NI'JE UUTGIFTEN


Sunnege en Ooldetriene in veldnaemen en geschiedenis beschreven: deurzetten levert weer een interessaant boek op

Vandaege verscheen de zesde in de riegel 'Veldnaemen van Stellingwarf', mit beschrievings van de veldnaemen en dörpshistorie van de dörpen Sunnege en Ooldetriene, van de haand van Piet van der Lende. De levendige prissentaosiemiddag was in et Dörpscentrum van Sunnege en Ooldetriene. In zien eupeningswoord gaf Schrieversronte-veurzitter Ype Dijkstra an hoe naost et vierdielige Stellingwarfs Woordeboek in de jaoren tachtig van de veurige ieuw ok et projekt Stellingwarver veldnaemen uut aende gong. Dr. Rudi Ebeling, die disse middag een eerste exemplaor kriegen zol en die veur zien pensioen naemkundige an et Nedersaksisch Instituut was, hulp in die tied now en dan mit goeie inhooldelike raod. Hi'j ston mit an de wiege, zoas Dijkstra et zee. De eerste oflevering in de serie, over Ni; jhooltpae en Ni'jberkoop, verscheen in die tied al gauwachtig. Intied bin van vuuftien dörpen de beschrievings in boekvorm verschenen. Et gaot om zes dielen mit mekeer. Et gaot om kultuur die veur een pat nog leeft en die op disse meniere deurgeven wodt an belangstellende meensken van now en van laeter. Veurzitter Dijkstra kon bi'j et begin een dikke veertig meensken welkom hieten: een riegel infermaanten en leden van de Warkgroep historie uut Sunnege en Ooldetriene, leden van de veldnaemekemmissie van de Stellingwarver Schrieversronte en aanderen.
Nao de eupening gaf schriever Piet van der Lende een schets van zien onderzuuk en van et boek. Hi'j is d'r in de oflopen drie jaor riegelmaotig mit doende west. Behalven de naemen, de verklaorings d'r van, details over bronnen en meer het hi'j et boek flink wat dörpsgeschiedenis mitgeven, dat veur veul liefhebbers van de plaetselike en algemiene Stellingwarver geschiedenis is et een slim interessaante publikaosie wodden.
Van der Lende beud vervolgens eerste exemplaoren an an dr. Ebeling, an de heer Hans Smink as vertegenwoordiger van Plaetselik Belang van Sunnege en Ooldetriene, en an de heer Jan Boonstra, vertegenwoordiger van de Warkgroep Historie Sunnege en Ooldetriene.
Dijkstra zicht et Schrieversrontewark as wark daor et plaetselike en et Stellingwarfs-regionaole in mekeer over gaon, en veldnaemekemmissieveurzitter Henk Bloemhoff gong daor nog even op deur, an de haand van et veldnaemewark zels. Dit thema wodde laeter ok oppakt deur Jan Boonstra, in zien praotien over doel en aktiviteiten van de plaetselike Warkgroep Historie. Inzet van flink wat geïnteresseerden kan tot mooie en degelike beschrievings leiden en zo kan ok vaastelegd wodden wat plaetselik nog te aachterhaelen is. Hi'j leut butendat ok zien wat veur plannen ze nog hebben. Mit naeme biezundere personen zol nog hiel wat van vaastelegd wodden kunnen in beide dörpen, neffens him. Nao zien daankwoord veur et kriegen van et boek beud hi'j Ype Dijkstra veur et Kenniscentrum van de Stellingwarver Schrieversronte de plaetselike geschiedenis-dvd-mit-boek an. Dijkstra was daor bliede mit, ok al vanwegens oolde banen die hi'j hadde mit meensken uut Ooldetriene en Sunnege. Ok de heer Smink van Plaetselik Belang was netuurlik goed te spreken over et kriegen van een eerste exemplaor. Hi'j fielseteerde de Schrieversronte mit de uutgifte en mit et goeie wark in et algemien. Hi'j hoopte dat ze daor mit deurgaon zollen, en hi'j weenskte de stichting veul suksessen in de toekomst.
Dr. Ebeling gong in op de biezundere aord en betekenis van et uutgeven van veldnaemeboeken. Ie beweren ze en ie maeken ze toegaankelik, op een wetenschoppelik verantwoorde meniere. Hi'j prees et nivo van disse riegel publikaosies, en et feit dat d'r deurzet wodt, de hieltied op dezelde goeie meniere. In zien ofsluting daankte Henk Bloemhoff elk veur zien inbreng, in et biezunder Jan Boonstra en aandere meensken in Sunnege en Ooldetriene, die disse interessaante middag mit orgeniseerd hadden. Veur him, schriever Piet van der Lende en dr. Ebeling weren d'r bloemen.
Et eerstvolgende veldnaemeboek zal gaon over Oosterwoolde, wiels ok uutgiften over o.e. Ooldelaemer, Berkoop en Buil in zicht binnen.
'Veldnaemen van Stellingwarf diel VI Ooldetriene en Sunnege' is 80 bladzieden dikke, het interessaante foto's en kaorten (waoronder een losse kaorte mit veldnaemen d'r op) en gelt 11,50 euro. Et boek is ok te koop in de lopende sutelaktie, en netuurlik in de boekwinkels en bi'j de Stellingwarver Schrieversronte. (31 aug. 09)


Roem 140 meensken maekten prissentaosie 'Et geheim van de wiend' mit, en...: Kultuurdippeteerde Jannewietske de Vries reageert op kollum Johan Veenstra

