrouw Oosterwijk bleek in heur reaktie slim inneumen mit et boek en toonde heur biezunder bliede dat et wark van heur man deurzet wodt, in dit geval deur iene van zien oold-leerlingen.
De prissentaosie van et boek wodde op een plezierige meniere leided deur de heer Ype Dijkstra van Oosterwoolde, oold-inwoner van De Fochtel en eerder o.e. borgemeister van Boarnsterhim. Dijkstra het zels behalven in de tael ok een protte interesse in de historie. Hi'j gong in zien woord van welkom naodrokkelik in op et belang van de goeie saemenwarking van de Stellingwarver Schrieversronte mit aandere perti'jen, zoas in dit geval drokkeri'je Van der Meer en streekkraante De Grijpvogel. Hi'j wees op et grote belang - mit naeme veur de streek zels - van et mit mekeer warken an de eigen tael en kultuur, en et belang om daor de goeie dingen uut op een goeie meniere naor veuren te brengen. Hi'j benaodrokte hoeveul en hoe goed de Schrieversronte hiel vule uut de wege zet. Van de kultuurbeleving uut die hi'j het hecht hi'j daor grote weerde an, en hi'j kon him trouwens ok niet aanders veurstellen as dat et ni'je boek gauw zien weg naor et pebliek vienen zal.


Bestuur Stellingwarver Schrieversronte fielseteerde schriever Johan Veenstra

Een weke of wat leden het d'r weer een biezunder mement west in et jaorenlange sukses van de Stellingwarver schriever Johan Veenstra. Dat was doe die veur de 2500ste keer een optreden verzorgde mit veurdracht uut zien wark. Dit meraokels grote sukses is niet ongemurken veurbi'jgaon. En ok Johan Veenstra zien vaaste uutgever, de Stellingwarver Schrieversronte, het d'r op een biezunder meniere ommedaenken an geven. De schriever was uutneudigd veur een kotte, biezundere bi'jienkomst mit et bestuur. Veurzitter Ype Dijkstra ston stille bi'j et biezundere sukses mit schrieven en optreden dat Veenstra had het en nog altied het. Zien biezundere anleg, zien arg goeie direkte kontakt mit et pebliek en et feit dat hi'j him de hieltied zet om goeie teksten te kriegen mit slim verzorgde tael, dat bin zaeken die pebliek en bestuur van de Schrieversronte slim warderen. Behalven de hattelike woorden en de fielsetaosie mit et sukses weren d'r van de Schrieversronte netuurlik bloemen, en ok een mooi kedo in boekvorm. Veenstra gong vervolgens nog even in op wat him as schriever zoal de hieltied te doen vaalt, en hoe hi'j dat beleeft [bericht uut et naojaor van 2008].


Opni'j: Tael en Thee

Een groepien meensken dat him doende hoolt mit de schrieveri'je in et Stellingwarfs orgeniseert op zundag 21 december 2008 weer een bi'jienkomst mit diezelde Stellingwarver schrieveri'je. Krek as beide veurige keren is 'Tael en Thee' in et theater van Karst Berkenbosch, an de Wolvegesterweg in Berkoop. Tied: 15.00 tot 17.30 ure. Entree: € 6,50. Ie kun je opgeven tot en mit 2 december op info@stellingwarfs.nl. Zie ok een aentien veerder op disse bladziede van de webstee.


Tael en thee, tael en thee, tael en thee, tael en thee

Op 21 december staon de thee en de koffie weer klaor bi'j Karst Berkenbosch an de Wolvegasterweg 16 in Berkoop.

Thee mit wat d'r bi'j
Pattie manluden en vrouwluden
Doende mit de Stellingwarver schrieveri'je
Willen jim heur idenen uutduden
Misschien over kast of eteri'je.
In thee mit tael
Of tael mit thee
Een mooi verhael
Mit wat lekkers d'r bi'j!

Toeloop in Berkoop
Bi'j Karst in Berkoop
In zien zonuumde Kiekkast
Verwaachten we aorig wat toeloop
Dus, risserveer mar vast!

Tot laeter bi'j Karst in et theater

Beste meensken, neteer;
Dan vergeten jim et niet.
Krek as de ere keer
Is 15.00 -17.30 de tied.

Neteer en mail of tillefoneer

Tot besluut
Kuwwe nog vertellen
Jim kun oons mailen of bellen
Dat maekt hielendal niks uut.

De kosten veur et vermaek
Bedregen € 6,50 p.p.
D'r is drinken ommeraek
En de vulde koeke, die zet stee!

Je opgeven kan t/m 12 december bi'j de
Stichting Stellingwarver Schrieversronte
Willinge Prinsstraote 10, 8421 Oldeberkoop/Berkoop
Tillefoon: (0516) 45 11 08
e-mail: info@stellingwarfs.nl

(Attie Nijboer)


Opfriskursus ofsleuten, beginnerskursus begonnen

Op donderdagaovend 13 november 2008 wodde de opfriskursus Stellingwarfs van disse haast ofsleuten mit een drokke en gezellige les, die krek as aanders twienenhalf ure duurde. Uut naeme van de tien kursisten bedaankte kursiste Ypkje van der Vegt de Stellingwarver Schrieversronte veur et aorige kursusanbod en in et biezunder kursusleider Henk Bloemhoff. In et veurjaor komt d´r nog een kleine netuurexkursie mit disse groep; die wodt orgeniseerd deur iene van de kursisten. Dezelde aovend, ok in et gebouw van de Stellingwarver Schrieversronte, gong de ni'jste beginnerskursus Stellingwarfs I uut aende, disse eerste keer onder leiding van de vrouwluden Grietje Bosma en Roelie Bakker. De beginnerskursus het mit mekeer tien lesaovens van elk twienenhalf ure. Ok disse kursus het tien ni´je kursisten.


Boek De geschiedenis van de diergeneeskunde in Ooststellingwerf verschenen

Op zaoterdagmiddag 17 meie verscheen et ni'je boek De geschiedenis van de diergeneeskunde in Ooststellingwerf. Et is in eigen beheer uutgeven deur de beide auteurs Thom Adamse (Haulerwiek) en Harm Eggink (Oosterwoolde), in saemenwarking mit de Stellingwarver Schrieversronte. Zi'j hebben van 1957 tot 1993 as diere-arts warkzem west in de gemiente Oost-Stellingwarf.
Zoe'n drie jaor leden bin de oold-kollega's Adamse en Eggink begonnen mit onderzuuk te doen naor de geschiedenis van de diergeneeskunde in Oost-Stellingwarf, om die vervolgens vaaste te leggen in boekvorm. Et idee was dat eers misschien een hieleboel wetensweerdigheden op dit terrein verleuren gaon konnen.
Et ni'je boek is vule meer wodden as een historisch overzicht, zoas in eerste instaansie misschien et doel was. De schrievers hebben veur een slim lezensweerdig en toegaankelik verhael zorgd, dat veur iederiene die in de historie van Stellingwarf interesseerd is, biezunder de muuite weerd is om te lezen. Behalven dat de historie dudelik en helder weergeven is, wodt die hier en daor ok nog onderbreuken mit mooie anekdotes uut de praktiek. Daornaost bin in et boek hiel wat aorige foto's opneumen en ok ofbelings van bi'jglieks kalverschetspepieren en bosschoppebriefies.
De geschiedenis van de diergeneeskunde in Ooststellingwerf telt 136 bladzieden en kost € 12,50. Et is van woensdag 21 meie of te koop bi'j de Stellingwarver Schrieversronte in Berkoop en een weke laeter ok in de Stellingwarver boekwinkels.

OPROEP ni'je winterverhaelen

Et doel is om dit jaor veur de twiede keer Stellingwarver veurleesdaegen te orgeniseren in alle verpleeghuzen en zorginstellings in hiel Stellingwarf. Veurig jaor december gebeurde dat veur et eerst en et initiatief wodde ommeraek wardeerd. In een peer zorginstellings wodt now alderdeegst nog de hieltied mit riegelmaot deur een peer van de vri'jwilligers van doe veurlezen. Een reden veur de orgenisaosie (de Stellingwarver biebeltheken en de Stellingwarver Schrieversronte) om dit jaor op maendag 29 en deensdag 30 december opni'j twie veurleesdaegen te holen. Et aachterliggende idee van de daegen is om juust in die donkere tied van et jaor een plezierig extragien te verzorgen veur de vaeks ooldere, of zieke, en pattietoeren ok wat ienzeme bewoners van de tehuzen.
Veurig jaor wodde van teveuren een riegel verhaelen uutkeuzen en verzaemeld in een bundel. Die bundel wodde nao et veurlezen aachterlaoten in et tehuus waor veurlezen was, zodat d'r nog es weer gebruuk van maekt wodden kan. Ok veur dit jaor is dat de bedoeling. Van verschillende veurlezers van veurig jaor wodde liekewel naoderhaand dudelik dat de verscheidenhied an verhaelen om uut veur te lezen wel wat groter kon. Daoromme now al disse oproep an iederiene die d'r aorighied an het en schrief in et Stellingwarfs. Zoj' de kommende, vast mooie en waarme zommertied, es naodaenken willen over dit verzuuk en schrief een aorig verhael veur de veurleesaktie in december? En wie wet wodt et now en dan zo bruuierig en brodsig waarm, dat alliend et schrieven over winterse zaeken veur een noflik stokkien verkoeling zorgt!
De orgenisaosie zol ni'je verhaelen graeg uterlik maendag 13 oktober binnen hebben willen op et kantoor van de Schrieversronte, Willinge Prinsstraote 10, 8421 PE Berkoop/Oldeberkoop, info@stellingwarfs.nl.


eerdere publikaosies van Attie Nijboer op disse webstee:
Griekenlaand

Witkalkte husies
langs een gooldgeel straand

Daor vuul ik mi'j thuus
ok al bin ie butenlaand

Waor bougainville bluuit tegen de muren
en zwoele naachten een iewighied duren

Laand van zunne, sirtaki en rooie wien
Ik wil jow elk jaor weeromme zien.

Attie Nijboer


Vliegeren


Ik vlieger op et straand,
d'r staot een straffe wiend.

Zien touw in mien haand,
et lot dat oons tegere verbint.

Hi'j gaot niet an de kaant',
as de netuur 'm niet inbint.

Mar ik gebruuk mien verstaand
Wor niet deur overmoed verbliend.

Attie Nijboer



De Riembus komt d'r an, op initiatief van de warkgroep 'Alles rondom Taal', in et kader van de kienderboekeweke

(uut de haast van 2008)

Disse weke is de kienderboekeweke weer uut aende zet. Dit jaor orgeniseert de warkgroep Alles rondom taal (iene van de warkgroepen van de Stichting Kunstwerf) een biezundere aktiviteit in Oost-Stellingwarf om et thema van de kienderboekeweke Verzineenverzinzin henne. Veur die aktiviteit bin alle groepen achte van alle basisschoelen in Stellingwarf-Oostaende anschreven. Veertien schoelen hebben heur opgeven, en mit dat risseltaot mag de warkgroep ommeraek tevreden wezen.
Doel van de Riembus is om leerlingen van groep achte an de iene kaante in de kunde kommen te laoten mit bepaolde instellings of instituten in oonze gemiente, an de aandere kaante gaon de leerlingen op een speulse meniere ´an et wark´ mit et thema van disse kiendeboekeweke. Mit een speciaole Riembus ('riemen' is et woord veur 'rijmen' in et Stellingwarfs) wo´n de leerlingen de morgens ophaeld, ze doen op drie verschillende plakken opdrachten en ze kommen tegen half twaelven in de Eupenbaore Biebeltheek in Oosterwoolde.

De Riembus zal de eerste keer stoppen bi'j de Stichting Stellingwarver Schrieversronte in Berkoop. Mitwarkers van et streektaelinstituut zullen wat vertellen over et doel van de stichting en ze hebben een riegeltien aorige opdrachten klaorliggen die de kiender uutvoeren moeten. Is die taeke goed volbrocht, dan krigt de groep een emmertien mit letters mit.
Nao Berkoop gaot de Riembus deur naor Oosterwoolde, waor in de Bruna-winkel weer een opdracht deur de leerlingen uutvoerd wodden moet. Ok bi´j Bruna bin weer letters te verdienen deur de leerlingen.
Veur de op ien nao laeste keer stoppen ze bi´j et Stellingwerf College. Daor staon verschillende docenten klaor om de 'groep acht-ers' heur toekomstige schoele zien te laoten, mar ok om ze et ien en aander over de keunst van et dichten te vertellen. Liekas bi´j de Schrieversronte en Bruna bin ok hier weer letters te verdienen.

Daornao is et mar een kleine stap naor de Eupenbaore Biebeltheek. Daor gaon de leerlingen doende mit de letters die ze bi´j mekeer brocht hebben, om zo zels an de slag te gaon mit de kennis die ze krek opsteuken hebben over de keunst van et dichten In een half ure tied moe'n ze perberen (een pat van) een gedicht te maeken. Et risseltaot wodt op speciaole panelen plakt en is in de rest van de kienderboekeweke te zien. Om twaelf ure wo´n de kiender mit de Riembus weer naor heur schoelen brocht. Ze kriegen in de loop van de reize ok nog een biezunder lunchpakket anbeuden.

Een biezundere jury zal an et aende et dichtwark kritisch beoordielen, om vervolgens te bepaolen welke bus mit kiender et mooiste of biezunderste gedicht maekt het. Veur die groep kiender is d'r een pries beschikber en die wodt uutriekt op een speciaol boekebal. Dat zal holen wodden op woensdagaovend 8 oktober in et JOP in Oosterwoolde.
De Riembus ridt elke morgen van 1, 2, 3, 6 en 7 oktober.
[Opm. van de websteeredaktie: et wodde een groot sukes. Alle keren weren groepen van zoe'n 40 tot 50 kiender op pad, en weren ok te gaaste bi'j de Schrieversronte. Die doelgroep was dikke tevreden.]


Jaorlikse hiemkundemiddag goed bezocht; petretten Johan Veenstra te zien bi'j de Stellingwarver Schrieversronte

De veurbi'je weke wodde in et gebouw van de Stellingwarver Schrieversronte in Berkoop de jaorlikse hiemkundemiddag veur et passeniel van alle basisschoelen in Oost- en West-Stellingwarf holen. De middag wodde deur een flink tal schoelen bezocht, mit mekere woonden een kleine dattig meensken de bi'jienkomst bi'j.
In et eerste diel van de middag vertelden leerkrachten van De Triade uut Wolvege over heur veurleesontbijt eerder dit jaor. Veur dat ontbijt wol de schoele een schriever nugen en dit keer es iene uut de eigen streek. D'r wodde kontakt zocht mit Johan Veenstra en die was bereid om an et projekt van De Triade mit te warken. Veurdat et an et ontbijt toe was, gongen de leerlingen eerst ien en aander over de schriever uut Ni'jhooltpae uutzuken. Daornaost mos, an de haand van foto's, een petret van Veenstra schilderd wodden. Bi'j et ontbijt las Johan Veenstra kienderverhaelen veur en konnen de leerlingen him vraogen stellen. Daornaost mochten ze mitdaenken over de titel van zien ni'je boek, dat in 2009 verschienen zal.
De petretten die deur de leerlingen van De Triade schilderd binnen bin nog tot halverwege oktober in de hal van et gebouw van de Schrieversronte te zien. De fleurige schilderi'jen bin meer as et bekieken weerd.
Naodat Johan Veenstra ok op de hiemkundemiddag twie van zien verhaelen veur kiender veurlezen had, wodde d'r ni'j lesmateriaol prissenteerd. Zo was d'r veur alle schoelen o.e. de ni'jste novelle van Sjoukje Oosterloo Onbewoond Eilaand mit bi'jheurend verwarkingsmateriaol. Daornaost beud de Stellingwarver Schrieversronte alle schoelen in West-Stellingwarf et boek Dirk Kerst Koopmans, schilder van De Scheene an, en veur de schoelen van Oost-Stellingwarf was d'r et boek Gien plak dat mi'j zo trekt! De 13 dörpen van Oost-Stellingwarf vroeger. Behalven et uutdielen van lesmateriaol was d'r ok overleg over et nog te ontwikkelen materiaol. Iene van de idenen die dit keer deur et onderwiesveld opperd wodden was een Stellingwarver scheurkelinder veur de groepen 1 t/m 4 en iene veur de groepen 5 t/m 8. Veur dat idee was mitien een protte bi'jval, dat d'r zal naogaon wodden zal as an disse weens voldaon wodden kan.
As laeste van de middag vertoonde Jan de Vries van Wolvege filmbeelden over Dirk Kerst Koopmans, die hi'j een posien veur die zien overlieden opneumen had. Op de beelden is de schilder van De Scheene te zien, o.e. kuierende en vertellende in et prachtige gebied rond de Scheene in West-Stellingwarf, mar ok in zien atelier in Balk. Van al dat beeldmateriaol (mit mekere zoe'n drie uren) zal een speciaole film veur et basisonderwies klaormaekt wodden.


Prima slaegde info-aovend 'Stellingwarf' 700 jaor. Uut alle dielen van Stellingwarf kwammen vertegenwoordigers in Berkoop

Oflopen weke was d'r in et gebouw van de Stellingwarver Schrieversronte in Berkoop een info-aovend over et biezundere jaor 2009. In dat jaor is et 700 jaor leden dat de naeme Stellingwarf bruukt wodde in een belangrieke oorkonde van de bisschop van Utrecht, en dat is de ooldste vermelding van de naeme 'Stellingwarf' die bekend is. Om dat biezundere feit te vieren wo'n d'r et kommende jaor alderhaande aktiviteiten holen in alle hoeken van de beide Stellingwarver gemienten. Al in 2007 hebben, op initiatief van de Stellingwarver Schrieversronte en de Vereniging Historie Weststellingwerf e.o. een tal historische verienings in et streektaelinstituut in Berkoop overleg had om te kieken wat d'r misschien allemaole an aktiviteiten meugelik wezen zol in et jaor 2009. Naoderhaand is uut die gespreksaovens een koördinerende warkgroep ontstaon. Die warkgroep bestaot uut vertegenwoordigers van de Historische Vereniging Appelscha e.o., de Vereniging Historie Weststellingwerf e.o. en de Stellingwarver Schrieversronte. Daornaost is ok een vertegenwoordiger van et Plattelaansprojekteburo uut Beetsterzwaog aktief in disse groep.

Biezundere aktiviteiten: van 'Bergfeesten' via spektaokelspullen en onderwiesaktiviteiten tot symposium…

Iene van de eerste aktiviteiten van de warkgroep Stellingwarf 700 was om een info-aovend te orgeniseren veur alle historische verienings, verienings van Plaetselik Belang, buurtverienings en gao mar deur. Et doel daorvan zol wezen om mit mekere zoveul meugelik de verschillende plannen veur et feestjaor op een riegeltien te kriegen, om zo veur een aorige spreiding van alle feestelikheden te zorgen. Deur eerdere berichten in o.e. disse kraante, wodden al verschillende idenen an de warkgroep deurgeven. Intied het de warkgroep ok veur een speciaole webstee www.stellingwarf700.nl zorgd, daor al eerder op disse webstee op wezen is. Daor bin al een flink tal van de plannen en idenen op weeromme te vienen binnen. Doel is ok dat op disse webstee een overzichtelike kelinder komt, waor alle aktiviteiten in et kader van Stellingwarf 700 jaor in opneumen wodden kunnen. Gegevens en berichten daorveur kun deurgeven wodden via de mail naor info@stellingwarf700.nl.
Op de info-aovend dee blieken dat d'r in de verschillende streken van Stellingwarf staorigies-an al aorig wat plannen ontwikkeld wodden. Zo zal de Historische Veriening Appelsche de Bergfeesten, zoas die rond 1850 hullen wodden, opni'j leven inblaozen; et Nationaal Vlechtmuseum in Noordwoolde hoolt grootkaans een tentoonstelling van oolde oorkonden en de Vereniging Historie Weststellingwerf e.o. wil een Middelieuws spektaokelstok opvoeren, dat veural bedoeld wezen zal veur de jeugd. Daoromme wodt o.e. histo-tolk Frank Spijkers in et projekt betrokken. Ok in Appelsche wodt an zoks docht. De Pieter Stuyvesant kuiertocht op de 1e zaoterdag in juni gaot wat mit de historie doen, et Anbo-koor uut Wolvege gaot een speciaol anpaste vorm van de Stellingwarf Cantate opvoeren en de Stellingwarver Schrieversronte orgeniseert veur 18 september 2009 een symposium om et jaor 1309 henne, mit as anleiding de gebeurtenissen en omstanigheden die tot de tekst van de oorkonde van 1309 leided hebben. De warkgroep Alles rondom Taal van de Stichting Kunstwerf nemt et thema mit in de kienderboekeweke en gao mar deur.
Behalven uutleg over de aktiviteiten die meugelik binnen veur 2009 en die dus ontwikkeld wodden zullen en et gebruuk van de webstee, was d'r ok gelegenhied om vraogen te stellen. Belangriek was mit naeme de vraoge over de financieringsmeugelikheden van de aktiviteiten. Deur de warkgroep wodde dudelik maekt dat alle aktiviteiten deur de verschillende verienings zels verzorgd wodden moeten, dus ok de financiering. De warkgroep het zels gien financiële middels mar kan as daor omme vraogd wodden zol wel advies geven waor misschien financiële steun anvraogd wodden kan. Dat gelt dus ok veur meugelike ni'je initiatieven. De warkgroep stemt graeg de dingen of, geft raod en steun waor meugelik en waor en deur wie al aktiveiten pland wodden, mar de financiering van elke aktiviteit is et wark en de verantwoordelikhied van degenen die de aktiviteiten opzetten en uutvoeren. De warkgroep hoopt d'r op dat nog meer klubs en verienings ankem jaor kleine of grotere aktiviteiten opzetten die ze in et locht van Stellingwarf 700 brengen willen, om d'r een biezunder feestelik jaor van maeken te kunnen. D'r bin weer volop ni'je gemientevlaggen te koop die elk anschaffen kan, de warkgroep hoopt die dus ankem jaor een protte wapperen te zien. Ok is d'r een biezundere vlagge Stellingwarf700 in de maek, die ankem jaor ok grif overal zien weg vienen zal.


De Stellingwarver sutelaktie is zo goed as veurbi'j... mar griep jim kaans nog!

De Stellingwarver sutelaktie was mit een hieleboel boeken, cd's enz. bi´j jow an de deure om een goed boek, een mooie cd of misschien wel een Oost- of West-Stellingwarver vlagge te verkopen. Dat doen we al ettelike jaoren, en now, in september dus ok weer. Mar... hej' ze mist? Koop dan toch op een aander plak een prachtig boek in et Stellingwarfs: gedichten, verhaelen, romans, geschiedenis, veldnaemeboeken, infermaosieboeken over de tael en nuum mar op. Op elk adres is de Stellingwarver boekekraante bezorgd, en daor staot alles in wat d'r mar te koop is bi´j de Stellingwarver Schrieversronte.

De sutelaktie kwam op woensdagaovend 24 september nog in o.e. Else, Berkoop en Ni'jberkoop. De tetaolopbrengst is nog niet hielemaole bekend, omdat hier en daor nog biezundere verkoopaktiviteiten binnen.
Veurig jaor zat de opbrengst van de hiele aktie nog tegen de € 18.000,00, dat bedrag zal warschienlik dit jaor niet haeld wodden, et bedrag zit an now toe wel boven de € 13.000,00. Dat betekent liekewel niet dat d'r over et hiele jaor neumen dan ok minder verkocht wodden zal. Zo was de omzet van Et Boekefoons veurig jaor juust € 7.000,00 hoger as in 2006, wiels de opbrengst van de sutelaktie in 2006 nog op omdebi'j € 23.000,00 zat. Bliekber is et koopgedrag van de meensken wat an et veraanderen en wodt ok in oonze kontreinen et tal meensken dat vri'jwilligerswark dot staorigan wat kleinder, zoas dat laandelik al een tied et geval is.

Dus... niet bi'j jow an de deure west, mar wel kopen willen?

Wat veur koopgedrag ie ok hebben, dat gaot netuurlik jow allienig an, beste lezer. Niet allienig in Stellingwarf mar ok in grotere Friese plakken as Et Vene en Liwwadden bin in de boekwinkels oonze boeken te koop. En in de grote dörpen van Oost- en West-Stellingwarf, daor kuj' in de boekwinkels et hiele jaor deur oonze prachtige veurraod inkieken en d'r uut kopen. Een bezukien an de Schrieversronte zels kan netuurlik ok. Wi'j zorgen as altied veur de wereld an mooie regioboeken!!



Ex-Aequo winner Stellingwarfpop 2008!

Op zaoterdag 14 juni wodde veur de twiede keer et popfestival Stellingwarfpop holen. Et festival, dat orgeniseerd wodde deur de Stellingwarver Schrieversronte, was ok dit keer op et gezellige Pastorieplein in Wolvege. Daornaost was et festival van begin tot aende live te heuren op de lekaole omroep Centraol. Was de opkomst wat de bezukers angaot veurig jaor nog wat maegerties, disse twiede keer was die dudelik een stok beter. Winner van et festival wodde de band Ex-Aequo uut Wolvege mit et nommer 'Staol en bezine'.
Om mit te doen an Stellingwarfpop mossen de optredende bands op zien minst ien Stellingwarfstaelig nommer naor veuren brengen. Et dee blieken dat Stellingwarver bands al meer Stellingwarfs bruken gaon as ooit teveuren. Zo was bi'jglieks et hiele optreden van de winnende band hielemaole in et Stellingwarfs, ok de prissentaosie. Dat gul ok veur de band Gien Gok, die et festival eupende. Gien Gok wun verleden jaor et eerste Stellingwarfpop.
De kwaliteit van de meerste bands was neffens de vuufkoppige vakjury beheurlik hoge. Zo was d'r o.e. veul wardering veur Page Avenue en sympathie veur Non-Sense, een band mit jonge meensken van rond de vuuftien jaor. Twiede wodde liekewel Parka, een band waorvan de vier leden van oorsprong uut Wolvege kommen. Parka timmert beheurlik an de weg, zo ston de groep kotleden nog in de Melkweg in Amsterdam. De jury was onder de indrok van de gedegenhied van de groep, de goeie verzorging van et optreden, mar veural ok van de zang. Bi'j de winner van de dadde pries, Full Metal Jacket, was de jury ien en lof over de eigentiedse tekst, mar ok over de meziek. As ienigste minpuntien wodde de podiumprissentaosie nuumd.
Et optreden van winner Ex-Aequo ston 'as een blok', zo vertelde juryveurzitter Klaas Osinga uut Makkinge. De meziek van et nommer 'Staol en bezine' is 'hitgevulig', mit o.e. prachtig gitaarwark, prima zang, en een goeie tekst. Et hiele optreden van de winnende band vun de jury gewoonweg professioneel. Veur de winner was d'r € 300,00, Parka kreeg een kevot mit € 200,00 en veur Full Metall Jacket was d'r € 100,00.

CD Stellingwarfpop
An et begin van et festival wodde de spiksplinterni'je cd Stellingwarfpop 2008 uutrikt. De eerste exemplaoren weren veur de winner van veurig jaor, de band Gien Gok. Ok van Gien Gok is een prachtig ni'j nommer te heuren op disse twiede pop-cd in et Stellingwarfs.

