De Stellingwarver Schrieversronte is het belangrijkste instituut voor taal, literatuur, geschiedenis, volkskunde en identiteit van Stellingwarf. Stellingwarf is een bijzondere regio in Zuidoost-Friesland (NL), waar men vanouds Stellingwarfs spreekt. Het Stellingwarfs is een vorm van Nedersaksisch. Onze administratie is geopend op maandag tot en met donderdag van 9.00 tot 16.00 uur, en op vrijdag van 9.00 tot 12.00 uur. Overleg met andere medewerkers is alleen mogelijk na telefonische afspraak.


NI'JS

Tip: moesaai oftewel scrol over de hiele bladziede, want d'r is meer ni'js as daj' now staon zien!


Warkieslappe: meer as veertig mooie verhaelen van Sjoukje Oosterloo prissenteerd

Zoe'n vuuftig belangstellenden weren vri'jdagmiddag in de plaetselike boekwinkel van Oosterwoolde kommen om mit te maeken dat et twiede boek van Sjoukje Oosterloo officieel op 'e wereld kwam. Disse splinterni'je uutgifte van de Schrieversronte is prachtig uutvoerd en is biezunder plezierig om te lezen. Iene van de eerste reakties van de lezers was: 'Sjoukje Oosterloo kan smoek vertellen en ok ontspannend!'. Een protte meensken kennen et wark van disse Stellingwarver schriefster al wel uut de streekkraanten en uut et tiedschrift 'De Ovend'. Wie et nog niet wet: et bin kotte verhaelen over daegelikse belevenissen in de wereld om je henne. Die belevenissen en die wereld bin op een biezundere meniere tekend, zodat gewone dingen even biezunder wodden en waordeur de weerde van die gewone dingen veur de meensken mooi naor veuren komt. Zoas belevenissen mit en van de voegels in de tuun en hoe die inienend versteurd wodden, over de erverings in de winter onderwegens naor et veurjaor, et bi'jholen van een kasboek en een hiel biezundere voonst daor in, en al zo meer. Wethoolder Sierd de Boer van Oost-Stellingwarf kreeg et eerste exemplaor deur de schriefster anlangd en was daor dudelik slim bliede mit. Oonze streekkultuur nuumde hi'j van groot belang en die kultuur het terecht wardering. Hi'j was zeker van plan en gao dit en et eerdere boek van Sjoukje Oosterloo, 'Malle meraokels' bi'jkotten es noflik lezen. Veurzitter Ype Dijkstra van de Stellingwarver Schrieversronte leidede de feestelike bi'jienkomst en hul een enthousiaste inleiding. Hi'j onderstreepte et belang van dit soort aktiviteiten van de meensken mit mekeer. Zoks verstarkt de onderlinge baand tussen meensken en et is goed veur et Stellingwarfs en de aandere streekkultuur. Veul meensken maekten vot gebruuk van de meugelikhied om een exemplaor van et ni'je boek te kopen (tal bladzieden: 128, pries: 14,00 euro),


Ni'j prenteboek veur ukken: Muske Tiemen Eerste exemplaor veur wethoolder Jelmer van der Zee

Op woensdagmorgen 1 september verschient et eerste prenteboek van Stien van Anne (Christine Magour) uut Wolvege. Et eerste exemplaor zal deur de schriefster overhaandigd wodden an wethoolder Jelmer van der Zee van West-Stellingwarf. De feestelike bi'jienkomst is in schoele Zuud in Wolvege, bi'j de kiender van groep 1 en 2.
Et boek Muske Tiemen is hielemaole in kleur drokt op et fermaot A-4. Et vertelt et verhael over een joongien dat graeg vliegen wil. Dat lokt as bliekt dat hi'j vleugelties kregen het en een muskien wodden is. Tiemen vligt naor alderhaande dieren toe en vragt as zi'j ok vliegen willen, krek as him. Mar dat is niet et geval, en uuteindelik vint et muskien et vliegen minder mooi as dat hi'j docht had doe hi'j nog een joongien was.
Et verhael over et muskien is bi'j uutstek geschikt veur de leeftiedsgroep van kiender van twie tot vuuf jaor. Dat komt omreden et verhael goed in mekaander stikt, mar ok omdat Christine Magour op een prachtige meniere mit de tael ommegaot. Daornaost het ze veur hiele mooie en ansprekende illestraosies zorgd, et gaot daorbi'j om kollages van biezundere soorten behang.
Muske Tiemen zal tiedens de jaorlikse hiemkundemiddag op 29 september ok uutdield wodden an alle basisschoelen, mar zal laeter ok anbeuden wodden an alle ukkespeulplakken. De Stellingwarver Schrieversronte stelt de boeken veur basisschoelen en ukkespeulplakken ommenocht beschikber.
Muske Tiemen is onderhaand et twaelfde kienderboek in et Stellingwarfs. Bi'j de Stellingwarver Schrieversronte zullen de kommende tied in elk geval nog drie kienderboeken uutgeven wodden. Et eerstvolgende verschient op 29 september.