Op vri'jdagaovend 28 augustus verscheen de ni'je roman 'Et geheim van de wiend' van Johan Veenstra op een peblieksaovend in et MFC 'De Ni'je Stienze' in Ni'jhooltpae. Roem 140 meensken geneuten van een mooi, ofwisselend kultureel pergramme. Ype Dijkstra, de veurzitter van de Stellingwarver Schrieversronte, vertelde in zien eupeningswoord dat et bi'j et ni'jste boek van Johan Veenstra om zien 22e gaot en dat et zien vuufde roman is. 'Johan Veenstra het een vaast petroon, om de aanderhalf jaor verschient d'r een ni'j boek van him. Dat belooft nog wat,' neffens een glunderende veurzitter. Dijkstra herinnerde de zael ok nog even an et feit dat veurige haast Johan zien 2500e optreden had, 'dat is zoe'n 70 keer in et jaor.' Daornaost schrift de Ni'jhooltpaeïger schriever ienkeer in de 14 daegen een kollum in de Liwwadder Kraante. 'Iene daorvan vul de laeste tied toch wel arg op,' neffens Dijkstra, 'en dat was de kollum die op 14 juli verscheen.' In die kollum gaf Johan Veenstra an dat hi'j et toch wel arg vremd vint dat de perveensie veur een Friese roman vier keer zoveul subsidie over het as veur een Stellingwarver. Dat wodde him dudelik naodat blieken dee dat veur de Friese vertaeling van 'Een brogge van glas' zoe'n 2000,00 euro beschikber steld wodde deur de perveensie en veur et oorspronkelike Stellingwarver boek mar 500,00 euro. Zoks vuult reer an, vint Johan Veenstra, in et Fries wor ik bliekber veur vol anzien, in et Stellingwarfs niet. Veurzitter Dijkstra gaf an hielemaole aachter die kollum te staon: 'Ik heb daor een waarme adhesie veur, kan ik jim vertellen. En dippeteerde, aj' d'r niet west weren vanaovend had ik dit zegd, now aj' d'r wel binnen, wat we vanzels slim warderen, ok.'
Veurzitter Ype Dijkstra zee ok veul wardering te hebben veur de echte Schrieversronteman Johan Veenstra. Zo het hi'j de laeste tied veul wark verzet veur de kommende sutelaktie, deur o.e. veur een kleine tachtig vri'jwilligers te zorgen die mit de krojen op pad gaon.

Interview Douwe Kootstra
Nao de eupening hul de Friese schriever en kollumnist Douwe Kootstra een ommeraek aorig interview mit zien schrieverskammeraod Johan Veenstra. De beide manluden kennen mekere al sund jaor en dag; zo lest Kootstra op verzuuk soms ok manuskripten van Veenstra. Bi'jglieks mit 'Een brogge van glas' was dat et geval. Et vul Douwe Kootstra op dat tussen de riegel boeken van grote Friese schrievers as Rink van der Velde en Anne Wadman de riegel van Veenstra beslist niet misstaot. Wat Douwe Kootstra an de ni'jste roman opvul was et biezunder mooie taelgebruuk van de schriever uut Ni'jhooltpae. Hi'j hul alderdeegst een klein taelkwissien mit de zael mit vraogen as wie wet nog wat ommepoelevinken en rommelschore betekenen.

'Ik moet wel deurdoen en niet ommedangelen'
Johan Veenstra vertelde over et schrieven van zien ni'je boek dat et dit keer gaot om een historische streekroman. 'Et is haost hielemaole fiktie, mar et verhael had wel in et echt gebeuren kund. Mien oolde huus komt trouwens wel in et boek veur, et is et huus van de heufdpersoon Anna Mulder. Et is veur et eerst dat ik in een roman een vrouw de heufdrolle speulen laot. Et is ok de eerste keer dat d'r een moord gebeurt in een boek van mi'j. Al zoe'n tien jaor leden had ik et daorover mit mien kammeraod Jelle. Et mos d'r toch echt es een keer van kommen, we hadden doe ok al een titel bedocht: 'Et liek in de Lende'. Die titel is et niet wodden, mar ik heb wel literair mit groot genoegen iene doodmaeken laoten. Die man had et trouwens meer as verdiend, d'r is niks mit verleuren.'
Zo om de aanderhalf jaor verschient d'r een ni'j boek van de zo suksesvolle Stellingwarver schriever. 'Ik heb uutrekend da'k tegen de 70 bin as mien zesde roman verschienen kan. De tied dri'jt deur en gaot hadde, ik moet dus niet ommedangelen.'

Eerste exemplaor veur kesteelheer Gregorius Halman
Waoromme et eerste exemplaor van 'Et geheim van de wiend' veur kesteelheer Gregorius Halman uut Blesdieke was, het twie redens. In et eerste plak omdat een belangriek pat van et boek him ofspeult in Blesdieke. Een schilderi'je van die heide, van Rinny Siemonsma, is in et bezit van Gerrie Halman en wodde bruukt veur et omslag van et boek. 'Mar,' vertelde Johan Veenstra, 'ik vien Gregorius ok een geweldige kerel. Hi'j bouwt een prachtig kesteel, hi'j maekt zien dromen waor en lat Stellingwarf wat moois nao.'
Kesteelheer Gregorius was d'r hiel wies mit en vuulde him vereerd dat hi'j et eerste exemplaor kreeg. Doe hi'j vraogd wodde om et schilderi'je beschikber te stellen veur et omslag, hadde hi'j liekewel eerst vraogd as et boek wel dramatisch was. 'Et gaot om een dramatisch schilderi'je van Siemonsma,' zo legde Halman uut, 'et is et alderlaeste schilderi'je van mien kammeraod Rinny, mar hi'j beelt op et schilderi'je ok et aendige van et leven an: verkleurd blad, vergaon hoolt.' De kesteelheer prees Johan Veenstra ok mit die zien goeie taelgebruuk: 'Jow verwoorden prachtig de Stellingwarver tael in de mooie inhoold van et boek.'