Veul lof veur orgenisaosie
Et festival wodde dit jaor weer prissenteerd deur de bekende entertainer JelleB. JelleB wet op een geweldig enthousiaste meniere alle optredens an mekaander vaaste te praoten en zorgt tussendeur veur veul infermaosie. Tiedens et juryberaod zorgde hi'j zels veur een spetterend optreden, waorbi'j hi'j et hiele pebliek mit wus te kriegen. In zien slotwoorden zee JelleB dat hi'j hiel vule lof het veur de orgenisaosie van Stellingwarfpop. Deur et hiele pebliek wodde dat mit een spontaon applaus nog es ekstra benaodrokt.
Sietske Bloemhoff, direkteur van de Stellingwarver Schrieversronte, gaf an dat de stichting zeker van doel is en orgeniseer in 2009 opni'j et festival Stellingwarfpop.
Stellingwarfpop 2008 mos liekewel eerst nog ofsleuten wodden en dat gebeurde mit een optreden van de groep Kouwe Makkers uut Stienwiek.



Voetbalgekte

Wat is d'r eins gebeurd?
Hiel wat straoten bin opfleurd,

Mit allegere vlaggies en belonnen:
Lichtkaans is d'r een feest begonnen,

Van ien of ere belangrieke VIP,
Mar iniens krieg ik een tip!

Oranje is now evenpies niet
De kleur van een Keuninklike “piet”,

Mar van 'oonze jonges' op et veld
Oons elftal speult as oonze grootste held!

Mennig uurtien zitten wi'j op 't gat:
De tillevisie legt oons hiele laantien plat.

We willen naor elke mets wel kieken,
Al et ere moet daor mar veur wieken.

En veur elk die niet van dit spellegien hoolt:
Rustig aosemhaelen blift je behoold!


Attie Nijboer

(wodde schreven even veur et Europees kamioenschop 2008)



Tomke komt d'r weer an!

Veur de dadde keer verschient et boekien Tomke in et Stellingwarfs. Begin juni wodt et an alle Stellingwarver ukken rondpat, krek as de veurige keren. Ni'j is dat dit jaor ok mitdaon wodt an de Tomke-veurleesweke. Op dit mement wo'n alle ukkespeulplakken benaoderd mit de vraoge as ze gebruuk maeken willen van et veurleesanbod. Een grote groep vri'jwilligers is intied vraogd om uut Tomke veur te lezen. Krek as veurige jaoren zorgde Sjoukje Oosterloo weer veur et vertaelen uut et Fries.


Zaoterdag 14 juni: Stellingwarfpop 2008!

Mit: Ex Aequo, Full Metal Jacket, Koala, Lost Minded, Non-Sense, Page Avenue, Parka, Roadhawks en Solid

Op zaoterdag 14 juni wodt veur de twiede keer et popfestival Stellingwarfpop holen. Et festival wodt orgeniseerd deur de Stellingwarver Schrieversronte en zal ok dit keer holen wodden op et gezellige Pastorieplein in Wolvege. Et doel van et festival is in 't eerste plak om mit naeme jonge bands en muzikaanten an te vieteren om in heur meziek meer gebruuk te maeken van de eigen streektael et Stellingwarfs. An et mitdoen van et festival is daoromme een pries verbunnen. De eerste pries bestaot uut een geldbedrag van € 300,00, de twiede pries levert € 200,00 op en de dadde € 100,00. Daornaost wodt d'r van alle dielnemende bands an et festival (negen in tetaol) ien Stellingwarfstaelig nommer op een CD zet. Die CD zal an et begin van et festival prissenteerd wodden. Veur de opnaemen van de negen lieties zorgt Cees Pols van studio Case I/O in Tuk.

De negen bands

De negen bands die dit keer an Stellingwarfpop mitdoen, speulen allemaole minstens ien Stellingwarfstaelig nommer. Dat nommer, dat in anmarking komt veur iene van de priezen, moet liekewel origineel wezen, et mag dus niet om een cover of vertaeling gaon. Daornaost mag de band in zien optreden, dat een goed half ure duren gaot, niet meer as twie covers naor veuren brengen. De Stellingwarver Schrieversronte is biezunder inneumen mit et feit dat een peer bands angeven hebben alliend (ni'je) Stellingwarver nommers naor veuren brengen te willen. De bands die 14 juni an et festival mitdoen, bin: Ex Aequo, Full Metal Jacket, Koala, Lost Minded, Non-Sense, Page Avenue, Parka, Roadhawks en Solid.

Jelle B, Gien Gok, Kouwe Makkers

Et festival, dat om kwat veur viere middags begint, wodt eupend mit een optreden van de winnende band van veurig jaor Gien Gok. Veur et officiële eupeningswoord is borgemeister Gerard van Klaveren vraogd. Die dreegt et festival een waarm hatte toe.
Gien Gok, ok bekend as No Gamble, zal tiedens zien optreden veural Stellingwarver nommers heuren laoten. Mit Gien Gok gaot et trouwens biezunder goed, want op 17 meie staot de band mit een ni'j Stellingwarfs nommer in de finale van et Friese festival Liet.
De orgenisaosie het daornaost ok veur een swingende ofsluter van et festival zorgd, deur de bekende fermaosie Kouwe Makkers te kontrakteren. Et festival duurt tot ien ure naachs.
Een schot in de roze was veurig jaor de prissentaosie van Stellingwarfpop deur Jelle B. Reden veur de orgenisaosie om him veur et kommende festival opni'j te vraogen. Jelle B zal behalven de prissentaosie ok zels een optreden verzorgen tiedens et juryberaod laete op de aovend.
De jury, die beoordielen zal wie uuteindelik mit de priezen strieken gaon, bestaot dit keer uut vuuf personen. Van de jury van verleden jaor doen in elk geval mit Neerlandikus en meziekliefhebber Peter Riksma (van vroeger van Wolvege) en de Stellingwarver dichter/muzikaant Jan Oosterhof (Steggerde). Daornaost bin jazz-muzikaant Klaas Osinga (Makkinge), Piet Tjassing (bassist Shady Lane, Makkinge) en Robert van Dam (bassist Believeisadoubt, Grunningen) bereid vunnen om an et jurywark mit te doen.



Vri'jdag 6 juni: dadde internationaole streektaelkonfereensie

Op 6 juni zal de dadde internationale streektaelkonfereensie holen wodden. De eerste keer was die in Mestricht, de twiede keer in oons Noordwoolde, en now is hi'j in Rilland, op de greens van Braobaant en Zeelaand, niet veer van de greens mit België. Et onderwarp is 'Dialect, van schoot tot school?' De morgens en de middags bin d'r drie lezings, mit stokkies meziek tussendeur, en an et aende van de morgen en de middag is d'r diskussie in verbaand mit de lezings. In de laeste lezing van de konfereensiedag wodt ingaon op de lespraktiek, in et pat van de morgen zal o.e. deur Roeland van Hout, Veronique De Tier en Jos Swanenberg een overzicht van de anpak op de schoelen in et Nederlaanse taelgebied geven wodden, wiels ok o.e. Ton Vallen an et woord komt over 'Dialect, onderwijs en sociale ongelijkheid'. Meer over et pergramme en ok hoe aj' je opgeven kunnen kuj' vienen op de webstee www.scez.nl; even anklikken: 'streektalen', en dan leger op de bladziede even de ankondiging zuken.


Handboek Nedersaksische Taal- en Letterkunde verschenen. Minister Plasterk: meer ommedaenken veur Nedersaksisch en regiokultuur

Nao zoe'n tien jaor van veurbereiding is op 31 meert et Handboek Nedersaksische Taal- en Letterkunde verschenen, in een slim sfeervolle bi'jienkomst in de Aula van de Rieksuniversiteit Grunningen. Mit naeme de erkenning van et Nedersaksisch halverwege de jaoren negentig was anleiding om tot et haandboek te kommen, omreden d'r een stevig overzicht ontbrak mit de belangriekste infermaosie over de tael en schrieveri'je van de regio as gehiel en van de dielen los van mekeer. Et haandboek is d'r now, en lat in alle opzichten de 'ienhied in verscheidenhied' zien. Uteraord wodt ok Stellingwarf beschreven, en ok in oons geval is een overzicht geven van de taelkundige biezunderheden. Mar dat niet allienig; ok de veurnaemste schrieveri'je in et Stellingwarfs wodt in een eigen heufdstok uutstokt.
De eerste exemplaoren wodden anlangd deur hooglerer Nedersaksisch perf. dr. Hermann Niebaum an Minister van Onderwies, Kultuur en Wetenschop dr. Ronald Plasterk en an dr. Hans Gerritsen, de Grunninger dippeteerde van Kultuur.
Et daankwoord van de minister beston veur een pat uut zien kiek op de al mar groter woddende wereld, de wereld van de globalisering. Mar d'r wodt tegenwoordig ok weer vule meer keken naor de dingen in de eigen leefwereld: wie bin wi'j, wat leeft in oonze eigen wereld, al staon neffens de minister een hiele goeie beheersing van et Nederlaans en ok, tot op een bepaold nivo, van et Engels veurop. Zien visie komt daele op wardering en 'koestering' van regionaole tael en kultureel arfgoed, ok van de regio's.
Dr. Gerritsen benaodrokte dat d'r in 'Den Haag' een positieve holing is veur de erkenning en veerdere toepassing van diel III op et Nedersaksisch. Tussendeur vertelde hi'j ok nog over et onderzuuk dat hi'j en de aandere Nedersaksische overheden deur de Rieksuniversteit uutvoeren laoten naor de bestuurlike en juridische kaanten van de veerdere toepassing van et haandvest.
Nao een kotte uutienzetting over de geschiedenis van et taelkundig onderzuuk van et Nedersaksisch deur perf. Ludger Kremer en een fielsetaosie van SONT-veurzitter Arend ten Oever mit een kotte kiek op de pesisie van et Nedersaksisch en mit een oproep tot toepassing van diel III van et haandvest, sleut Letteren-decaan perf. dr. Ger de Haan et officiële pat van de bi'jienkomst. De redaktie en aandere auteurs kun weerommekieken op een suksesvolle ofsluting van het haandboek-projekt. De bi'jienkomst wodde ok bi'jwoond deur een tiental gaasten uut Stellingwarf. Meer over het haandboek kuj' vienen op de webstee van de uutgever: www.vangorcum.nl. Beeld en geluud van de prissentaosie o.e. op http://www.youtube.com/watch?v=Ov8kWQpv5W8


Zaoterdag 26 april: Eupen Podium in et Vlechtwark in Noordwoolde


EUPEN PODIUM

Een eupen podium
Een kaans veur elkenien'!

Een menier', een medium
Laot mar es wat van jezels zien!

Een gedichien, een vassien, een verhael,
een veurdracht in de Nederlaanse of Stellingwarver tael.

Kom, geef je op veur dit gebeuren
Wi'j zullen doukies graeg wat van jow heuren!

Liekewel, hej' al wat ervering,
Of et wodt jow debuut.

Onder et genot van een vertering
Biwwe doukies een aorig daggien uut.

Attie Nijboer, meert 2008


Lees veural veerder!!!

Op zaoterdag 26 april 2008 wodt van 10.00 ure morgens tot 18.00 ure middags in Et Vlechtwark in Noordwoolde een Eupen Podium holen. Et doel van die dag is dat iederiene die d'r aorighied an het en laot es wat uut eigen wark heuren – as et now om gedichten, verhaelen, meziek of teniel gaot – daor an mitdoen kan. Veur wark in et Stellingwarfs bin d'r twie appatte blokkies risserveerd: van 14.00 ure tot 14.30 ure en van 16.00 ure tot 16.30 ure. Belangstellenden kun heur anmellen bi'j de Schrieversronte deur et strokien onder an dit blad in te vullen en op te sturen of deur de antwoorden deur te mailen. Netuurlik kan ok op elk aander mement mitdaon wodden, dat moet dan meld wodden bi'j de SWW in Noordwoolde (zie daorveur webstee www.sww.eu).

Tiedens de middag wodt in Et Vlechtwark ok veurlezen an kiender. Dat gebeurt in et Nederlaans en in et Stellingwarfs, in een ruumte die daor speciaol veur inricht is.
De Eupen Podiumdag is een gezaemelike orgenisaosie van de Stichting Welzijn Weststellingwerf, de Stellingwarver biebeltheken en de Stellingwarver Schrieversronte.



De Taelgreens veurbi'j… in poëzie

Wie mitdoen wil an de negende edisie van de VU Poëziepries moet even heur webstee opzuken, dat is www.vupodium.nl. Van 31 jannewaori of kun gedichten instuurd wodden, en de orgenisaosie dot oons tiedinge dat et ok wat wezen kan veur meensken die aktief binnen in of mit de streektael, want et thema is: Taelgreens veurbi'j. Ie kun tot 15 meert insturen. Meensken mit interesse kun meer over die pries vienen op de webstee die ni'jsies nuumd wodde. Dan moej' even deurklikken naor Prijsvragen, en dan naor Poëzieprijs.


Scheene

De boot glidt deur et waeter
brengt mi'j terogge in de tied.

Naor et leven van Dirk Kerst Koopmans
heur, de wiend fluustert in et riet.

In de veerte klinkt entegesnaeter
Ik roek de geur van et sompige laand.

Et wereltien riekte doe niet veerder
as de husies an de overkaant'.

Scheene, laand van turf, vene en moeras
Blief beweerd veur laeter
Krek zoas et vrogger was!!![/i]


Attie Nijboer (meie 2007)



STELLINGWARFPOP: ET NI'JSTE NI'JS

Stellingwarfpop 2008 op zaoterdag 14 juni
--- Je opgeven kan t/m 31 meert!!

Op zaoterdag 14 juni wodt veur de twiede keer et popfestival Stellingwarfpop holen. Et festival, dat orgeniseerd wodt deur de Stellingwarver Schrieversronte, zal ok dit keer holen wodden op et gezellige Pastorieplein in Wolvege. Et doel van et festival is in 't eerste plak om mit naeme jonge bands en muzikaanten an te vieteren om in heur meziek meer gebruuk te maeken van de eigen streektael, et Stellingwarfs. An et mitdoen van et festival is daoromme een pries verbunnen. De eerste pries bestaot uut een geldbedrag van € 300,00, de twiede pries levert € 200,00 op en de dadde € 100,00. Daornaost wodt d'r van alle dielnemende bands an et festival (negen in tetaol) ien Stellingwarfstaelig nommer op een CD zet. Die CD zal an et begin van et festival prissenteerd wodden. De opnaemen van de negen lieties gebeuren in de maonden veurofgaonde an et festival in studio Case I/O in Tuk.

Veurweerden om mit te doen an Stellingwarfpop 2008
1. Elke dielnemer of band brengt op zien minst íén Stellingwarfstaelig nommer naor veuren.
2. Et Stellingwarfstaelige nommer moet origineel wezen, et mag niet om een cover of vertaeling gaon.
3. In elk optreden meugen hooguut twie covers speuld wodden.
4. Elke dielnemer of band die him opgeft stuurt een demo, een biografie en eventueel een foto op an de Stellingwarver Schrieversronte, t.a.v. Sietske Bloemhoff.
5. De opgifte, demo en biografie moe'n uterlik 31 meert binnen wezen op et kantoor van de Stellingwarver Schrieversronte.
6. Dielnemers van 2007 meugen ok an Stellingwarfpop 2008 mitdoen.

An de haand van de demo's en biografieën bepaolt de warkgroep wie, of welke band mitdot an Stellingwarfpop 2008

Veur meer infermaosie kan ok beld wodden mit de Stellingwarver Schrieversronte (0516-451108, even vraogen naor Sietske Bloemhoff) of deur te mailen naor info@stellingwarfs.nl.

Prissentaosie, jury en orgenisaosie
Een schot in de roze was veurig jaor de prissentaosie van Stellingwarfpop deur Jelle B. Reden veur de orgenisaosie om him veur et kommende festival opni'j te vraogen. Op dit mement wodt nog onderzocht as et meugelik is om Stellingwarfpop 2008 mit een exklusief optreden van een biezundere band of te sluten.
De jury die beoordielen zal wie uuteindelik mit de priezen strieken gaon, bestaot uut vuuf personen. Van de jury van verleden jaor doen in elk geval mit Neerlandikus en meziekliefhebber Peter Riksma (van vroeger van Wolvege) en de Stellingwarver dichter/muzikaant Jan Oosterhof (Steggerde). Daornaost is warkgroeplid Piet Tjassing (bassist en songwriter van Shady Lane) bereid vunnen om an et jurywark mit te doen. Op dit mement wodt nog mit twie ere jurykandidaoten overlegd.
De orgenisaosie van et festival is in hanen van een speciaole warkgroep van de Stellingwarver Schrieversronte. Daorin bin mit naeme meensken uut de doelgroep zels aktief, et gaot o.e. om Robert van Dam (bassist Believeisadoubt), Remy Tjassing (zanger, gitarist Shady Lane), Albertha Bloemhoff (laestejaorsstudent Akedemie veur Popkultuur), Bernard Damhuis (Meziekatelier Wolvege), Piet Tjassing (bassist Shady Lane), Anne Henk Bloemhoff (gitarist) en Léon van Lier (Grand-Kefé de Burgemeester).

Info over de cd van et veurige festival van Stellingwarfpop (2 juni 2007)

Wat kuj' op die cd allegeer heuren? Gien Gok mit 't Gaot allemaol te veer, Memory Lane mit Pinnen, Parka mit Stellingwarfse nozems, Revolta mit Over de Tjonger, Sweet Nothings mit Stellingenweg, Shady Lane mit Spitsure, Mukusha mit Mooie dingen, Infinite mit Ofspraoke en Zie-maar mit Oost-Stellingwarf. Meer over de veurige keer kuj weerommevienen in oons webstee-archief. Klik, aj' daor in kieken willen, 'webstee-archief' an in de blauwe riegel links.


Ok de op ien nao ni'jste Ovend geft een protte leesplezier!

Ja, zo is dat. Want Jannes Westerhof vertelt over Peter Hiemstra, 'maeker van beeldverhaelen'; dat is naor anleiding van “Longerlaand”, et grote sukses van de Eupen Stal van et veurbi'je jaor. Johan Veenstra gaot op zien biezundere belevings deur die hi'j daor bi'j hadde, in 'Heimwee naor Longerlaand', en etzelde dot Peter Hiemstra, in 'Ik zol et zo weer overdoen!'. Jimmy Visser vertelt in disse Ovend naor anleiding van een oold kaststallegien in 'Toch nog een kastgevuul', Koosje Hornstra gaot in et 'veuroffien' in op onderwies en leesplezier, W. de Jong gaot weeromme naor zien jonge tied in Appelsche, Sietske Bloemhoff vertelt over de 'Sfeervolle eerste Tael en Thee', Sjoukje Oosterloo brengt et verhael 'Haostige spoed' en van Kees Koopstra kuj' et verhael 'Zunig' lezen. D'r bin gedichten van Attie Nijboer en Roely, Nicolette Hartong nemt je mit op een exkursie o.l.v. Hans Salverda naor de oolde laandweer tussen Else en Zorgvlied en bi'j Appelsche, d'r is een verslag deur de redaktie van veurleesmiddaegen veur de jeugd, W.H. de Vries brengt de 63e oflevering over 'De oorlog in de Stellingwarven', en zo is d'r nog meer. De ni'jste Ovend geft een protte leesplezier en dat niet allienig: et is ok een aorig idee om lid te wodden van de Stellingwarver Schrieversronte aj' dat nog niet binnen. Begin et ni'je jaor goed op die meniere, zollen we zeggen, want dan kriej' him mooi thuus toestuurd. Et abonnement (+ lidmaotschop) gelt 12,50 euro in et jaor.


'Streektaal en duurzaamheid', bundel lezings van de (inter)nationaole streektaelkonfereensie van 25 meie 2007 in Noordwoolde (Stellingwarf, Frieslaand)

Op 20 december 2007 verscheen et boekwark 'Streektaal en duurzaamheid', mit de lezings van de grote streektaelkonfereensie die et veurbi'je veurjaor hullen wodde in Noordwoolde. Et is de ni'jste uutgifte van de Stellingwarver Schrieversronte. De lezings bin in de vorm van tien heufdstokken opneumen. De teksten bin veur et grootste pat krek as ze op de konfereensie veurdreugen binnen. Behalven de lezingteksten het et boek een kotte inleiding, een saemenvatting van de forumdiskussie en gegevens over de sprekers/auteurs. Et boek is Nederlaanstaelig, op heufdstok 8 nao, dat is in et Nederduuts.
Et is bekend dat streektaelen en dialekten et in oonze tied niet makkelik hebben en d'r bin ok nog altied wel smeelderige of daelezetterige reakties op. An de aandere kaante hebben een hieleboel meensken d'r een goed gevuul veur en perberen personen en instaansies om de streektaelen in levend gebruuk te holen. Ok de overheden doen in veul gebieden et ien en aander.
In de verschillende heufdstokken laoten de schrievers zien wat d'r neffens heur an aktiveiten en beleid neudig is en wat veur meugelikheden ze zien om ok veur de kommende tied et levend gebruuk van de streektaelen zien gerak te geven. De inhoold van 'Streektaal en duurzaamheid' zal de meerste lezers flink wat ni'je infermaosie zien laoten, ok degenen die bi'j de zorg veur de streektaelen of veur et kulturele arfgoed in et algemien betrokken binnen. Dat zodoende is et ni'je boek beslist een 'must'. Ie lezen d'r trouwens niet allienig veul over de regionaole taelen, streektaelen en dialekten van Nederlaand in; ok an de situaosies in Vlaanderen en Noord-Duutse dielstaoten as Nedersaksen, Sleeswiek-Holstien en Mecklenborg-Veurpommeren wodt ommedaenken geven.

'Streektaal en duurzaamheid' het de volgende inhoold:

0. Piet Hemminga en Henk Bloemhoff - Inleiding
1. Piet Hemminga - Over staat en streektaal
2. Hermann Niebaum - Situatie en wenselijkheden voor de studie van het Nedersaksisch: in Nederland en Duitsland
3. Roeland van Hout - Het Europees Handvest en het Limburgs: het politieke en taalkundige discours
4. Henk Bloemhoff - De gemeentelijke basis voor streektaalbeleid: situatie en wenselijkheden
5. Riemke Bakker - Gronings: de mogelijkheden om het Gronings in de praktijk te leren
6. Ina Bieze - Gronings: een verhaal in mijn lokaal!
7. Ingrid Drenth - Gronings: het vak Groninger taal en cultuur in de tweede fase
8. Reinhard Goltz - De Tokunft vun dat Plattdüütsche: Wat deit de Staat - wat maakt de Verwaltung?
9. Veronique De Tier en Rob Belemans - Beleidsontwikkeling en -ondersteuning voor niet-erkende dialecten in Vlaanderen en Zeeland
10. Eelke Goodijk - De Trijetalige Skoalle
11. Hans van Borselen - Korte samenvatting van de forumdiscussie
- Infermaosie over de auteurs

Bibliografische gegevens:
Henk Bloemhoff en Piet Hemminga (red.), Streektaal en duurzaamheid. Oldeberkoop/Berkoop NL, 2007. ISBN 9789064661433; dikte: 120 pagina's; pries: 12,50 euro.
Ie kun de ni'je uutgifte bestellen bi'j de Stichting Stellingwarver Schrieversronte, Willinge Prinsstraat 10, 8421 PE Berkoop/Oldeberkoop, info@stellingwarfs.nl, till. (0031) (0)516-451108.
De internationaole streektaelkonfereensie in Noordwoolde was et initiatief van de Stellingwarver Schrieversronte, die op die meniere een vervolg gaf an de eerste nationaole streektaelkonfereensie in Mestricht. Bank Bercoop was sponsor, en tegere mit de perveensie Frieslaand sponsorde Bank Bercoop ok de ni'je bundel. Op 20 december wodde in kleine kring et eerste exemplaor prissenteerd an baankdirekteur de heer W. Nijboer, die slim inneumen was mit et boekwark en de biezundere konfereensie. Noordwoolde krigt ok een vervolg.
Dit jaor zal d'r een streektaelkonfereensie wezen op 6 juni in Rilland Bath, op zoe'n vuuf menuten van Bergen op Zoom. Et thema is 'Dialekt op 'e schoele'. Braobaanse en Zeeuwse instellings zullen die dag orgeniseren. De bundel mit de lezings van de eerste konfereensie, Lang leve de dialecten!, is nog te koop bi'j et Huis voor de Kunsten Limburg, Pb. 203, 6040 AE Roermond, ok veur 12,50 euro.



Alderni'jste Ovend: prachtig om te lezen!

De ni'jste Ovend is vandaege of morgen weer bi'j jow in huus, aj' vaaste abonnee binnen temeensen. Aj' dat niet binnen: wor dat mar gauw, want et is de muuite weerd en ie steunen zo de klub die al zoe'n 35 jaor mit mekeer de schoolders d'r onder zet. Wat vien ie in et ni'jste nommer, de 36e jaorgaank no. 1, feberwaori 2008? W. de Jong nemt je mit naor buten in Appelsche, naor 'de grote stoeve', lees en ondergao zels wat dat is... Sietske Bloemhoff vertelt over de Stellingwarver veurleesaktie (een groot sukses!), Pieter Jonker over et kenniscentrum van de Stellingwarver Schrieversronte (in zien woorden een schatkaemer), Jannes Westerhof het een vraoggesprek mit Martin Maätoke, 'een Friese Stellingwarver' (en mit Molukse aachtergrond) en hi'j schreef et 'In memoriam Jan van der Meulen', W.H. de Vries vertelt in de riegel 'De oorlog in de Stellingwarven' (no. 64) uut et dagboek van Vrouw Baas-Van der Weide, op Klaas van Weperen vaalt et locht in de ni'jste oflevering van 'Dit plak dot me wat', en ok vaalt d'r weer volop poëzie te lezen, disse keer van Anne Bult en veerder in de vorm van poesiealbumvassies van Attie Nijboer en Sjoukje Oosterloo. Henk Bloemhoff geft o.e. ommedaenken an een ni'j Fries boek over plaknaemen, et veuroffien is disse keer van Jannes Westerhof en d'r is meer redaktieni'js, bi'jveurbeeld over Stellingwarfpop 2008: zet mar even in de agenda: 14 juni, Wolvege, Stellingwarfpop!



Vri'jdagaovend 14 meert: literaire aovend in Hotel De Zon in Oosterwoolde

An et begin van de laandelike boekeweke is d'r op vri'jdagaovend 14 meert 2008 in Hotel De Zon in Oosterwoolde een literaire aovend mit Aya Zikken (Indonesië), Hylke Speerstra (Frieslaand), Johan Veenstra (Stellingwarf) en Bergaul (Molukken). Op die aovend hoolt Berna Brinkman (vroeger aktief bi'j A Propoz) gesprekken mit de schrievers, die netuurlik ok uut eigen wark veurdregen gaon. Et literaire diel van de aovend wodt ofwisseld mit meziek van de Molukse groep Bergaul. Daornaost is d'r een boeketaofel van de Bruna-boekhaandel mit een mooi anbod van boeken. De orgenisaosie van de aovend is in hanen van de warkgroep Alles rondom taal, bestaonde uut Berna Brinkman, Klaasje Herder (biebeltheken Oost-Stellingwarf), Arie Buitendijk (Bruna) en Sietske Bloemhoff (Stellingwarver Schrieversronte). Die warkgroep maekt sund kot ok diel uut van de ni'je stichting 'Kunstwerf'.

Et pergramme begint om 20.00 ure, de zael is om 19.30 ure los. De intree is € 10,00 (streekhappies inbegrepen). Kaorties kun ofhaeld wodden bi'j Bruna (Oosterwoolde), boekhaandel Zwikstra (Wolvege) en bi'j de Stellingwarver Schrieversronte (Berkoop).