Boek over Stellingwarf om 1309 henne: eerste exemplaor veur borgemeister Van Klaveren

Een prachtige inkiek in Stellingwarf en zien omgeving eerste kwat 14e ieuw, dat levert et ni'je boek mit de drie lezings van et Historisch Symposium in 2009. Dat was et jaor van de vierderi'je van 'Stellingwarf' 700, mit et hiele jaor deur een protte aktiviteiten. In heur anbieding van et eerste exemplaor an borgemeister Gerard van Klaveren van West-Stellingwarf ston vice-veurzitter Attie Nijboer van de Stellingwarver Schrieversronte deensdagaovend 24 augustus naodrokkelik stille bi'j doel en aktiteiten van de viering 'Stellingwarf' 700. Dat jaor was mit angrepen, zo vertelde ze, om de Stellingwarver geschiedenis, identiteit en tael es even flink in et locht te zetten veur de hiele bevolking. En dat warkte goed, want d'r het ommeraek veul extra belangstelling west en die klinkt nog altied goed deur. Alle reden om deur te gaon. Dat vun ok de heer Van Klaveren in zien reaktie. Hi'j hadde zien belangstelling al blieken laoten op et symposium, en hi'j bleek ok now slim ni'jsgierig naor de infermaosie in et boek. Hi'j wol de bundel butendat ok graeg lezen mit et oge op eventueel te veer gaonde plannen veur gemientelike herindielings. Een veul te grote schaol daor sommigen an daenken, zicht hi'j niet zitten. Et belang van et uutbrengen van oolde geschriften zoas et laandrecht en de Middelieuwse oorkonden gaf him reden om de Schrieversronte de suggestie te doen om nog es te overwegen om die teksten in een fors fermaot, mit goeie vertaelings en al, op een wat luxe meniere uut te geven. Dat zol kunnen naor bestaonde veurbeelden, zoas de uutgifte van oolde Friese wetsteksten deur dr. Oebele Vries van de Rieksuniversiteit Grunningen.
De woorden 'Soe sullen die Stellinge...' in de boektitel kommen uut een zin die veurkomt in et Stellingwarver laandrecht. Hoewel dr. Oebele Vries eerst gien lezing holen zol op et symposium, gebeurde dat toch. Want deur een wonder hadde hi'j veurjaor 2009 in et Gelders Archief in Arnhem een ofschrift vunnen van et 14e ieuwse Stellingwarver laandrecht. Dat was meraokels, want gieniene hadde veurtied bedocht dat zoks d'r west hebben zol. Dat vertelde hi'j ok nog es in et twiede diel van disse feestelike prissentaosie. De Schrieversronte hadde him vraogd om nog es uutvoerig over de tekst van et laandrecht te vertellen, en an dat verzuuk voldee hi'j nao de pauze op een butengewoon interessaante en deskundige meniere, veur een geheur van roem vuuftig belangstellende bezukers.
De ni'je bundel bestaot uut Vries zien uutleg bi'j et laandrecht, perf. Hans Mol zien uutvoerige lezing mit interessaante biezunderheden over Stellingwarf en Schoterwarf as vri'je laansgemienten en de stried mit de bisschop van Utrecht en veerder Mr. Caspar van Heel zien beschrieving van de plaetselike verholings tussen Stellingwarf, et Laand van Vollenhove en Stienwiek begin 14e ieuw. De tekst van et laandrecht is ok opneumen, en ok een liest van oorkonden mit kotte beschrievings deur auteur Van Heel. Et boek is 72 bladzieden dikke, gelt 17,50 euro en is een uutgifte van de Stichting Stellingwarver Schrieversronte in Berkoop.