Reaktie Jannewietske de Vries
Netuurlik kwam in et twiede diel van et interview van Douwe Kootstra mit Johan Veenstra ok de bewuste kollum van 14 juli op 'e lappen. Interviewer Douwe Kootstra greep de kaans an om een reaktie te vraogen an dippeteerde Jannewietske de Vries, naodat bleek dat d'r nog niet op reageerd was deur heur. 'Ik docht, ik kom gewoon even naor disse aovend toe,' reageerde de dippeteerde. 'Doe ik de kollum las, wodde ik zuver rood en niet deur de zunne... Zoks kon toch niet waor wezen, d'r is toch een geliekese behaandeling Fries, Stellingwarfs en Bildts. Ik heb an een ambtener vraogd hoe dit now toch kon. Now, en et bliekt om een technisch perbleem te gaon. De Stellingwarver Schrieversronte is niet officieel opneumen in et haandelsregister en daoromme niet een erkende uutgeveri'je. Alliend erkende uutgevers wo'n op de wieze subsidieerd zoas dat bi'j o.e. Bornmeer (de uutgever van de Friese vertaeling van Een brogge van glas) et geval is. De Schrieversronte vaalt daoromme onder een ere regeling.'
In een eerste reaktie gaf Schrieversronte-veurzitter Ype Dijkstra an dat dit perbleem vanzels mitien anpakt en oplost wodden zal.
Naodat Johan Veenstra nog een fragment veurlezen had uut et boek, verzorgde de jonge zangeres Carolien Hunneman uut Oosterwoolde een twiede optreden en was et an et slot van de aovend toe.

Veurzitter Ype Dijkstra in slotwoord: 'Et broest van de aktiviteiten bi'j de SSR'
In zien slotwoord zee Dijkstra dat de Schrieversronte de kommende tied nog tal van aktiviteiten het: op 31 augustus de prissentaosie van et boek 'De veldnaemen van Ooldetriene en Sunnege' en de start van de jaorlikse sutelaktie, op 18 september et Historisch Symposium 'Stellingwarf 700', op 30 september de jaorlikse prissentaosiemiddag hiemkunde veur et basisonderwies, mit o.e. een ni'j kienderboek (i.s.m. onderwiesburo Comperio), in de kienderboekeweke een aktiviteit i.s.m. de stichting Kunstwerf, op 19 november de lezing van Hans van Borselen 'Nieuwe stellingen betrekken', op 21 november et popfestival 'Stellingwarfpop 3' en in december de jaorlikse veurleesaktie in de Stellingwarver zorg- en verpleeginstellings.

Et geheim van de wiend is uutgeven deur de Stellingwarver Schrieversronte in een oplaoge van 1500 stoks. Et boek telt 160 bladzieden en kost 12,50 euro. Et is veurzien van een omslag van Sijtze Veldema van Stiletvormgeving uut Dwingel.
Op vri'jdagaovend 4 september is d'r een aovend in de biebeltheek van Noordwoolde daor Johan Veenstra veurlest uut et ni'je boek. Hi'j zal dan interviewd wodden deur Pieter Jonker. (30 aug. 09)


Herdrok is d'r: 'Gien plak dat mi'j zo trekt! De 13 dörpen van Oost-Stellingwarf vroeger'

Vlak veur de jaorlikse sutelaktie van de Stellingwarver Schrieversronte verscheen de eerste herdrok van et geschiedenisboek 'Gien plak dat mi'j zo trekt. De 13 dörpen van Oost-Stellingwarf vroeger'. Dit boek, dat een gezaemelike uutgifte is van drokkeri'je Van der Meer en de Stellingwarver Schrieversronte, wodde schreven deur dr. Henk Bloemhoff uut Oosterwoolde. Et mooi uutgeven boek mit daorin veul biezundere historische gegevens over de dörpen wodde opfleurd mit tal van prachtige illestraosies en foto's. In de heufdstokken over de dörpen bin veerder bestaonde Stellingwarver gedichten te vienen, wiels Attie Nijboer van De Fochtel op verzuuk een tal ni'je gedichten schreef. Behalven oolde foto's bin ok flink wat foto's van disse tied in et boek opneumen. Veur die foto's zorgde Sietske Bloemhoff uut Oosterwoolde, wiels de prachtige vormgeving van et boek veur rekening is van Alain ter Schuur uut Wolvege.
Gien plak dat mi'j zo trekt, de heufdtitel van et boek, is een mooie riegel uut een gedicht van H.J. Bergveld. Mit geschiedenis, beelden, poëzie en niet te vergeten et Stellingwarfs hoopten de auteur en de beide uutgevers veurig jaor dat d'r nog meer belangstelling veur de eigen regio ontstaon zol, mit naeme veur de geschiedenis en de eigen tael. Dat dat aorig lokt is bliekt wel, now d'r een eerste herdrok van 500 stoks verschenen is. Et boek telt 96 bladzieden, gelt 14,95 euro en is rondomtoe in de Stellingwarver boekwinkels te koop, bi'j de Stellingwarver Schrieversronte in Berkoop en ok in de sutelaktie. (10-09-09)


Veul wardering veur kienderboek 'God maekt mooie dingen'. Eerste exemplaor veur ds. Nico ter Linden