Muziek op Stapel, Stapel op Muziek

Op zaoterdag 8 meert 2008 wodt in de karke van Berkoop veur de twiede keer de Johannes Passion (BWV 245) van J.S. Bach opvoerd deur et Amsterdam Bach Consort. In 2004 was de eerste uutvoering en dat was een groot sukses. Muziek op stapel – Stapel op muziek is bliede en prissenteer opni'j de Johannes Passion. I.s.m. de Stellingwarver Schrieversronte krigt elke bezuker een prachtig boekien over de Passion, daor een verni'jde vertaeling in opneumen is van de Duutse teksten in et Stellingwarfs. Veur die vertaeling zorgde schriever Boele Land uut Jelsum. De middag begint om 15.00 ure en kost € 35,00. Daor is et hierboven nuumde boekien én een happien en draankien in et schoft bi'j inbegrepen. De kaorties kun ophaeld en/of tillefonisch besteld wodden bi'j Harmke Kromkamp, Oosterwooldseweg 11 in Berkoop, till. 0516-451528. Risserveren kan liekewel ok via de webstee www.muziekopstapel.nl.


Twiede Tael en Thee

Op zundagmiddag 27 jannewaori wodt de twiede Tael en Thee holen, ok dit keer in et theatertien van Karst Berkenbosch in Berkoop. Et kulturele pergramme, mit veurdrachten van verhaelen, gedichten en meziek, wodt verzorgd deur vuuf Stellingwarver schrievers, wiels Karst Berkenbosch ok now veur muzikaole ofwisseling zorgen zal. De prissentaosie wodt verzorgd deur Grietje Bosma van Wolvege, wiels de orgenisaosie van de middag in hanen is van de Stellingwarver Schrieversronte. De schrievers die dit keer in Tael en Thee an bod kommen bin Klaas van Weperen uut Wolvege, Koosje Hornstra van Der Izzerd, Kees Koopstra uut Else, Christine Magour van Wolvege en Ate Mulder uut Makkinge.
Tael en Thee begint om 15.00 ure en duurt tot omdebi'j 17.15 ure. De intree is € 6,50, daor bin de thee en een vulde koeke bi'j inbegrepen.
Et doel is dat in et volgende winterseizoen Tael en Thee een vervolg krigt, liekewel in een ere lekaosie, omreden Karst Berkenbosch zien theater sluten gaot.
De eerstvolgende gelegenhied waor o.e. beginnende Stellingwarver schrievers en dichters van heur heuren laoten kunnen is op zaoterdag 26 april in Et Vlechtwark in Noordwoolde. De Schrieversronte orgeniseert dan, tegere mit de Stellingwarver biebeltheken en SWW, een Eupen Podium.


Veul lof veur optreden Bergaul op de gezellige ni'jjaorsbi'jienkomst van de Stellingwarver Schrieversronte

Zoe'n 130 meensken woonden zaoterdagaovend 12 jannewaori de ni'jjaorsbi'jienkomst bi'j van de Stellingwarver Schrieversronte in Et Vlechtwark in Noordwoolde. Nao de welkomstwoorden van direkteur Sietske Bloemhoff begon de aovend mit een optreden van de Molukse meziekgroep Bergaul, en dat vul al mitien biezunder goed in de smaek. Dat kwam niet alliend deur de prachtige meziek, mar ok deur de plezierige prissentaosie en uutleg van teksten en meziek. Nao Bergaul dreug schriefster Roely Bakker sfeervolle en gevulige gedichten veur, die ze liekewel zels meerstal gedaachten nuumt. Daornao was et de beurt an Johan Veenstra, die veur de pauze op zien bekende wieze een humoristisch verhael uut zien boek De wereld is gek veurdreug. Nao de pauze vertelde Veenstra een eernstiger verhael uut diezelde bundel. Daor verscheen oflopen weke de dadde drok van. Nao et twiede optreden van Roely Bakker was et weer de beurt an Bergaul, die ok nog veur een aorige Stellingwarver verrassing zorgde. De groep van acht manluden leut et bekende kienderlietien Roodkapje eerst in et Maleis heuren en vervolgens in et Stellingwarfs. Intied weren beide teksten uutdield, dat de zael kon beide vassies mitzingen. Et doel is dat de Schrieversronte en Bergaul in de naobi'je toekomst nog es weer een gezaemelike aktiviteit oppakken. Nao de ofslutende woorden van veurzitter Doeke Duursma, die et pergramme ok prissenteerde, wodde d'r in et gezellige Vlechtwark nog een hiel schoft naopraot.


Ni'jjaorsbi'jienkomst Stellingwarver Schrieversronte: optreden Johan Veenstra, Roely Bakker en Molukse meziekgroep Bergaul

Op zaoterdagaovend 12 jannewaori hoolt de Stellingwarver Schrieversronte zien ni'jjaorsbi'jienkomst in Et Vlechtwark in Noordwoolde. De warkgroep Publiciteit van die stichting het veur een biezunder kultureel pergramme zorgd. Zo wodt de aovend eupend mit een optreden van de Molukse meziekgroep Bergaul, die niet alliend hiele mooie meziek heuren lat, mar ok nog es veur een geweldige sfeer zorgt. Daornao is et de beurt an schriefster Roely Bakker van Makkinge, die een keuze uut heur prachtige gedichten heuren laoten zal. Et doel is dat binnen niet al te lange tied heur gedichten in een ni'je bundel verschienen zullen.
Et is al weer een hiel schoffien leden dat Johan Veenstra veur 'eigen' pebliek optrad, mar de warkgroep Publiciteit het de schriever uut Ni'jhooltpae veur disse ni'jjaorsbi'jienkomst over weten te haelen. Veenstra zal twie verhaelen veurdregen, iene veur et schoft en iene nao et schoft. Ok Roely Bakker en Bergaul treden elk twie keer op, waorbi'j Bergaul ok nog veur een speciaole Stellingwarver verrassing zorgen zal!
De aovend is veur geneudigden en leden van de Schrieversronte ommenocht, niet-leden bin ok welkom, mar betaelen € 7,50 intree. De aovend begint om 20.00 ure en duurt tot goed 22.00 ure.


Stellingwarver Schrieversronte kreeg gift van Geitefokverieninge

In de naacht van oold op ni'j het de Berkoper Geitefokverieninge weer zien laoten hoe plezierig as heur opbouwende stunts mit de jaorwisselings binnen. Verschillende verienings en instaansies in Berkoop kregen weer een gift. Ok de Stellingwarver Schrieversronte; die kreeg een mooi bedrag veur de anschaf van een ni'je printer op de administraosie. Bedaankt, Geitefokkers! En zo zette et ni'je jaor veur de Schrieversronte vot mar goed in.


Veul wardering veur Stellingwarver veurleesaktie: an et aende van dit jaor weer!

An et aende van veurig jaor weren op 'e kop of dattig vri'jwilligers op pad veur de eerste grote Stellingwarver veurleesaktie in alle zorginstellings en verpleeghuzen in Stellingwarf. Daornaost wodde d'r in vier Stellingwarver biebeltheken veurlezen. De aktie wodde orgeniseerd deur de Stellingwarver Schrieversronte en de Stellingwarver biebeltheken.
Et enthousiasme en de wardering veur de aktie was groot, bi'j de tehuzen liekegoed as bi'j de veurlezers zels. Et doel is daoromme dat d'r dit jaor tussen de kastdaegen en ooldejaorsdag opni'j in de tehuzen en instellings veurlezen wodt. Butendat zal perbeerd wodden om de veurleesaktie uut te breiden naor ooldere meensken die nog thuus wonen, mar daorbi'j ondersteund wodden deur Thuuszorg.
Deur mitwarkers van de Schrieversronte wodde een selektie maekt van winterverhaelen (o.e. van H.J. Bergveld en Jouk); die wodden in een appatte mappe verzaemeld. Elke veurlezer kon daor verhaelen en gedichten ut kiezen die him of heur et beste laggen. Nao et veurlezen is de mappe anbeuden an de instelling waor veurlezen wodde, zodat d'r nog es weer gebruuk van maekt wodden kan.
Et idee veur de veurleesaktie ontston oflopen jaor in een overleg tussen de Stellingwarver biebeltheken en de Stellingwarver Schrieversronte. Veur de kommende tied staon d'r meer gezaemelike projekten op staepel. Zo wodt in de biebeltheek van Wolvege op de aovend van 31 jannewaori, dan is et de Nationaole Gedichtedag, een workshop gedichten schrieven holen.

Jaorlikse hiemkundemiddag veur passeniel van de Stellingwarver basisschoelen

De jaorlikse hiemkundemiddag was dit jaor, 2007, op woensdagmiddag 26 september. De bi'jienkomst was weer in et gebouw van de Stellingwarver Schrieversronte in Berkoop (Willinge Prinsstraote 10). Tiedens disse middag, die orgeniseerd wodt deur de Stellingwarver Schrieversronte, was d'r andacht veur verschillende hiemkundige onderwarpen. In et eerste diel van de middag was d'r roem ommedaenken veur et wark van histo-tolk Frank Spijkers uut Buil. Hi'j het uutlegd wat percies et doel van zien wark is. Daornao het hi'j een pat van zien verhael over de geschiedenis van de Bekhofschaans heuren laoten. De kiender van de bovenbouw van de basisschoelen van Buil, De Oosterstreek, Noordwoolde en Berkoop weren betrokken bi'j de feestelike eupening van de opknapte Bekhofschaans op 24 meie. Alle kiender kregen van teveuren een speciaol lesboek en een bezuuk van Frank Spijkers om een indrok te kriegen van wat de Bekhofschaans in et verleden betekend het. Veur de schoelen die niet bi'j de eupening betrokken weren, is d'r now een lesboek klaor en d'r kan evt. een ofspraoke mit de histo-tolk maekt wodden.

Nao et schoft is d'r ni'j lesmateriaol uutdield. Veur alle schoelen was d'r een dvd over et ontstaon van de Lende, mit een lesbrief d'r bi'j. Verleden jaor wodde de film tiedens de hiemkundemiddag vertoond.
Veur de middenbouw stelt de Schrieversronte bi'jkotten veur alle schoelen een prachtig, kleurig boek beschikber. Dat boek hiet De hollebomebos, mit as heufdfeguur de hekse Krakkemikka. Uut dit spiksplinterni'je boek is op 26 september iene van de 19 verhaelen veurlezen.

De orgenisaosie was wies mit de anwezighied van krapan dattig personen uut et onderwiesveld.


Dadde drok van "De wereld is gek"

Van Johan Veenstra zien verhaelebundel "De wereld is gek" komt bi'jkotten de dadde drok uut. De eerste drok wodde op 27 augustus 2004 prissenteerd in De Zon in Oosterwoolde. Omdat et boek nog altied goed verkocht wodt, wodde in et laest van veurig jaor deur de Stellingwarver Schrieversronte tot een dadde drok besleuten. De tetaole oplaoge van "De wereld is gek" komt now op 3750 exemplaoren. Et is niet te verwaachten dat et boek hiernao nog een herdrok beleven zal. Johan Veenstra warkt an een ni'je verhaelebundel, mar et is zien bedoeling en kom eerst nog mit een ni'je roman.



Adverteensiepuzel boekekraante

Ok dit jaor [2007] stuurden weer een boel meensken de oplossing van de adverteensiepuzel die in boekekraante 'Twie pond 'n stuver' ston, op. Uut alle oplossings trokken we de naemen van drie winners, en dat bin Petra Haanstra uut Ni'jhooltwolde, E. de Vries van De Haule en G. Tingen uut Appelsche. Ok van dit plak of nog es van hatte fielseteerd! De boekepakketten bin intied naor de winners gaon. Wi'j weensken heur hiel veul plezier mit et lezen!


Winterverhaelen in et Stellingwarfs: grote veurleesaktie op 27 en 28 december

Op donderdag 27 en vri'jdag 28 december gaon zoe'n dattig vri'jwilligers op pad veur een grote Stellingwarver veurleesaktie. De aktie is orgeniseerd deur de Stellingwarver Schrieversronte en de Stellingwarver biebeltheken en is veural bedoeld veur de ooldere inwoners van Stellingwarf die in verpleeghuzen of zorginstellings wonen. Daornaost wodt op vri'jdagmiddag 28 december in vier biebeltheken in et Stellingwarfs veurlezen.
Et idee veur de veurleesaktie ontston oflopen jaor tiedens een overleg tussen Karin Meijerman van de Stellingwarver biebeltheken en Sietske Bloemhoff van de Stellingwarver Schrieversronte. Veur de kommende tied staon d'r meerdere gezaemelike projekten op staepel, waorvan de veurleesaktie d'r iene is.
Omreden juust in de donkere tied van et jaor wat extra ommedaenken veur ooldere en/of zieke meensken hiel belangriek wezen kan, bin de beide veurleesdaegen orgeniseerd. Daornaost vienen beide instellings et belangriek om op disse meniere et belangrieke wark in de zorg es een keer mit dit anbod te ondersteunen. Een schoffien leden wodden daoromme alle verpleeghuzen en zorginstellings anschreven mit de vraoge as ze gebruuk maeken wollen van et veurleesanbod. Daor wodde enthousiast op reageerd en de veurbereidings gongen uut aende.
Deur mitwarkers van de Schrieversronte wodde een selektie van winterverhaelen (o.e. van H.J. Bergveld en Jouk) maekt en in een appatte map verzaemeld. Die mappen bin oflopen weke in een gezellige bi'jienkomst in et gebouw van de Schrieversronte an de veurlezers uutdield. Elke veurlezer kan daor verhaelen en gedichten uut kiezen die him of heur zels et beste liggen. Nao et veurlezen wodt de mappe an de instelling waor veurlezen wodt anbeuden, zodat d'r nog es weer gebruuk van maekt wodden kan.

In biebeltheken iederiene welkom!
De veurleesaktie in de zorg- en verpleeginstellings is op donderdag 27 en vri'jdag 28 december. In vier biebeltheken wodt d'r op vri'jdagmiddag 28 augustus tussen 15.00 ure en 16.00 ure veurlezen. Et gaot om de biebeltheken van Wolvege, Oosterwoolde, Noordwoolde en Appelsche. Daor is de aktie veural bedoeld veur ooldere meensken die nog thuus wonen (kunnen). Mar ok ere meensken mit belangstelling bin van hatte welkom.
Nao de veurleesaktie in tehuzen en biebeltheken zal bekeken wodden as et meugelik is om d'r een jaorlikse tredisie van de maeken. Et eerstvolgende gezaemelike projekt van de biebeltheken en de Stellingwarver Schrieversronte is een workshop gedichten schrieven tiedens de Nationaole Gedichtedag op 31 jannewaori.



Een hiel ni'j jaor

Nog mar pattie weken en daegen
Wi'j jaegen naor et aende van et jaor.

Et kan mi'j niet behaegen
Ik bin nog lange niet klaor!

Ik zol wat meer mit jow praoten
Wat vaeker zeggen da'k van jow hool.

Meer tied deurbrengen mit mien maoten
Stamppot maeken van boerekool.

Wat vaeker angaon bi'j mem,
mar ik zag gien kaans.

De tied drokte mi'j klem
Bin 'k dan niet vule maans?

Nog een peer uren en menuten
dan ligt d'r nog een hiel ni'j jaor.

Lao'k now mar alvast besluten,
dat ligt veur jow en mi'j klaor.

Attie Nijboer
(schreven in 2007, mit et oge op et kommende ni'je jaor)



Europees Buro veur kleine taelen was in Berkoop

Op 20 september vergeerderde de Nederlaanse ofdieling van et Europees Buro veur kleine taelen in et gebouw van de Stellingwarver Schrieversronte in Berkoop. Meerstal wodt in Liwwadden bi'j mekeer kommen, mar soms gaot et om een plak in et Nedersaksische gebied, zoas Zwolle. Disse keer was Berkoop weer an de beurt. D'r wodde o.e. praot over de Europese dag van de taelen van 26 september, over et ontwarp-warkplan 2008, over et beleid veur de kommende vier jaor, over et wark van et koepel-buro in Ierlaand en over een grote konfereensie in Italië van 26-29 september 2007.
Veurofgaonde hullen de Stellingwarver schriever Johan Veenstra en keunstener Peter Hiemstra uut Berkoop een kotte prissentaosie van vuuf objekten en gedichten uut 'Longerlaand', et boekwark en et keunstprojekt daor ze zoe'n sukses mit hebben en al had hebben op de Eupen Stal van dit jaor. Schrieversronte-man Henk Bloemhoff vertelde over de riegel aktiviteiten van de Stellingwarver Schrieversronte van van 't zommer en de kommende haast. Bi'j de Nederlaanse ofdieling bin alle belangrieke orgenisaosies veur et Fries, en veerder de Stellingwarver Schrieversronte en SONT (as koepel van de aandere orgenisaosies in et Nedersaksische gebied).


Raod van Europa kikt weer naor et Nederlaans beleid angaonde de streektaelen

Et 'Committee of Experts of the European Charter for Regional or Minority Languages' was op donderdag 6 september in et Nedersaksische gebied op visitaosiebezuuk, en wel in et perveensiehuus van Overiessel in Zwolle. Et komitee van deskundigen moet om de drie jaor naogaon hoe et staot mit de erkende taelen in een bepaold laand, dus ok mit et Nedersaksisch. De heufdvraoge is dan: dot et laand wel genoeg veur de regionaole taelen die ze erkennen, is et beleid daor wel neffens et nivo daor et laand veur tekend het? Et komitee schrift, as ze genoeg weten, een advies veur de Raod van Ministers van de Raod van Europa. De Raod van Europa het meer as 40 ansleuten lanen, en is nao WO II insteld mit op andringen van Nederlaand. Et advies van et komitee wodt in et gewone geval bekrachtigd deur de Raod van Ministers (van alle lanen dus) en gaot dan as rikkemedaosie naor et laand daor ze west hebben om nao te gaon hoe et d'r mit staot.
Krek as drie jaor leden was ok disse keer de heer Frans-Xaver Goop uut Liechtenstein veurzitter, en weren alle streektaelinstellings uut et Nedersaksische taelgebied van Nederlaand anwezig. Veur SONT hul Jan Haveman een uutienzetting, veur de Stellingwarver Schrieversronte het Henk Bloemhoff de perblemen mit et Stellingwarfs in oonze regio uutduded. Haveman zee dat et riek aenlik niks dot veur et Nedersaksisch, en veurzitter Goop was zels ok nogal ontevreden over de Nederlaanse laandelike overhied. Want drie jaor leden hebben de Europese deskundigen een tal raodgevings geven an Nederlaand, waoronder de rikkemedaosie om tot een saemenhangend taelbeleid te kommen veur de erkende taelen. Zok beleid daor bliekt dislange niks van. Butendat, oonze rieksoverhied hadde nog iens niet een verslag inleverd bi'j de Raod van Europa angaonde de laeste drie jaor. De Raod van Europa kan et riek niet dwingen, allienig mar goeie raod geven. Mar et is wel dudelik dat et laeste woord over disse gang van zaeken bepaold nog niet zegd is. De streektaelinstellings hebben et gesprek mit et komitee trouwens as butengewoon konstruktief ondergaon.
Nederlaans lid van et komitee is Mieke Sanders. Zi'j pleitte d'r naor SONT en de regio-instellings toe veur, dat die vule meer angeven dat et om de erkende tael Nedersaksisch gaot. Ze moe'n naor et pebliek toe daor meer over dudelik maeken, en ze moe'n zorgen dat et haandvest de hieltied in beeld is. Vule meer meensken buten de Nedersaksische kringen moe'n zodoende in de kunde kommen mit de staotus, moe'n weten om welke taelen as et gaot, wat et haandvest in grote lijnen inhoolt, enz., zo vun zi'j.


Mooi risseltaot van de Sutelaktie Stellingwarver Schrieversronte

De sutelaktie van de Stellingwarver Schrieversronte het weer west. Die jaorlikse verkoopaktie van Stellingwarver boeken, cd's en kelinders brocht weer een mooi bedrag op veur de uutgeveri'je van de stichting: krapan € 17.500,00. Dat is een bedrag waor alle sutelders, bestuur en staf van de Schrieversronte mar wát wies mit binnen. Veerweg et beste wodde de ni'je spreukekelinder verkocht, mit vot d'r aachteran Malle meraokels, et eerste boek van Sjoukje Oosterloo. Hiel vule meensken kenden Sjoukje al deur heur verhaelen in de regionaole kraanten, zo bleek de sutelders onderwegens. Hiel goed verkocht ok et boekien mit striptekenings Piere en Slakke van Jan Oosterhof, Een brogge van glas en De wereld is gek van Johan Veenstra. Et ni'je boek Longerlaand van Peter Hiemstra en Johan Veenstra dat oflopen 13 juli verscheen was al roem veur de sutelaktie uutverkocht.
Op de slotaovend van de sutelaktie wodde ofscheid neumen van sutelder en schriever Wiebe H. de Vries. De Vries sutelde jaorenlaank mit, mar is onderdehaand over de tachtig. Zien gezondhied lat et niet meer toe om ankem jaor nog weer mit de kroje de straote op te gaon.
Daornao wodde ofscheid neumen van Klaas van Weperen uut Wolvege. Van Weperen dee zes jaor de koördinaosie van de sutelaktie; ieder jaor bin d'r zoe'n 80 vri'jwilligers veur in et spier. Nao woorden van lof van direkteur Sietske Bloemhoff en vice-veurzitter Grietje Bosma – die een prachtig toepasselik naemdicht hadde - kregen Klaas van Weperen en Anneke, zien vrouw én onmisbere sutelhulpe op de aachtergrond, een kedobon en een bloemstok veur alles wat we veur de sutelaktie uut de wege zet hebben.


Boeiende lezing van Mr. Van Heel over de Middelieuwse grootte van Stellingwarf, en... kan Stienwiekerlaand beter 'Zuud-Stellingwarf' hieten?

Op 11 oktober orgeniseerde de Stellingwarver Schrieversronte een slim interessaante lezing over de geschiedenis van Oost- en West-Stellingwarf. Spreker was Mr. Caspar van Heel, veur zien pensioen archiefinspekteur van de perveensie Overiessel. Et onderwarp was 'Hoe groot waren de Stellingwerven oorspronkelijk?'. Weinig vaalt mit zekerhied te zeggen over de echte, oorspronkelike grootte, mar wel is d'r veul dat d'r op wist dat grote patten van Noordwest-Overiessel bi'j et oorspronkelijke Stellingwarf heurden, mit naeme et gebied van et oolde Iesselham, mar lichtkaans toch ok Gieteren. De relaosie mit Diever van de oostelike Stellingwarvers is niet botte deurzichtig, mar d'r bin toch tekens dat al et gebied van Stienwiek en wiede omstreken ooit ien gehiel was, inklusief Stellingwarf. Van Heel illestreerde zien lezing mit een protte lochtbeelden via een beamer, en butendat leut hi'j et pebliek in de kunde kommen mit zien lange lieste van bronnen (oorkonden) die op et Middelieuwse Stellingwarf betrekking hadden. In een eerdere lezing in Stienwiek hadde Van Heel al es veursteld dat de gemiente daore beter Zuud-Stellingwarf hieten kund hadde, en daor sleut hi'j zien lezing ok disse keer mit of. Zien verhael zal, zo et now liekt, ok in een bundel over Stienwiek en omstreken verschienen. Een kleine vuuftig meensken weren veur disse lezing naor et gebouw van de Schrieversronte in Berkoop kommen. Ze hebben volop geneuten. Wie zien kaans mist het, kan in feberwaori mooi naor een aovend van de Vereniging Historie Weststellingwerf gaon daor hi'j komt te praoten over ditzelde onderwarp. Van Heel vreug him nog of was 2009 ok et jaor veur een viering van 100 jaor Stellingwarf wezen zal. Inderdaod zal dat, en daorover is meer te vienen op disse webstee. Ien en aander wodt bi'jkotten van meer infermaosie veurzien.


Stellingwarver middag: Tael en Thee

Op zundagmiddag 25 november orgeniseerde een groepien schrievers van de Stichting Stellingwarver Schrieversronte (Martha Hoekstra, Koosje Hornstra en Ate Mulder) een Stellingwarver middag in et theater van Karst Berkenbosch in Berkoop. Tiedens de middag, waorvan et pergramme de naeme Tael en Thee dreegt, hebben een tal Stellingwarver dichters/schrievers uut eigen wark veurdreugen. Daornaost het Karst Berkenbosch veur muzikaole ofwisseling in et pergramme zorgd. An disse eerste Tael en Thee deden mit: Jimmy Visser, Joukje Postma, Grietje Bosma, Marijke Ponne, Kees Koopstra en Roely Bakker. De prissentaosie was in hanen van Martha Hoekstra en Koosje Hornstra. De intree van de middag is € 6,50, daorbi'j bin twie paanties thee of koffie en een vulde koeke inbegrepen. De middag begon om drie ure en duurde tot omdebi'j kwat over vufe. Op de laeste zundagmiddag van jannewaori wodt de twiede Tael en Thee holen, ok weer in et theater van Karst Berkenbosch an de Wolvegasterweg in Berkoop.


Sutelaktie Stellingwarver Schrieversronte 2007 komt d'r an!

Waore? Daore! Op 3 september (maendagaovend), op 5 september (woensdagaovend) en 10 september (maendagaovend) in Stellingwarf-Oostaende: Appelsche (zuud), Berkoop, Oosterwoolde (zuud) en Raevenswoold; in West-Stellingwarf op 12 september (woensdagaovend), op 17 september (maendagaovend) en 19 september (woensdagaovend.)
Ja, op die tieden dan rattelen de sutelaktie-krojen van de Stellingwarver Schrieversronte weer deur de Stellingwarver straoten. Die jaorlikse verkoopaktie van Stellingwarver boeken, cd's en kelinders is op zes aovens in de eerste helte van september. Jaorliks doen zoe'n tachtig vri'jwilligers van de Schrieversronte mit an de altied slim suksesvolle verkoopaktie. Dit jaor komt de aktie in Oost-Stellingwarf in Appelsche (zuud), Berkoop, Oosterwoolde (noord) en Raevenswoold. In West-Stellingwarf wodt d'r suteld in Hooltpae, Ni'jhooltpae, Blesdieke, Scharpenzeel, Munnikeburen, De Langelille, Der Izzerd, Spange, Noordwoolde, Zaandhuzen en een pat van Wolvege.

Ieder zien meuge, zee de boer

…en hi'j nam viegen veur de dust. Dat zeggien en nog 4474 aanderen mit 'zee die-en-die' in et Nederlaans, Fries, Nederduuts, Engels én een protte uut Nederlaanse streektaelen weg ommezet in et Nederlaans, bin lessend bi'j mekeer brocht en veur uutgifte klaormaekt deur volkskundige dr. Jurjen van der Kooi. Et is een ienvooldig uutvoerde uutgifte wodden, die arg belangriek is op dit terrein. Of, om et in de woorden van NRC-redakteur Ewoud Sanders te zeggen (NRC 15 juni 2007): 'het definitieve werk op dit gebied, ook vanwege de doortimmerde inleiding'. Et kan van now of an allienig mar meer besteld wodden bi'j et Fries Instituut/FFRYG van de Grunninger Universiteit, Pb. 716, 9700 AS Grunningen. Et boek is deur FFRYG uutgeven tegere mit Sasland.