Ni'je webstee Stellingwarver Schrieversronte: www.stellingplus.nl

Van begin augustus of het de stichting Stellingwarver Schrieversronte d'r een ni'je webstee bi'j: www.stellingplus.nl. Die webstee in et Stellingwarfs is veural richt op et schrieven in oonze Nedersaksische streektael. Et doel is om d'r veural een levendige webstee van te maeken, mit o.e. veul publikaosiemeugelikheden. Zo zullen d'r in de rebriek 'schriefklub' de hieltied ni'je verhaelen opneumen wodden, wiels in de rebriek 'leesklub' mit naeme verhaelen plaetst wodden uut et archief van de Schrieversronte. Twie vri'jwilligers van de stichting zullen zorgen dat de rebrieken vas blieven.
Veul ommedaenken zal d'r ok wezen veur et schrieven leren van et Stellingwarfs. Dat zal wezen in de vorm van ondersteuning en anvulling van de al jaoren bestaonde kursus Stellingwarfs veur beginners. Mar d'r wodt ok al een posien warkt an een ni'je internetkursus
(veur verschillende leeftiedsgroepen) die binnen niet al te lange tied anbeuden wodden zal onder de rebriek 'e-learning'.
Behalven ommedaenken veur et schrieven van en in et Stellingwarfs zal op www.stellingplus.nl ok veul meziek te zien en te heuren wezen, mit naeme veur et jongvolk. Daorveur is d'r o.e. een goeie saemenwarking mit et jongerencentrum M!X in Wolvege. Daormit orgeniseert de Schrieversronte ok van 't jaor weer et suksesvollee 'Stellingwarfpop'.


September-anbod

Wie in september de twie ni'je boeken van Jan Veldhuizen kocht, betaelt daor 20,00 euro veur i.p.v. 23,00 euro. Wie in de tied van de sutelaktie veur 25,00 euro of meer an boeken anschaft die deur de Schrieversronte uutgeven binnen (inklusief de spreukekelinder), krigt een jaor laank et mooie Stellingwarver tiedschrift De Ovend ommenocht toestuurd. Et tiedschrift verschient zes keer in et jaor.


Sutelaktie Stellingwarver Schrieversronte begint op 30 augustus. Mar liefst 60 vri'jwilligers op pad mit hiel vule mooie boeken en aandere negosie

Op maendagaovend 30 augustus begint de jaorlikse sutelaktie van de Stellingwarver Schrieversronte, mit tal van ni'je uutgiften in de krojen. De jaorlikse verkoopaktie van mit naeme Stellingwarver boeken komt op maendag 30 augustus, woensdag 1 september en maendag 6 september in Stellingwarf-Westaende. Dat zal o.m. et geval wezen in De Hoeve, De Oosterstreek, Noordwoolde, Zaandhuzen en Wolvege. Op woensdag 8 september, maendag 13 september en woensdag 15 september is Oost-Stellingwarf an de beurt. D'r wodt dan suteld o.e. in een diel van Appelsche, Else, De Fochtel, De Haule, Langedieke en Ni'jberkoop, mar ok in Buil in West-Stellingwarf.
De sutelaktie is de hieltied tussen middags vuuf ure en aovens acht ure. De sutelaktiekemmissie, bestaonde uut de Schrieversronte-vri'jwilligers Hammie en Jitze Hofstra, Joop Oosterhof, Koop Oosterloo en Jan Punter, is van plan om van de aktie weer een flink sukses te maeken. De kemmissie wodde opni'j bi'jstaon deur et 'belteam' Fettje Alten en Johan Veenstra. Zi'j zorgden d'r tegere veur dat de groep die dit jaor op pad gaot mit de krojen uut roem 60 enthousiaste Schrieversronte-vri'jwilligers bestaot. Daornaost is d'r nog een flinke groep vri'jwilligers die zorgt dat iederiene mit volle bakken in de krojen op pad kan, mar ok op tied van een nattien en een dreugien veurzien wodt.