Deensdagaovend 25 augustus verscheen bi'j de Stellingwarver Schrieversronte in Berkoop et aldereerste boek van Martin Oostra. Veur de prissentaosie van dit biezundere boek weren behalven femilie en goeie kunde van de schriever ok vertegenwoordigers van et karkelike leven in Stellingwarf nuugd. Dat dat slim wardeerd wodde dee blieken uut et feit dat een flink tal vertegenwoordigers de aovend bi'jwoonde.
In zien eupeningswoord vertelde Schrieversronteveurzitter Ype Dijkstra o.e. dat Martin Oostra de hieltied aktiever wodt veur et Stellingwarfs. Hi'j schrift riegelmaotig verhaelen veur de rebriek Op 'e schostienmaantel in de regionaole kraanten Stellingwerf en Nieuwe Ooststellingwerver. Ok veur de Stellingwarver Spreukekelinder van 2010 het Martin Oostra bi'jdregen leverd.
Nao de eupening legde Martin Oostra uut waoromme hi'j dit boek schreven het. Hi'j vertelde dat hi'j zels as kiend graeg de kienderbiebel lezen hadde en daor veul an had hadde. Et leek him hiel mooi toe om veur de kiender van now verhaelen uut de biebel te vertellen in et Stellingwarfs. Om et boek op te fleuren wodde zocht naor iene die in staot wezen zol om geschikte prenten te maeken. Bi'j toeval kwam Oostra in de kunde mit Geeske Snetselaar uut Zwolle, krek ofstudeerd an de keunstakedemie. Ze had al eerder een vergeliekbere opdracht uutvoerd. Schriever en uutgeveri'je weren mitien onder de indrok van et wark van Snetselaar en de 23-jaorige illestratrice zorgde veur tien prachtige kleureprenten.
An et slot van zien toespraoke riekte Martin Oostra et eerste exemplaor van zien boek uut an ds. Nico ter Linden. Disse laandelik bekende domenee het al zoe'n veertig jaor een twiede husien an De Scheene en dreegt et Stellingwarfs én de Stellingwarver Schrieversronte een waarm hatte toe.

Reaktie Nico ter Linden
Ds. Nico ter Linden gong vervolgens vanzels ok even in op de inhoold. 'Et is mit liefde schreven, fraai illestreerd en zorgvuldig uutgeven, ik mag daor de auteur, de illestratrice en de Schrieversronte van hatte mit komplementeren. Zels heb ik an De Scheene ok een poging daon om biebelse verhaelen an kiender te vertellen. Mar ik keus d'r veur die vremde verhaelen mitien ok van uutleg te veurzien, en dus mos ik mi'j tot kiender van 10 jaor en oolder richten, want jonger kun ze die uutleg niet verstaon. Martin Oostra richt him tot jongere kiender, en dat dot hi'j mit overgaove. Die kiender moej' en maj' dus nog niet mit uutleg lastig valen, want ie hoeven ze nog niks uut te leggen.'
Naost bewondering veur et boek had Ter Linden ok wat kritiek. Zo vint hi'j daj' biebelse verhaelen niet 'historiseren' moeten, en now en dan dot Oostra dat. Theologen bin et d'r bi'jglieks over iens dat bi'j et meer van Galilea gien meraokel gebeurd is, d'r wodt in de biebel een verhael over een wonder verteld.

Exemplaor veur alle basisschoelen
Tussen alle toespraoken deur wodde d'r vanzels ok uut et ni'je boek veurlezen. Dat gebeurde op kundige wieze deur Femmie van Veen uut Hooltpae, sund de invoering van et vak Hiemkunde in et basisonderwies in de beide Stellingwarven is zi'j o.m. as vaaste veurlezer van kienderverhaelen riegelmaotig op pad.
An et aende van de aovend vertelde veurzitter Ype Dijkstra nog et ien en aander over de kommende aktiviteiten van de Stellingwarver Schrieversronte. De Stellingwarver Schrieversronte dielt op 30 september an alle basisschoelen in Stellingwarf een exemplaor van dit ni'je boek uut. Dat zal gebeuren in de loop van de jaorlikse hiemkundemiddag veur onderwiezend passeniel in et gebouw van de Stellingwarver Schrieversronte in Berkoop. Et ni'je boek is vanzels ok al te koop bi'j de boekhaandels en de Schrieversronte zels. (31 aug. 09)


"Malle Meraokels" van Sjoukje Oosterloo en "Piere en Slakke" van Jan Oosterhof verschenen