EERDERE ANKONDIGING STELLINGWARFPOP
(Dit bericht is op 23 juni van de eerste bladziede haeld)

Geef et deur en gao d'r henne! Ja, op 2 juni is et dan eindelik zoveer! Et eerste echte Stellingwarver popfestival STELLINGWARFPOP wodt holen!
Op et Pastorieplein in Wolvege wodt deur negen Stellingwarver popgroepen mitdaon an et eerste echte Stellingwarver popfestival. Et festival wodt orgeniseerd deur de Stellingwarver Schrieversronte in et kader van de Rabobaank anvieteringspries veur et Stellingwarfs. Die pries, bedoeld om et gebruuk van et Stellingwarfs an te vieteren bi'j bepaolde doelgroepen of aktiviteiten, wodde drie keer eerder uutrikt. De eerste keer gong et om et Groot Stellingwarfs Diktee, de twiede keer wodden d'r twie zangaovens orgeniseerd veur zangkoren uut de beide Stellingwarven en de dadde keer was d'r een veurdrachtswedstried veur leerlingen van et basisonderwies.
En now dan een popfestival! De warkgroep van de Rabobaank anvieteringspries veur et Stellingwarfs (Henny Koops, Roelof Dragt en Sietske Bloemhoff) is zoe'n twie jaor leden mit de aldereerste veurbereidings begonnen. Aenlik al mitien wodde besleuten om de warkgroep uut te breiden mit meensken uut de doelgroep zels. Dat was eerder ok gebeurd bi'j et orgeniseren van de zangaovens en dat hadde slim goed voldaon. Binnen kotte tied wodde de warkgroep anvuld tot 11 personen die allegere, op wat veur meniere dan ok, wat 'hebben' mit (et orgeniseren van) festivals. Et bin Albertha Bloemhoff, Remy Tjassing, Jeroen van der Pol, Bernard Damhuis, Piet Tjassing, Robert van Dam, Anne Henk Bloemhoff en Léon van Lier.
Mit riegelmaot kwam de warkgroep bi'j mekere in Grand-Café De Burgemeester an et Pastorieplein in Wolvege. Dit kefé van Léon en Ria van Lier zorgt op 2 juni veur et nattien en dreugien, mar dri'jt ok uut enthousiasme mit in de orgenisaosie.
An et festival doen negen bands mit. Alle bands moe'n op zien minst ien Stellingwarfstaelig nommer brengen. Mit dat nommer maeken ze kaans op ien van de drie te winnen priezen. De eerste pries bestaot uut een geldbedrag van € 300,00, de twiede uut € 200,00 en de dadde pries is € 100,00 weerd. Mit een peer oproepen om je veur et festival an te mellen in o.e. boekekraante Twie pond 'n stuver was et tal bands dat mitdoen kan, zo berikt. Op dit mement staon d'r alderdeegst al vier groepen op de reservelieste. Alle bands reageerden hiel enthousiast op dit Schrieversronte-initiatief en hebben allegere hiel vule nocht an et gebeuren. Et doel is dat grote dielen van et festival rechtstreeks te heuren binnen op de lekaole omroepen Odrie (Oost-Stellingwarf) en Centraol (West-Stellingwarf). Et festival wodt daornaost professioneel vaastelegd op dvd.

De negen bands
De negen bands die mitdoen bin: een gelegenhiedsfermaosie van Believeisadoubt, Gien Gok, Infinite, Memory Lane, Parka, Revolta, Shady Lane, Sweat Nothings en Zie Maar. Wie uuteindelik mit de priezen strieken gaot, wodt bepaold deur een deskundige jury. In die jury zitten o.m. Willo de Bildt (docent opleiding Pop en Media in Liwwadden), Peter Riksma (neerlandikus en meziekliefhebber), Jan Oosterhof (Stellingwarver zanger en muzikaant) en Sjouke van Olphen (Rabobaank De Stellingwerven). Op dit mement wo'n nog een peer meensken benaoderd om plak te nemen in de jury.
De prissentaosie van et festival is in hanen van Jelle Broersma, bi'j bezukers van popfestivals een bekende naeme, en Jeannette Roeles, zangeres en veurdrachtskeunsteneres. Et festival duurt tot naachs 12 ure, om die tied henne wo'n de drie prieswinners bekendmaekt.

Cd
Et festival begint middags om drie ure en zal eupend wodden deur burgemeester Harry Oosterman van Oost-Stellingwarf en burgemeester Gerard van Klaveren van West-Stellingwarf. Et doel is dat d'r bi'j de eupening van et festival mitien de prissentaosie is van een cd, mit daorop de negen Stellingwarver nommers. De cd wodt in disse tied opneumen in Studio Caseio in Tuk.
Et uutgeven van de cd wodt financieel meugelik maekt deur een extra gift van de Rabobaank De Stellingwarven, de Stellingwarver Schrieversronte zels, en een subsidie van de perveensie Frieslaand. De cd is vanof et festival op 2 juni te koop veur € 10.00 et stok.


Internationaole streektaelkonfereensie: naodrok op riekdom an meugelikheden

De internationaole streektaelkonfereensie van veurbi'je vri'jdag in Noordwoolde het een protte inzicht geven in de situaosie van de verschillende regionaole taelen en streektaelen in Nederlaand, Vlaanderen en Noord-Duutslaand. Haost overal is et zo dat de regionaole taelen en streektaelen d'r zwakker veur staon as vroeger, mar liekegoed gavven de deskundigen die nuugd weren om een lezing te holen hiel wat wegen an die insleugen wodden kunnen om verbetering te kriegen. Perf. dr. Hermann Niebaum, in Stellingwarf goed bekend vanwegens zien saemenwarking mit de Schrieversronte in een tal projekten, gaf een beeld dat onderzuuk en studie veur et Nedersaksisch an de Rieksuniversiteit Grunningen liekewel as in sommige plakken in Noord-Duutslaand minder wodden binnen, veural as gevolg van de financieringssystemen. Mar liekegoed moet bepleit wodden, vun hi'j, dat d'r in Nederlaand een soort vergeliekende grammatika komt van de verschillende soorten Nedersaksisch. Veur zien warkgebied an de ere kaante van de greens en wiederop in et Nederduutse gebied willen ze een taeltelling zoas de Taeltelling Nedersaksisch. Op die meniere kriegen ze zicht op waor de tael staot en zoks is van belang veur et hoe now veerder.
Dr. Reinhard Goltz van et Institut för Nedderdüüts in Bremen gaf een beeld van de warking van et Europees haandvest in de verschillende Noord-Duutse staoten, Nedersaksen en Sleeswiek-Holstien o.e. De erkenning is ien ding en die is neudig, an de aandere kaante moe'n meensken zels wel hiel wat uut de wege zetten an aktiviteiten. Een mooi Nederduuts veurbeeld veur Nederlaanse en Vlaamse regio's is et invoeren van een onderdiel regionaole tael in de opleiding veur lerers. Een kracht die daor zorgt dat d'r ok goed overlegd wodden kan mit de nationaole regering, is de Bundesraat för Nedderdüütsch. Krachten bundelen is in Nederlaand en Vlaanderen ok neudig, neffens perf. dr. Roeland van Hout, hooglerer in de variaosietaelkunde an de Radboud Universiteit in Nijmegen. Hi'j is veurzitter van de Raod veur 't Limburgs. Hi'j gaf zicht op de plannen veur et Limburgs de kommende jaoren. Op et nationaole vlak zag hi'j bepaold gien betrokkenhied bi'j de streektaelen deur de Nederlaanse taelunie, en van et Meertens-Instituut verwaachtte hi'j al liekemin hulpe veur de streektaelen. De rieksoverhied voert een soort beleid van palliatieve sedatie op 'e erkende taelen Nedersaksisch en Limburgs, zee hi'j. Daor zol een soortement platform van streektaelen tegenover staon kunnen, leek him toe. Drs. Rob Belemans van et Vlaams Centrum veur Volkskultuur in Brussel kwam mit de naeme 'streektaelunie', mar vrouw lic. Veronique de Tier uut Gent en hi'jzels brochten veerder veural de situaosie van de dialekten van et Nederlaanse taelgebied in België naor veuren. Daor wodt perbeerd flink wat an de dialekten te doen in et kader van et immaterieel arfgoed. Vrouw Ina Bieze, docent Nederlaans in de Twiede Fase van et Dr. Aletta Jacobscollege in Hoogezaand leut zien hoe aj' mit naeme in projektvorm et Grunnings op een ansprekend meniere integreren kunnen in et Studiehuus. Ingrid Drenthe, warkzem bi'j de Schoelegemienschop Singelland in Drachten schetste hoe een vak Grunningers d'r uutzien kunnen zol, ophongen an et European Framework of Reference, dat de hieltied belangrieker wodt in et onderwies, ok in Nederlaand. De Grunninger drieslag wodde liekewel begonnen deur Vrouw Riemke Bakker van Grunneger toal, die zicht gaf op et onderwies veur volwassenen. De heer Eelke Goodijk van Cedin in Liwwadden leut zien hoe et drietaelig onderwies Fries, Nederlaans en Engels an een tal schoelen now al goed warkt. Veural van belang is de veurbeeldwarking van dat medel en van et gegeven dat d'r gien schae ondervunnen is, wiels de taelriekdom van et Fries op disse meniere deur de jeugd oppakt wodt. In reaktie prees Perf. Van Hout de formule, benaemens omdat onderzuuk zien lat dat nargens piene leden wodt deur disse drietaelige anpak. Streektaelfunktionaoris dr. Henk Bloemhoff schetste hoe van de bevolking uut staorigan mit man en macht een streektaelinstituut opbouwd is in Oost- en West-Stellingwarf, hoe gaondeweg benaemens de gemientepoletiek bereid bleek te helpen en hoe daor now een produktief en professioneel streektaelinstituut uut opbouwd is. Hi'j leut o.e. zien de belangrieke rolle van de gemienten veur de gemientelike taelpriezen, de gemientelike meugelikheden om de trouwtoespraoke in et Stellingwarfs te doen, de regeling dat meensken et Stellingwarfs naor de gemiente toe bruken kunnen, en meer. Liekewel pleitte hi'j veur et volgen ok deur Oost- en West-Stellingwarf van et medel dat deur veul aandere Friese gemienten volgd wodt veur et Fries, en dat vanuut de perveensie ok rikkemedeerd wodt veur et Stellingwarfs in Oost-en West-Stellingwarf. Dat wil zeggen: uutbouw van et gebruuk deur de gemiente van et Stellingwarfs.deur middel van een taelbeleidsplan, wat ok de perveensie rikkemedeert. Deur nogal wat sprekers wodde steld dat d'r grote kaansen en meugelikheden binnen veur de streektaelen, vandaege-de-dag. Ok konstateerde men dat d'r in disse tied in streektaelen schreven, zongen, drokt en onderwezen wodt as nooit eerder vertoond. De kaansen en meugelikheden angriepen dus, was de bosschop. Vanuut et Forum drongen mit naeme veurzitter Anne Doornbos van et Drentse Huus van de Taol en et lid van de Twiede Kaemer Harm Evert Waalkens daor op an. Waalkens leut weten dat de overhied graeg praot mit een starke 'parnter' die veur et gehiel opkomt. Van dat was et him al dudelik wodden dat d'r een starke lobby blift veur de erkenning van et Nedersaksisch onder diel III van et Europese haandvest. De petitie van Noord- en Oost-Nederlaand daor over mos binnenkot weer deur de Kaemer oppakt wodden, zee hi'j. Partners zuken was ok nogal es een tip. Now, de Schrieversronte leut zien et vak van partners zuken en kontakten benutten ommeraek onder de kni'je te hebben, deur et veurbeeld van disse dag: instituten en deskundigen van Bremen tot Brussel gavven heur mitwarking, liekas ok de kundige en fleurige dagveurzitter dr. Piet Hemminga van de Fryske Akademy en sponsor Bank Bercoop, wiels ok boekwinkel Zwikstra uut Wolvege een interessaante uutstalling gaf op zien boeketaofel. Krek as nao de eerste nationaole streektaelkonfereensie in et perveensiehuus van Limburg veurig jaor zullen ok nao disse konfereensie de lezings in een bundel verschienen, onder supervisie van de inhooldelike veurbereiders van disse dag: perf. Niebaum, perf. Van Hout en Schrieversronte-man Henk Bloemhoff.


'Streektaalbeleid en duurzaamheid: waartoe, waarheen en hoe!'
Internationaole streektaelkonfereensie in Noordwoolde (Stellingwarf)

{dit bericht is van de eerste bladziede haeld op 25 meie 2007)

Et streektaelinstituut Stellingwarver Schrieversronte in Berkoop orgeniseert jaorliks een symposium. Dit veurjaor is et tied veur een onderwarp dat ommeraek de muuite weerd is veur meensken mit belangstelling uut alle regio's: streektaelbeleid veur de toekomst en de aktiviteiten die d'r bi'j heuren. Et gaot om een grote internationaole streektaelkonfereensie. Elk die hier aorighied an het is hattelik welkom!
plak: Multifunktioneel Centrum 't Vlechtwerk, Mandehof 13, Noordwoolde
daotum: vri'jdag 25 meie, tied: 9.30 - 16.45 ure

pergramme

9.30 Binnen kommen mit koffie
10.00 Eupeningstoespraoke deur de dagveurzitter - dr. Piet
Hemminga, Fryske Akademy, Liwwadden
10.15 'Situatie en wenselijkheden voor de studie van het
Nedersaksisch: in Nederland en Duitsland' - Perf. dr. Hermann
Niebaum, Rieksuniversiteit Grunningen
10.45 'Het Europees Handvest en het Limburgs: het politieke en het
taalkundige discours' - Perf. dr. Roeland van Hout, Radboud
Universiteit, Nijmegen
11.15 'Mehrsprakige Kinnergaarns in Oostfreesland: Praxis un Umfeld' - Maria Ganter (onder veurbehoold), leidster Kindergarten
Rappelkiste, Aurich-Walle
11.45 'Gronings in het volwassenenonderwijs en in het Studiehuis:
praktijk en mogelijkheden' - mevr. Riemke Bakker, Stichting
Grunneger Toal, Bedum, mevr. Ina Bieze, Dr. Aletta
Jacobscollege, Hoogezaand en mevr. Ingrid Drent,
Scholengemeenschap Singelland, Drachten
12.15 Grote pauze
13.15 'De Tokunft vun dat Nedderdüütsche: Wat deit de Staat, wat
maakt de Verwaltung?' - dr. Reinhard Goltz, Institut för
Nedderdüütsch Spraak/Institut für Niederdeutsche Sprache, Bremen
13.45 'Beleidsontwikkeling en ondersteuning voor niet-erkende
dialecten in Vlaanderen en Zeeland' - Lic. Veronique De Tier,
Stichting Cultureel Erfgoed Zeeland/Variaties vzw/Universiteit
Gent, en drs. Rob Belemans, Vlaams Centrum voor Volkscultuur,
Brussel
14.15 'De gemeentelijke basis voor streektaalbeleid: situatie en
wenselijkheden' - dr. Henk Bloemhoff, Stellingwarver
Schrieversronte, Berkoop
14.45 'Essenties van drietalig onderwijs Fries, Nederlands, Engels,
nu en in de toekomst' - Eelke Goodijk, Cedin, educatieve
dienstverlening, Taalsintrum Fryslân, Liwwadden
15.15 Theetied
15.45 Forum mit de heer Anne Doornbos (veurzitter Huus van de Taol,
Assen), de heer Frits Speetjens (oold-borgemeister van Oirschot
en veurzitter van de stichting Het Brabants, 's-Hertogenbosch),
mevr. drs. Daisy Vliegenthart, bestuurskundige, Hoofddorp en de
heer Harm Evert Waalkens, lid van de Twiede Kamer van de
Staoten-Generaol
16.15 'Meziek in streektael': optreden van de Sallaanse groep
Muppetstuff, de akoestische band uut Zwolle die rondomtoe
sukses het, mit o.e. et lied Oelevloch, tekst van de Sallaanse
dichteresse Johanna van Buren
16.45 Sluting

Toelochting
De binnen- en butenlaanse specialisten die hierveur nuumd binnen, bin bereid vunnen om et pebliek mit veurbeelden te veurzien van infermaosie over et streektaelbeleid van now en aktiviteiten d'r bi'j in heur gebied. Ze zullen angeven wat veur streektaelbeleid ze neudig vienen veur de taeldomeinen daor ze over vertellen; ien en aander wodt ok bekeken van de situaosie van heur regio uut.
Nao elke lezing is d'r kot gelegenhied om vraogen te stellen. In de twiede helte van de middag is d'r een forum. D'r zal o.e. ingaon wodden op vraogen as: hoe kun politici zorgen veur een goed streektaelbeleid?An et aende is d'r een optreden pland van de akoestische band Muppetstuff uut Zwolle, mit lieties in et Nedersaksisch, en dat zal anspreken.
Inhooldelik wodde de konfereensie veurrbereided deur de Stichting Stellingwarver Schrieversronte, m.m.v. Perf. dr. Hermann Niebaum en Perf. dr. Roeland van Hout.
Et gaot om et vervolg op de Eerste nationaole streektaelkonfereensie die op 16 juni 2006 holen wodde in de Staotezael van et Gouvernement an de Maas in Mestricht.

Veerdere infermaosie
Disse internationaole streektaelkonereensie wodt orgeniseerd deur de Stichting Stellingwarver Schrieversronte, et streektaelinstituut van Oost- en West-Stellingwarf in Berkoop, en is in financieel opzicht mit meugelik maekt deur Bank Bercoop.
Boekhaandel Zwikstra van Wolvege zal d'r mit boeken staon. Mitdoen an de konfereensie is ommenocht, mar et is wel neudig daj' je van te veuren opgeven.

Eupening opknapte Bekhofschaans

Op 24 meie zal middags de eupening wezen van de opknapte Bekhofschaans, dat is an de Lende bi'j Berkoop. Flink wat orgenisaosies uut Zuudoost- Frieslaand hebben veur die gebeurtenis een tal biezundere aktiviteiten ontwikkeld. Die bin veur verschillende doelgroepen.
Om 12.45 ure begint et zonuumde 'Expertdiel' in Et Waopen van Berkoop, mit een inleiding over de Friese Waeterlinie, de Lende-Kuunderlinie en de Bekhofschaans. Dit diel van de dag is alliend veur geneudigden. Van 14.30 ure of is dan tied veur et diel Living History, mit een grote rolle veur een groep Bourtanger dragonders en de ooldste kiender van de basisschoelen van Berkoop, Buil en Noordwoolde. De warkelike eupening is in dit diel opneumen. Ok de beide Stellingwarver burgemeesters zullen daor een belangrieke rolle in speulen. Bi'j de eupening zal ok een bod onthuld wodden, mit gegevens over de schaans.
Uut Bourtange kommen niet alliend dragonders. De groep nemt o.e. een peer kenonnen mit, die ze vanzels ok bruken zullen…
Eers is et zo rustig bi'j de Bekhofschaans, mar mit disse feestelikheden wodt et een hiel spektaokel. Iederiene die dat graeg mitmaeken wil, is van hatte welkom. De wegen naor Bekhof toe wo'n middags veur et deurgaonde verkeer ofsleuten. Bezukers kun liekewel de auto kwiet an de Madenweg of op et stok laand schuin tegen Bekhof over.

Veur et onderwies is een lessepakket ontwikkeld. Veurofgaonde an de eupening van de schaans zal et op de schoelen in de buurt bruukt wodden. Ok zal in et begin van de meimaond histo-tolk Frank Spijkers uut Buil bi'j die schoelen daele mit een biezunder pergramme. Dan weten de kiender veur de eupening al et ien en aander over schaansen en waeterlinies.

Et doel is dat de warkgroep, daor vertegenwoordigers in zitten van de verschillende orgenisaosies, nao de eupening van de Bekhofschaans kieken zullen as d'r veur de ere schaansen in de buurt én de Lende-Kuunderlinie ok extra ommedaenken wezen kan. De veur dit projekt saemenwarkende orgenisaosies bin: Vereniging Historie Weststellingwerf e.o., Landschapsbeheer Friesland, Staatsbosbeheer/It Fryske Gea, Dörpsarchief Berkoop, Plattelaansprojekten Zuudoost-Frieslaand en de Stellingwarver Schrieversronte.


Saemenwarking mit Stichting Sasland

Al een maond of wat leden het de Stichting Sasland in Grunningen, die oorspronkelik opzet is deur mitwarkers van et Nedersaksisch Instituut, anvulling van et bestuur kregen. Butendat hebben ze de verkope van heur studies onderbrocht bi'j de Stellingwarver Schrieversronte, in een saemenwarkingsverbaand. Boeken as “Over het ontstaan van Vriezenveen” van perf. dr. H. Entjes, “Tussen Vlie en Wezer. Verzamelde bijdragen tot de Friese, Oostnederlandse en Nederduitse naamkunde” van dr. R.A. Ebeling en van dezelde auteur “De familienamen in Drente anno 1947, een retrograde lijst” bin van now of an uutslutend te koop bi'j de Stichting Stellingwarver Schrieversronte. Bestellings per mail kun naor info@stellingwarfs.nl.
Een komplete lieste van de titels die (nog) leverd wodden kunnen, komt over een poze ok beschikber. De kosten van et versturen kommen over de priezen henne.


"De Ovend" in prachtige kleuren

Zoas al ankondigd is wodt et tiedschrift De Ovend van dit jaor of in kleur drokt. Et eerste nommer is al verschenen. Et gaot om de 35e jaorgaank no. 1. Ok dit nommer het weer 32 bladzieden, en et het prachtige foto's, haost allegeer in kleur. Behalven vaaste bi'jdregen het disse Ovend o.e. een fleurig veuroffien van Jannes Westerhof, Koosje Hornstra brengt heur vraoggesprek mit Doeke Duursma naor veuren, we kriegen de tekst van een lezing van veldnaemedeskundige Rudi Ebeling, we kriegen te weten wat Carel Zuil beslist een mooi boek vint, Jannes Westerhof lat Jan Eize Hofstee vertellen over 'Dat plak dot me wat', d'r bin gedichten van Harmen Houtman en Roely Bakker en kotte verhaelen van Sjoukje Oosterloo, W. de Jong en Klaas Jalving. En dan is nog iens niet alles nuumd. Doe krek as een hiele protte aandere meensken: neem een abonnement op De Ovend!! Dat gelt van now of 12,50 euro in 't jaor, losse exemplaoren kosten 2,50 euro.


Nederlaanse dialektedag het weer west

Op zaoterdag 17 meert was weer de twiejaorlikse dialektedag van de Stichting Nederlandse Dialecten. Die dag wodde disse keer hullen in et Vlaamse Mechelen, in et Erfgoedcentrum Lamot. De morgens weren d'r drie grote lezings: “Spelenderwijs gezegd. Over taalvariatie in kinderspelwoordenschat” deur Rob Belemans, “Gemeenschapszin en competitie in Idols. Rituele bekentenissen van een televisie-talentenjacht” deur Stijn Reijnders in saemenwarking mit aanderen, en “De Gerrit Callewaert in ieder van ons” deur Marc Reynebeau. Disse lezings staon ok in de bundel die op disse dag uutkwam. Et grootste pat in dat boek bin liekewel artikels over taelvariaosie in verbaand mit kienderspullegies. Alle streektaelgebieden in België en Nederlaand kommen an bod, ok Stellingwarf. Et boek hiet toepasselik “Dialect in het spel” (431 blz., pries 15,00 euro; kosten van et versturen kommen d'r overhenne; bestellings: snd@mail.be). De middags weren d'r warkwinkels, een infomark, en... de neudige meziek en gezellighied. De volgende SND-dag zal neffens de gewoonte weer in Nederlaand wezen.


Ni'j beleidsplan Schrieversronte rikkemedeert duurzemhied en verni'jing

Op 1 meert verscheen bi'j de Stichting Stellingwarver Schrieversronte et ni'je beleidsplan. Dat zal et raemwark wezen veur et wark en de aktiviteiten van de Stellingwarver streektaelinstelling in de kommende jaoren en veur et ontwikkelen van visies over de Stellingwarver kultuur. De titel is Mit mekaander veerder mit et Stellingwarfs, en et plan slat op de tiedrekte tot 2016. In et plan wodt angeven op welk beleid, op welke aktiviteiten en ok op welke visies e.d. deurgaon wodt, en mit welke beleidsstokken en ontwikkelings rekening holen wodden zal.
Zo wil et bestuur an de haand van de kriteria van et Europees Haandvest veur regionaole taelen of taelen van minderheden in verschillende domeinen taelaktiviteiten ontwikkelen en anvieteren, naost et basispakket an aktiveiten. Dat kan gaon om uutbreiding van de aktiviteiten van et instituut zels, mar et kan ok gaon om ni'je aktiviteiten in projektvorm. Et bestuur zicht de taelkunde en taelbegeleiding en et Stellingwarfs binnen hiemkunde as vaaste onderdielen van et Stellingwarver streektaelinstituut en zal d'r ok in die geest mit ommegaon de kommende tied. As de Stellingwarver Schrieversronte een professioneel instituut blieven wil en niet alliend mar een verieninge van vrunden van de streektael wezen zal, dan is een staf mit kwaliteitszetels een belangrieke veurweerde, zo zegt et repot. De omvang en inhoold van een protte vraogen om hulpe en infermaosie en de vraogen om hulpe bi'j alderhaande projekten maekt behoold van de tetaole fermaosie van now meer as neudig, zo docht et bestuur.
Krek as de laeste jaoren meer en meer gebeurd is, zal deurgaon wodden mit de veerdere professionalisering. Dat die vanneuden is is ok een gevolg van de gruui en de ontwikkelings. Veur de veerdere professionalisering is al een basisplan ontwikkeld.
Veerder zullen d'r meer saemenwarkingsprojekten opzet wodden om et Stellingwarfs en et streekeigene heur gerak te geven. D'r wodt benaemens docht an biezundere doelgroepen veur kursussen, op et terrein van de tael liekewel as op dat van de geschiedenis. Waor et van nut wezen kan zal d'r nog meer saemenwarkt wodden mit aandere instellings as dislange, al wodt de riegel an now al as indrokwekkend beschouwd. D'r wodt o.e. docht an veerdere saemenwarking mit et Projektbureau Zuidoost-Fryslân.
Extra publieksaktiviteiten wo'n verwaacht bi'j et in uutvoering nemen van et projekt Et Stellingwarfs en de dörpen, dat de Schrieversronte as plan het. Ok wil et streektaelinstituut meer wark maeken van et zichtber wodden van et Stellingwarfs, zoks o.e. in ansluting op een perveensiaole nota veur et Fries. Veur Stellingwarfs binnen hiemkunde op de basisschoelen zullen extra plannen ontwikkeld wodden, en mit et Tomke-projekt veur de ukken wodt deurgaon. Daor zal appatte financiering veur kommen moeten.
Et repot kondigt veerder o.a. jaorlikse symposia an, een aktieplan veur et Stellingwarfs in de media, en, veur de hiele kotte termien, een Stellingwarfs popfestival. Mar liekegoed wodt deurgaon op de vaaste meniere van veurrang geven an de duurzemhied van et streektaelinstituut, an bestaonde aktiviteiten en de vaaste vormen van saemenwarking mit een hiele riegel instellings, verienings en ondernemings.
Onder de kop Hoe now veerder? geft et Schrieversrontebestuur zien belangriekste doel: 'Veur 1972 was d'r aenlik hielendal niks in en veur et Stellingwarfs. In 35 jaor tied is d'r hiel vule opbouwd. Aenlik is dat een klein wonder. Mar een wonder dat deur grote eigen inzet en deur de permanente steun van de gemienten en de perveensie tot staand brocht is. En daor moet mit vaort en visie an veerderwarkt wodden. Struktureel en mit oge veur een duurzem behoold'.
De titel van disse ni'jste Schrieversronte-uutgifte dot daenken an et richtinggevende repot/diskussiestok uut 1977, Veerder mit et Stellingwarfs, dat indertied mit op anraoden van Perf. dr. Anne Vondeling opsteld wodde. De keuzes die de Schrieversronte in dit ni'jste repot daelelegd het, bin netuurlik hielemaole van disse tied én ze bin richt op de volgende tien jaor. Toch het et bestuur veur duurzemhied keuzen in de vorm van behoold en verstarking en niet veur al te grote verni'jingsplannen. Dat komt uut et idee weg dat et goeie behaeld is mit een hiele protte inspannings en investerings en dus behullen wodden moet, en dat muuilik te veurspellen is hoe de wereld over een jaor of viere, vieve daenkt over et ommegaon mit oonze streektael en de streekkultuur. Mar een goed Stellingwarfs kenniscentrum en veerdere kennisontwikkeling zullen meensken in de toekomst hoe dan ok altied weerde an hechten blieven. Dat meuj' netuurlik mit een gerust hatte verwaachten, dat daoromme ok de naodrok op duurzemhied. En bi'j slot van zaeke, oge veur duurzemhied past ok hielemaole in de geest van et mement; mit mekeer op een degelike meniere veerder, is de gedaachte. Et ni'je repot is 24 bladzieden en gelt vuuf euro, buten de kosten veur et versturen omme.