Tien ni'je uutgiften
Sund de zo suksesvolle sutelaktie van 2009 bin d'r mar liefst tien ni'je boeken deur de Schrieversronte uutgeven. Et gaot om: Daor klept de klokke weer (kienderboek, H. Hoogeveen, vertaeld deur Hans Koopmans)), Terug naar Stellingwerf/Weeromme naor Stellingwarf (ok veur kiender, deur histotolk Frank Spijkers), Alderhaande (40 inspirerende stokkies veur 40 inspirerende mementen, Jan Schonewille), Appelsche Bijdrage tot de Geschiedenis van een oude Boerengemeenschap (herdrok, Gerke P. Mulder), De wiend blaost ok wel es aandersomme (dichtbundel, Jan Veldhuizen), Laot mi'j now ok es wat zeggen (kotte verhaelen, Jan Veldhuizen), Soe sullen die Stellinge... (o.e. lezings van et symposium 'Stellingwarf' 700), Muske Tiemen (prenteboek veur ukken en kleuters, Stien van Anne), Vinkega (verhaelend fotoboek, Marije Kuiper) en Warkieslappe (verhaelen, Sjoukje Oosterloo). Uteraord ligt ok de ni'je Stellingwarver Spreukekelinder veur 2011 in de krojen.


Drokke tieden mit boeken...
Bi'j de uutgeveri'je van de Stellingwarver Schrieversronte bin et drokke tieden. Zo kommen d'r in een peer maonden tied zeuven ni'je boeken uut. In juli weren dat al een dichtbundel en een verhaeleboek van Jan Veldhuizen, op 24 augustus verschient 'Soe sullen die Stellinge...' mit daorin o.e. de drie lezings die holen wodden op et historisch symposium in 2009 en op 9 september verschient een exklusief fotoboek van Marije Kuiper.

Twie ni'je kienderboeken
In september komt d'r ok een prachtig prenteboek veur ukken en kleuters uut van Stien van Anne (Christine Magour) en tiedens de jaorlikse hiemkundemiddag wodt veur kiender van 10 t/m 12 jaor et boek Job, Tjitske en Mevrouw de Vries in Stellingwarf prissenteerd.
De verwaachting is dat tiedens de sutelaktie, die in de eerste helte van september holen wodt, een flink tal exemplaoren van al die ni'je uutgiften heur weg naor et lezerspebliek vienen zullen.


Coby Veldhuizen nam ni'je boeken van Jan Veldhuizen (1941-2005) in ontvangst

Oflopen donderdag 29 juli wodden de eerste exemplaoren van de beide ni'je boeken van Jan Veldhuizen (1941-2005) uutrikt an zien vrouw Coby. Dat gebeurde deur veurzitter Ype Dijkstra en direkteur Sietske Bloemhoff van de Stellingwarver Schrieversronte.
Bi'j de prissentaosie thuus bi'j Coby Veldhuizen weren ok dochter Hetty en de man, de ere beide kiender konnen d'r spietig genoeg niet bi'j wezen.
Veurzitter Ype Dijkstra gaf an dat de Schrieversronte bliede is en ok trots, dat heur uutgeveri'je de beide boeken De wiend blaost ok wel es aandersomme (gedichten) en Laot mi'j now ok es wat zeggen (kotte verhaelen) uutgeven kon. Hi'j hadde van teveuren beide boeken al even lezen kund en vertelde beheurlik onder de indrok te wezen van de inhoold. 'Mooi dat beide boeken d'r now dan binnen,' zo zee Dijkstra, 'mar ok zo verschrikkelik jammer dat Jan et zels niet meer mitmaekt.'
Coby en Hetty Veldhuizen weren vanzels biezunder inneumen mit de beide bundels. 'Jan beleefde een boel plezier an de schrieveri'je,' gaf Coby an. 'Hi'j was daor hiel vule mit an de gang, en vaeke vreug hi'j mien oordiel. Toch bleek, doe ik kotleden de manuskripten las, dat ik sommige gedichten ok veur et eerst zag. Dat maekt et now hielemaole biezunder.'