Oflopen zaoterdagmiddag verschenen bi'j de Bruna-winkel in Oosterwoolde twie ni'je uutgiften van de Stellingwarver Schrieversronte. Et gong om Malle Meraokels, et eerste boek mit kotte, humoristische verhaelen van Sjoukje Oosterloo uut Gersloot en et twiede boek, Piere en Slakke mit striptekenings, van Jan Oosterhof uut Steggerde.
De uutrikkinge van Malle meraokels gebeurde eerst in Rikkingehof in Oosterwoolde; daor woont Albert Tiesinga, de hoogbejaorde heit van schriefster Sjoukje Oosterloo. Alliend de ere kiender van Tiesinga, Schrieversronte-veurzitter Doeke Duursma en direkteur Sietske Bloemhoff weren daorbi'j. Tiesinga was dudelik hiel bliede mit et boek van zien dochter en zol et zo gauw meugelik lezen gaon, vertelde hi'j. Omreden Tiesinga misschien de drokte van de hiele prissentaosie in de Bruna-winkel niet ankunnen zol, was d'r veur keuzen om et eerste exemplaor van Malle meraokels naor Rikkingehof te brengen. Liekewel, doe vanof 13.30 ure de feestelikheden veerder gongen bi'j Bruna, was tot verrassing van iederiene Albert Tiesinga tóch anwezig, en veur him was d'r deur alle ere anwezigen een dik applaus.
Nao de welkomstwoorden van Doeke Duursma vertelde Sietske Bloemhoff over et tot staand kommen van et ni'je boek van Sjoukje Oosterloo en roemde daornaost de geweldige inzet van de schriefster veur de schrieveri'je in verschillende kraanten, én heur sekere meniere van et ommegaon mit et Stellingwarfs. Sietske zee nog vule te verwaachten van de schriefster uut Gersloot.
Nao de uutrikkinge van et twiede en dadde exemplaor van Malle meraokels an de schriefster zels en an kollega-schriever Jan Oosterhof was et toe an de prissentaosie van de bundel Piere en Slakke mit striptekenings van laestnuumde. Sietske zee dat Jan Oosterhof al sund jaor en dag een trouwe mitwarker is an de Stellingwarver Spreukekelinder mit o.e. zien striptekenings mit in de heufdrolle Piere en Slakke. Daornaost schrift Jan Oosterhof gedichten in et Stellingwarfs en ok is hi'j aktief mit meziek in et Stellingwarfs. Een stok of wat van de strips verschenen indertied in de bundel Krentiesbri'j, die in 2002 verscheen.Toch leek et de uutgeveri'je van de Stellingwarver Schrieversronte goed toe om een selektie van de Piere en Slakke-strips in een appat boekien te bundelen.
Et eerste exemplaor wodde deur de schriever uut Steggerde anbeuden an de heer Arie Buitendijk van de Bruna-winkel in Oosterwoolde. Van de heer Buitendijk was bi'j de Schrieversronte al dudelik dat hi'j veul interesse het bi'j de uutgiften van de stichting. Dat wodt netuurlik slim op pries steld, en op hiele kotte termien wodde besleuten om de prissentaosie van de ni'jste uutgiften in de boekewinkel an de Stesjonsstraote te holen. Veur de heer Buitendijk was et een grote verrassing dat hi'j et eerste boekien van Piere en Slakke anbeuden kreeg. In zien daankwoord gaf Buitendijk an daor slim mit inneumen te wezen, en gaf butendat an dat hi'j et belang van et regionaole boek in zien winkel hiel groot vint. Daornaost zee Buitendijk slim bliede te wezen mit de now al goeie saemenwarking mit de Stellingwarver Schrieversronte.
Nao et haandtekeningen zetten in de ni'je boeken deur de schrievers beud de heer Buitendijk heur beide, as daank veur de mooie bi'jienkomst, een mooie penne mit inskriptie an.


De stoel van Lily Köhler

(deur Attie Nijboer, september 2008)

Zol Lily Köhler in heur roodflewielen stoel zitten, dan zo'k grif bi'j heur zitten gaon om naor heur verhaelen te luusteren.
Verhaelen die gaon over heur leven van vlak veur, in en nao de Twiede Wereldoorlog. Et maegien Lily dat mit heur oolden en heur zussien Elly in die tied in Rotterdam opgruuit. Ze hebben, krek as zovule ere meensken in de steden, slim honger. Mar ze hebben mekere en die baand hoolt heur op 'e bien.

Lily haelt heur einddiplome en op anraoden van heur mem gaot ze an et wark. Geld verdienen! Mar heur hatte ligt niet bi'j een kantoorbaene! Lily wil daansen, zingen en tenielspeulen. Et lokt heur om die droom te verwezenliken. Liekewel is de pries om heur daor staonde te holen hoge. Te hoge, want et gaot ten koste van heur gezondhied. Muuistreden gaot Lily weer weeromme naor heur oolderlike huus.

Et lokt heur om een mooie baene bi'j de gemiente te kriegen, op 'e keunstofdieling. De zunne begint weer te schienen. Et gelok is nog niet op, want as heur heit besluut de zoolderkaemer te verhuren, komt een keunstener op 'e adverteensie of. Hi'j hiet van Fred Zoer. Ze vienen mekere aorig en van et ien komt et aander. Ze trouwen en kriegen twie kiender.

Om kot te gaon: "De Stoel" nuugt om in zitten te gaon. Ik heb et daon en ik raode jim an om zoks ok te doen! Ik vun et een angriepend verhael, schreven deur een vrouw mit een protte wilskracht en humor. Dat lees en vuul ie deur et hiele boek henne. In een zocht ha'k et boek uut. En ik bin slim beni'jd wodden naor ere boeken van de schriefster Lily Köhler.


LONGERLAAND UUTVERKOCHT

In de loop van de vier weken durende tentoonstelling Eupen Stal in Berkoop is et ni'je boek 'Longerlaand' van Peter Hiemstra en Johan Veenstra zowat uutverkocht raekt. Op dit mement bin de laeste exemplaoren van dit prachtige boek (oplaoge 1000 stoks) alliend nog in een peer boekwinkels in Stellingwarf te koop. Dat betekent dat veur et eerst in et 35-jaorige bestaon van de Stellingwarver Schrieversronte een ni'j boek al veur de sutelaktie uutverkocht was! Een prachtig verjaorskedo, kuj' wel zeggen.
Bi'jkotten verschient in de kienderboekeweke nog, op 10 oktober, et kienderboek 'De Hollebomebos' van Herma Stroetinga en in november de roman 'De Stoel' van Lily Köhler.