'BOEK, Weet wat je leest' geft ommedaenken an et Stellingwarfs

Dit prachtige 'ni'js- en aachtergrondblad' over boeken dat himzels 'populair literair magazine' nuumt, het ok disse keer weer prachtige vraoggesprekken en uutvoerige aandere stokken mit infermaosie. Biezunder is disse keer, we hebben et over no. 1 van jg. 4, dat d'r een aorig artikel in staot over lezen in de streektael. En inderdaod, behalven et Limburgs, Drents en et Nedersaksisch in et algemien kriegen mit naeme boeken in et Stellingwarfs flink ommedaenken. Gelokkig dat dit soort laandelike blaeden 'de perveensie' niet overslat. Zoveul schrievers en zoe'n protte lezers in de kleinere taelgebieden, dat is ommes een verschiensel daor aj' niet zomar even an veurbi'j heuren te gaon!


STRAOLENDE DAG VEUR KURSISTEN VAN KURSUS STELLINGWARFS I

Inderdaod, et was beslist een straolende dag de zaoterdag die now al weer veurbi'j is, de 19e feberwaori 2007 om percies te wezen. Wat et zunneschienweer anbelangt, en veur negen personen die mitdaon hebben an de jaorlikse kursus Stellingwarfs ok in een aander opzicht. Want in et gebouw van de Stellingwarver Schrieversronte in Berkoop wodde de kursus Stellingwarfs veur beginners ofsleuten, en dat gebeurde mit een slim gezellige en kreatieve examendag.
Van de twaelf kursisten die in et eerst-an mitdeden, deden disse keer negen personen examen. De kursus Stellingwarfs veur beginners is tien aovens van elk twie uren laank. Butendat moej' ok, naor gelang de studiewiezer opgeft, nogal wat huuswark doen: taeloefenings, een warkstokkien over geschiedenis, van Stellingwarver literetuur genieten en gao mar deur. Drieje van de twaelf kursisten mossen eerder om tiedgebrek ofhaoken, mar de negen die zaoterdag an et examen mitdeden slaegden zonder perblemen.
Op et examen van disse Stellingwarver kursus maek ie een diktee, doej' een grammatika-opzuukopdracht, doej' een stokkien kreatief schrieven en ie hebben twie keer mondeling: angaonde geschiedenis en angaonde lezen en literetuur.
An et aende van de middag kon Schrieversronte-veurzitter Doeke Duursma an alle negen kursisten et diploma anlangen. Disse meensken hadden in de loop van de kursus en ok op disse dag heur beste bientien veurzet, dat koj' in alles marken. Ze verdienden et om even flink in et zunnegien zet te wodden, en dat dee de veurzitter dan ok even. De meensken die disse keer et examen haeld hebben, bin: Titia Dorine Bijwaard (Ni'jtriene), Teunie van der Wijk (Oosterwoolde), Attie Nijboer (De Fochtel), Wence Wassink (Liwwadden), Ulke Jochem van der Bij (Kollumerzwaog), Jacqueline Nijholt (Hooltpae), Martin Oostra (Wolvege), Nicolette Hartong (Boksum) en Yvonne Winters (Opeinde). Kursusleiders weren Grietje Bosma, Pieter Jonker, Geert Lantinga en Henk Bloemhoff.


Twiejaorlikse dag van de SND

De Stichting Nederlaanse Dialekten hoolt op 17 meert weer een grote dialektedag, disse keer in et Belgische Mechelen. D'r bin lezings, d'r is een stadskuier en meer, en ok komt d'r weer een boek uut. Et heufdonderwarp is disse keer 'Dialect in het spel'. In et boek gaon ok een stokmennig schrievers op dat onderwarp in, al naor gelang de streektael/et dialekt daor ze over vertellen. Meer over disse dag is te vienen op www.vcv.be.


Wisseling van taeken bi'j de Stellingwarver Schrieversronte

Per 1 jannewaori het de heer Pieter Jonker zien taek as direkteur overgeven an Sietske Bloemhoff, die eerder al waornemer was as dat zo uutkwam. Mit et stappien weeromme van Pieter en de ni'je situaosie veur Sietske kun beide kollega's goed uut de voeten, al zal et mit naeme veur Sietske nog even wennen wezen. Meer over de wisseling is te lezen in et kommende nommer van oons tiedschrift De Ovend.


Krek verschenen: et Stellingwarver plaanteboek van Henk Jager

Vandemorgen verscheen d'r al weer een ni'j boek bi'j de Stellingwarver Schrieversronte. Et is bepaold weer een hiel biezunder boek dat bi'j de Schrieversronte uutkommen is: Et Stellingwarver plaanteboek, naemen en biezunderheden.
En inderdaod, daor gaot et omme. Et boek het een prachtig omslag, et het krek zokke mooie foto's, mar de tekst het netuurlik nog vule meer te bieden!
De maeker, Henk Jager, het mit ieverig warken, dat him netuurlik hiel wat tied kost het, een boek op 'e wereld brocht dat et meer as verdient om kocht te wodden deur elk huusgezin. Dat is omdat hi´j alle Stellingwarver naemen bi´j mekeer brocht het die him dislange uut bronnen bekend weren. Die het hi´j onder de belangriekste Nederlaanse benaeming zet, dat ie kun daor alle benaemings bi´j mekeer vienen. Mar d´r is meer, want aj´ bi´jveurbeeld et woord slangebloeme tegenkommen as synoniem bi´j salomonszegel, dan woj´ ok deurverwezen naor aandere plaanten die die benaeming hebben. Mar dat is niet et ienigste. Want ie vienen van alles en nog wat an infermaosie over gruuiplakken, gebruuk en gewoonten, meugelike verklaorings van de naemen, en nuum mar op.
Et is een boek dat om zo te zeggen een slim hoog infermaosiegehalte het.
Et eerste exemplaor wodde anlangd an de heer U. Hosper, direkteur van It Fryske Gea, een orgenisaosie die ok Stellingwarver netuur in bezit en beheer het. Ze steunen et bruken blieven van de tael o.e. deurdat ze oolde benaemings in et Stellingwarfs in heur Stellingwarver gebied weer op botties en kaorten en zo naor veuren kommen laoten.
Uteraord gaon et behoold van de eigen streektael, de eigen netuur, et eigen laandschop en de liefde veur die dingen hier mooi mit mekeer op. Henk Bloemhoff van de Schrieversronte beud et eerste exemplaor an. Hi'j wol hiel graeg dat hiel vule meensken et ni´je boek kopen zullen. Et is de schriever en de Schrieversronte d´r now krek om te doen dat de naemen en de aandere infermaosie zo vule as et kan weer bruukt wodden, in ieder geval onder de meensken kommen. En de pries is te overzien, et gaot om mar 12,50 euro.
Niet allienig de heren Hosper en Bloemhoff hullen een praotien om et ni'je boek henne, ok de bekende plaantenaemedeskundige de heer E.J. Weeda (van Zwolle) kwam mit een aorige inleiding. En dat veur een aorig volle zael in 'Et Waopen' in Berkoop.


Taeltelling Nedersaksisch: twiede drok verschenen

Veurige weke is de twiede drok verschenen van et boekwark Taeltelling Nedersaksisch. De eerste drok was op 'e wereld kommen in et laest van 2005. De laeste maonden was et boek uutverkocht, dat de Stichting Sasland van de Rieksuniversiteit Grunningen en de Stellingwarver Schrieversronte besleuten dat d'r een twiede drok kommen mos in verbaand mit de vraoge die d'r de hieltied nog naor dit boek is.
Et boek geft an hoe et staot mit et feitelik bruken van et Nedersaksisch thuus, et praoten kunnen, et lezen kunnen, et inderdaod ok echt lezen, en ok et schrieven kunnen.
Et onderzuuk is daon in de verschillende Nedersaksische regio's: Oost-Stellingwarf, West-Stellingwarf, Stienwiekerlaand, West-Overiessel, Drenthe, Grunningen, Twente, in de Aachterhoeke en op de Veluwe. De uutkomsten geven ok een beeld van leeftiedsverschillen, opleidingsverschillen enz. in verbaand mit et bruken en et beheersen.
Et dot blieken dat mit mekeer een dikke 1,6 miljoen meensken et thuus praoten, zoe'n 2,1 miljoen kun et praoten, zoe'n 2,3 miljoen kun et lezen en zoe'n 1,3 miljoen doen dat ok vri'j riegelmaotig.
Technische gegevens: 108 bladzieden, ISBN: 90 6466 1324, serienommer: Nedersaksische Studies 21, schriever: Henk Bloemhoff, pries: 9 euro.


Krek verschenen: ni'je roman van Johan Veenstra

Daor is dan de roman daor iederiene al op zat te waachten, de ni'je roman van de bekendste Stellingwarver schriever, Johan Veenstra! Over dit twintigste boek mit hiel vule autobiografische elementen is hiel vule te lezen al in oonze schitterende boekekraante Twie pond 'n stuver en in oons prachtige tiedschrift De Ovend. Op 1 september wodde een grote peblieksaovend hullen mit de prissentaosie; tussen de 175 en 200 meensken weren d'r bi'j. Mit o.e. kruderige vraoggesprekken vol humor van de Friese schriever Douwe Kootstra mit Johan Veenstra, veurleeswark deur de schriever zels, en de anbieding van de Drentse schriever Gerard Nijenhuis. Die reageerde mit zien grote wardering te numen veur de Stellingwarver schrieveri'je en de Stellingwarver Schrieversronte, en veur Johan Veenstra in et biezunder. Hi'j prees o.e. et echte Stellingwarfs dat Veenstra altied in zien boeken bruukt, en dat ok now weer zien wark extra antrekkelik maekt.
D'r is meraokels veul belangstelling veur et ni'je boek. Et vligt over de toonbaank, dat et is an te raoden om d´r gauw bi´j te wezen. De pries maekt dit boek extra antrekkelik, et gaot om mar 11,00 euro.
Veur meer ni´js over de aovend en et boek is et an te raoden de streekkraanten in de gaten te holen.


De regio tijdens de Tweede Wereldoorlog

Dit gaot om een uniek geschiedenisboek van de haand van Wiebe H. de Vries, mit ommeraek wat feiten over de Twiede Wereldoorlog in Stellingwarf en omgeving. Wat 'de oorlog' angaot is dit gewoon ét boek, zeg mar, en dat moej' hebben. In de twiede helte van augustus is de dadde drok verschenen, dat we kun now weer volop leveren. Et is een pracht van een boek mit flink wat foto's, et is 256 bladzieden dikke en et gelt mar 18,50 euro. De liefhebber van de geschiedenis van die zwaore tied van de oorlog moet hier ok even weten, dat De Vries nog om de twie maonden een interessaant artikel schrift in oons tiedschrift De Ovend. Niet allienig et boek dus, mar ok zien serie artikels is slim te muuite weerd om te lezen. Et boek De regio tijdens de Tweede Wereldoorlog en et tiedschrift De Ovend bin beide uutgiften van de Stellingwarver Schrieversronte.


September Stellingwarver boekemaond mit ommenocht een debuut van Roely Bakker: et boekemaondgeschink

Twie keer eerder verscheen d'r een echt boekemaondgeschink bi'j de Stichting Stellingwarver Schrieversronte. In 1994 verscheen de prachtige novelle Gooldsje van de haand van Boele Land en in 1999 et kruderige boekien Et buro 1 Meneer Hartogh van de haand van Jan Jelle Foxhol. Dat et wodde de hoogste tied dat de trouwe kopers en lezers van et Stellingwarfs weer es verrast wodden mit een boekemaondgeschink. Dit jaor verscheen de 25-ste boekekraante Twie pond 'n stuver en dat was aenlik de direkte anleiding om een biezunder boek uut te geven. Dat daoromme maekte Drokkeri'je Van der Meer uut Oosterwoolde, de vaaste huusdrokker van de Schrieversronte, tegere mit de perveensie en de Schrieversronte zels dit projekt financieel mit meugelik. Et boek wodde schreven deur Roely Bakker uut Makkinge. Staorigan is Roely Bakker al gien onbekende meer in et wereltien van de Stellingwarver schrieveri'je. Heur verhaelen en gedichten verschenen riegelmaotig in De Ovend en in de rebriek Op 'e schostienmaantel in oonze streekkraanten. Wark van heur wodde opneumen in verschillende boeken en op de Fryske Skriuwerskelinder. Ze schreef zeuven spiksplinterni'je verhaelen veur dit boek, dat as titel mitkreeg Zuver nuver, en ze keus uut heur gedichten ok zeuven stoks. Et bin hiel verschillende verhaelen wodden. Zo is d'r een erotisch verhael, een kastvertelling, een love-story en nuum mar op. De meerste verhaelen speulen vandaege-de-dag en bin medern van toon, mar et verhael In de meensken een welbehaegen is een klassiek kastverhael in de beste tredisie. Et speult nog in de tied dat de kiender in de bedstee sleupen. Roely Bakker wet de sfeer van die tied prachtige daele te zetten. Ze is een echte verteller. Bi'j et lezen van heur verhaelen bi'j' altied beni'jd hoe as et oflopt en ze schrift ok wel zo beeldend daj' drekt ok et hiele verhael veur je zien. De dialogen in heur verhaelen bin altied levendig. In heur gedichten wet ze ok prachtig beelden op te roepen, mar ze geft veural uutdrokking an et gevuul: liefde, gelok en passie. Zeuven verhaelen, zeuven gedichten die heur graeg lezen laoten.
Et ni'je boek wodde vormgeven deur Sijtze Veldema van StiletVormgeving uut Dwingel. Et is een vierkaant boek en in gruun en zwat uutvoerd.
Zuver nuver kriej' kedo aj' veur 12,50 euro an Stellingwarver Schrieversronte-boeken kopen: in de boekwinkel of in de sutelaktie. Die gaot op maendag 4 september weer uut aende, zie ok veerder op oonze webstee. Et boekwark is ok te kriegen veur 5,50 euro. Meensken die heur in september opgeven as lid bi'j iene van de biebeltheken van et biebelthekeverbaand 'Zuudoost-Frieslaand' kriegen et boek ommenocht. De oplaoge is bepaold op 1500 stoks.


Over de biografie van het Stellingwerver landschap

As een keurige kleine zelsstaandige uutgifte is de oflopen weke bi'j de Stellingwarver Schrieversronte een biezundere tekst verschenen van Perf. dr. H.T.J. Waterbolk. Et is die van de lezing die hi'j hul op et archeologiesymposium in et veurige jaor in Noordwoolde. Disse ni'je uutgifte is in et Nederlaans; die in et Stellingwarfs het eerder al in et tiedschrift De Ovend staon. Meensken mit belangstelling veur de echt prachtige tekst van Perf. Waterbolk in disse biezundere uutgifte kun oons even tiedinge doen. De pries is 2,50 euro.


Et Stellingwarver Plaanteboek: de naemen en biezunderheden

In september verschient bi'j de Stellingwarver Schrieversronte 'Et Stellingwarver Plaanteboek: de naemen en biezunderheden'. Dit boek is van de haand van Henk Jager, mit foto's van Klaas van der Veen. De Stellingwarver Schrieversronte geft dit boek uut in saemenwarking mit et Fryske Gea.
Et boek geft niet alliend honderden mooie Stellingwarver plaantenaemen, mar telt ok meer as 250 stokkies mit aorige infermaosie over die plaanten. Dat kan gaon over waor as die plaante nog te vienen is, waor as die plaante veur bruukt wodde, hoe as et leefmilieu van die plaante was en is, en al zo wat henne.
Uutgebreider ni'js over dit biezundere boek volgt, hool et in de gaten dus!


Opni'j verschenen: 'Notities uit de Geschiedenis van de Ooststellingwerfse dorpen'

Vlak nao de Pinkster verscheen de ni'jste drok van et boek 'Notities uit de Geschiedenis van de Ooststellingwerfse dorpen'. Dat is goed ni'js veur meensken die meer over de geschiedenis van de dörpen in Oost-Stellingwarf an de weet kommen willen. Zeker veur meensken die hier ni'j kommen binnen te wonen en veur meensken mit algemiene belangstelling die graeg de historische feiten van heur dörp es op een riegeltien staon zien willen. In dit boek wodt op een begriepelike meniere et veurnaemste verteld uut de geschiedenis van elk van de dörpen van Oost-Stellingwarf. Et wodde indertied schreven deur de veur-veurige burgemeester van Oost-Stellingwarf, dr. T.H. Oosterwijk. Oosterwijk wodde indertied terecht beschouwd as een groot kenner van de Stellingwarver geschiedenis. Lange leden al weer, om percies te wezen in 1962, verschenen zien beschrievings van de geschiedenis van elk dörp van Oost-Stellingwarf as losse 'opstellen' in de Ni'je Oost-Stellingwarver. Die riegel bi'jdregen wodden daornao in stencilde vorm verspreided en nog weer laeter warkte hi'j die vorm omme tot een boek, mit anvullings en verbeterings. Ok in boekvorm wodde de geschiedenis van elk dörp appat, per eigen heufdstok, naor veuren brocht. De eerste drok in boekvorm wodde in 1977 uutgeven, en in 1986 verscheen de twiede drok, bewarkt en wel, en as uutgifte van drokkeri'je Van der Meer in Oosterwoolde tegere mit de Stellingwarver Schrieversronte. De ni'jste drok is de vierde, en daor zitten gien wiezigings meer in.
Ofgaonde op de vraoge die d'r de hieltied nog naor dit biezundere boek is en de reakties deur de jaoren henne verwaachten beide uutgevers een goeie verkope. Veur de pries hoeft et al hielemaole niet over te gaon, et boek gelt mar 14,50 euro.
'De Geschiedenis van de Ooststellingwerfse dorpen' is 192 bladzieden dikke. Et boek het behalven een protte infermaosie in de tekst ok een protte historische illestraosies. Ok veur de echte sneupers bin d'r hiel wat gegevens in de tekst te vienen, en ok de verwiezings in de noten an et aende van elk heufdstok bin nog altied de muuite weerd.


Maaike

Van de haand van Jan Schonewille (1953) verscheen op 13 april 2006 (toegelieke de bevri'jdingsdag van Oost- en West-Stellingwarf), zien debuutroman 'Maaike'. Jan Schonewille studeerde theologie an de Theologische Universiteit van Kaampen. In 1980 wodde hi'j predikaant van de geriffermeerde karke in Ni'jsliek, in kombinaosie mit toerissingswark in de regio Beilen. In 1985 wodde hi'j benuumd as predikaant veur missionaire toerissinge in de S.O.W.-karken in Frieslaand. In 1992 startte hi'j 'Onder de Linde', een centrum veur bezinning, opvang en vorming, in een verbouwde boereplaetse an de Vogelrijd op 'e Fochtel. Sund veurjaor 2000 was hi'j bestuurslid van de Stichting Joodse Warkkaampen in Frieslaand en Drenthe. Die stichting leut onder meer monementen daelezetten bi'j de oolde warkkaampen en gaf een boek uut over die warkkaampen. Hi'j schrift veur een vaasterebriek in et ni'jsblad De Ni'je Oost-Stellingwarver. Disse roman gaot over de geheime liefde van een maegien mit een bewoner van et joodse warkkaamp Ybenheer. Et boek telt 80 pag. en kost Euro 8,--. Et boek verscheen mit financiële hulpe van de perveensie Frieslaand.


Studentehaever. Verhaelen en gedichten in et Stellingwarfs

Onder redaktie van Roely Bakker en Christine Magour-Mulder verscheen de bundel verhaelen en gedichten Studentehaever. In Studentehaever staon verhaelen en gedichten in et Stellingwars uut de jaoren 2001 t/m 2005. Ze bin van de haand van een groep kursisten Kreatief Schrieven. Van goenend van die kursisten is ok al riegelmaotig wark publiceerd in o.e. et Stellingwarver tiedschrift De Ovend, de rebriek Op 'e schostienmaantel in de regionaole kraanten en de Stellingwarver Spreukekelinder. De Stellingwarver Schrieversronte hoopt dat, behalven deur et jaorliks orgeniseren van ien of meer kursussen Kreatief schrieven, mit et verschienen van Studentehaever meer meensken anzet wodden tot et schrieven in et Stellingwarfs. An de prachtige, slim ofwisselende inhoold van disse bundel zal et zeker niet liggen, die zal de lezers vast hiel goed smaeken. Alle Schrieversronte-leden wodde de bundel in feberwaori 2006 ommenocht toestuurd. Veerder is de bundel in de haandel veur 4,95 euro; hi'j telt 48 bladzieden


Bundel 'beestachtige riempies' van Jan Veldhuizen

Vlak veur et begin van de jaorlikse sutelaktie kwam et ni'je boek van Jan Veldhuizen op de wereld. Et hiet 'Beestebende', en et bestaot uut 'beestachtige riempies', in de woorden van de schriever zels. Et is wel verschrikkelik spietig et hier numen te moeten, mar Veldhuizen is in de maond november van 2005 in zien woonplak Apeldoorn wegraekt, in de leeftied van 64 jaor.
Jan Veldhuizen brocht zien jeugd deur op 'e Miente in Noordwoolde. Een peer jaor leden kwam hi'j opni'j mit et Stellingwarfs in de kunde, de tael van zien jonge jaoren. Van die tied of schreef hi'j verhaelen vol humor, mar hi'j schreef ok gedichten, vol sfeer en eernst. In 2003 dee hi'j mit an de Stellingwarver Schrieveri'jepries, een anvieteringspries veur beginnende schrievers en dichters in et Stellingwarfs. Hi'j wun, mit zien cyclus van gedichten 'De oolde zegeuner'. Veurig jaor kwam zien eerste bundel bi'j de Schrieversronte uut, 'De tael van mien moeke'.
In de ni'je bundel 'Beestebende' vaalt veural Veldhuizen zien humor slim op. 'Beestebende' zit in een hiel mooi omslag van Sietske Bloemhoff, is 48 bladzieden dikke en kost 7,50 euro. Veldhuizen zien debuutbundel verscheen in 2004 bi'j de Schrieversronte, onder de naeme 'Gewoon Stellingwarfs. De tael van mien moeke'. Veldhuizen hul him ok doende mit et schrieven van kotte verhaelen, en ok hadde hi'j aorighied an et biebelvertaelen in et Stellingwarfs.


Stellingwarfs - Nederlands Verklarend Handwoordenboek

Rondomtoe is bekend dat de Stellingwarver Schrieversronte in de tiedrekte van 1994-2004 et grote, vierdielige Stellingwarfs Woordeboek uutgeven het. In dat woordeboek bin zoe'n protte woorden, betekenissen, uutdrokkings, spreekwoorden enz. opneumen dat et mit mekeer haost om 4000 bladzieden gaot. Alle vier dielen toegelieke, dat kost 120 euro. De Stellingwarver Schrieversronte het now ok een vule kottere, goedkopere uutvoering te koop, die wel haanzem is.
Et gaot om et 'Stellingwarfs - Nederlands Verklarend Handwoordenboek', een uutgifte in íén boek van 704 bladzieden. Dat is antrekkelik, en de pries is dat ok, want dit woordeboek gelt mar 12.50 euro.
Et ni'je haandwoordeboek geft behalven zo goed as alle woorden die ofwieken van et Nederlaans ok alle betekenissen en de volle riekdom van de variaanten die in et Stellingwarfs veurkommen. Veurbeeldzinnen en uutdrokkings en zo bin mar dunne opneumen. D'r is keuzen uut et grote woordeboek, dat dit haandwoordeboek staot veur et Stellingwarfs van et hiele gebied van Stellingwarf. D'r is ok een riegel woorden en betekenissen in verwarkt die nog niet in et grote vierdielige woordeboek stonnen, mar die naoderhaand veur et locht kommen binnen.
In de inleiding is een liest opneumen van muuilike verbienings. Bi'jveurbeeld: aj' = 'als je' en 'wowwe' = 'worden we', 'wilden we'. Veerder is d'r een kaorte opneumen mit de plaknaemen van Stellingwarf in et Stellingwarfs. Et gaot om een uutgifte van de Stellingwarver Schrieversronte. De schriever is Henk Bloemhoff.


Boekwark 'Taaltelling Nedersaksisch'

In dit boek staon de risseltaoten van de enquête naor de beheersing en et bruken van et Nedersaksisch in Nederlaand. Zoe'n twiedadde van de meensken in et Nedersaksische gebied is in staot die tael te praoten en te lezen. De helte dot dat ok riegelmaotig. Wel wo'n et bruken en et praoten kunnen per generaosie minder, en ok is d'r wat verschil aj' meten neffens opleiding en geslacht. Soms ok is d'r een dudelik verschil tussen plattelaand en stad, al is dat veur een perveensie as Drenthe bi'jveurbeeld weer niet zo.
Erkenning van et Nedersaksisch volgens et Europese haandvest veur regionaole taelen en taelen van minderheden kan d'r toe helpen om et Nedersaksisch in levendig gebruuk te holen. Dippeteerde Kristen van Overiessel kreeg in november et eerste exemplaor. Hi'j het nog es mit naodrok weten laoten dat Overiessel, ok uut naeme van Grunningen, Drenthe, Gelderlaand en de gemienten West- en Oost-Stellingwarf, an et riek vraogd het om mit de procedure te beginnen om et Nedersaksisch te erkennen onder diel III van et Europese haandvest.

Een tal ciefers over et gebied van et Stellingwarfs uut de ni'je publikaosie kuj' op disse webstee weervienen onder de anklikmeugelikheden 'FAQ' en 'taelinfo algemien'. Et gaot om een uutgifte van de stichting Sasland in Grunningen en van de Stellingwarver Schrieversronte in Berkoop. Bi'j oons, de Stellingwarver Schrieversronte dus, kuj' et boek ok bestellen. De pries is 9 euro, et versturen niet inbegrepen. De hiele titel is: Taaltelling Nedersaksisch. Een enquête naar het gebruik en de beheersing van het Nedersaksisch in Nederland. Et tal bladzieden is 108; ISBN 90 6466 1324. [Bronnen: www.overijssel.nl en de uutgifte zels]

'Gedaachten' van Jan van der Meulen

Op 3 september 2005 verscheen de dadde dichtbundel in et Stellingwarfs van de Stellingwarver Jan van der Meulen. Van der Meulen wodde geboren op 20 april 1926, as zeune van de gemientetimmerman in Wolvege. Al is hi'j al meer as vuuftig jaor uut Stellingwarf weg, Van der Meulen het d'r nog altied een hechte baand mit. Somstieden vint hi'j et spietig dat hi'j zo veer vot woont, mar hi'j het nog wel een geweldig onthoold wat zien jonge jaoren in Wolvege anbelangt. Van der Meulen beschouwt zien wark haost meer as 'Gedaachten' dan as 'gedichten', dat zodoende de naeme van de ni'je bundel. De uutgifte is 48 blz. dikke en kost 7,50 euro. Peter Lazarov maekte et omslag.