Jan Veldhuizen was ommeraek drok mit de Stellingwarver schrieveri'je in de weer, doe hi'j in november 2005 onverwaachs uut de tied raekte. Dat bliekt ok wel as Coby en Hetty Veldhuizen vertellen dat d'r nog een tal verhaelen en gedichten half of binnen. Et is vanzels hiel arg spietig dat Jan niet de tied kregen het om zien schrieveri'jke, daor hi'j zoveul plezier an beleefde, veerder te ontwikkelen. Jan woonde al sund jaor en dag in Apeldoorn, mar kwam van De Miente bi'j Noordwoolde en hi'j bleef him altied een echte Stellingwarver vulen.
In 2003 wun Jan Veldhuizen 'De Oolde Pook-pries', dat was in die tied de anvieteringspries veur et schrieven in et Stellingwarfs, insteld deur de beide Stellingwarver gemienten. De cyclus van gedichten De oolde zegeuner, daor hi'j die pries mit wun, verscheen laeter ok in zien eerste bundel, mit de titel Gewoon Stellingwarfs De tael van mien moeke. In augustus 2005 verscheen Beestebende, zien twiede boek, mit veul speulse riempies. Et eerste boek is onderdehaand al weer een posien uutverkocht.


Twie ni'je boeken van Jan Veldhuizen (1941-2005)

In juli verschienen d'r bi'j de Stellingwarver Schrieversronte in Berkoop twie ni'je bundels van de in 2005 overleden Stellingwarver schriever Jan Veldhuizen. Jan Veldhuizen woonde in Apeldoorn, mar gruuide op in De Miente bi'j Noordwoolde. Jan was aenlik nog niet zo lange in de weer mit de Stellingwarver schrieveri'je, mar wel volop. Hi'j beleefde daor veul plezier an en schreef mit riegelmaot veur o.e. et Stellingwarver tiedschrift De Ovend.
In 2003 wun hi'j mit 'De oolde zegeuner', een cyclus van gedichten, 'De Oolde Pook-pries'. Dat was doe nog de anvieteringspries veur et schrieven in et Stellingwarfs, insteld deur de beide gemienten. Niet zo lange daornao verscheen zien eerste gedichtebundel Gewoon Stellingwarfs De tael van mien moeke. In dat boek weren mit naeme sfeervolle, mar ok hiele eernstige gedichten te vienen. Aende augustus 2005 verscheen Beestebende, et twiede boekien van Jan Veldhuizen, mit veul speulse riempies over 'meenselike' dieren. Op 15 november 2005 raekte Jan, ok al leut zien gezondhied him al langere tied in de steek, hiel onverwaachs uut de tied. Op dat mement laggen d'r bi'j de Schrieversronte nog twie manuskripten van Jan Veldhuizen, waorvan al toezegd was dat ok die in boekvorm verschienen zollen.
In juli 2010 is et dan zoveer. Et gaot in et eerste plak om De wiend blaost ok wel es aandersomme, mit weer hiele sfeervolle en vaeks ok ontroerende gedichten. In et boek, dat hielemaole in kleur verschient, bin een tal foto's van Sietske Bloemhoff opneumen. Veur de opmaek zorgde Schrieversrontemitwarkster Trijnie Telkamp. In et ere boek Laot mi'j now ok es wat zeggen bin kotte, humoristische verhaelen te lezen. Omslag en opmaek wodden ok bi'j dit boek verzorgd deur Sietske Bloemhoff en Trijnie Telkamp. Beide boeken tellen 48 bladzieden en kosten 11,50 euro et stok. Wie beide boeken in ienkeer anschaft betaelt liekewel mar 20,00 euro.


Tentoonstelling Dirk Kerst Koopmans - de schilder van de Scheene

Op donderdag 1 juli wodt de tentoonstelling Dirk Kerst Koopmans - de schilder van de Scheene eupend. In de tentoonstelling is mit naeme een overzicht van Koopmans zien vroegere inkttekenings en een ni'je dokumentaire over zien betekenis as keunstener te zien. De tentoonstelling is een onderdiel van et internationaole keunstprojekt 'Out of Space' dat tot 1 november in de Rottige Miente holen wodt.
De eupeningstieden van Dirk Kerst Koopmans - de schilder van de Scheene bin op elke zaoterdagmiddag van 13.30 tot 17.00 ure, en tiedens de Scheenekeunstroute (zie www.kunstaandescheene.nl) en de Eupen Monementedaegen.
De tentoonstelling duurt t/m 12 september en is in de karke van Scharpenzeel, Grindweg 139.
Een anraoder veur wie et nog niet het: Bi'j de Stellingwarver Schrieversronte en de Stellingwarver boekhaandels is nog altied et prachtige boek Dirk Kerst Koopmans - schilder van de Scheene te koop. Et boek op A-4 fermaot kost 17.95 euro.