Malle Meraokels en Piere en Slakke: twie ni'je uutgiften van de Stellingwarver Schrieversronte

Vlak veur de jaorlikse sutelaktie van 2007 verschienen bi'j de Stellingwarver Schrieversronte in Berkoop twie ni'je boeken. Et gaot om et eerste boek van Sjoukje Oosterloo uut Gersloot en een bundel mit striptekenings van Jan Oosterhof uut Steggerde.
De prissentaosie van et boek Malle meraokels van Sjoukje Oosterloo is op zaoterdag 1 september in Rikkingehof in Oosterwoolde. De schriefster bödt dan in kleine kring et eerste exemplaor an heur hoogbejaorde heit an, die in Rikkingehof woont. Van 13.30 ure of gaon de feestelikheden veerder in de Bruna-winkel in Oosterwoolde. Daor zal dan ok et eerste exemplaor van de ere ni'je Schrieversronte-uutgifte uutrikt wodden. Die twiede ni'je uutgifte is de bundel Piere en Slakke, mit striptekenings van Jan Oosterhof.
Sjoukje Oosterloo schrift al weer een hiel posien. Veul meensken kennen heur verhaelen al wel uut 'Op 'e schostienmaantel', de Stellingwarver verhaelerebriek van de regionaole kraanten, en sund kot ok uut 'Griepgraeg Stellingwarfs', de Stellingwarfstaelige bladziede van de ni'je huus-an-huus-kraante De Grijpvogel. Daornaost is d'r ok mit riegelmaot wark van heur te lezen in et Stellingwarver tiedschrift De Ovend.
Sjoukje Oosterloo het een protte aorighied an et schrieven in et Stellingwarfs. Jaoren leden het ze al de kursus Stellingwarfs volgd, mar kwam deur ere drokte aenlik d'r niet an toe om d'r ok warkelik wat mit te doen. Totdat ze meer tied kreeg. En van et iene komt vaeks et aandere, want behalven dat ze heur eigen verhaelen, en now en dan gedichten, schrift, mag ze ok graeg et wark van eren vertaelen. Sjoukje is gewoon hiel graeg mit de tael in de weer. Op heur warkkaemer ligt et Stellingwarfs Woordeboek letterlik veur et griepen, ze bruukt dat hiel vule. Niet om te kieken naor de schriefwieze, want die beheerst ze al hiel goed. Ze zocht in et woordeboek hiel bewust naor mooie woorden en uutdrokkings, om zo de riekdom van et Stellingwarfs zoveul meugelik te benutten. En dat ziej' weeromme in heur verhaelen, mar ok in wark dat ze vertaeld het. Zo vertaelt Sjoukje veur De Ovend altied de verhaelen van kollega-schriefster Lily Köhler en ze het ok die heur boek De Stoel ommezet in geef Stellingwarfs. Dat boek verschient in et naojaor. Mar ok et laeste Tomke-boekien het Sjoukje vanuut et Fries vertaeld in et Stellingwarfs. Weer een hiele ere klus, vanzels, want veur kleine kiender gaoj' toch eers mit de tael omme as veur volwassenen.
Sjoukje Oosterloo-Tiesinga woont in Gersloot, mar komt van oorsprong van Oosterwoolde. Ze gruuide daor liekewel op mit et Fries as thuustael. Toch was et Stellingwarfs heur niet vremd, want ze heurde dat genoeg om heur henne. Vandaege-de-dag praot en schrift ze et as gien aander en dat is beslist een grote ploeme richting Gersloot weerd.
In heur kommende boek Malle Meraokels wodt over daegelikse dinkies verteld. In de verhaelen zit een boel humor, een inkelde keer liekewel best mit een serieuze ondertoon. De belevenissen in de verhaelen staon dichte bi'j de belevingswereld van veul meensken, ien van de redens waorom ze graeg lezen wodden. Praktisch alle verhaelen in et ni'je boek bin spiksplinterni'j. Malle Meraokels telt 128 bladzieden en gaot 11.00 euro kosten.

'Piere en Slakke' hiet et ni'je boek van Jan Oosterhof. Die maekt al jaorenlaank tekenings mit de stripfeguren Piere en Slakke in de heufdrolle veur de Stellingwarver Spreukekelinder. Meerstentieds gaot et om slim aorige deurdaenkerties, somstieden het et ok mit een bepaold gebeuren of aktualiteit uut oons gebied te maeken. De strips bin altied mit humor daelezet, ok al is et onderwarp soms beheurlik serieus bedoeld. Jan Oosterhof wet zoks hiel goed te verwoorden en het butendat een goeie haand van tekenen.
Deur de jaoren henne het blieken daon dat hiel vule meensken Piere en Slakke mit groot plezier lezen en bekieken in de Stellingwarver Spreukekelinder. Een stok of wat van de strips verschenen indertied in de bundel Krentiesbri'j, die in 2002 verscheen. In die bundel staon ok gedichten en kotte verhaelen van Jan Oosterhof. Toch leek et de uutgeveri'je van de Stellingwarver Schrieversronte goed toe om een selektie van de Piere en Slakke-strips in een appat boekien te bundelen. Veul meensken die de Spreukekelinder altied kopen, zullen daor zeker wies mit wezen. De kelinder is now ienkeer een scheurkelinder, en meerstal wo'n de blatties d'r van niet beweerd. Meensken die de beide stripfeguren nog niet kennen, zullen dit ni'je boek liekewel ok beslist warderen!
Piere en Slakke telt 64 bladzieden en kost 7,50 euro. Wie liekewel zaoterdagmiddag 1 september bi'j Bruna in Oosterwoolde beide ni'je boeken anschaft betaelt i.p.v. 18,50 euro mar 15,00 euro.
Nao de officiële prissentaosie van beide boeken zullen de schrievers d'r van elk verkocht exemplaor signeren.