Ni'j boek over de archeologie van Stellingwarf

D'r is op 2 september een prachtig boek verschenen over de archeologie van Stellingwarf. De schrievers bin drs. Sake Jager, van vroeger uut Oosterwoolde, en drs. Evert van Ginkel. Et boek is in een groot fermaot uutvoerd, telt 208 bladzieden en 218 illestraosies. Ie kun et beslist as een standerdwark beschouwen. Over et boek is meer ni'js te vienen in de laeste Stellingwarver boekekraante. Ok bin d'r mooie artikels over verschenen in de streekkraanten NOS, Aanpakken en Stellingwerf. Ie kun et boek bestellen bi'j de Stichting Stellingwarver Schrieversronte. Et is ok te koop in de boekwinkels.


Lezing Perf. Waterbolk in De Ovend

Op 2 september was et Stellingwarver archeologiesymposium in Noordwoolde. Iene van de hoogtepunten was de lezing van de slim bekende archeoloog Perf. dr. H.T. Waterbolk uut Haovelte, over 'de biografie van et Stellingwarver laandschop'. De Stellingwarver Schrieversronte het Perf. Waterbolk vraogd om zien lezing in De Ovend publiceren te meugen (in et Stellingwarfs), en dat is intied ok gebeurd. Dat is goed ni'js veur degenen die d'r niet wezen konnen en veur aandere belangstellenden. Butendat zal Perf. Waterbolk zien lezing dommiet nog as losse uutgifte bi'j de Schrieversronte in drok verschienen. Daor wodt nog an warkt.


Boek over Berkoop verschenen

Berkoop is et iewenoolde centrum van de Stellingwarven, zo het dat altied vuuld en zo vuult et nog. Mar haj' wel lezen dat dat dörp al zo ongeveer 900 jaor bestaot? Temeensen, dat hebben ze in Berkoop becieferd. En dat is meraokels, want een aander belangriek centrum as Amsterdam wodt pas veur et eerst nuumd in bronnen van de dattiende ieuw. Hoe dat ok allegeer zit, et kon allienig mar feest wodden in Berkoop. Ok daor hej' al wat over in de Stellingwarver kraanten lezen kund. En d'r is ok een ni'j boek over Berkoop op 'e wereld kommen. Et wodde schreven deur een bekende schriever en lietieszanger, kabberet-, radio- en theaterman uut Berkoop. Inderdaod, Karst Albert Berkenbosch dus. Dat boek is vanzels slim de muuite weerd. Et is uutgeven deur de Stellingwarver Schrieversronte, en daor kuj' et dus bestellen of gewoon kopen. Karst zien boek het de titel Beeld van Berkoop. Et is zoe'n 160 bladzieden dikke, en et kost 10 euro. D'r is steun veur et boek kommen van de perveensie Frieslaand, van de gemiente Oost-Stellingwarf en van Bank Bercoop. Lees ok de streekkraanten over de feestelike dingen in Berkoop. Ok in et dörpblad De Dreijer kuj' d'r wat over geweer wodden.


Dag, Stellingwarvers! Ni'je cd in et Stellingwarfs is her en der te kriegen

Die ni'je cd is 'Dag, Stellingwarvers!' van Henk Bloemhoff m.m.v. Sietske Bloemhoff en aanderen. Et is een uutgifte van JAZ Music Liwwadden. Veurig jaor gavven ze daor ok al mit een protte sukses de Stellingwarver Stiekelstokkies van Johan Veenstra uut.
Negen van de vuuftien lieties bin ooldere produkties van Omroep Frieslaand en zesse bin opneumen in de studio van Jan van der Linden in Noordwoolde, in de tiedrekte 2001-2004. Om wat veur lieties gaot et? Et bin et slim bekende Waor de Lende, De melkster (ok een tekst van Jouk), Makkinge, Bisschop Guido, Jan mit de Pette, Vremde ofgeunst, Oolde plaetse, 't Stellingwarver feestlied ('Dag, Stellingwarvers'), Veurjaor, Foddelpotteri'j, Hee kleine blonde, Gelokkige meensken, Lendelaand, Kultuur en Vang de wiend (een bewarking van Donovan zien Catch the wind). De cd kost 14,95 euro en ligt rondomtoe in de cd-winkels, en in Stellingwarf ok in de boekwinkels en bi'j de Stellingwarver Schrieversronte.
Sund d'r cd's binnen, is d'r vraoge naor iene van Henk en Sietske Bloemhoff. Omroep Frieslaand het op 25 april de ni'je cd 'Dag, Stellingwarvers!' uutreupen tot cd van de weke, en hi'j het al rondomtoe te heuren west op de regionaole en lekaole zenders. De dadde oplaoge is d'r al weer even, dat ze kun weer rondomtoe leveren.


'Nedersaksisch in beweging'

Dat is de naeme van een kleine, ni'je uutgifte van SONT (de Streektaelorgenisaosie in et Nedersaksisch Taelgebied). Et is et verslag van de studiemiddag veur geneudigden en meensken uut de poletiek op 26 november 2004. D'r staot een saemenvatting in van de veurdracht 'Tussen Nederlands en Nederduits' van Perf. dr. H. Niebaum, veerder de veurdracht 'Woso höört Nedersaksisch in Putt III vun de Spraken-Charta?' deur dr. Reinhard Goltz (van et Instituut veur de Nederduutse tael in Bremen) en de lezing 'Een pauzenummer in de landelijke politiek. Over de maatschappelijke en politieke status van de streektael', deur drs. Bert Middel, lid van de Eerste Kaemer. Veerder kuj' een kot verslag vienen van de praoteri'je van de zael mit een forum an et aende van de middag, en een kotte beschrieving hoe veer de erkenning onder diel III van het Europees haandvest nog te gaon het, van de haand van Henk Bloemhoff. Hi'j was ok saemensteller van de uutgifte, wiels Jan Haveman, bestuurslid van SONT en van vroeger uut Steggerde, de opmaek en redaktie verzorgde. De uutgifte is 22 bladzieden dikke. Ie kun him bestellen bi'j SONT, Akker 52, 7621 GJ Borne. Kopen bi'j de Stellingwarver Schrieversronte kan ok. Kosten: 3 euro, et versturen niet inbegrepen.


Stellingwarfs in 'Proeven van dialect'

Een weekmennig leden verscheen et achtste 'dialectenboek' van de Stichting Nederlandse Dialecten. Et hiet 'Proeven van Dialect. Een kijkje in de keuken van de Nederlandse dialecten', is 364 bladzieden dikke en gaot over woorden die mit de keuken en mit eten en drinken van doen hebben. Alle grotere streektaelen en dialekten kriegen heur gerak in disse bundel. Veur et noorden dus et Fries, Grunningers, Overiessels, Drents en Stellingwarfs. Et Stellingwarfs en Drents kommen tegere veur et locht in et artikel 'Voor fijnproevers: uit de dialectologische keukens van Drenthe en Stellingwerf'. De schrievers bin Henk Nijkeuter veur Drenthe en Henk Bloemhoff veur de Stellingwarven. Ze hebben et o.a. over panne, lepel en vörke, de slief, de stölpe en de Drentse gerechten 'zakkebaand', 'zeunemelk', 'sneiballegie', 'stoetbrugge' en 'tweibak', Stellingwarfs 'twiebak'. De hiele bundel hebben zoe'n twintig auteurs an mitdaon. Hi'j is veural de muuite weerd veur liefhebbers van taelverschillen, van biezundere naemen veur eten en drinken en van et verschiensel van ontliening uut aandere taelen weg (zoas in dit geval et Latien en et Fraans). Hi'j gelt 15 euro. ISBN 90-73869-08-0.


'Stellingwarver Streekwoorden'

Topper in de sutelaktie van 2004 was de 'spreukekelinder', uutgeven deur Van der Berg in Almere. Intied is d'r een ni'je Stellingwarver uutgifte verschenen bi'j diezelde uutgever. Et gaot om vri'j wat prachtige spreuken en gezegden en ok om een koppeltien gedichten. Iene van de drie redakteuren van de kelinder, Sietske Bloemhoff, maekte een keuze veur disse bundel uut de eerdere spreukekelinders. Et boekien is 80 bladzieden dikke en gelt 4,95 euro.


Biezunder boek van Karst Albert Berkenbosch

D'r is in et laest van veurig jaor een ni'j boek verschenen van de Berkoper Karst Albert Berkenbosch. Titel: 'Et hoeft niet, et is vri'jwillig. Inkelde reize Garyp - Schitu Stavnic'. Karst fietste de veurbi'je zoemer mit een koppel belangriek volk veur et goeie doel van een stichting hulpgoederen Roemenië naor Schitu Stavnic. Zien ni'je boek is een reisverslag vol belevenissen. Et is 64 bladzieden dikke en gelt mar 10 euro. En twie euro daor van gaon naor et goeie doel.



Noflike winterdaegen mit Euphonia!

Hej' de ni'je kast-cd van euphoniawolvega.nl misschien van Sunderklaos kregen? Of hej' him kocht of in bestel? Misschien hej' d'r dan ok aorighied an om heur riempien in et Stellingwarfs te bruken. Dat is ditte.

'Euphonia', die geft wat!

Oe jong wat is 't een wereld
Van koolde kak en geld,
Van zwetsbroeken en knieperds,
Waor inkeld anzien telt!

Jawisse, 't kan wel aanders,
Beseffen wi'j mit 'kast',
Dan weej' wel weer dat meensken
Bescheidenhied méér past!

Wi'j hebben niks te 'blaozen',
Of louter... mit meziek!
Een noflik kastfeest wiwwe,
Veur iederiene liek!

Zodoende dit kedogien,
Toe, pak et mar es uut,
Dan kuj' wat smoeks beleven,
Mit oold, vertrouwd geluud!


Oplossings puzelties Spreukekelinder 2006

De oplossing van et puzeltien van juli is: k, ik, iek, riek, griek, keurig, kleurig, gruwelik.

De oplossing van et puzeltien van augustus is: scHaop, dophEide, wIeven, buunDer, schEper, Paors, anmAeken, peTtens, benTen, petrIes, wollE, zaaNd. Et woord dat vraogd wodt, is: HEIDEPATTIEN.

De oplossing van et puzeltien van september is: t, et, vet, vent,
teven, etvene, veerten, vergeten.
An et aende van et jaor wo'n de oplossings van oktober, november en december plaetst.

De oplossing van et puzeltien van april: feMilie, strAote, lAand, briNk, Dörp, burEn, teGere, naOsten, strEek, paD. Et woord dat vraogd wodt, is MAANDEGOED.

De oplossing van et puzeltien van meie: e, en, nee, iene, liene, pielen, pleinen, lepienen.

De oplossing van et puzeltien van juni: onTuug, sprUuien, zUnne, oNweer, Schaad, juLi, wAarm, mi'jeN, liGstoel, zommEr. Et woord dat vraogd wodt, is: TUUNSLANGE.

jannewaori:
Nao oplossing van de puzel ontstaot et woord WINTERWEER:
Wolle, vrIezen, sNi'j, wiT, mussE, leeRzen,
Wak, iEs, wiEnd, Redens.

feberwaori:
i, ik, iek, klei, kiele, geliek, kriegel, kleverig, geveerlik

meert:
e, re, ere, neer, meren, raemen, marleen, ni'jlaemer

Bi'jkotten volgen de oplossings van oktober, november en december 2006 op disse bladziede.


Harmen Houtman wun Stellingwarver Schriefwedstried

De twiede Stellingwarver Schriefwedstried is wunnen deur de bekende Stellingwarver schriever van verhaelen, gedichten en lietiesteksten Harmen Houtman. Houtman was krek as Johan Veenstra al in de eerste helte van de jaoren zeuventig drok doende mit de schrieveri'je. Hi'j schrift o.e. teksten veur de kabberetgroep Flying Stars van Hooltpae. Ok is hi'j iene van de meensken van et eerste ure van de Stellingwarver Schrieversronte. Hi'j wun de Stellingwarver Schriefwedstried mit de ienakter 'Een hiete dag'. De wedstried is iene keer in de drie jaor, en elke keer gaot et om een aander literair genre. D'r weren veur disse keer vuuftien ienakters instuurd van mit mekeer twaelf schrievers. De jury hadde drie ienakters op nommenaosie. De beide aanderen weren 'Vri'jeri'je' van Roely Bakker uut Makkinge, en 'De Schriever veur et Dörpsbelang', een vertaeling deur Sjoukje Oosterloo uut Gersloot van een ienakter van de bekende Friese schriever Trinus Riemersma.
Veurofgaonde an de priesuutrikkinge wodden de drie stokken speuld: deur de tenielverienings 'De Hoek van Zevenwouden' van Berkoop (et wark van Houtman), ''t Ontluikende bloempje' van Makkinge (et stok van Roely Bakker) en 'De Vriendenkring' van Der Izzerd (de vertaeling van Sjoukje Oosterloo). De veurzitter van de jury, de bekende Roel Oostra van vroeger uut Drachten en van langer leden uut Wolvege las een grondig juryrepot veur. Loko-borgemeister Cor Trompetter van de gemiente Stellingwarf-Westaende eupende de aovend, en borgemeister Harry Oosterman van Stellingwarf-Oostaende riekte de pries uut, mit een toespraoke. Beide heren praotten in et Stellingwarfs, de zael was hatstikke vol en d'r weren ok aorig wat jongeren, dat de bekende veuroordielen wodden weer es niet bevestigd. De pries is insteld deur de beide gemienten en de leiding van de aovend was in goeie hanen van Klaas van Weperen, veurzitter van de warkgroep.


Ni'je veurzitter van de Stellingwarver Schrieversronte: Doeke Duursma

Op 9-11-06 hul de Stichting Stellingwarver Schrieversronte een biezundere ledevergeerdering. De reden was dat de leden op veurdracht van et bestuur een ni'je veurzitter kiezen mossen. Dat was neudig deur et vertrek van Mr. Simon ter Heide, de veurige veurzitter, in de bluuimaond van dit jaor. Sund die tied vervong mevr. Grietje Bosma-Dijkstra him, tot 9 november. Binnen et bestuur hadde zi'j al de funktie van twiede veurzitter. Op de veurdracht ston de heer Doeke Duursma uut Wolvege, oold-raodslid van West-Stellingwarf. Hi'j wodde deur de dikke vuuftig leden die d'r weren mit groot genoegen keuzen. Duursma zee dat hi'j op weg naor et veurzitterschop al veul van et wark van de Schrieversronte zien hadde en dat hi'j him graeg veur et wark van de stichting en veur de stichting zels inzetten zol. Hi'j zee zoks ok as een ere te beschouwen.


Aovend over veldnaemen

Op 21 november hul de Stellingwarver Schrieversronte een aovend over veldnaemen. Disse aovend was veur leden van de veldnaemekemmissie en veur inkelde meensken van de historische verienings van Appelsche, Oosterwoolde en een peer liefhebbers uut Langedieke. De heer Piet van der Lende uut Amsterdam hul een goed verhael over zien onderzuuk naor de naemen van Sunnege en Ooldetriene. De heer dr. R. Ebeling, van vroeger van et Nedersaksisch Instituut van Grunningen, hul een interessaante inleiding over et ontstaon van et onderzuuk naor veldnaemen indertied an de Rieksuniversiteit Grunningen. Hi'j vertelde hoe et in Drenthe allegeer begonnen was mit et wark van de heer Wieringa, en hoe dat materiaol now in et Rieksarchief in Drenthe beweerd wodt.
De Stellingwarver Schrieversronte is daor op een eigen meniere op deurgaon, en het onderdehaand vuuf veldnaemeboeken uutgeven. Daorin vien ie ok een hiele protte historische gegevens uut de dörpen die beschreven binnen. De reeks hiet Veldnaemen van Stellingwarf, en de naemen van de boeken die an now toe uutgeven binnen, bin:

Diel I. Veldnaemen van Stellingwarf Diel I. Ni'jhooltpae en Ni'jberkoop. Schreven deur Ph. Bloemhoff-de Bruijn
Diel II. Veldnaemen van Stellingwarf Diel II. Donkerbroek. Schreven deur Ph. Bloemhoff-de Bruijn
Diel III. Veldnaemen van Stellingwarf Diel III. Der Izzerd, Hooltwoolde, Ni'jhooltwoolde. Schreven deur Ph. Bloemhoff-de Bruijn en Y. Duursma
Diel IV. Veldnaemen van Stellingwarf Diel IV. De Fochtel. Schreven deur O. de Vent
Diel V. Veldnaemen van Stellingwarf Diel V. De Langelille, Munnikeburen, Ni'jtriene, Scharpenzeel, Sliekenborg, Spange. Schreven deur P. van der Lende

Aovendveurzitter Henk Bloemhoff hul een inleiding over naemgevingselementen in oonze gemienten. Hi'j kon zoe'n 20 meensken welkom hieten in et Schrieversrontegebouw. De bi'jdrege van dr. Ebeling zal verschienen in et feberwaori- of aprilnommer van De Ovend van et kommende jaor. Wat de heer Van der Lende te vertellen had zal verschienen in zien ni'je veldnaemeboek over Sunnege en Ooldetriene. Dat wodt diel VI in de riegel veldnaemeboeken.


Boek en lezing over de Maatschappij van Weldadigheid

Op donderdag 10 november hul schriever Wil Schackmann een slim interessaante lezing over de 'proefkolonie' van de Maatschappij van Weldadigheid. Et gong mit naeme over 'De Klonie' in een stokkien Drenthe zudelik van Noordwoolde (Frederiksoord, Wilhelminaoord), in Willemsoord (Ov.) en in een stroke an disse kaante van de perveensiegreens. De lezing was in et gebouw van de Stellingwarver Schrieversronte in Berkoop, sleut an op de jaorvergeerdering van de stichting en wodde hullen naor anleiding van et verschienen van de schriever zien boek. Dat is 'De proefkolonie. Vlijt, vaderlijke tucht en het weldadig karakter onzer natie', Uutgeveri'je Mouria, 392 blz., pries 18,50 euro. D'r was een protte volk. Et verhael was dan ok meer as de muuite weerd, mit ok aorige krenten veur liefhebbers van de dörpsgeschiedenis van Noordwoolde en omgeving. De NRC van 10-11-06 geft een kot beeld van et boek, en ok van inkelde vergeliekbere boeken.


Twiede drok van 'Een brogge van glas'

Johan Veenstra zien ni'je roman 'Een brogge van glas' hadde een eerste oplaoge van 1250 exemplaoren. De belangstelling was liekewel zo groot, dat goed twie weken nao et uutkommen al een twiede drok op 'e wereld kommen is, ok now weer van 1250 exemplaoren.
Rondomtoe is et boek dus now weer volop te kriegen. Op 30 september signeert de schriever bi'j boekwinkel Binnert Overdiep op Et Vene, de middags van 3 tot 5 ure. De kommende wintertied is Veenstra weer vaeke op pad mit veural humoristische veurdrachten uut eigen wark. Hi'j geft dan beslist ok ommedaenken an zien ni'jste boek. As meensken dat willen is hi'j ok bereid om een hiele aovend te verzorgen over 'Een brogge van glas'. Hi'j zal daor dan uut en over vertellen.


Nedersaksische petitie anbeuden an Kaemerleden

Op deensdag de 26e september hebben de dippeteerden Hans Gerritsen van Grunningen en Jan Kristen van Overiessel veur de perveensies Grunningen, Drenthe, Overiessel en de beide Stellingwarver gemienten een petitie anbeuden an de leden van de vaaste Kaemerkemmissie van Binnenlaanse Zaeken. Uut naeme van die kemmissie nam veurzitter mevr. Saskia Noorman – Den Uil de petitie an. Et was een forse groep kaemerleden die d'r bi'j was, en die toonden beheurlik heur belangstelling. Uteraord komt de petitie, die de naeme het 'Om het behoud van het Nedersaksisch' op 'e agenda, en de hoop is dat now de zaeke een stok veerder komt. Konkreet is vraogd om gauwachtig diel III van et haandvest op et Nedersaksisch van toepassing te verklaoren, en om in dat verbaand ok een Konsultatief Orgaan in te stellen. De anbieding wodde extra opfleurd mit wat Grunningstaelige meziek. Van de Nedersaksische streektael-koepelorgenisaosie SONT weren anwezig mevr. Annet Westerdijk en Henk Bloemhoff.


Film over de Lende

Twie studenten van Hogeschool Van Hall/Larenstein in Wageningen, Jaap Bijma en Derk van Dijken, maekten disse zommer op verzuuk van de Stellingwarver Schrieversronte een film over et ontstaon van de revier de Lende. De film is een stage-opdracht en wodt inpast in et vak Hiemkunde veur et basisonderwies. Twie oolde verhaelen over et ontstaon van de Lende bin de basis veur et verhael. Et iene gaot over grote reuzen die tegere de Lende van de monding tot an et beginplak Tronde an toe greuven hebben en onderwegens noflik an de praot weren mar die ok an et slaon raekten. Et aandere gaot over et Trondiger boertien Bettus van Thies, of beter nog, over die zien geite. De Lende zol onder een geitestat zien begin had hebben, in de vorm van straolties miege... De film is nog niet hielendal of, in oktober komt d'r een officiële prissentaosie.


Lied in et Stellingwarfs op 'Liet 2006'

Zanger/trombonist Karel Wilms, van vroeger uut Appelsche en now in Oosterwoolde, dot mit an et Friese lietiesfestival 'Liet' mit een lietien in et Stellingwarfs. Hi'j is mit zien band 'No gamble', die de gelegenhiedsnaeme 'Gien gok' anneumen het, tot de finale deurdrongen. 'Gien gok' speulde ok al es eerder tegere mit Concordia in Else en ze speulen disse zommer ok op 'e Fochtel, in een grote feesttente. [bron: et weekblad Stellingwerf]


Kastfeest

[Jaowel heur, ie kun ok een kastlietien in et Stellingwarfs zingen. Kiek mar! De tekst is van Johan Veenstra; dit komt uut et zangbundeltien Piepmoes. Daor vien ie ok de meziek in]

Kastfeest is nog even waachten
en dan is het jaor veurbi'j.
Kastfeest dat is vri'j van schoele
en misschien wel ies en sni'j.
Kastfeest is een grote kastboom,
een peer lochies in de naacht.
't Bin de huders bi'j de schaopen,
veilig holen die de waacht.

Kastfeest dat is hulst mit beigies
en misschien een goed rappot.
Kastfeest is de braoden gaanze,
feest'lik eten op jow bod.
Kastfeest is een waarme karke,
meensken zingen overal:
Haost twieduzend jaoren leden
kwam een kientien in de stal.

Kastfeest is een oolde kastman,
die kedogies bi'j him het.
Kastfeest is et feest van vrede…
prakkesaosies, een gebed.
Kastfeest dat bin duzend klokken,
bim-bam-beierend in de wiend.
Kastfeest in de hiele wereld
is Maria mit heur kiend.


Brogge van glas: Johan Veenstra lest veur op de radio

Op 25, 26 en 27 december, in de kastdaegen dus, kuj' luusteren naor... Brogge van glas, et ni'je boek daor Stellingwarver schriever Johan Veenstra zoe'n sukses mit het. Et boek wodt veurlezen op Omrop Fryslân, aovens van 19.00 ure of. De schriever dot dat zels. Per keer kuj' genieten van zoe'n drie heufdstokken van et boek.


Mooie prestaosie van Gien Gok

Et gaot allemaol te veer... Dat is de titel van et lied in et Stellingwarfs daor de groep Gien Gok et dadde plak mit haeld het op Liet, et jaorlikse Friese lietiesfestival. Dat wodde disse keer holen op zaoterdag 7 oktober 2006. Et was lieke gezellig en van hoge kwaliteit as vanoolds in de Liwwadder 'Harmonie'. Vakjury én pebliek weren vol lof over de Appelschester zanger en tekstschriever Karel Wilms en die zien meziekgroep. Topper en dus goed veur et eerste plak was disse aovend de Friese groep The Secret. Gien Gok zal ankem jaor ok mitdoen an et Stellingwarfs popfestival. De vakjury beston uut meziekdeskundigen uut alle streken van Frieslaand. Uut Stellingwarf was dat disse keer Sietske Bloemhoff van de Stellingwarver Schrieversronte.


Een brogge van glas: dadde drok in zes weken tied

Of et Stellingwarfs een protte lezen wodt? Dat kan niet aanders aj' ofgaon op de taelenquêtes die een jaor of drie leden hullen binnen, en aj' ofgaon op 'e verkoopciefers van de ni'jste Schrieversronte-uutgiften. Et ni'jste boek van Johan Veenstra, de autobiografische roman Een brogge van glas, springt dan ok nog weer boven alles uut. In zes weken tied bin we as uutgever schone henne deur de eerste oplaoge (1250 ex.) en de twiede oplaoge 1250 ex.), dat een ni'je oplaoge van 1250 ex. is al in de maek. Niet allienig Stellingwarfstaeligen lezen dit boek. Et wodt ok buten oons gebied een hieleboel verkocht.
Rondomtoe is d'r hiel vule wardering veur dit wark, dat aj' et nog niet hebben en d'r ok mit in de kunde kommen willen, bestel et dan in de boekwinkel of mail naor info@stellingwarfs.nl (kiek links hiernaost onder 'kontakt maeken' en klik an).
En… d'r bin nog meer prachtige boeken en aandere uutgiften in et Stellingwarfs. Kiek mar es om je henne op disse webstee, en kiek of vraog mar es in de boekwinkels!


Stellingwarver sutelaktie: weer een topjaor

De sutelaktie van de Stellingwarver Schrieversronte lopt dit jaor uut op een topprestaosie van 22.500 euro. De sutelaktie is veur de 31e keer en dit wodt et hoogste bedrag dat dislange haeld is.
Et beste verkochten dit jaor: 1) de Stellingwarver spreukekelinder (578 ex.), 2) Een brogge van glas, de ni'je roman van Johan Veenstra (557 ex.), 3) Et Stellingwarver plaanteboek van Henk Jager (127 ex.). Ok aandere titels verkochten nog ommeraek, zoas de roman Maaike van Jan Schonewille van De Fochtel. Et grote tal vri'jwilligers dat disse keer mitdee was ok meraokels.


Stellingwarver Schrieveri'je Pries uutriekt

Disse driejaorlikse anmoedigingspries van de beide Stellingwarver gemienten ondersteunt de ontwikkeling van de Stellingwarver literetuur. De pries was disse keer veur Christine Magour van Wolvege, veur heur mooie verhaelen in de kraanterebriek Op 'e Schostienmaantel en in de Schrieversronte-bundel Studentehaever (een uutgifte van begin van dit jaor). De pries wodde maendagaovend 2 oktober uutriekt deur burgemeester Gerard van Klaveren van West-Stellingwarf. De leiding van de aovend was in hanen van burgemeester Harry Oosterman van Oost-Stellingwarf. Links en rechts in et Oosterwooldiger gemientehuus weren behalven komplementen veur Christine Magour ok komplementies te heuren veur… burgemeester Oosterman, omreden hi'j veur et eerst in et eupenbaor Stellingwarfs praotte.
Behalven de Stellingwarver Schrieveri´je Pries is d´r ok nog de Stellingwarver Schriefwedstried. Die wodt op 10 november uutriekt. De dadde pries, de H.J. Bergveldpries, wodt om de zes jaor uutriekt.