Woudboerderijtjes, een boek mit interessaante kultuurhistorische infermaosie, ok over oonze streek

Et nog niet zo lange leden verschenen boek 'Woudboerderijtjes' het in oonze omgeving nog niet in et ni'js west en daoromme wiezen we lezers van disse webstee graeg even op et bestaon d'r van. Et gaot over boerderi'jen en boerderi'jgies en heur bewoners in de Friese Woolden, dus ok in Stellingwarf. De infermaosie over Stellingwarf gebeurde ok mit inbreng van de Stellingwarvere Schrieversronte. Et boek wodde schreven deur Bauke Boersma en d'r staon prachtige foto's in van F. H. de Vlas. Uutgever: Friese pers/Noordhoek; tal bladzieden: 160. Pries: 18,50 euro


Tomke weer uut aende in hiel Stellingwarf!

Maendagmorgen 31 meie het wethoolder Jelmer van der Zee van de gemiente West-Stellingwarf de Tomke-veurleesweke uut aende gaon laoten. Van der Zee, die o.e. onderwies in zien pottefulie het, het mit vule nocht de ukken van ukkespeulplak 't Dreumesje van Steggerde veurlezen. Wel dee blieken dat de wethoolder van huus uut meer mit et Fries as mit de Nedersaksische taelen te maeken had het. Veurdat hi'j naor West-Stellingwarf kwam woonde Van der Zee in Twente, mar die tied het van him gien Tukker maekt. Et veurlezen in et Stellingwarfs gong him liekewel slim goed of. Op een ongedwongen meniere wus hi'j de andacht van de ukken prima vaaste te holen. De beide leidsters Richtje en Hendrika geneuten daor ok zichber van.
Et Tomke-veurleesprejekt is in Stellingwarf dit jaor al weer veur de dadde keer van stal gaon. In hiel veul ukkespeulplakken wodt d'r deur zoe'n 25 vri'jwilligers van de Stellingwarver Schrieversronte veurlezen uut Tomke. Dit jaor het et boekien as titel 'Tomke en Romke in et verkeer'. Ok dit alderni'jste boekien wodde weer deur de Schrieversronte ommenocht onder alle ukkespeulplakken verdield.
Et Tomke-veurleesprojekt is van oorsprong Fries. Volgend jaor wodt et boekien veur de vuuftiende keer uutgeven. Vuuf jaor leden verscheen Tomke veur et eerst in et Stellingwarfs, dat wodde die eerste keer financieel meugelik maekt deur et foons Kring van Bercoop. Daornao zorgde de Schrieversronte zels veur de financiering.
Et projekt bliekt een schot in de roze. Jaorliks besluten de hieltied meer ukkespeulplakken om mit te doen, et enthousiasme bi'j de leidsters is over et algemien arg groot.
Tomke wodde weer vanuut et Fries naor et Stellingwarfs vertaeld deur Sjoukje Oosterloo. Et Tomke-veurleesperjekt wodt orgeniseerd deur Schrieversronte-vri'jwilligers Annie Dedden van Blesdieke veur West-Stellingwarf en Akkie Zeilstra van Raevenswoold veur Oost-Stellingwarf.