Tomke-boekien in et Stellingwarfs

Info uut de meitied van 2007: Veur de twiede keer is d'r een Tomke-boekien veur de ukken. Et is al even klaor, van verschillende kaanten heuren we dat et weer goed anslat bi'j de kleine kiender. Et Tomke-boekien wodt ommenocht anbeuden via de biebeltheken, wodt in ukkespeulplakken brocht en wie d'r graeg over beschikken wil kan een eksemplaor bi'j de Stellingwarver Schrieversronte ofhaelen. Wel even bellen van te veuren, omreden we wel los wezen moeten. De verhaelties bin van de haand van Riemkje Pitstra en Auck Peanstra; ze bin kundig uut et Fries in et Stellingwarfs vertaeld deur Sjoukje Oosterloo. Et gaot om een saemenwarkingsverbaand tussen de Stellingwarver Schrieversronte en Afûk.


De ni'jste boekekraante is krek verschenen!

Infermaosie van begin zommer 2007:
Ja, dat is weer goed Stellingwarver ni'js. De jaorlikse boekekraante 'Twie pond 'n stuver' is d'r weer, en d'r staot krek as veurige jaoren weer een macht an infermaosie in. Allegeer slim de muuite weerd om te lezen! En prachtig in kleur!
Veul ommedaenken is d'r veur 'Piere en slakke', een ni'j boek van Jan Oosterhof, daj' ommenocht kriegen kunnen aj' veur meer as 17,50 euro kopen in de kommende Stellingwarver sutelaktie. Extra ommedaenken is d'r ok veur 'Longerlaand', et keunst- en literetuurboek van Peter Hiemstra en Johan Veenstra, dat zo ommeraek veul wardering krigt. De Stellingwarver spreukekelinder is d'r, veul ommedaenken is d'r veur et ni'je boek van Sjoukje Oosterloo: 'Malle meraokels', de streektaelkonfereensie van 24 meie is in beeld, de kursus Stellingwarfs is an de odder en gao mar deur. Veur en over et jongvolk is d'r een kienderpagina, ie kun een bi'jdrege over et Wolvegester meziekatelier lezen, ie wo'n van alles geweer over et ni'jste Tomke en Romke-boekien (veur de kleine ukken!), de uutgifte over de Bekhofschaans komt uutgebreid naor veuren en d'r wodt verteld over twie kommende veurleesmiddaegen veur kiender. Alderdeegst verschient d'r bi'jkotten nog een ni'je uutgifte veur kiender: 'De hollebollebomebos'. Ok wodt d'r een hiemkundemiddag veur onderwiezend passeniel ankondigd. Mar et aldermeerste springt de midden van disse ni'je boekekraante d'r uut: een prachtige beeld van groepen die mitdaon hebben an et popfestival Stellingwarfpop in Wolvege, Stellingwarver teksten van die groepen, én... de ni'je cd die daor uut votkommen is, netuurlik mit pop in et Stellingwarfs!!
Op elk adres in Oost- en West-Stellingwarf is of wodt nog een ni'je boekekraante bezorgd. Netuurlik ok bi'j de leden van de Stellingwarver Schrieversronte. As de boekekraante deur verzin niet bi'j jow brocht wodt, mail oons dan even aj' willen (info@stellingwarfs.nl), of bel even (0516-451108). Dan kun we d'r nog even wat an doen. Leden van de Schrieversronte die buten de beide gemienten wonen, kriegen de boekekraante over de post toestuurd.


Stellingwarver spreukekelinder 2008

Infermaosie van begin zommer 2007:
Bi'j uutgeveri'je Van de Berg in Almere is een dag of wat leden de Stellingwarver Spreukekelinder veur et jaor 2008 verschenen. Veur de ni'je kelinder hebben weer een flink tal meensken ni'j wark schreven. Et gaot daorbi'j om wark van Roely Bakker (gedichten), Klaas Boersma (kotte verhaelen, riempies en gezegden), IJbe Duursma (historische vertellegies), Thijs van Galen (roofvoegels), Martha Hoekstra (verhaelties), Harmen Houtman (gedichten), Henk Jager (vissen, insekten, amfibieën), Kees Koopstra (vertellegies), Jan Oosterhof (striptekenings, gedichten) en Sjoukje Oosterloo (verhaelen). Daornaost zorgde de redaktie (Annie Dedden van Blesdieke en Sietske Bloemhoff uut Oosterwoolde) zels ok veur bi'jdregen. Zo zette Annie Dedden een flink tal kuiers en fietstochten uut en veurzag die butendat van aachtergrondinfermaosie. Sietske Bloemhoff zorgde o.e. veur de puzelties en foto's. Naost ni'j wark wodde d'r ok aorig materiaol zocht uut bestaonde mar wat minder bekende Stellingwarver boeken en tiedschriften, dat ok zoks is in de kelinder opneumen.
Op de veurkaanten van alle blatties staon prachtige gezegden en riempies die allegere uut et Stellingwarfs Woordeboek zocht binnen. Ok op sommige aachterkaanten is materiaol uut datzelde woordeboek te vienen.
De Stellingwarver Spreukekelinder is iene van de veertien spreukekelinders die Van de Berg uutgeft. Behalven oonzend geft die uutgeveri'je in Almere ok een Amsterdamse, Braobaanse, Zeeuwse, Veluwse, Westfriese, Rotterdamse, Grunninger, Friese, Aachterhoekse, Haagse, Twentse, Drentse, Overiesselse, (Belgisch) Limburgse en Surinaamse spreukekelinder uut. De Stellingwarver Spreukekelinder is te koop bi'j de Stellingwarver boekewinkels en de Stellingwarver Schrieversronte (mailadres: info@stellingwarfs.nl; pries: 11,95 euro).