Stellingwarfs diktee in Wolvege een groot sukses

Op donderdagmiddag 6 juli hul H.N.I. in Wolvege een prachtige aktiviteit: een groot Stellingwarfs diktee in de eupen locht. Of liever: in een feestelike tente, daor ie in- en uutlopen konnen. Wat iederiene now misschien daenkt, was niet zo: et was d'r niet smoorhiete mar slim noflik. Dat kwam deurdat d'r now en dan een fris wientien wi'jde. D'r was een protte belangstelling, en degenen die mitdeden spanden heur ommeraek in, dat was wel dudelik.
H.N.I. hadde Pieter Stoevezaand ok mitdoen laoten, en die bleek de leiding over disse middag in hanen te nemen, dat alles leup zoas et mos. De beste diktee-veurlezer van de Stellingwarven was inhuurd: schriever Johan Veenstra. En in de jury zatten Schrieversronte-veurzitter Grietje Bosma en Schrieversronte-mitwarkers Henk en Sietske Bloemhoff.
De risseltaoten mochten d'r wezen. D'r weren nogal wat meensken mit onder de twintig fouten, wat bi'j et grote diktee van et Nederlaans as een grote prestaosie zien wodden zol.
Disse middag kwam Henk Jager uut Berkoop, van vroeger uut Noordwoolde, et alderbeste veur de dag: hi'j wodde de winner mit mar twie fouties! Hi'j kreeg hulde van iederiene, en… hi'j kreeg de eerste pries, een pakket an boeken. Nogal wat meensken wollen et diktee graeg nog een keer rustig naolezen kunnen. Dat veur heur en aandere belangstellenden staot et hiernao nog een keer.

1. Dat ha'k veurig jaor om disse tied niet docht, da'k hier vandemiddag wezen zol veur et diktee in et Stellingwarfs.
2. Zo, dat was een aorig anlopien, mar now za'k mien kundighied es even best naor veuren kommen laoten.
3. Zoj' misschien even wat opschikken willen, et luie zwiet moet d'r uut en ik moet ommeraek aarmslag hebben bi'j et schrieven.
4. Ik doe dit niet zomar veur de verdievedaosie, et is mi'j eernst en jim toch ok, eers is d'r wat niet in de haoke.
5. Wi'j moe'n oons vule meer doende holen mit de toekomst van et jonge volkien, dat is aorig beter as kilsteren over hoe et vandaege-de-dag allegeer aanders moet.
6. Peerdebeslaon, muddejaegen en liesterstrikken bin dingen van vroeger, ni'jmoodse woorden as tillevisie en komputer bin ok een stok makkeliker.
7. Misschien dot doukies nog wel es blieken dat de kiender de oolden wat meer aachter de vodden zitten moeten mit lezen en schrieven en niet aandersomme.
8. De meitied hewwe al wel weer had, mar over de haast moej' me nog niet beginnen, awwe aanst klaor binnen gaon we weer lekker buten in et mooie weer.
9. Wiethoevule meensken daenken dat dit geschrief mar wat willewark is, mar et liekt wel wat op tuunommespitten, et komt je zuver op 'e kroppe van de blaoze an.
10. Of bin we (biwwe) al weer haost klaor! Dit was me gien praot weerd, we bin nog mar krek uut aende!


VVV Zommerschoele i.s.m. Historische Vereniging Appelscha: drie aovens in De Hoolten Klinte

In september gaot de VVV Summerschool/Zommerschoele weer uut aende in Appelsche in een saemenwarking van de Historische Vereniging Appelscha e.o. en de Stichting Stellingwarver Schrieversronte. De eerste aovend wodt hullen op donderdagaovend 7 september 2006 om 20.00 ure. Alle aovens bin in et gebouw De Hoolten Klinte in Appelsche. De eerste aovend wodt verzorgd deur Schrieversronte-mitwarkster Sietske Bloemhoff mit een lezing mit dia's over Stellingwarver klokkestoelen. Naost dat zi'j kenner is van et boerehuus in de Stellingwarven warkt ze op et heden an een twiede, wiezigde drok van heur boek 'Klokkestoelen van Stellingwarf'. Heur heufdtaeke in et daegelikse leven is die van mitwarkster veur et vak Stellingwarfs binnen hiemkunde op de basisschoelen. Ze het heur volop verdiept in et onderwarp Klokkestoelen van Stellingwarf. Niet alliend wet ze een protte over de geschiedenis en funktie van de klokkestoelen, mar ze wet ok percies hoe as klokkestoelen bouwd wodden.
Op donderdag 14 september is de Stellingwarver schriever Johan Veenstra te gaaste, die vertellen zal over zien ni'je boek dat pas uut is, een stark autobiografische roman onder de titel 'Een brogge van glas'. Een peer weken nao et wegraeken van zien moeder kwam Johan Veenstra eerst an de weet wie zien vader was en ontdekte hi'j dat hi'j een halfbreur hadde. Hi'j zal ok romanfragmenten veurlezen. Schrieversronte-direkteur Pieter Jonker zal him ondervraogen over zien schrieveri'je, want sund 1971 schreef hi'j twintig boeken in et Stellingwarfs. Hi'j was butendat jaorenlaank mit kollums te heuren op Omroep Frieslaand.
Op donderdag 21 september komt Schrieversronte-direkteur Pieter Jonker uut Oosterwoolde de laeste aovend van de Zommerschoele verzorgen. Centraal staot veur et schoft een lezing over ooriezers en mussen in de Stellingwarven en aandere kleraosie. Nao et schoft staot hi'j stille bi'j een stokmennig grote projekten die deur de Schrieversronte anpakt wodden of anpakt binnen. O.a. et projekt Archeologie van de Stellingwerven, et Stellingwarver plaanteboek, et projekt over de bosgeschiedenis van Stellingwarf, et projekt Taelkundig Onderzuuk Stellingwarfs. Alle aovens gaon om 20.00 ure uut aende en de intree is bescheiden.


Ni'jste Ovend kotleden verschenen

Veur wie nog niet abonneerd is mar wel belang het: et ni'jste nommer van et tiedschrift De Ovend is d'r ok al weer. Et is de oflevering van augustus 2006. Netuurlik mit verhaelen, ankondigings, de vaaste rebrieken en gao zo mar deur. Mar disse keer is hiel biezunder een prachtig katern binnen in De Ovend, mit ofdrokken van schilderi'jen van Jeltje Baas-Venema. Die heuren bi'j een interessaant vraoggesprek dat Geke Zanen mit heur hadde. Zels hebben, zokke mooie dingen? Neem een abonnement op De Ovend veur mar 11,50 euro in et jaor. Een los nommer kan ok, dat gelt 1,95 euro.


VVV Zommerschoele i.s.m. Historische Vereniging Appelscha: drie aovens in De Hoolten Klinte

In september gaot de VVV Summerschool/Zommerschoele weer uut aende in Appelsche in een saemenwarking van de Historische Vereniging Appelscha e.o. en de Stichting Stellingwarver Schrieversronte. De eerste aovend wodt hullen op donderdagaovend 7 september 2006 om 20.00 ure. Alle aovens bin in et gebouw De Hoolten Klinte in Appelsche. De eerste aovend wodt verzorgd deur Schrieversronte-mitwarkster Sietske Bloemhoff mit een lezing mit dia's over Stellingwarver klokkestoelen. Naost dat zi'j kenner is van et boerehuus in de Stellingwarven warkt ze op et heden an een twiede, wiezigde drok van heur boek 'Klokkestoelen van Stellingwarf'. Heur heufdtaeke in et daegelikse leven is die van mitwarkster veur et vak Stellingwarfs binnen hiemkunde op de basisschoelen. Ze het heur volop verdiept in et onderwarp Klokkestoelen van Stellingwarf. Niet alliend wet ze een protte over de geschiedenis en funktie van de klokkestoelen, mar ze wet ok percies hoe as klokkestoelen bouwd wodden.
Op donderdag 14 september is de Stellingwarver schriever Johan Veenstra te gaaste, die vertellen zal over zien ni'je boek dat pas uut is, een stark autobiografische roman onder de titel 'Een brogge van glas'. Een peer weken nao et wegraeken van zien moeder kwam Johan Veenstra eerst an de weet wie zien vader was en ontdekte hi'j dat hi'j een halfbreur hadde. Hi'j zal ok romanfragmenten veurlezen. Schrieversronte-direkteur Pieter Jonker zal him ondervraogen over zien schrieveri'je, want sund 1971 schreef hi'j twintig boeken in et Stellingwarfs. Hi'j was butendat jaorenlaank mit kollums te heuren op Omroep Frieslaand.
Op donderdag 21 september komt Schrieversronte-direkteur Pieter Jonker uut Oosterwoolde de laeste aovend van de Zommerschoele verzorgen. Centraal staot veur et schoft een lezing over ooriezers en mussen in de Stellingwarven en aandere kleraosie. Nao et schoft staot hi'j stille bi'j een stokmennig grote projekten die deur de Schrieversronte anpakt wodden of anpakt binnen. O.a. et projekt Archeologie van de Stellingwerven, et Stellingwarver plaanteboek, et projekt over de bosgeschiedenis van Stellingwarf, et projekt Taelkundig Onderzuuk Stellingwarfs. Alle aovens gaon om 20.00 ure uut aende en de intree is bescheiden.


Ni'jste Ovend kotleden verschenen

Veur wie nog niet abonneerd is mar wel belang het: et ni'jste nommer van et tiedschrift De Ovend is d'r ok al weer. Et is de oflevering van augustus 2006. Netuurlik mit verhaelen, ankondigings, de vaaste rebrieken en gao zo mar deur. Mar disse keer is hiel biezunder een prachtig katern binnen in De Ovend, mit ofdrokken van schilderi'jen van Jeltje Baas-Venema. Die heuren bi'j een interessaant vraoggesprek dat Geke Zanen mit heur hadde. Zels hebben, zokke mooie dingen? Neem een abonnement op De Ovend veur mar 11,50 euro in et jaor. Een los nommer kan ok, dat gelt 1,95 euro.


Twie pond 'n stuver: de ni'jste jaorlikse Stellingwarver boekekraante komt d'r an

Inderdaod, en die boekekraante bestaot al 25 jaor! Daor geft disse oflevering, in fleurig rood en wit, flink wat ommedaenken an, en dat is hiel terecht. En de adverteerders kriegen vot een extra ploempien, want die maekten dit allegeer weer mit meugelik!
Wat brengt de ni'jste boekekraante? Ie kun in 't eerst plak van alles lezen over de ni'jste uutgiften van de Stichting Stellingwarver Schrieversronte. Zo kuj' percies weten wat d'r dommiet in september mit de sutelaktie in de boekekroje te vienen is. En dat zal weer hiel vule wezen, daor kuj' staot op maeken.
Veerder is d'r in de ni'je boekekraante een hiele hoop te vienen over ni'je en lopende aktiviteiten van oonze stichting Stellingwarver Schrieversronte, d'r staon ni'je gedichten in, d'r is een bladziede veur kiender (die de laeste jaoren elke keer deur een aandere schoele klaormaekt wodt, disse keer deur Tussen de Singels in Oosterwoolde) en gao zo mar deur. Een peer biezundere verrassings uut disse 25e boekekraante bin de ankondiging van et prachtige Stellingwarver Plaanteboek: de naemen en biezunderheden (deur Henk Jager), die van Een brogge van glas: de ni'je, ontroerende roman van Johan Veenstra, en van et biezundere boek Zuver Nuver van Roely Bakker uut Makkinge, daj' ommenocht kriegen as boekemaondkedo aj' veur 12,50 euro of meer bi'j oons kopen in de tied van de sutelaktie (eers gelt et 3,50 euro). De Stellingwarver Spreukekelinder 2007 verscheen al in juni en dot et al goed, en zo ok de roman Maaike, van Jan Schonewille van De Fochtel. Veerder zuj' in de krojen o.e. vienen kunnen et boekien Tomke: beslist ok aorig om te kopen, want ie kun d'r plaeties uut zien laoten en ie kun d'r uut veurlezen veur de kleine ukken. En dan bin d'r de ni'jste drok van W. H. de Vries zien De regio tijdens de Tweede Wereldoorolog en de ni'jste drok van Notities uit de Geschiedenis van de Ooststellingwerfse dorpen van dr. T.H. Oosterwijk. Nog niet zo lange leden verschenen is ok Studentehaever, de slim wardeerde bundel mit verhaelen en gedichten van een hiele groep schrievers/dichters die ien of meer kursussen daon hebben bi'j de Schrieversronte. En waor, zo is d'r nog vule, vule meer.
In disse boekekraante staot een hiele barg dat de muuite van het lezen en et goed beweren meer as weerd is. Zoas et artikel over de ni'je saemenwarking mit de biebeltheken, en et artikel over et reilen en zeilen van de boekekraante in zien 25-jaorig bestaon. Meer vertellen we eerst even niet, zels blaederen en lezen is butendat aoriger! Nog veur september gaot de ni'je boekekraante naor alle huusadressen in Stellingwarf, en hi'j is al naor oonze leden en aandere vaaste adressen buten Stellingwarf.


Hiemkundemiddag veur passeniel basisonderwies

Op 27 september is d'r een belangrieke middag veur passeniel van de basisschoelen in Oost- en West-Stellingwarf, in et gebouw van de Stellingwarver Schrieversronte in Berkoop. Et gaot o.a. over lesmeugelikheden bi'j volksverhaelen. Ok wodt d'r ni'j hiemkundig onderwiesmateriaol prissenteerd. Woj' d'r meer over lezen? Klik dan hiernaost onder 'Ni'jgies over' de meugelikhied 'onderwies' even an.


Hendrik Entjes uut de tied

In zien woonplak Ni'jluzen (Overiessel) is op maendag 8 meie perf. dr. Hendrik Entjes wegraekt. Perfester Entjes was van 1974-1982 hooglerer veur et Nedersaksisch an de Grunninger universiteit. Hi'j promoveerde indertied op et Twents van Vriezenveen. In de begintied van de opleving van et Stellingwarfs het hi'j de Stellingwarvers vaeke goeie raod geven over hoe aj' d'r et beste mit ommegaon kunnen, mit de streektael. Dat wodde nog starker in de twiede helte van de jaoren zeuventig. Zo gaf hi'j raod bi'j de opzet en uutvoering van de kursus Stellingwarfs. Vri'j wat kursisten herinneren him as kommitteerde van et Nedersaksisch instituut. Hiel belangriek was zien raod in de beginjaoren van et grote woordeboekprojekt. In de tied dat et grote Stellingwarfs Woordeboek schreven wodde, was hi'j lid van de Raod van Advies. Entjes was een vrundelike man, een man mit kiek op de dingen en een man van opbouw en saemenwarking. De Stellingwarvers hadden him dan ok slim hoge. Hi'j is 86 jaor wodden.


Tomke in et Stellingwarfs: dippeteerde Bertus Mulder beud eerste exemplaoren an

Vandemorgen, vri'jdag 12 meie verscheen in et ukkespeulplak 'Boemeltje' in Makkinge de eerste Stellingwarver edisie van 'Tomke'. Tomke is de naeme van een lesbevodderingspergramme veur peuters in Frieslaand. Dat wodt in een saemenwarkingsverbaand deur een tal instellings orgeniseerd. Et projekt bestaot uut de jaorlikse Friese veurleesweke in meie mit et ni'je Tomke-boekien, tillevisieuutzendings en een Tomke-symposium. De koördinaosie van et hiele projekt is altied in hanen van Siets Ypenga (Biebeltheekservice Fryslân) en Alian Akkermans (Afûk). Dit jaor verschient et Friestaelige Tomke-boekien veur de tiende keer. De laeste jaoren bin d'r veur et boekien ok altied ien of een peer verhaelties in et Stellingwarfs ommezet.
Et leek de uutgevers van Tomke slim aorig toe om dit jaor, vanwegens et jubileum, et Tomke-boekien ok een keer hielemaole in et Stellingwarfs te prissenteren. Een prachtig plan, vun ok de Stellingwarver Schrieversronte, en ze wollen graeg helpen deur in et Stellingwarfs te vertaelen. Dat vandemorgen konnen de eerste exemplaoren van et boekien op een feestelike wieze uutrikt wodden. Dippeteerde Mulder was d'r graeg veur ofreisd naor Makkinge, want, zo zee hi'j in zien praotien veur de ukken én de geneudigden, de perveensie wil in zien taelwark behalven an et Fries ok graeg ommedaenken geven an et Stellingwarfs en Bildts, benaemens ok in verbaand mit de jeugd. Om dat as et waore te onderstrepen gaf hi'j eerste exemplaoren an twie Stellingwarfstaelige kiender in de groep, Esther en Joyce Retz. Die weren oe zo andachtig, krek as de aandere kiender. Die kregen, krek as Esther en Joyce, behalven et boekien ok nog passende kedogies vanwegens et feest. Mulder wees d'r in et verbaand van zien toespraoke nog es op dat meensken de meertaelighied (Nederlaans, Stellingwarfs, Fries en ok aandere taelen) veural zien moeten as een riekdom, van aachterstaand is ja gien spraoke. De prissentaosie wodde ien groot feest, dat laeter veur de groten nog even deurgong in et Schrieversronte-gebouw in Berkoop, mit een toespraokien van Pieter Jonker angaonde de aktiviteiten veur de jongeren die gebeurd binnen en die de kommende tied ommedaenken kriegen zullen. Bestuursleden en meensken van de Afûk praotten nog even flink deur over de meugelikheden en perblemen van dit soorte van wark.
Mar wat en wie is now die Tomke, zuj' je ofvraogen. Tomke is een joongien dat mit et hontien Romke en mit Kornelia de kangeroe een protte aeventuren beleeft. De verhaelties over die drieje bin alle keren slim ansprekend veur de leeftiedsgroep daor ze veur bedoeld binnen. De aeventuren liggen dichte bi'j de belevingswereld van kleine kiender. Best wel es een betien spannend, en best wel es een betien ondeugend. De Tomke-verhaelties wo'n meerstal schreven deur Riemkje Pitstra of Auck Peanstra. D'r staon ok altied prachtige, kleurige illestraosies bi'j van Karin Poiesz of Luuk Klazenga. Mar in de boekies staot nog meer. D'r staon kleine lieties in, opzegvassies, anwiesspellegies en kleurplaeties. Elke keer weer is et een prachtige uutgifte, daoromme is de Schrieversronte d'r ok oe zo wies mit dat Tomke, Romke en Kornelia now ok goed Stellingwarfs blieken te kunnen.
Van et Stellingwarver Tomke-boekien bin 2000 exemplaoren drokt, alle ukken in de Stellingwarven kriegen et boekien ommenocht. Et boekien is dommiet ok te koop bi'j de Stellingwarver Schrieversronte.


Twie pond 'n stuver: de ni'jste jaorlikse Stellingwarver boekekraante komt d'r an

Inderdaod, en die boekekraante bestaot al 25 jaor! Daor geft disse oflevering, in fleurig rood en wit, flink wat ommedaenken an, en dat is hiel terecht. En de adverteerders kriegen vot een extra ploempien, want die maekten dit allegeer weer mit meugelik!
Wat brengt de ni'jste boekekraante? Ie kun in 't eerst plak van alles lezen over de ni'jste uutgiften van de Stichting Stellingwarver Schrieversronte. Zo kuj' percies weten wat d'r dommiet in september mit de sutelaktie in de boekekroje te vienen is. En dat zal weer hiel vule wezen, daor kuj' staot op maeken.
Veerder is d'r in de ni'je boekekraante een hiele hoop te vienen over ni'je en lopende aktiviteiten van oonze stichting Stellingwarver Schrieversronte, d'r staon ni'je gedichten in, d'r is een bladziede veur kiender (die de laeste jaoren elke keer deur een aandere schoele klaormaekt wodt, disse keer deur Tussen de Singels in Oosterwoolde) en gao zo mar deur. Een peer biezundere verrassings uut disse 25e boekekraante bin de ankondiging van et prachtige Stellingwarver Plaanteboek: de naemen en biezunderheden (deur Henk Jager), die van Een brogge van glas: de ni'je, ontroerende roman van Johan Veenstra, en van et biezundere boek Zuver Nuver van Roely Bakker uut Makkinge, daj' ommenocht kriegen as boekemaondkedo aj' veur 12,50 euro of meer bi'j oons kopen in de tied van de sutelaktie (eers gelt et 3,50 euro). De Stellingwarver Spreukekelinder 2007 verscheen al in juni en dot et al goed, en zo ok de roman Maaike, van Jan Schonewille van De Fochtel. Veerder zuj' in de krojen o.e. vienen kunnen et boekien Tomke: beslist ok aorig om te kopen, want ie kun d'r plaeties uut zien laoten en ie kun d'r uut veurlezen veur de kleine ukken. En dan bin d'r de ni'jste drok van W. H. de Vries zien De regio tijdens de Tweede Wereldoorolog en de ni'jste drok van Notities uit de Geschiedenis van de Ooststellingwerfse dorpen van dr. T.H. Oosterwijk. Nog niet zo lange leden verschenen is ok Studentehaever, de slim wardeerde bundel mit verhaelen en gedichten van een hiele groep schrievers/dichters die ien of meer kursussen daon hebben bi'j de Schrieversronte. En waor, zo is d'r nog vule, vule meer.
In disse boekekraante staot een hiele barg dat de muuite van het lezen en et goed beweren meer as weerd is. Zoas et artikel over de ni'je saemenwarking mit de biebeltheken, en et artikel over et reilen en zeilen van de boekekraante in zien 25-jaorig bestaon. Meer vertellen we eerst even niet, zels blaederen en lezen is butendat aoriger! Nog veur september gaot de ni'je boekekraante naor alle huusadressen in Stellingwarf, en hi'j is al naor oonze leden en aandere vaaste adressen buten Stellingwarf.


Hiemkundemiddag veur passeniel basisonderwies

Op 27 september was d'r een belangrieke middag veur passeniel van de basisschoelen in Oost- en West-Stellingwarf, in et gebouw van de Stellingwarver Schrieversronte in Berkoop. Et gong o.a. over lesmeugelikheden bi'j volksverhaelen. Ok wodde d'r ni'j hiemkundig onderwiesmateriaol prissenteerd.


Hendrik Entjes uut de tied

In zien woonplak Ni'jluzen (Overiessel) is op maendag 8 meie perf. dr. Hendrik Entjes wegraekt. Perfester Entjes was van 1974-1982 hooglerer veur et Nedersaksisch an de Grunninger universiteit. Hi'j promoveerde indertied op et Twents van Vriezenveen. In de begintied van de opleving van et Stellingwarfs het hi'j de Stellingwarvers vaeke goeie raod geven over hoe aj' d'r et beste mit ommegaon kunnen, mit de streektael. Dat wodde nog starker in de twiede helte van de jaoren zeuventig. Zo gaf hi'j raod bi'j de opzet en uutvoering van de kursus Stellingwarfs. Vri'j wat kursisten herinneren him as kommitteerde van et Nedersaksisch instituut. Hiel belangriek was zien raod in de beginjaoren van et grote woordeboekprojekt. In de tied dat et grote Stellingwarfs Woordeboek schreven wodde, was hi'j lid van de Raod van Advies. Entjes was een vrundelike man, een man mit kiek op de dingen en een man van opbouw en saemenwarking. De Stellingwarvers hadden him dan ok slim hoge. Hi'j is 86 jaor wodden.


Tomke in et Stellingwarfs: dippeteerde Bertus Mulder beud eerste exemplaoren an

Vandemorgen, vri'jdag 12 meie verscheen in et ukkespeulplak 'Boemeltje' in Makkinge de eerste Stellingwarver edisie van 'Tomke'. Tomke is de naeme van een lesbevodderingspergramme veur peuters in Frieslaand. Dat wodt in een saemenwarkingsverbaand deur een tal instellings orgeniseerd. Et projekt bestaot uut de jaorlikse Friese veurleesweke in meie mit et ni'je Tomke-boekien, tillevisieuutzendings en een Tomke-symposium. De koördinaosie van et hiele projekt is altied in hanen van Siets Ypenga (Biebeltheekservice Fryslân) en Alian Akkermans (Afûk). Dit jaor verschient et Friestaelige Tomke-boekien veur de tiende keer. De laeste jaoren bin d'r veur et boekien ok altied ien of een peer verhaelties in et Stellingwarfs ommezet.
Et leek de uutgevers van Tomke slim aorig toe om dit jaor, vanwegens et jubileum, et Tomke-boekien ok een keer hielemaole in et Stellingwarfs te prissenteren. Een prachtig plan, vun ok de Stellingwarver Schrieversronte, en ze wollen graeg helpen deur in et Stellingwarfs te vertaelen. Dat vandemorgen konnen de eerste exemplaoren van et boekien op een feestelike wieze uutrikt wodden. Dippeteerde Mulder was d'r graeg veur ofreisd naor Makkinge, want, zo zee hi'j in zien praotien veur de ukken én de geneudigden, de perveensie wil in zien taelwark behalven an et Fries ok graeg ommedaenken geven an et Stellingwarfs en Bildts, benaemens ok in verbaand mit de jeugd. Om dat as et waore te onderstrepen gaf hi'j eerste exemplaoren an twie Stellingwarfstaelige kiender in de groep, Esther en Joyce Retz. Die weren oe zo andachtig, krek as de aandere kiender. Die kregen, krek as Esther en Joyce, behalven et boekien ok nog passende kedogies vanwegens et feest. Mulder wees d'r in et verbaand van zien toespraoke nog es op dat meensken de meertaelighied (Nederlaans, Stellingwarfs, Fries en ok aandere taelen) veural zien moeten as een riekdom, van aachterstaand is ja gien spraoke. De prissentaosie wodde ien groot feest, dat laeter veur de groten nog even deurgong in et Schrieversronte-gebouw in Berkoop, mit een toespraokien van Pieter Jonker angaonde de aktiviteiten veur de jongeren die gebeurd binnen en die de kommende tied ommedaenken kriegen zullen. Bestuursleden en meensken van de Afûk praotten nog even flink deur over de meugelikheden en perblemen van dit soorte van wark.
Mar wat en wie is now die Tomke, zuj' je ofvraogen. Tomke is een joongien dat mit et hontien Romke en mit Kornelia de kangeroe een protte aeventuren beleeft. De verhaelties over die drieje bin alle keren slim ansprekend veur de leeftiedsgroep daor ze veur bedoeld binnen. De aeventuren liggen dichte bi'j de belevingswereld van kleine kiender. Best wel es een betien spannend, en best wel es een betien ondeugend. De Tomke-verhaelties wo'n meerstal schreven deur Riemkje Pitstra of Auck Peanstra. D'r staon ok altied prachtige, kleurige illestraosies bi'j van Karin Poiesz of Luuk Klazenga. Mar in de boekies staot nog meer. D'r staon kleine lieties in, opzegvassies, anwiesspellegies en kleurplaeties. Elke keer weer is et een prachtige uutgifte, daoromme is de Schrieversronte d'r ok oe zo wies mit dat Tomke, Romke en Kornelia now ok goed Stellingwarfs blieken te kunnen.
Van et Stellingwarver Tomke-boekien bin 2000 exemplaoren drokt, alle ukken in de Stellingwarven kriegen et boekien ommenocht. Et boekien is dommiet ok te koop bi'j de Stellingwarver Schrieversronte.