Ni'je kursus Stellingwarfs en ni'je 'opfriskursus'

KURSUS STELLINGWARFS VEUR BEGINNERS
Dit naojaor begint d'r in et gebouw van de Schrieversronte weer een kursus Stellingwarfs veur beginners. Die bestaot uut tien lesaovens van elk twie uren, en een ofslutend examen. D'r is in et veurjaor van 2011 ok nog een prachtige exkursie argens in een Stellingwarfs netuurgebied. De daotums veur de kursus Stellingwarfs veur beginners bin: maendagaovend 8, 15, 22 en 29 november, 6 en 13 december, 3, 10, 17 en 24 jannewaori 2011.
In disse beginnerskursus is d'r veul ommedaenken veur et schrieven in et Stellingwarfs. D'r wodt gebruuk maekt van de Nederlaanstaelige boekwarki Hoe schrijf je 't Stellingwerfs van dr. Henk Bloemhoff. D'r is daornaost ok veul ommedaenken veur et wark van Stellingwarver schrievers, zoas de bekende Johan Veenstra, mar ok van dat van ooldere schrievers, zoas H.J. Bergveld, iene van de eerste schrievers in et Stellingwarfs. Veerder kom ie ok in de kunde mit de geschiedenis van Stellingwarf en is d'r andacht veur de biezundere ligging van de streek.
De kursusleiding bestaot uut Roely Bakker, Grietje Bosma, Henk Bloemhoff, Pieter Jonker en Geert Lantinga. De kosten bin 65,00 euro, koffie of thee mit wat d'r bi'j inbegrepen.
Meensken die interesse hebben veur de kursus kun et beste even bellen mit et kantoor van de Schrieversronte: 0516-451108, of mailen naor: info@stellingwarfs.nl.

OPFRISKURSUS
Van oold-kursisten van de kursus Stellingwarfs veur beginners kwam ok et oflopen seizoen weer et verzuuk veur een vervolg op die kursus. Et plan is now om van 't haast veur die meensken een soort van 'opfriskursus' te holen, die bestaon zal uut drie lesaovens van de hieltied twie uren. De kursusaovens bin op donderdag 14 en 21 oktober, en op donderdag 11 november. De opfriskursus wodt geven deur dr. Henk Bloemhoff. Je opgeven kan tillefonisch naor et kantoor van de Schrieversronte: 0516-451108 of deur te mailen naor et mailadres info@stellingwarfs.nl.


Johan Veenstra: meer as 50.000 boeken!

Op 22 april is d'r een twiede drok verschenen van Johan Veenstra zien laeste roman Et geheim van de wiend. Op 6 meert kreeg Veenstra in Emmen de Streektaelpries 2009 van et Dagblad van het Noorden veur dat boek. Nao et winnen van de pries bin d'r van alle kaanten nogal wat extra boeken bi'j de Stellingwarver Schrieversronte besteld, dat zodoende het de uutgever besleuten dat de roman rap herdrokt wodden mos. De twiede drok is duzend exemplaoren groot. In elke goeie boekhaandel is et boek now weer te bezetten.
Mit disse herdrok het de Stellingwarver schriever uut Ni'jhooltpae een magische greens beriekt. De totaole oplaoge van zien boeken is now krek over de 50.000 exemplaoren hennekommen. Veur een klein taelgebied as et Stellingwarfs is dat een unieke prestaosie.
Veenstra is nog lange niet van doel en hool mit de schrieveri'je op. Hi'j warkt op et ogenblik an een ni'je bundel mit humoristische verhaelen en wil van 't jaor eins ok uut aende zetten mit et schrieven van een ni'je roman.


Lidmaotschop en abonnement van et Stellingwarver kulturele tiedschrift De Ovend

Et lidmaotschop tegere mit et abonnement op et Stellingwarver tiedschrift De Ovend kosten 15.00 euro in et jaor m.i.v. 2009. Losse nommers gellen 3.00 euro. Jow lidmaotschop en toegelieke et abonnement kuj' je veur opgeven op info@stellingwarfs.nl.
Ok de kommende oflevering keer bin d'r weer hiel interessaante bi'jdregen te lezen.





Dit is op de greens van Ni'jberkoop, Makkinge en Tronde. Lag hier begin 14e ieuw nog de greens mit Drenthe? Meer over de middelieuwse geschiedenis in 'Soe sullen die Stellinge...', de op 24 augustus 1309 verschenen bundel mit lezings van et Symposium 'Stellingwarf' 700.