125e Boekuutgifte Stellingwarver Schrieversronte!
Boek over de Stellingwarven van Johan Veenstra en Peter Hiemstra

Op vri'jdagaovend 13 juli 2007 kwam et boek 'Longerlaand' van Johan Veenstra en Peter Hiemstra uut. Splinterni'je gedichten over twintig plakkies in de Stellingwarven en foto's van beelden van keramist Peter Hiemstra over dezelde plakkies. Een dag laeter is de tentoonstelling begonnen die dezelde naeme het in et gebouw van de Stellingwarver Schrieversronte in Berkoop, as onderdiel van de Eupen Stal. Remco Heite, de oold-burgemeester van West-Stellingwarf, nam et eerste exemplaor van et boek in 't Waopen in Berkoop in ontvangst. Hi'j prees de ni'je uutgifte ommeraek: een hiel biezunder boek, wat de poëzie angaot, de ofbelings van de beeldende keunst, de fotografie en de boekuutvoering zels. Hi'j prees de uutgever, de Stellingwarver Schrieversronte, dat die muuite daon het om dit boek op 'e wereld te kriegen. Nao et officiële pat van et pergramme konnen alle geneudigden de tentoonstelling alvast bekieken.
In december 2001 bin Hiemstra en Veenstra uut aende zet mit heur beelde-en gedichteprojekt 'Longerlaand'. Et idee is van Peter Hiemstra. In de eerste maonden van 1998 maekte hi'j een daegelikse kuiertocht op 'e Delleboerster Heide en hi'j vun dat hi'j wat mit dat mooie plakkien doen moeten zol. Hi'j realiseerde him ok dat d'r een protte mooie plakkies in de Stellingwarven binnen. Hi'j nam him veur om een serie beelden te maeken, mar dan mos een dichter diezelde plakken beschrieven in een gedicht. En zo kwam hi'j bi'j Johan Veenstra terechte mit et verzuuk as die mitdoen wol. En die wol wel.
Van twintig plakkies in Oost- en West-Stellingwarf, waor zi'j allebeide op de ien of aandere meniere wat mit hebben, het Peter Hiemstra een keramisch beeld maekt en Johan Veenstra een gedicht of een serie gedichten. Ze hebben de laeste jaoren de hiele Stellingwarven deur reisd: van de oolde zeediek tussen Sliekenborg en Schoterziel tot an de Kaele Dunen in Appelsche an toe. Ze hebben overal keken en heur inspireren laoten en ze hebben allebeide hiel persoonlik wark maekt. Et is gien realistische weergaove van et laandschop wodden, mar uterings van heur gevuul. Een gevuul bi'j een plak. Herinnering of warkelikhied. Vroeger of now. Et bin persoonlike vertaelings in beeld en poëzie wodden. Johan Veenstra het zodoende ok hiel persoonlike gedichten schreven. De uutgever van et boek, de Stellingwarver Schrieversronte, is bliede dat d'r now ok weer gedichten van Veenstra te koop binnen. Al zien eerdere dichtbundels bin naemelik al lange tied uutverkocht!

In et boek 'Longerlaand' staon de gedichten van Johan Veenstra en foto's van de beelden van Peter Hiemstra. Butendat bin d'r foto's in opneumen van de plakkies in de Stellingwarven die zi'j verbeeld hebben mit kotte beschrievings van die plakkies. De vormgeving van et boek is van de alom bekende Gert Jan Slagter en de foto's van de beelden bin maekt deur topfotograaf Erik Hesmerg uut Sneek. Sijtze Veldema uut Dwingel het de foto's van de plakkies maekt. Al mit al is et een prachtig boek wodden. Omdat een protte instaansies d'r votdaolik van overtuugd weren dat 'Longerlaand' een slim biezunder boek is, hebben ze d'r rejaol subsidie veur geven. Daoromme kost et in een had omslag uutgeven boek mar vuuftien euro. Van et boek bin duzend exemplaoren drokt. En… et blift bi'j die iene drok. Meensken die et boek hebben willen, moe'n d'r dus bi'j wezen as de kiepen bi'j et voer.

Op 'e tenstoonstelling op 'e Eupen Stal in Berkooop weren de beelden van Peter Hiemstra en de gedichten van Johan Veenstra te bekieken. Et boek is behalven in de boekwinkel daor ok te koop. De beelden bin trouwens ok te koop. De keramist en de dichter weren riegelmaotig in de tentoonstellingsruumte anwezig wezen en gavven mit genoegen an de bezukers uutleg over dit biezundere projekt. D'r komt al een protte volk, en de boeken wo'n ommeraek verkocht!


Mit De Ovend naor 2010

De Ovend is et Stellingwarver tiedschrift dat al in de jaoren zeuventig begonnen is en dat richt is op iederiene. D'r verschienen verhaelen, gedichten en beschouwings in, en bi'jdregen over de tael, de literetuur, de geschiedenis en de volkskunde van Stellingwarf.
De Ovend verschient zes keer in 't jaor, per keer het De Ovend op zien minst 32 bladzieden en d'r staon ok biezundere foto's in. Dit jaor, 2007 dus, is De Ovend hielendal in kleur. En netuurlik om de kommende jaoren. Abonneer je, want now en in de toekomst staot De Ovend veur mooie artikels en biezundere infermaosie.
Ie kun trouwens altied even vraogen om ooldere nommers aj' daor belang bi'j hebben. Een abonnement kost mar 12,50 euro. Veur etzelde geld bi'j toegelieke lid van de Stellingwarver Schrieversronte. Losse nommers kosten 2,50 euro per stok.


(anpast 06-02-2010)