Reize naor Sallaand

Op zaoterdag 9 september maekten vieftig Schrieversronte-leden een kulturele busreize naor Sallaand onder leiding van Jannes Westerhof uut Darp, die twie jaor leden op verzuuk van de Warkgroep Publiciteit van de Schrieversronte zoe'n soorte van reize deur Drenthe orgeniseerd hadde. In de bus vertelde hi'j over alle plakken historische biezunderheden, mar ok over schrievers en keunsteners die daor woonden en warkten. De eerste stop was in Gieteren om te koffiedrinken. Daornao wodde een bezuuk brocht an et atelier van de keunstschilder Joke Plomp, die niet alliend over heur eigen wark vertelde mar ok over aandere keunsteners die in Staphorst warkt hadden. D'r was ok genog gelegenhied om et wark van heur te bewonderen. De reize gong doe richting Hasselt, en in Ni'jluzen wodde een ontvangst hullen in et oolde gemientehuus, waor de burgemeester Arend ten Oever van de gemiente Ommen een inleiding hul over de Stichting SONT, de koepelorgenisaosie van streektaelorgenisaosies in Noord- en Oost-Nederlaand. Ten Oever is oold-burgemeester van Ni'jluzen; reisleider Jannes Westerhof hadde d'r eerder drie jaor gemientesiktaoris west. De enthousiaste inleiding wodde deur burgemeester Ten Oever mit humor brocht. Doe gong de reize naor et laandgoed Vilsteren. Daor waachtte eerst een koffietaofel mit streekgerechten. Nao de koffietaofel was d'r een inleiding van een ure deur de rentmeester van et laandgoed Vilsteren. Deur de vraogen uut de zael koj' opmaeken dat de meensken mit grote interesse de lezing volgden. Doe gong de reize wieder naor et laandgoed Eerde, waor as Krishnamurti tien jaor woond en warkt het op et kesteel van de femilie Van Pallandt. Burgemeester Ten Oever hul op 'e brogge veur et kesteel een gloedvolle beschouwing over de geschiedenis van et kesteel en van zien biezundere bewoner. As ofscheid kreeg elk een aorig boekien kedo van Ten Oever. Staorigan wodde et tied om de reize te vervolgen en in de bus kregen de Schrieversronte-leden weer uutgebreid een toelochting van reisleider Jannes Westerhof. Stipt op tied kwam de bus weer in Wolvege an. Et is et plan om de reize ien keer in de twie jaor holen te blieven.


Buma-Stemra geft ommedaenken an wark in de regionaole taelen

In et ni'jste nommer van et magazine van Buma-Stemra wodt ommedaenken geven an meziek in een tal regionaole taelen. Ze geven een beeld van et wark van de Friese zangeresse Nynke Laverman, van de Limburger Gé Reinders, van et Drentse Skik en zo nog een peer.
Mit naeme veur 'oonze' tekstdichters en komponisten, mar netuurlik ok veur alle aandere meensken mit interesse misschien aorig om es even in te kieken.


Nedersaksisch Vocaal Ensemble opricht

Dit ensemble is nog mar krek opricht: op 8 september 2006. Alle teksten die de 22 zangers en zangeressen zingen zullen, zullen in ien van de zes heufdvariaanten van et Nedersaksisch wezen die ze onderscheiden. Op et langelaeste zal et om 36 leden gaon. Meer infermaosie zal te vienen wezen op www.nedersaksischvocaalensemble.nl.
In et eerstan zullen ze heur veural richten op et Grunnings en Drents. Ienkeer in de drie weken zal d'r rippeteerd wodden in et Markehuus in Grolloo.


De Stellingwarver sutelaktie is uut aende!!!

De jaorlikse Stellingwarver aktie om boeken en al zo meer an de deuren te verkopen, een tredisie van tientallen jaoren onderdehaand, is ok disse keer in de maond september. De ploeg meensken die bi'j de deuren daele gaot, is een grote groep van plezierige, optimistische vri'jwilligers en ze hebben een protte mooie dingen om an te bieden, dus laot ze niet zomar an jow veurbi\'jgaon en neem flink wat of!
Ze kommen altied bi'j aovend, mar wanneer dan? Dat is op maendagaovend 4 september, woensdagaovend 6 september en maendagaovend 11 september: dan wodt d'r suteld in Stellingwarf-Oostaende in de dörpen Appelsche (et noorden), De Fochtel, De Haule, Else, Ni'jberkoop en Oosterwoolde (et zuden). Op woensdagaovend 13 september, maendagaovend 18 september en woensdagaovend 20 september lopt de sutelaktie in Stellingwarf-Westaende in de dörpen De Blesse, De Hoeve, Oolde- en Ni'jlaemer, Oolde- en Ni'jtriene, Noordwoolde-Zuud, Steggerde, Sunnege, Vinkege, Wolvege (et noordwesten)


Schoelekraanties onderwegens: in et Stellingwarfs en in oranje

We hebben weke 24 al weer te pakken, en in die weke kommen ze naor jow basisschoele in Oost- of West-Stellingwarf toe: de kraanties veur de onder- en middenbouw. Et gaot om 't Herenhoentien (veur de onderbouw), o.e. mit et verhael 'Piepmoes gaot voetballen'. D'r zit ok een kleurplaete bi'j, mit Piepmoes op et WK. Hoe kan et ok aanders in disse tied. En ja, 't Herenhoentien is disse keer hielendal in et oranje, en ie lezen d'r ok aorige voetbalmoppen in.
Wat donkt jim van de volgende. 'Maik vragt an zien heit as hi'j aovens de WK-voetbalwedstried zien mag. Dat mag van heit, mar mar iene helte. 'Da's goed,' zegt Maik, 'as et dan mar de twiede helte is!'
Et schoelekraantien 'Uut de buse' is veur de middenbouw. Et is disse keer al lieke 'knal'-oranje as 't Herenhoentien. Ie vienen een verhael 'Kellie en de voetbalwedstried', een soort deurstreeppuzel, voetbalmoppen en gao mar deur.
Veur de bovenbouw wodt een stel kopieerblaeden anleverd. Et bin de ´boolderties´, de rebriek mit vaaste ni´jgies dus, en veerder gedichies mit opdrachten en moppies. Hiemkunde liekt al in de vekaansiestemming. Lees mar es: Chris en Tom hebben heur tente opzet in et oerwoold in Afrike. Wiels ze hoolt bi´j mekeer zuken veur een vuurtien, zien ze inienen een lieuw. Tom klimt in een boom en zicht Chris ronties lopen om de tente.
'Pas op,' Chris, ropt hi'j, 'de lieuw zit vlak aachter je!' 'Dat hindert niet,' zegt Chris, ´ik lig toch nog drie ronties veur!´


Groot Stellingwarfs Diktee van H.N.I. komt d'r an, en... iederiene kan mitdoen!

In de tied van de fietsvierdaegse van West-Stellingwarf wodt op donderdagaovend 6 juli in Wolvege een Groot Stellingwarfs Diktee holen. Et diktee wodt orgeniseerd deur de H.N.I. Wolvege, mit mitwarking van de Stellingwarver Schrieversronte. Et Groot Stellingwarfs Diktee zal wezen op et Marktplein in et oostaende van Wolvege, en d'r zullen dattig personen an mitdoen. Et diktee zal veurlezen wodden deur de Philip Freriks van de Stellingwarven, schriever Johan Veenstra van Ni'jhooltpae.
Veur et diktee wo'n vuuftien Stellingwarvers uut de wereld van de sport, media, poletiek enz. vraogd. De ere vuuftien dielnemers doen mit deur as de beste vuuftien uut een veurronde te kommen. Woj' mitdoen an de veurronde, en woj' weten hoe die is? Woj' meer weten over et diktee? Lees dan veerder hiernaost, linksboven, onder 'de tael': klik die meugelikhied an.


Hiemkundemiddag veur passeniel basisonderwies

Op woensdagmiddag 27 september is d'r in et gebouw van de Stellingwarver Schrieversronte een biezundere bi'jienkomst veur passeniel van de basisschoelen van Oost- en West-Stellingwarf. D'r bin inleidings over hiemkundige onderwarpen, en die gaon over lesmeugelikheden bi'j et volksverhael, over de meugelikheden van et dokumentaosiecentrum van de Stellingwarver Schrieversronte en over de Stellingwarver streektael in et onderwies. Veerder wodt d'r ni'j lesmateriaol prissenteerd.
Dat is nao et schoft, mar et pat veur et schoft is in de vorm van een prachtige workshop van drs. Tineke Neyman. Zi'j is koördinater arfgoededukaosie van de perveensie Frieslaand, en ze zal disse middag vertellen over een tal lesmeugelikheden bi'j et bruken van een volksverhael in de klasse. Ze zet de dielnemers van disse middag daor zels ok mit an de slag.
Een schriftelike uutneudiging mit antwoordstrokien en een volledige beschrieving is naor de schoelen stuurd. We rikkemederen disse onderwiesmiddag nog graeg even bi'j et passeniel van et basisonderwies an. De middag is van 13.30 ure tot omdebi'j 15.30 ure.


Nedersaksische bestuursdillegaosie in overleg mit Kaemerfrakties

Op donderdag 18 meie was een dillegaosie van bestuurders veur de perveensies Grunningen, Drenthe, Overiessel, Gelderlaand en de gemienten Oost- en West-Stellingwerf op vesite bi'j de frakties van de VVD, et CDA en de PVDA in de Twiede Kaemer. Doel was om die frakties infermaosie te geven over et ongeduld dat in et noorden en oosten onderdehaand ontstaot deurdat diel III van et Europese haandvest van regionaole taelen of taelen van minderheden, nao meer as tien jaor, nog altied niet toepast is op et Nedersaksisch. Et Nedersaksisch bestaot uut et Grunnings, Drents, Twents, Sallaans, Aachterhoeks, Veluws en Stellingwarfs en is in 1995 officieel erkend as regionaole tael die bescharmd wodden moet in et kader van et Europese haandvest. Die erkenning indertied was een slim belangrieke stap, veural in psychologisch opzicht. Mar de toepassing van diel III is een vule starker insterment om de hieltied aktief te blieven om et Nedersaksisch te bruken en d'r veur te zorgen. Dat is ok al omdat de Raod van Europa als onofhaankelike instelling naogaot as de overhied van een laand alles wel dot mit een tael zoas et volgens de regels van et haandvest heurt.
Dillegaosieleider dippeteerde Hans Gerritsen van de perveensie Grunningen gaf an dat een bestuurskundig onderzuuk naor beleid en beleidsplannen deur vrouw drs. Daisy Vliegenthart zien laoten het dat onderdehaand voldaon wodt an genoeg kriteria van et haandvest. Dat niks hoeft de Nederlaanse regering now nog tegen te holen om ok diel III van toepassing te verklaoren veur et Nedersaksisch. Ok leut de Grunninger dippeteerde zien dat de perveensies en gemienten heur slim inspannen veur een beleid dat ok wat opsmit, zoas ok te marken is an de inzet van beheurlike strukturele en incidentele middels.
Et gaot bi'j de strukturele middels veur et Nedersaksisch om meer as een miljoen euro, wiels d'r ok nog vaeke losse subsidies geven wodden veur et uutgeven van boeken, cd's en alderdeegst regio-soaps. Dippeteerde Jan Kristen van Overiessel wees d'r mit naodrok op dat hi'j et vremd vint dat et Nedersaksisch in Nederlaand de staotus van diel III al mar niet krigt, wiels in Duutslaand et Nedersaksisch in 1998 al onder diel III vaalt in de dielstaoten Nedersaksen, Sleeswiek-Holstein, Bremen, Hamburg en Mecklenburg-Vorpommern. Dat zol toch in et Europa van vandaege-de-dag liek wezen moeten: alles onder diel III, dochte him.
De frakties kregen infermaosie deur een historisch overzicht van anvraogen, overlegsituaosies en procedures en deur een exemplaor van et boek daor de taeltelling Nedersaksisch van 2003 in beschreven wodt. Et weerommelopen van et praoten thuus en et hielendal niet bruken deur een protte meensken die et Nedersaksisch toch wel praoten kunnen, levert ongerusthied op mar geft ok een extra argement om diel III now zo gauw meugelik toe te passen.
De frakties weren bereid ien en aander veur te leggen an de menister, en zi'j zullen heur ok veerder beraoden.
Veur de Stellingwarver gemienten wodde mitdaon an et overleg deur burgemeester Gerard van Klaveren, wiels ok haandvest-expert Henk Bloemhoff van de Stellingwarver Schrieversronte bi'j de dillegaosie was.


'Stellingwarfs Intermezzo': meraokels mooi 'Oranjeconcert'

Op 29 april was et weer tied veur et 'Oranjeconcert' van de Chr. Brassband Euphonia in Wolvege. Dit jaor warkte Euphonia mit de à capella-groep Intermezzo, die an now toe veural in et butenlaand een protte sukses het. De tekst daor ze et schoft mit inleidden was hiel biezunder: et pebliek kreeg deur heur zang in et Stellingwarfs te heuren wat as ze al of niet doen mossen in de pauze. Disse tekst van Johan Veenstra wodde in honderd persent goed uutspreuken Stellingwarfs zongen. Et optreden van de groep Intermezzo in zien gehiel was trouwens ok veurtreffelik. De optredens van Brassband Euphonia mit heur prachtig klinkende blaosmeziek was al lieke veurtreffelik. Dat woord kan wis en zeker ok bruukt wodden veur Jeanette Roeles heur prissentaosie van een hiele riegel gedichten in et Stellingwarfs. Die gedichten wodden tussendeur brocht, mar niet zomar los van alles. Want, zoas iene van de toeschouwers et zo aorig uutdrokte, die gedichten en de meziek van Euphonia weren naor inhoold en vorm op een biezundere meniere in mekeer breided. Ok dat koj' wis en werachtig veurtreffelik numen. Zo wodde een Arthur-gedicht van Lodewijk Hooghiemstra op een prachtige meniere verwarkt tot meziek, op zoe'n meniere daj' je verschillende ridders en ere feguren uut de verhaelen van keuning Arthur veur de geest haelen konnen.
Bi'j et kiezen van de teksten hadde Euphonia hulpe kregen van Sietske Bloemhoff van de Stellingwarver Schrieversronte. De keuze beston uut gedichten van Lodewiek Hooghiemstra: "Rood en glundig" en "Daor ridt ridder Galahad", van Jan van Overtjonger: "Kringloop" en "Et kruus", van Stien van Anne: "De spinne en de vlinder", van Martinus Bakker (Jouk): "Vioeltien" en "De kikker" en van H.J. Bergveld: “Bazar Euphonia”.
Et jaorlikse konsert hadde disse keer dus as titel “Stellingwarfs Intermezzo”, en d'r was krek as altied een protte volk op ofkommen. Mit zoe'n 600 meensken vuulde sporthal “De Steense” in Wolvege dan ok gezellig vol an.
De teksten in et Stellingwarfs weren ofdrokt in een biezunder boekien dat iederiene kreeg. De Friese dippeteerde Bertus Mulder hadde d'r een enthousiast veurwoord in schreven en Sietske Bloemhoff van de Stellingwarver Schrieversronte hadde de saemenstelling daon, mit een aorige bronvermelding en al.
De aovend wodde op een biezundere meniere eupend: et was de eerste keer dat de ni'je burgemeester van West-Stellingwarf Gerard van Klaveren dat dee. En ok dat was veurtreffelik: hi'j wees op de weerde van de eigen Stellingwarver tael en reup dan ok iederiene op om die tael toch veural bruken te blieven. We kun rustig stellen: de kulturele weerde van et Stellingwarfs wodde mit disse aovend meer as bewezen, veur zoveer dat nog neudig wezen zol bi'j sommigen...


De ni'jste Ovend is d'r!

Daor is hi'j al weer, de alderni'jste Ovend. Mit prachtige kleuren an de buterkaante en een riegel mooie illestraosies binnenin. Zoas prachtige ofbelings van wark van de keunsteners Anton Voorzanger, Guus Hellegers en Gert Roelofsen, in een stok over de Hannie Mein Keunstpries 2006 van de haand van Sietske Bloemhoff.
In heur vaaste rebriek Et Kroontien schrift zi'j over Tomke, die mit et hontien Romke en Kornelia de kangeroe een protte aeventuren beleeft. Et boekien daor ze over schrift is laestdaegs op 'e wereld kommen, zie ok veerder op disse webstee. Et Tomke-boekien is laestdaegs naor alle ukkespeulplakken gaon. Thuus is et ok goed bruukber veur oolden mit klein grut. Om uut veur te lezen en om mit mekeer naor de mooie prenties te kieken.
Sietske geft in disse Ovend veerder heur ankondiging van et Groot Stellingwarfs Diktee. Dat wodt dommiet deur H.N.I. Wolvege hullen, mit hulpe van de Stellingwarver Schrieversronte. Dichteresse Roely komt mit twie prachtige gedichten, en ok dichter Lammert Tiesinga kan d'r wat van. Die zien gedicht naor anleiding van Raevenswoold is om zo te zeggen echt weer even wat aanders.
Mooie verhaelen bin d'r van Lily Köhler, van Sjoukje Oosterloo, van W. de Jong en van Klaas Jalving. Annie Dedden vertelt over wat zi'j now heur mooiste boek(en) vint, W.H. de Vries vertelt veerder over de oorlog in oonze kontreinen, Bert Schapelhouman dot dat over et leven an de ere kaante van de grote poele en Karst Berkenbosch brengt et vervolgverhael van Ooldemunnike weer veuruut (schrievers wisselen de hieltied of in dit vervolgverhael). Te vule om allegeer op te numen, disse Ovend, mar ie lezen et netuurlik allegeer zels aj' een abonnement hebben. De Ovend is et bekende, twiemaondelikse tiedschrift van de Stellingwarver Schrieversronte, en zit in de vierendattigste jaorgaank. De Ovend is begonnen in de loop van 1972, et jaor van de oprichting van de Stellingwarver Schrieversronte. Trouwens, losse nommers gellen mar 1,95 euro. Wat kan een meenske nog meer begeren! Now, gewoon lid wezen, dan komt De Ovend veur 11,50 euro in et jaor bi'j je over de heerd. Dan doej' mit en dan steun ie et Stellingwarfs krek as al die aandere meensken!
Aj' lid binnen, daenk dan disse keer ok even extra goed om de bi'jsluters. Want leden van de Schrieversronte kun heur opgeven veur een kulturele busreize naor Sallaand (9 september). Veerder wodt ankondigd dat d'r op 1 september een kultureel pergramme is bi'j gelegenhied van et verschienen van et ni'jste boek van Johan Veenstra, Een brogge van glas. Kaorten gellen 5 euro per stok. Aj' ze even risserveren laoten bi'j de Stellingwarver Schrieversronte dan liggen ze aovens veur jow klaor


Stellingwerf College mit geschiedenisexkursie naor et Guinness Book of Records

Maegies en jonges van et Stellingwerf College in Oosterwoolde hebben et veur mekeer. Mar liefst 1113 leerlingen en lerers van et Stellingwerf College spanden heur op vri'jdag 28 april ommeraek in om mit heur schoele in et Guinness Book of Records te kommen, mit 'de grootste exkursie an now toe'. Dat deden ze allegere in et kader van et grote schoele-examenfeest van dit jaor. Morgens betied gongen ze op 'e fiets een exkursie regionaole geschiedenis doen van Oosterwoolde uut naor Appelsche, an de haand van een boekien mit infermaosie, de route en een stokmennig aorige opdrachten. Onder et motto 'Kijk en gij zult ontdekken' pruufden ze van et laandschop en de geschiedenis tussen Oosterwoolde en Appelsche, mit de turf, de oolde vaort mit de schipveert en et leven van de meensken die in de veenderi'jen warkten. Et wodde een biesterbaorlik spektaokel mit een hieleboel ommedaenken van de media. Even nao half iene kon burgemeester Harry Oosterman bekend maeken in de grote zael van Duinen Zathe dat et allegere veur mekeer kommen was: 1113 leerlingen en lerers hadden mitdaon, en dat was meer as genoeg veur et rekord.
Een hiele hoop personen en instaansies warkten mit. De Stellingwarver Schrieversronte ok, en ok iene van de 'zusters', de Historische Verieninge van Appelsche. Die gavven op een oolde snikke in et Fochteler Verlaot tekst en uutleg over turf, et turfstikken en oolde geriedschoppen. De bekende Berkoper Jaap Wever speulde bi'j kefé Hulst in Appelsche de oolde socialistische veurman Domela Nieuwenhuis nao. Dat hadde hi'j vaeker daon, koj' wel vernemen. Elke groep hadde een mooie vraoge veur Domela in petto. De leerlingen weren wel gelooid op risseltaot, dat koj' an heur inzet wel marken. Allegere weren ze slim op 't schik op disse prachtige veurjaorsmorgen. En hoe kon et ok aanders, mit zoe'n veurbeeldige dag. Hulde an de veurbereidingskemmissie van et Stellingwerf College, dat mag ok hier wel even zegd wodden. Op www.schoolexamenfeest.nl is meer over dit grote feest te vienen.


Oproep om gedichten

Krek as veurgaonde jaoren wil de redaktie van de Stellingwarver boekekraante "Twie pond 'n stuver" meensken oproepen om een mooi Stellingwarfs gedicht te schrieven veur de jaorlikse boekekraante. Et wodt dit jaor een hiele biezundere uutgifte, want et is veur de 25e keer dat de Stellingwarver boekekraante verschient. De onderwarpen veur de gedichten bin vri'j. De redaktie maekt een keuze uut de inzendings. Jim inzendings kun jim sturen naor de redaktie van "Twie pond 'n stuver" p.a. Willinge Prinsstraote 10, 8421 PE Berkoop/Oldeberkoop. Jim kun netuurlik ok mailen naor info@stellingwarfs.nl.


De veurige Ovend is d'r ok nog!

De veurige oflevering van oons twiemaondelikse tiedschrift De Ovend is d'r ok nog. Et is et nommer van april 2006. De Ovend geft iederkeer ommedaenken an tael, schrieveri'je, geschiedenis en volkskunde van Stellingwarf, zoas bekend wezen mag. En inderdaod, De Ovend is altied hielemaole in et Stellingwarfs.
Jim vienen een protte variaosie in de inhoold. Et nommer van april begint mit een prachtig vraoggesprek van Johan Veenstra mit de ni'je burgemeester van Stellingwarf-Oostaende, drs. Harry Oosterman. Oosterman komt daor vlot en fleurig in naor veuren en ie kriegen nocht om zels een keer mit him over van alles en nog wat an de praot te kommen. Dat liekt niet muuilik te wezen, en doe dat dan toch veural in et Stellingwarfs; dat wil hi'j op die meniere, praotendewieze dus, ok graeg zels leren. Ik wil graeg dat meensken Stellingwarfs tegen me praoten, zegt hi'j enthousiast.
Wiebe de Vries vertelt wieder over de oorlog in en om oonze kontreinen. Arg de muuite weerd is ok W. Hoekstra zien bi'jdrege over de femilie Heloma. Henk Bloemhoff geft ommedaenken an et oolde gebruuk om kraekelingen te prissenteren bi'j een begraffenis. Dat dot hi'j uteraord in de taelrebriek Oonze tael, oonze zorg. Bert Schapelhouman vertelt veerder over zien leven 'over de grote poele' oftewel over de Atlantische Oceaan. Lily Köhler komt mit et verhael 'Opni'j beginnen', Roely Bakker lat heur bi'jdrege zien an et vervolgverhael 'Ooldemunnike in de warre', Harmen Houtman brengt et gedicht 'Op et grote klied' en Hans v.d. Berg schrift hoe lastig et kiezen van je mooiste boek is. Hi'j komt uut bi'j Beekman en Beekman van Toon Kortooms. Sietske Bloemhoff Geft ommedaenken an een bepaold type bi'jschure van vroeger en an et eerste boek van Jan Schonewille: Maaike. In de kienderrebriek Et kroontien het ze plak geven an Stien van Anne heur verhaeltien Had waeter.
De Ovend komt bi'j jow over de heerd veur 11,50 euro in et jaor. Gewoon doen, want ie steunen et Stellingwarfs daor ok nog mit. Losse nommers gellen 1,95 euro. Neem een abonnement, oonze kultuur is et weerd!


Maaike, oftewel: et eerste boek van Jan Schonewille

Op 13 april verscheen in dörpshuus Et Legien op 'e Fochtel et eerste boek van Jan Schonewille. Et is een roman en de schriever vertelt d'r in over de liefde tussen et Fochteler maegien Maaike en een bewoner van et joodse warkkaamp Ybenheer. De eerste twie exemplaoren van et boek wodden deur Jan Schonewille uutrikt an wethoolder Pieter Bouma van Oost-Stellingwarf en an Marjan van den Berg, Jan zien partner.
Jan Schonewille (1953) studeerde theologie an de Theologische Universiteit van Kaampen. In 1980 wodde hi'j predikaant van de geriffermeerde karke in Ni'jsliek, in kombinaosie mit toerissingswark in de regio Beilen. In 1985 wodde hi'j benuumd as predikaant veur missionaire toerissinge in de S.O.W.-karken in Frieslaand. In 1992 begon hi'j mit 'Onder de Linde', een centrum veur bezinning, opvang en vorming, in een verbouwde boereplaetse an de Vogelrijd op 'e Fochtel. Sund veurjaor 2000 was hi'j bestuurslid van de Stichting Joodse Warkkaampen in Frieslaand en Drenthe. Die stichting leut onder meer monementen daelezetten bi'j de oolde warkkaampen en gaf een boek uut over die warkkaampen.
Jan Schonewille beschrift in zien boek de liefde die et Fochteler maegien Maaike ondergaot mit de uut Den Haag ofkomstige Jacob. Jacob Levi is deur de Duutsers, tegere mit veul meer joodse jongen en mannen, onderbrocht in kaamp Ybenheer. Mit een maot van him haelt hi'j gruunten veur de bewoners van et kaamp bi'j de boerefemilie Van den Berg, waor hi'j zo in de kunde komt mit Maaike. Alles liekt goed te gaon, totdat op 2 oktober 1942 de bewoners van et kaamp votbrocht wodden naor Westerbork, en van daor uut naor konsentraosiekaampen in Polen.
De roman is op een vlotte, mar ok gevulige meniere schreven en het een verrassend slot.
Jan Schonewille is van oorsprong Drents en hi'j het al wel de kursus Stellingwarfs volgd, mar zien eerste boek het hi'j veur de wissighied toch nog vertaelen laoten. Die vertaeling wodde op vakkundige wieze uutvoerd deur schriever Boele Land uut Jelsum, van vroeger uut Ni'jberkoop. Et omslagontwarp is van Albertha Bloemhoff uut Oosterwoolde. Maaike telt 80 bladzieden; de pries is € 8,00.

Et was al mit al een indrokwekkende bi'jienkomst, die om 13.30 ure begon mit een veurdracht deur Niek van der Oord over de oorlog, in anwezighied van Fochteler schoelekiender. Anslutend gong ieder mit heur naor et monement van kaamp Ybenheer, veur een herdaenking. De schoelekiender van De Fochtel brochten daor passende meziek, d'r wodden gedichten deur heur veurdreugen en deur Jan Schonewille wodden de neudige passende woorden zegd. Ien en aander maekte grote indrok op de anwezigen.
De middag wodde weer vervolgd in de volle zael van et Fochteler dörpshuus Et Legien. Schriever Jan Schonewille beud twie eerste exemplaoren an an wethoolder Pieter Bouma, die laeter antwoorddee mit een passende, persoonlik kleurde toespraoke antwoordde, en an zien parner Marjan van den Berg. Ok Boele Land dielde in alle ere, omreden hi'j de vertaeling maekte. Et 'opdat wi'j nooit vergeten' klonk disse middag de hieltied deur. De middag was dan ok niet zomar even steld: et was 13 april, de bevri'jdingsdag van Oost- en West-Stellingwarf.


Boek 'Kunst over Bomen Bomen over kunst' krigt vormgevingspries

Naost Friese keunsteners en dichters het ok een groepien Stellingwarver dichters indertied mitdaon an et boek 'Kunst over Bomen Bomen over kunst'. Dit boek het kotleden as iene van de drie nomineerde boeken de jaorlikse vormgevingspries van de stichting It Fryske Boek kregen. Een mooi ni'jgien!


(anpast op 27-08-2010)