Femilieberichten in et Stellingwarfs

Riegelmaotig wodt oons vraogd om hulpe bi'j et schrieven van een tekst in et Stellingwarfs, bi'j et maeken van een opschrift, bi'j et bedaenken van een naeme in et Stellingwarfs of bi'j et opstellen van een femiliebericht in et Stellingwarfs. Et is hiel goed dat zoks gebeurt. De Stellingwarver Schrieversronte bestaot as instelling ok om meensken bi'j zok soorte van dingen te helpen. En wi'j helpen jim graeg, dat blief d'r mar niet lange over piekeren. Bel of mail oons dus gerust, oons tillefoonnommer is 0516-451108. Om te mailen kuj' hier an de linkerkaante 'kontakt maeken' anklikken.


Krek weeromme van een kuiertien, een fietstocht of nog wat aanders? Of: graeg even een betien rust onder al dat internetten? Hoe et ok zit, lees nog even veerder, je...


As 't iene dag regent...

'Wat een weer,' zegt Lange Garriet,
En hi'j stapt de winkel in.
'Bah!'zegt Koene, die him naokomt,
'Bah! Wat is dat weer toch min!'
'Harre! Harre!'zucht een vrouwgien,
En ze kikt heur nylons nao…
'Tjong!'zegt Matten, wat bin 'k bliede,
Da'k hier even dreuge stao!
'Oe, die regen! Wat een wereld!'
Klaegt Merinus Gruunteboer,
''t Plakt me wis al deur de jasse!'
Zanikt Sietse Kiepevoer.
'Wat een bujje! Wat een bujje!'
Zegt de oolde kastelein.
(En de druppen uut zien pette
Lekken op een sukertrein…)
'Fi'j toch! Fi'j toch!' klaegt een juffer
Mit een paorse parreplu.
(En ze bibbert en ze babbert,
En ze zegt wel tien keer: 'Hu!')
''t Zievert me al in de schoenen!'
Zucht de dochter van Klaos Vis.
(Wat in dit laand, op sandaolen,
Trouwens niet zoe'n wonder is!...)

En de winkelman, die inpakt,
Geft et oolde antwoord weer:
''t Is wat! 't Is wat! 't Is wat!' zegt hi'j,
Zeuvenhonderdvuuftien keer!

(uut: Een haandvol speulgoed. Oosterwolde, 1979, 2e drok: uutgifte van de Stichting Stellingwarver Schrieversronte)




As ienigste plak in Stellingwarf het Else, al jaoren, een twietaelig plaknaemebod. 'Else' is de oolde, Stellingwarver naeme van dit mooie dörp. Aj' graeg weten willen hoe jow eigen dörp in et Stellingwarfs hiet, kiek dan even op de kaorte van Stellingwarf die te vienen is onder de anklikmeugelikhied 'kaorten', in de blauwe riegel, links bovenan op disse bladziede


Toon pit, doe mit: fleurige vlaggies veur an de fiets, an de tente, op 'e boot en al zo wat henne!

Wol ie, krek as oons, ok wat extra Stellingwarver fleur, gemoedelikhied en aandere aorige eigenschoppen uutstraolen? Dat moej' netuurlik veural doen! En maek et allegeer extra levendig mit een kleine, fleurige vlagge van Oost- of West-Stellingwarf, of, mooier nog, mit die beide tegere. Ze kosten elk mar 4,50 euro! Een grotere vlagge kan netuurlik ok, kiek hieronder. Toon pit, doe mit!


Fleurige vlaggen van Oost en West...!

Laot ie ok graeg now en dan zien hoe fleurig de Stellingwarven binnen? Dat kan ok mit de Stellingwarver vlagge. Of beter: mit die van Oost-Stellingwarf en/of die van West-Stellingwarf. Ze bin ok te koop bi'j de Stellingwarver Schrieversronte. Die van West-Stellingwarf kost 32,50 euro, die van Oost-Stellingwarf 34,50 euro. Verschil moet d'r blieven!


Over oonze uutgiften van de laeste tied vien ie van alles onder de anklikmeugelikhied 'ni'je uutgiften', in et blauwe riegeltien links van disse bladziede. Op iene nao onderan in dat riegeltien vien ie de anklikmeugelikhied 'webstee-archief', mit oolder ni'js van disse webstee


(ni'jste anpassing op 3 september 2010)